लूका 6:27-49

“आंउ तुहां मैहणुवां सिंउ जै मिंडी गलै शुणतै अत्तै, ऐ बोलता: कि अपड़ै दुशमणां सिंउ प्रेम करा; जै तुहां सिंउ बैर रखतै तेन्हैरा भला करा।” जै तुहांनि श्राप दींतै, तेन्हांनि आशीष देया; जै तुवाड़ी बेजती कातै तेन्हैरै तेईनी प्रार्थना करा। जै तिंडि एकि तलवड़ी पन थप्पड़ मारिया, तैस धेरै होरी तलवड़ी बि करि दै; जै तिंडा कौट लै गहिया, तेसनी कुरता बि कढि करि दी दै। जै कौ ताउ किना कोई चीज मगिया, ता तु तेसनी दै, अगर जै तिंडि कौ चीज लै गहिया, ता तैस किना मेईं मगै। जेतिया बर्ताव तुवे चांहथै कि, मैहणु तुहां सिंउ करिया, तुवे बि तैन्हांं सिंउ तेतिया ऐ बर्ताव करा। तिहियें अगर तुवे बि तैन्हांं सिंउ प्रेम कातै जै तुहां सिंउ प्रेम कातै ता ऐ केणु बडी गल आ, केईनी कि “पापी मैहणु” बि ऐपु सिंउ प्रेम रखणारा सिंउ प्रेम रखतै। तिहियें अगर तुवे तैन्हांं सिंउ भलाई कातै जैन्हैं तुहां सिंउ भलाई क्यौरी आ, ता ऐ केणु बडी गल भुई, केईनी कि पापी मैहणु बि ता ऐतियु ऐ कातै। अगर तुवे तैन्हांंनियें उधार दींतै जैन्हां किना वापस लींणैरी आशा रखतै, ता ऐ केणु बडी गल भुई? केईनी कि पापी मैहणु बि ता तैन्हांं किना वापस लींणैरै तेईनी पापियनि उधार दींतै। बल्कि तुवे अपड़ा दुशमणा सिंउ प्रेम करा, जां तेन्हैरी भलाई करा, जां फिरी उधार दी करि लींणैरी आशा मेईं रखा। तां ऐ तुवाड़ै तेईनी बडा ईनाम भूंणा, जां तुवे परमप्रधान परमेश्वरेरै बच्चै भूंणै, केईनी कि सै तैन्हांं पन बि जै धन्यवाद ना कातै जां जै दुष्ट मैहणु अत्तै दया काता। जेतिया तुवाड़ा पिता दयावान आ तेतियै तुवे बि दयावान बणां। “दोष मेईं ला, ता तुहां पन बि दोष ना लगणा। कोसेरा बि फैसला मेईं करा, ता तुवाड़ा बि फैसला ना करियूंणा। माफ करा ता तुहांनि बि माफ करियूंणु। दियां करा ता परमेश्वरा तुहांनि बि दींणु। मैहणुवां पूरा नाप दबा-दबा करि जां हिलाई-हिलाई करि उछुई करि तुवाड़ै खोक्खा सुटणु। परमेश्वरा बि तुहां सेईतै तिहियें व्यवहार कांना जिहीं तुवे होरनियां सिंउ कातै। तिहियें तुवाड़ा बि न्याय भूंणा।” फिरी तेनी तेन्हांनि अक उदाहरण दी करि ऐ समझांणैरी कोशिश की, कि “क्या अक कांणा होरै कांणैनि बत्त लुहाई सकता? क्या ऐहीं कांने ला दोईयो गढ़ै मझ ना छिढणै? चैला अपड़ै गुरू किना कदि बि बडा ना भूंता; पण अगर सै पूरी शिक्षा हासिल काता ता सै अपड़ै गुरू बराबर बंणी सकता। तु केईनी अपड़ै भाईरिया कमियां तकांता, पण ताउ अपड़ि अंदरी बुराई लाधी ना ऐईंती? जां जेख्णी तु अपड़ि अंदरी बुराई ना तकांता, ता अपड़ै भाईनी किहीं बोलि सकता, कि भाई रुकि गा तिंडि अंदरी बुराई आंउ कढि दियुं? हे कवटी! पेहिलै तु अपड़ि बुराई अपड़ै अंदरा किना कढ, तां फिरी तु ठीक-ढंगै सिंउ तका करि अपड़ै भाईरी बुराई दूर करि सकता। कौ बि अच्छु बुट, बुरा फल ना दींतु, जां ना कौ बुरू बुट अच्छा फल दींतु। हर कौ बुट अपड़ै फलै ला पछियांणियूंतु, केईनी कि मैहणु झिल्हा किना अंजीर ना त्रोड़तै जां ना करेरिया किना अंगूरा केरै गुच्छै त्रोड़तै। भला मैहणु अपड़ै मंनेरै भलै भंडारा किना भली गलै कढता, जां बुरा मैहणु अपड़ै मंनेरै बुरै भंडारा किना बुरी गलै कढता केईनी कि जै मंना मझ भरौरू आ सैहै तेसैरू मुहां पन ऐईंतु। जां तुवे मिंडु बोलोरू ना कातै ता केईनी मूंनी, ‘हे प्रभु! हे प्रभु!’ बोलतै? जै कौ मैहणु मूं किनि ऐईंता जां मिंडी गलै शुणि करि तैन्हांं मनता, आंउ तुहांनि शुणांता कि सै कोस सैयि आ? सै तैस मैहणु समान आ, जेनि घर बणांतै टैंमा जमीन डुघी खंणि करि चटांनि पन नींह रखि, जां फिरी बाढ़ यैई जां नदिरू पाणी तैस घरा सिंउ टकराईयू पण तेनी सै हिलाईयु बि ना; केईनी कि सै पक्कु बणोरू थियु। पण जै मिंडी गलै शुणि करि बि तैन्हांं पन ना चलता सै तैस मैहणु सैयि आ, जेनि धरती मझ बगैर नींह खंणने घर बणाउ, जां जेख्णी नदिरू पाणी तैस घरा सिंउ टकराईयू ता सै इकदम छिढि गियु जां छिढि करि तेसैरा सत्यानाश भौ ग्या।”