JOŊ 11

Pëcäts Lasaru

1 # Lúk 10.38,39 Aka nalon na maaki, ka jaka Lasaru; aciina Betaania, untab Maaria ni ni ba tsaari Maarta. 2#Joŋ 12.3Maaria namëntsi, ci-un nan doi tular Ajug ulicar; ni uweelul a na faaul itsiim; ni ba tsaari, Lasaru ci-un na maaki. 3A bukul bakaats ban tsaar biki ni nul, yël ñaan pa pii ja Yeesu: “Ajug, teenan-e: Bëfetsaru amaak.” 4Bi Yeesu te bi ko wan, na ja: “Pëmaak pan cits pi pëcäts, maa aci pa përëmb Nasien-batsi, pa Abuk Nasien-batsi përëmbanaa tsi pul.” 5Yeesu ŋal Maarta, ni na tsaar ni nul ŋaats, ni Lasaru. 6Maa, bi na me bi Lasaru maak, a na ci rul, ngënu ngëtëb kak. 7A uu ba, na ja bafetsul: “Nda ju ngë tsëp Judeeya kak.” 8A bafetsul jaul: “Rabi! Jonats ki Bajudeu ru tsas pëtapënu ilaak pëfiŋ; a kë tsëp rul kak-a?” 9Yeesu yank bukul aja: “Cits iink ngëwoora untaaja ni ngëtëb ngi pënak wama ngun aci-a? Uci ñaan kë yandaar pënak, di ka jontas; par ka win ufac umundu wi. 10Maa, uci ñaan kë yandaar tsi bërëm, ka jontas; par ufac cits tsi nul.” 11Bi Yeesu ba bi pëja irim yan, a na kaka ja bukul: “Bëfetsar nja Lasaru, aŋooy; mán tsëp pëwambiul.” 12Din, bafetsul jaul: “Ajug, uci na ŋooy, ka yës.” 13Yeesu ro ka ñakanaan uleka pëcäts Lasaru, maa bafetsul ja ne aci uleka pënaakësa tsi bëŋooy. 14A Yeesu ru leents bukul ajëntsan: “Lasaru a cäts. 15Undo ind, man lílan bi ndoots bi n ci rul, unk ndë wak. Maa, nda ju ngë tsëp di nul.” 16Din a Tomaas, nul ni ka jakee Diidimus, ja bacintsul bafets: “Nda ju ngë tsëp buts, n ja kee cats ni nul.”

Yeesu añakanaan uleka kanatsee-di-pëcäts

17Uband Yeesu, na tsënk Lasaru ro ba ngënu ngëbaakër di bametsu pëbuk. 18Betaania awok Jerusalem, ko unduakan wi ngënkilometar ngëwaants; 19a bacumal tsi Bajudeu bi tsi Maarta ni Maaria pii juabëtsan bukul ngëwaas, undo pëcäts ni ba tsaari. 20Bi Maarta te bi Yeesu kë bi, a na tsëp pii jëk ni nul; maa Maaria ruka, atsoar di kato. 21A Maarta ja Yeesu: “Ajug, uci m do ci tsi, natsaar ni nji, bitse ka cäts. 22Maa nji man me, ŋal tsi inkri, ko wi m yep wi ba këyep Nasien-batsi, Nasien-batsi ka wëlu wul.” 23A Yeesu jaul: “Kantsaar ni wi ka natsee di pëcäts.” 24Maarta jaul: “Ma me nii natsee di pëcäts tsi unu utuami.” 25A Yeesu jaul: “Nji n ci-un kanatsee-di-pëcäts, a nji n ci-un ubiira. Ñaan na waki tsi nji, ŋal ank na cäts, në ka aatsum ubiira. 26A ñaan nan tsiji ubiira a na wak tsi nji, yaas a në cats, pa sandëndën. M wak tsi ko wan-a?” 27A Maarta ja Yeesu: “Eey-e Ajug, ma wak, wi ci-un Këristu, Abuk Nasien-batsi, ni kan bii tsi umundu.”

28Bi Maarta ja bi ko wan, na pën; na ru Maaria ni ba tsaari, a na kuetanul ajaul: “Najukan aci tsi, ka ruu.” 29Bi Maaria te bi ko wan, a na natsa ucar umënts wun pëtsëp di Yeesu. 30Par, Yeesu netse ro niaji untab, awama ci di tsëko tsi Maarta jëkëna tsunk ni nul. 31Bajudeu bando biki ci ni Maaria di kato a bu kë juabutsënul uwaas, bi ba win bi na natsa ucar umënts wun pëtsëp, a ba fetsul, par bë jakar ne, ka ya këya irug di pëbuk. 32Bi Maaria band bi tsi tsëko tsi Yeesu ci tsi, a nu win Yeesu, a na yër tsi itsiimul na jaul: “Ajug, uci m do ci tsi, kantsaar ni nji, bitse ka cäts.” 33Bi Yeesu win bi Maaria kë kaan, a Bajudeu ban ñuatsaniul biki kë kaan buts, a uwaasul re mak, a na juatsan. 34A na ja bukul: “tsum tsi nda mooyul tsun?” A ba jaul: “Ajug, pëni kii win.” 35A Yeesu rug. 36Din Bajudeu ja: “Nda teenan-e bi na ro bi ŋalul!” 37A balon tsi bukul ja: “Namëntsi, nul na waantsi këkës nakuel, roots yëlan pëtsu buts Lasaru na rits cats-a?”

Yeesu anatsani Lasaru di pëcäts

38A uwaas Yeesu kaka re mak, a na tsëp di pëbuk. Aci baar ban jëpa bi bëlaak, a pëlaak pëwiak sëtsa tsi tsëniaji. 39Din, a Yeesu ja: “Nda pënani pëlaak!” A Maarta, nan tsaari ni kancäts, ja Yeesu: “Ajug, aruka ñal; par wul ci wink unu ubaakëndan.” 40Yeesu jaul: “Njnjaatsu iink, uci m wak, kë win përëmb Nasien-batsi-a?” 41Din, a pëlaak pënanaa; a Yeesu katar këkës ruets, a na ja: “Paapa, man baranu, par m cikëndënin. 42Ma me m ja m doon kuu cikëndënin. Maa, undo kandënd bañaan ba nats bikink afayin, wul ka wun nja ank, pa bukul pëfiaar u ci wi yëliin un.” 43Bi Yeesu ba bi pëja ngëmënts ngan, a na lië mak, aja: “Lasaru, pëni utsand!” 44A nul nando unk cats pëni utsand; itsiim ni iñan atana ni ifaal, a urostuul faya ni kaleenj. Din, Yeesu ja bukul: “Nda pacanul, ndë wëtanul na tsëp!” 45A bacumal tsi Bajudeu bando bukunk bi tsi Maaria, win ko wi Yeesu ro wi, a ba uwak tsi nul.

Bafariseu ajúk abaar pëloole, pa Yeesu pëfiŋaa

(Mat 26.1-5; Mar 14.1-2; Lúk 22.1-2)

46Maa balon tsi bukul tsëp di Bafariseu ee leents bukul ko wi Yeesu ro wi. 47A bawiak-bajakan, ni Bafariseu, ru kato kawat-pëleents kawiak ba júk, a ba ja: “Wee ngë ci-un tsi përo? Ñaani aci tsi përo ngëpibanaani ngëcumal. 48Uci ngë wëtul unk, bañaan bëlieng ka wak tsi nul. Rooma ka bi kee cok tsëko nja tsëyëman, ni ucaak nja.” 49Maa Kayafas, nan ci nalon tsi bukul, te ci-un nan pei pëci nawiak-bajakan uwaanu umënts wun, ja bukul: “Ind, nda meets ko un ci wi; 50nda winats u pe pëwara ind ñaan naloole pëcäts pa bañaan, ni pëjaa ucaak bëlieng aniaman.” 51Përim pan, pënënatsi tsi nul bërierul; maa, aci-undo bi na ci bi nan pei pëci nawiak-bajakan uwaanu umënts wun, wul ka wun na car aleents Yeesu ka pëcäts pa ucaak Bajudeu. 52A te cits pëcäts pa ucaak rin, maa aci buts pa pëbofëlan upäts Nasien-batsi ban garandar biki, pa ba ci baloole. 53Pëkur tsi unu umënts wun, ba baaraan pëtsu Yeesu na fiŋa. 54Wul ka wun Yeesu katse yandaar na wina tsi pëncuaf Bajudeu. Maa, na pën tsul atsëp ulaalats di pëboos pa woki pi tsul, di përaasa Efraim; a nee ci rul ni bafetsul.

55Ufesta-pëbuer wi Bajudeu awokani, a bañaan pëboos bacumal kata pëtsëp Jerusalem pa bee ba jëntsandar, tsini Ufesta-pëbuer ruka ka baandi. 56A ba ci tsi pëtsas Yeesu; a di kato-kayëman, a bu kë yepëlar koo ja: “Wee nda wejats wun tsi ko wan? Di ka bi koon këbi ufesta-a?” 57A bawiak-bajakan, ni Bafariseu, wëtan irim pa, na mei ba këme tsi Yeesu ci tsi, në leents, pa në mobaa.

Currently Selected:

JOŊ 11: KPKNT

Highlight

Copy