NGËRO 5

Ananias ni Safiira

1A nalon niints ni ka n jakee Ananias, ni aarul Safiira, waap bëka bukul, 2maa a na baaraan pëloole ni aarul, a na rukës ko, tsi uncaam wi na waapar wi bëka; a na tsëpand un duka wi ee jukan tsi bërun bapostolu. 3Din, a Per ja: “Ananias, we ka wun a m wët Useetaani a u cumu uwaas? M tsupar Uwejats-ujënts, m bek ko tsi uncaam wi m waapar wi bëka. 4Bi m netse bi m waap bul cits bíicu-a? A bi m waap bi bul, uncaam cits tsi kañanu-a? Um di uwejats wi yëlan dun pëbi di uwaasu? M tsuparats ñaan-najin, maa m tsupar Nasien-batsi.” 5Ananias kë te irim yan, a na yër a cäts; a bëlal baandë-ni ban te biki ko wan bëlieng. 6A ipaas natsa atieman puum, a ba tsëpand pul ee mooy.

7Bi u par bi ko pi mfuts-unu, a aarul niaji, maa meets ko un par wi. 8A Per yeparul, ajaul: “Leentsin-e! Përes pi pi nda waapar pun bëka ind-a?” A na ja: “Ee-e, aci pul.” 9Din, a Per jaul: “We ka wun a nda baar pëloole pa pëteen-teenan Uwejats Ajug?” Teenan-e iyots bañaan ba mooy biki ayënu, yuu yi tsi pëlëman, bu ka tsëpandu buts. 10Tsi uyëk umënts wun, a ŋaats yër tsi itsiim Per a cäts; uniaji ipaas, ba tsënk na cäts, a ba tsëpandul ee mooy abofëlan ni ayënul. 11A bëlal bëwiak baandë-ni bañaan Ngëriisia bëlieng, ni bañaan bëlieng ban te biki ngëko ngan.

Bapostolu aro ngëko bawitsa ngëcumal

12A iñan bapostolu ro ngëpibanaani ngëcumal, ni ngëko ngan pikran ngi tsi pëncuaf bañaan. A ba baar bëlieng pëloole, a ba ja ba roon bu kë juk di Ukuëra Salomon. 13Maa, kaats nalon ñaan na yeentsi pëbofëlar ni bukul, par bañaa n ja ba roon bu kë bëndan bukul mak. 14A kandënd bañaan ba uwak biki tsi Ajug, bayënts ni bakaats, kë pe këpe pëwatsësar; 15a u tsu bañaan a bu kë tsëpand bamoj di ngërawa kee ru piintsan bukul tsi ikaab ni tsi iyoongia, pa uwal wi Per kë par wi, ulimëntsul ka kërara ŋal naloole rin tsi bukul. 16A bañaan bacumal buts ban pëni biki ngëntab ngan fay ngi Jerusalem, kë tsiji bamoj ni biki ngëcaay kë nooran biki, a ba yësana bëlieng.

Bapostolu anoor-noorana

17Maa, nan pei pëci nawiak-bajakan, ni ban ci biki ni nul bëlieng, ban ci bkii ban bofëna biki di bëjukan Basaduseu, cum ni mankocar; 18a ba mob bapostolu ee ríc di ukalabus ucaak. 19Maa bërëm, a ulon uwaanju Ajug waants ilëman ukalabus, u pënani bukul utsand, a u ja bukul: 20“Nda tsëpan ndii pibandar di kato-kayëman, ndë leents bañaan irim njaka yi bëlieng, yi ubiira yi.” 21Bi ba te bi ko wan, din a unu kë jënts ba niaj kato-kayëman ee kur pëjukan bañaan. A bi nan pei pëci nawiak-bajakan baandi bi ni bacintsul, a ba rú bëjuk kato kawat-pëleents kawiak, ni bawiak babuk Israel bëlieng; a ba wël ulai di ukalabus pa bapostolu pë biindee.

22Maa, bi baleemp band bi, bë tsënkats bukul di ukalabus; a ba witsee ee leents, 23aja: “Wund atsënk ukalabus nigana uwar, a bawaay nats tsi ilëman; maa, uwaants wund ilëman, wund tsënkats ñaan di bametsu.” 24Bi nawiak bawaay kato-kayëman, ni bawiak-bajakan te bi irim yan, a bë katse me ko wi bu kë ro wi tsi uleka ko un par-na wank bapostolu. 25Tsi uler umënts wun, a nalon ñaan baandi ee leents bukul aja: “Nda teenan-e! Bayënts biki nda guts bukunk di ukalabus, nats bukunk di kato-kayëman a bu kë jukan bañaan.” 26Din, a nawiak bawaay tsëp ni baleemp ee tsiji bapostolu, maa bë roonats uyëlan, par bë lal bañaan përits tap bukul ilaak.

27A ba tsiji bukul ee natsan di kato kawat-pëleents kawiak. A nan pei pëci nawiak-bajakan yepar bukul 28#Mat 27.25aja: “Wund pokats ind iink pëjukan tsi katim ki, maa ind cuman bikink Jerusalem bëjukan ind, a nda ŋal pëyuuntsan wund pëñaak ñaan namëntsi.”

29Din, a Per ni bacintsul bapostolu yankës aja: “Nasien-batsi ka un pëcikëndënaa, tsi pëjaa pëcikëndën bañaan-bajin. 30Nasien-batsi basin nja anatsani Yeesu, ni nda fiŋ unk a nda rialul di pëmul. 31Maa, a Nasien-batsi riangul tsi kariirul, pa na ci Nasien ni Nabuëran, pa pëwël Israel kayaar-ibats, ni pëjampësaa ngëjuban. 32Wund aci bamaatir ngëko ngi, wund ni Uwejats-ujënts wi Nasien-batsi wël wi baro ko wi na ja wi.”

Ko wi Gamaliel ja wi

33Bi ba te bi ko wan, ba riabats a ba ŋal pëfiŋ bukul. 34Maa, a nalon Nafariseu ni ka n jakee Gamaliel, nan ci najukan-ulua, ni bañaan rëmbani bëlieng, natsa di kato kawat-pëleents kawiak, a na tsu bukul ba pënani bapostolu utsand ko uties; 35a na ja bukul: “Bayënts Israel! Nda roan bëwaar tsi ko wi nduu ro wi bañaan biki. 36Par, ngënu ngi aruka ka baandi, a Teudas natsa atsu beenul pëci ñaan nawiak, a na jukëlan bayënts ban duakan biki ngëseent ngëbaakër; maa a na fiŋa, a ban do bukunk ka cikëndënul garandar bëlieng, a ko ba unk. 37A nuu par, a Judas kanpënë-ni-galileeya natsee tsi ngënu bëmarkaar, a na natsani bañaan bacumal a bu kë fetsul; a na fiŋa buts, a ban do biki ka fetsul garandar bëlieng. 38Inkri, má n ja ind: ind tsë lënkar bañaan biki, nda wëtan bukul ba tsëp; par uci uwejats bukul oo uleemp bukul ci wi bañaan-bajin, kee u niaman. 39Maa, uci u ci wi Nasien-batsi, nda yëlanats pëgar wul, pa ind tsii tsë jaka nda natsara pëkaman Nasien-batsi.”

40A ba niiran irim Gamaliel, ba rui bapostolu ee tucan bukul, a ba tsu bukul ba rits ñakan tsi uleka katim Yeesu, a ba wëtan bukul. 41A bapostolu pën di kato kawat-pëleents kawiak, a ba lílan, undo bi ba winaa bi ba tsënkan pëjaa bë kawarëna tsi undo Katím ki. 42A kara unu di kato-kayëman, ni di kara kato, bë wëtanats pëjukan ni pëleents Upetsan-uwar, Yeesu ci-un Këristu.

Currently Selected:

NGËRO 5: KPKNT

Highlight

Copy