LÚKAS 1
1
Ujuundi
1Teofilu, niints nawiak! Bañaan bacumal, ro ko wi ba yëlan wi përo, ba pican ko undola wi tsi pëncuaf wund. 2Bë pican ngëko ngi wund leentsa ngi. Te ba leents wund biki ngul, kul, ki ujuundi, win ngul ni këkës kul, a bee ci baleents përim Nasien-batsi. 3A nji, ma yepar ngul bëlieng uwar, ki ucaki-ko; a u wara ndoon, ka pican ngul bi nga par bi ja, pa wi. 4Mando ank, pa kë ba pëme ne, ko wi m leentsa wi, abaaraan pëci ucär.
Uwaanju acar aleents ubukara Joŋ-namijan
5 #
1Bën 24.10
Pëcël pi Eroodis sien pi pëboos Judeeya, a u ka nalon najakan, ni ka n jakee Sakaria. Aci nalon tsi ngërúp bajakan ban bofëna biki tsi Abia. Áarul ka jaka Elisabet, abof ts tsi kajër Aaron. 6Sakaria ni Elisabet, bë ci bamabal tsi bërun Nasien-batsi; bë meandaatsa uwutsëtsuel tsi ngëtsua Ajug bëlieng, ni tsi irim i na ja yi bëlieng. 7Maa bë kaats napäts, par Elisabet ajaka cits ŋaats, te bë tsaf bëlieng. 8Bëlon bëyaas, bi ngërúp Sakaria ci bi tsi përo uleemp, Sakaria ci tsi uleemp bëjakan tsi bërun Nasien-batsi. 9Bi u ja bi u roon u rolaa tsi bëro bajakan, iko júgatsa a na rata, pa pëniaj tsëko-tsëyëman Ajug në taban ucuraay. 10Bi ucuraay kë yëk bi, a kandënd bañaan-ucaak bëlieng ci tsi bëñaan di utsand. 11Ulon uwaanju Ajug pibandari tsi bërun Sakaria; anats tsi kariir tsëtabanaani ucuraay. 12Sakaria kë win, ubëlul pën, na lënk mak. 13Maa uwaanju jaul: “Sakaria, cats lënk! Par, bëñaanu aniirana. Áaru Elisabet ka kaaru napäts niints, kë tsuul katim, Joŋ. 14Kë lílan undoul, kë piban m lílan. Bañaan bacumal ka lílan, undo ukaraul. 15#Ngëp 6.3Par ka ci ñaan nawiak tsi bërun Ajug. Di ka raan ubiiñu, nin pëwat pëyëk. Ka wama ci di pëpës aninul, Uwejats ujënts ka cumul. 16Ka tsu bañaan Israel bacumal, ka kaki tsi Ajug, Nasien-batsi kul. 17#Mal 3.23,24Nasien-batsi ka runanul, në wëlandul uwejats ni uyëlan Eliyas, nayëlia. Ka wëlul wul, pa në yëlanaan pëtsu bayënts-bamkari, ka kakan ngëwaas kul tsi upäts kul, ni pëtsu barika-ro ko wi ba jaka wi, ka ka kameko bamabal, pa pëyecis bañaan-ucaak ka ci ban yecis biki pa Ajug.” 18Sakaria ja uwaanju: “Mán meena we umënts wan kë ci? Par man tsaf mak, aar nji ruka tsaf buts.” 19#Dan 8.16; 9.21Uwaanju jaul: “Nji n ci-un Gabriel, nji n ja un n doon koo nats tsi bërun Nasien-batsi. Man yëlee këyëlee pa pëñakanaanu, ni pëleentsu Upetsan-uwar umënts wi. 20Bi u ci bank, kë ci narika-ñakan; m di kë yëlan uñakan te unu wi ngëko ngëmënts kë baandi wi. Par, m fiaarats përim nji. Uband pul pëci, pë ci.” 21Bi Sakaria kë ñakanaana bi, bañaan kë lipul di utsand. A ngëwejats pe kul ibats, uleka bi na wami bi di tsëko-tsëyëman. 22Bi na pëni bi utsand, yëlaants pëñakanaan kul. Din ba me na win bëwinal di tsëko-tsëyëman. A nuu way këway kul iñan; aruka ci narika-ñakan. 23A ngënu uleempul kë ba, na witsa katoul. 24Ngënu ngëmënts par, aarul Elisabet mob pëpës, na bekar, ko u yëlan wi këlí kañan. Par nul Elisabet aci tsi pëja: 25“Ko wi ci wun wi Ajug roorin wi, tsi ngënu ngi na fierandin ngi, a na pënanin mkaw tsi këkës bañaan.”
Uwaanju acar aleents ubukara Yeesu
26Tsi pëli pëpaajantsan, Nasien-batsi yël uwaanju Gabriel di përaasa pan ciina Galileeya, puu jaka Nasaret, 27#Mat 1.18pa u tsëp di ŋaats na meetsi niints, nan kai natsasaul ni ka n jakee Juse; Juse apënë-ni pëka Dawid. Katim ŋaats ka jaka Maaria. 28Uwaanju niaj di Maaria, u jaul: “Man leenu, wi kantsuunkara! Ajug aci ni wi.” 29A Maaria pikra mak tsi përim pan. Nu tsas tsi ibatsul, pëme ko un ci wi kawël-mboos kan. 30A uwaanju jaul: “Cats lënk, Maaria. Par Nasien-batsi atsuunkaru. 31#Mat 1.21Teenan-e! Kë mob pëpës, kë k napäts niints, kë tsuul katim, Yeesu. 32#2Sam 7.12,13,16; Isa 9.6Ka ci ñaan nawiak, nuu jaka, Abuk Kanpe pëci di ruets. Ajug, un ci wi Nasien-batsi, ka wëlul pësien asinul Dawid, 33në sien kato Jakob pa sandëndën, te pësienul di ka ba.” 34A Maaria ja uwaanju: “Um bi ko wan kë ci n? Par, nji n meets niints.” 35Uwaanju jaul:
“Uwejats-ujënts ka welee tsi wi; pëyëlan Kanpe pëci di ruets ka límtsanu. Wul ka wun, #1.35 Ilon icolësiaar atsu “napäts” ni kan kee ka ci Nayëman, koo jaka Abuk Nasien-batsi, niints.nayëman ni kan kee koo jaka, Abuk Nasien-batsi.
36Teenan-e Elisabet, ni nda kee! Atsaf, maa nul seempa ink ts napäts niints; nul nandoi jaka di ka k, nul ci ink tsi pëlíul pëpaajantsan. 37#Uju 18.14Par, kaats ko wi Nasien-batsi yëlaants wi.” 38A Maaria ja: “Man ci naluek Ajug. U roaan bi m jain bank.” Uwaanju pën aruk Maaria.
Maaria aya pëwula Elisabet
39Maaria natsa uwal umënts wun, na míint pëtsëp pëlon përaasa, pan ciina pi Judeeya, di kajara ngëntunda. 40A na niaj kato Sakaria, na leena Elisabet; 41Elisabet kë te Maaria wël mboos, napäts raŋar di pëpësul; Elisabet cum ni Uwejats-ujënts. 42Na kat përim mak, a na ja: “M beenira tsi bakaats, napäts ni këbuk ki beenira! 43Aro um a umënts wi wëlain, bi anin Ajug nji bi bink pëain? 44Par, teenan-e! Bi n te bi m wël mboos, napäts raŋar di pëpës nji, apiban na lílan. 45Anaak, nan fiaari ngëko ngi Ajug jaul ngi kë rola.”
Kaya Maaria ki ubëndan
46Maaria ja: “Uwejats nji aci tsi përëmban Ajug,
47uwaas nji kë lílan tsi Nasien-batsi, naëran nji.
48 #
1Sam 1.11
Par alesin, nji nan ci naluekul, na welani been nji.
Bañaan bëlieng ka ruka ka jain, nanaakal;
49par Kayëlan-bëlieng aroorin ngëko ngëwiak;
katimul aci kayëman.
50Kayëk-ipësul, aci pa ba lënkul biki,
tsi bak kul, tsi batiemi kul, pëtsëp.
51Apiban uyëlan kañanul;
aruak bañaan ban tsij biki ngëwejats kape iyeen kul,
ba garandar.
52 #
Job 5.11; 12.19 Apënan basien tsi itsoari kul yi pësien, na kat ba welan biki iyeen kul.
53Awël babonats ngëko ngëwar akësan,
maa na ruak barëmb, iñan bajëntsu.
54Na tsënk Israel, naleempul,
alesëna kayëk-ipësul
55 #
Uju 17.7
#
1Sam 2.1-10
tsi uleka Abraam ni kajërul, pa sandëndën,
bi na ro bi ja basin inja.”
56Maaria tsoar ni Elisabet, ko u wokan wi këlí këwaants, na ru witsa katoul.
Ubukara Joŋ-namijan
57Uband uwal wi Elisabet kë k wi, na k napäts niints. 58Bacënul, ni bayëtsul te u jaka Ajug ayëkarul ipës mak, ba lílan ni nul. 59#Ija 12.3Unu uwasantsan wi napäts ka wi, ba bi pëwelanul kambac. Ba ŋal pëtsuul katim asinul, un ci wi Sakaria. 60Maa, aninul ja: “Naaw! Joŋ di nu rua run.” 61Ba jaul: “Kaats ñaan tsi kayëtsu nan tsuee katim kan.” 62Ba wiil asin napäts iñan, pa pëyeparul katim ki na ŋal ki napäts pëtsua. 63Sakaria yep katagëba, na pican përim pi: “Katimul Joŋ.” Ba pikra bëlieng. 64Uyëk umënts wun, mtum Sakaria waabësa, pëndiamëntul kabësa, na ñakan, na rëmba Nasien-batsi. 65Bañaan pëcën bëlieng lënk. Ngëko ngan par ngank bëlieng kë ñakanaana tsi kajara ngëntunda Judeeya kun bëlieng. 66Bañaan bëlieng, ban te biki ngul, gaang ngul tsi ngëwaas kul, kë ja: “We wi napätsi kii ci wun-i?” Par, uyëlan ajug awina ci ni nul.
Kaya Sakaria ki ubëndan
67Sakaria, asin napäts, cum ni Uwejats ujënts, na car aleents përim, aja:
68“Ajug, na jaaraan ngëwar, nul Nasien-batsi Israel,
par abi pëwula bañaanul, na facan bukul.
69Anatsani pëntin pëbuërëni pa n ja,
tsi pëka Dawid naleempul;
70aci ko wi na ro wi ja,
ajaana wël tsi mtum bayëliaul bayëman, ki uwal ujon;
71aci pëbuër pi kan pënan nja pi tsi ban bër nja biki,
ni tsi iñan ba ñaas nja biki,
72pa pëpiban kayëk-ipës ki na yëkar ki basin nja
ni pëles karo-pëlooleul kayëman.
73Aci ubaaja wi na baaja wi asin nja Abraam. Unk,
74bi ngë ba bi pëbuërana tsi iñan ban bër nja biki,
na wël nja pëyëlan puu bëndanul, te ngë ri ka ciind ni bëlal;
75nja kë ci tsi ko u yëman wi, ni tsi ko u mab wi, tsi bërunul,
tsi ngënu bëlieng ngi ubiira inja.
76 #
Mal 3.1
A wi, napäts nji, kuu jaka, nayëlia
Kanpe pëci di ruets.
Par, kuu yandaar tsi bërun Ajug,
pa pëyecisul bëga,
77pa pëtsu bañaanul pëme pëbuër,
tsi pëjampësaa ngëjuban kul,
78undo bi Nasien-batsi nja cum bi ni kayëk-ipës; ka wun
unu kë natsee di ruets, u wúleenja
79 #
Isa 9.1
pa pëfiets ban ci biki tsi karëm,
a pëcäts límtsan kul,
pa pëkaŋan iyots nja tsi bëga bi kan tsij nja bi tsi pëfac.”
80Napäts kë wiaka, uwejatsul kë pe këpe pëka uyëlan. Na ciina ngëlaalats, te unu pë pibandarul tsi Israel.
Currently Selected:
LÚKAS 1: KPKNT
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Manjaku © Alliance Biblique du Sénégal, 2020.
