NGËRO 9

Sol aniiran Yeesu

(Ngë 22.6-16; 26.12-18)

1A Sol wama ka pícar pëfiŋ bafets Ajug, a na tsëp di nan pei pëci nawiak-bajakan, 2a na yepul ngëletar pa pëtsëpand Damaasku di ito-ijuki; pa uci nee win balon ban bof biki tsi Bëga, bayënts oo bakaats, në tan bukul ka tsëpand Jerusalem. 3A na repa bëga pëtsëp; uwokanul pëband Damaasku, din ufac di batsi fietsul afayësan. 4Na yër tsi utsia, na te pëlon përim jaul: “Sol, Sol, we ka wun a kë noor-nooranin?”

5A Sol yeparul aja: “M ci yën, Ajug-a?” A përim ja: “Nji n ci-un Yeesu ni kë noor-noorani; [pëkaman ko un jul wi, aciu ko u ñats wi.” A na lënk mak, katse me ko wi nu ro wi, a na ja: “Ajug! Wee m ŋal wun nji përo?” A Ajug jaul:] 6“Natsan kë niaj përaasa, dul di kii leentsa run ko wi m ka wi përo.”

7A bayënts ban ci biki ni nul tsi bëyaas nats, bë bëyëlants uñakan, a ba te përim, maa bë winats ñaan. 8Sol natsa tsi utsia, na teenan këkësul, maa winats ko. A ba mobël tsi kañan atsëpand Damaasku. 9A na ro ngënu ngëwaants, winats, rialaats, nin raanats.

10A u ro ka nalon nafets Yeesu nan ci di Damaasku ni ka n jaka Ananias; a Ajug ñakanaanul tsi bëwinal aja: “Ananias!” A najankma a jaul: “Nji ni, Ajug.” 11Din, Ajug jaul: “Natsaan kë tsëp di urawa wi ka n jaka wi Urawa-ucol, kë tsas nalon niints, aci di bëñaan di kato Judas, ka jaka Sol, apënë-ni Tarsu; 12awin nalon niints ni ka n jakee Ananias tsi bëwinal, a na paful iñan pa na kak na win.” 13Maa, Ananias jankma aja: “Ajug! Man te bacumal kë ñakan ngëko ngëcumal nga waraatsa ngi, tsi uleka niintsi, ngi na ro ngi bayëmanu di Jerusalem. 14A tsiji tsi pëyëlan pi na yanki pi di bawiak-bajakan, pa pëmob bañaan bëlieng, biki kan du biki katimu.”

15Maa, Ajug jaul: “Tsëpan, par namëntsi, aci kaŋí ki n dat ki pa pëtsëpand katim nji tsi bërun ban cits biki Bajudeu, ni basien, ni babuk Israel. 16Mán pibanul bi na ka bi pënoor, undo katim nji.”

17A Ananias tsëp ee niaj di kato, a na paful iñan na ja: “Natsaar ni nji Sol! Ajug yëliin un, nul Yeesu nan cili unk tsi wi, bi kë bi bi di bëga; pa wi pëkak puu win, kë cum Uwejats-ujënts.” 18Tsi uyëk umënts wun, a iko pëniul di këkës pi ipepatëras, na kak ka win, a na natsa, na mijana. 19Bi na ba bi bariala, na kak aliinc. A na ruka di Damaasku aro ngënu ni bafets Yeesu.

Nanoor-nooran, anoor-noorana

20A tsi uyëk umënts wun, Sol kur pëleents di ito-ijuki koo ja, Yeesu ci-un Abuk Nasien-batsi. 21Ban teul biki bëlieng pikra a bu kë ja: “Cits iink niintsi ka tsas un pëba biki kan du biki katim ki di Jerusalem-a? A cits iink wul ka wun na bi tsi, pii tan bukul pëtsëpand di bawiak-bajakan-a?”

22Maa, Sol ru pe këpe pëlincandër tsi pëpiban u ci Yeesu ci-un Këristu, a na pikra n Bajudeu ban ciina biki Damaasku. 23#2Kor 11.32,33A u par ngënu ngëcumal, a Bajudeu baar pëloole pa pëfiŋul, 24maa Sol bi me utsaag bukul. A bu kë waay buts ilëman, bërëm ni pënak, pa pëfiŋul. 25Maa, bafetsul jejul bërëm ayuagul di pëcaa, ba welaniul bi pëlënk pan cagëna pi përaasa.

Sol di Jerusalem

26Bi Sol band bi Jerusalem, a na tsas pëbofëlar ni bafets Yeesu, maa, bukul bëlieng ba lalul, bë fiaarats ne nul aci nafets Yeesu. 27Maa, Barnabas mobul atsëpand di bapostolu, a na leents bukul bi Sol win bi Ajug di bëga, a Ajug ñakanaanul, ni bi na leents bi përim di Damaasku ni bëyeentsal, tsi katim Yeesu. 28A na ci ni bukul di Jerusalem, a nuu niaj nuu pëni, nuu leents përim ni bëyeentsal, tsi katim Ajug. 29Ka ñakan ni Bagërek, a nuu totëlar irim ni bukul, maa bu kë tsas pëfiŋul. 30Bi batsaar tsi Këristu me bi ko wan, a ba tsëpandul Seesareeya; a ba wëtanul na tsëp Tarsu.

31Tsi wul, a Ngëriisia ru tsij pëfac tsi Judeeya bëlieng, ni Galileeya, ni Samaaria; a nguu liinc-liincandar, a nguu yandaar tsi puu lënk Ajug; a tsi bëtsënk Uwejats-ujënts, a nguu pe këpe pëwatsësar.

Eneeyas ayësana

32Bi Per ci bi tsi pëyaana ngëleka bëlieng, a na juŋa atsëp buts di bayëman ban ci biki di Liida 33A na tsënk rul nalon niints nalab ni ka n jakee Eneeyas; apiints tsi bëkaab aro ngëwaanu këwas tsi pëmaak. 34A Per jaul: “Eneeyas! Yeesu Këristu ka yësanu. Natsaan kë yecës bëkaabë, wi bërieru.” Tsi uyëk umënts wun, a na natsa. 35A bañaan ban ci biki di Liida ni Saroona bëlieng winul, a ba witsësa aniiran Ajug.

Tabita anatsanee di pëcäts

36A u ro ka nalon nafets Yeesu ŋaats di Jope, ni ka n jakee Tabita, uci wi Dorkas, un ci wi ubaca; nul acum ni karo-ngëwar, ni kawël-bëtseend. 37Maa tsi ngënu ngan, a nee maak a na cäts; bi ba ñaw bi puumul, a ba tsu pul di pëfër përuets. 38Bi Liida wok bi Jope, a bafets Yeesu te Per ci rul, ba yël bayënts batëb di nul pa pii buaraul ba ja: “Bili di wund ucar!”

39A Per natsa atsëp ni bukul. Bi ba band bi, a ba tsëpandul di pëfër përuets, a bacätsëndan-bayën bukul bëlieng fayul, a bu kë kaan, ba pibanul ipantu, ni iŋi-bëtiem i Dorkas leemp yi, bi na wama bi ci ni bukul. 40Maa, Per cilandër bañaan bëlieng utsand, na jintëla añaan; a na witsësa mab puum, na ja: “Tabita, natsan!” A ŋaats teenan këkës, na win Per, a na tsoar. 41Per colanul kañan, na katul. A na rui bayëman ni bacätsëndan-bayën bukul, na piban bukul ŋaats kak nayësal. 42A ko wan mea jëk Jope bëlieng, a bañaan bacumal wak tsi Ajug. 43Per ruka di Jope, aro ngënu ngëcumal, di kato nalon niints ni ka n jakee Simon, aci naleempëna itël.

Currently Selected:

NGËRO 9: KPKNT

Highlight

Copy