लूका 19
19
चुंगी लींणार जक्कई
1यीशु यरीहो शहरै बत्तै भौ करि गांहथा थ्या। 2तैठि जक्कई नाँईयेरा अक मैहणु थ्या जै चुंगी लींणै वा केरा सरदार जां अमीर थ्या। 3सै यीशु तकांणा चांहथा थ्या कि सै केणुहां त्या आ, पण भीड़िरी वजहि ला तैस यीशु लाधिऐ ना या, केईनी कि सै छोटै कदैरा थ्या। 4तां सै तैस तकांणेरै तेईनी तैस किना अघ्रियालीं दाउड़ी करि एकि गूलरेरू बुटा पनि चढ़ी ग्या, केईनी कि यीशु तेसै बतै गांहणार थ्या।
5जां यीशु तेदि बत्तै गांहथा थ्या जैस बुटा पनि जक्कई चढ़ौरा थ्या, ता यीशु तैस धेरै खड़ु तका करि तेसनी बौलु, “हे जक्कई, जल्दी उतरि करि थल्लै आ; केईनी कि आज मूं तिंडै घरै रींहणु जरूरी आ।” 6सै झट-पट बुटा पना उतरि करि खुश भौ करि यीशु अपड़ै घरेनी लै ग्या। 7ऐ तका करि सारै मैहणु कुड़-कुड़ा करि बोलणा लगै, “सै ता एकि पापिरै घरेनी ग्या।”
8यीशु जेख्णी तेसेरै घरा मझ रोटी खांता थ्या, तां जक्कई खड़ै भौ करि यीशु सेईतै बौलु, हे प्रभु! तका, जै किछ मूं किनि धन-दौलत आ, तेत मझांं अधा हैसा आंउ गरीबनी दी दींता, जां अगर कोसकैरू चुंगी लींणा मझ किछ बि अन्या करि-करि लै लियौरू आ ता तेसनी चोउर गुणा वापस दी दींता। 9तां यीशु तैस सिंउ बौलु, आज इस घरेरै मैहणुवां पन उद्धार यौउरा, केईनी कि तीं परमेश्वरा पनि विश्वास केया जिहीं तुवाड़ै पूर्वजै अब्राहमै क्यौरा थ्या। 10केईनी कि आंउ मैहणुरा पुत्र मतलब आंउ पापा मझ डुबोरै मैहणुवां अनन्त सजाहि किना बचाणनि जां तैन्हांं मैहणुवां केरा उद्धार कांना यौउरा।
दशा सुन्नेरै सिक्का केरा उदाहरण
(मत्ती 25:14-30)
11जेख्णी सै मैहणु ऐकेई गलै शुणतै थ्यै, तां गलै लांतै-लांतै यीशु अक होरा उदाहरण बोला, तेख्णी यीशु यरूशलेम शहरा नीड़ थ्या, जां मैहणु समझणां लगै कि परमेश्वरैरा राज्य बस ऐईंणार आ। 12तां यीशु बौलु, “अक अमीर मैहणु दूर परदैशनी चलि ग्या ताकि सै तेधोरै राजा बंणी करि ऐईछिया।” 13जां तेनी अपड़ै दासा मझांं दश जंणै शदाय, जां तेन्हांनि दश सुन्नेरै सिक्कै (जै त्रियां सालेरी तनखाय बराबर थ्यै) दित्तै, जां तेन्हांनि बौलु, “ऐन्हैं ला मूं ऐईंतै तेईनी लींण-दींण करै।”
14“पण तेसेरै नगरा मझ रींहणार तैस सिंउ जिद्द रखींथ्यै, जां तैस पिचोरै किछ विषैक पुजांणारै मैहणुवां धेरै विषैक भेईजा, कि असै ना चांहथै, कि ऐ असु पनि राज करिया। 15जां जेख्णी सै राजा बंणी करि चलि या तां ऐतियु भूं कि तेनी अपड़ै दास जेन्हांनि सुन्नेरै सिक्कै दितोरै थ्यै, ऐपु किनि शदाय, ताकि पता करिया कि तैन्हैं लींण-दींण करि-करि कितु-कितु कमूं? 16तां पेहिलै दासै अईछी करि बौलु, हे मालिक! तिंडै दितोरै दश सुन्नेरै सिक्कै ला मीं दश होरै सिक्कै कमोऐ।” 17तेनी तैस सिंउ बौलु, शाबाश भलै दास! तु हल्की किना हल्की गलै मझ ईमानदार निकोत्था, ऐठणीरै तेईनी तु दश नगरा पन अधिकार कर।
18होरै दासै बौलु, तिंडै दितोरै पंजै सिक्कै ला मीं पंज होरै सिक्कै कमोऐ। 19मालिकै तैस दासा सिंउ बौलु, ताउनि बि मीं पंजा नगरा पनि अधिकार दित्ता। 20त्रियें अईछी करि बौलु हे मालिक! तका तिंडा दितौरा सुन्नेरा सिक्का ऐड़ि आ जै मीं बगवुई मझ संम्भाय रखौरा थ्या। 21केईनी कि आंउ ताउ हैरी डरींथ्या, ऐठणीरै तेईनी कि तु कठोर मैहणु आ; जै तीं ना रखा तैस उठाय लींता, जै तीं ना बाउरू तैस बढता।
22तेनी मालकै तेसनी जुबाव दिता, हे दुष्ट दास, मूं तिंडा न्याय तिंडै शब्दा केरै मुताबिक कांना। जब तांउ पता थ्या कि आंउ अक ऐतिया मैहणु आ, जै मीं ना रखु तैस उठाय लींता, जां जै मीं ना बाउरू तैस बढता; 23ता ताउ मिंडा पेईंसा सहूकारा किनि जमा करि दींणा चेहिंथा थ्या, कि जेख्णी मूं ऐईंणु थियु ता ब्याजै समैत लै लींता। 24जां फिरी मालकै नीड़ खड़ै दासा सेईतै बौलु, ऐस सुन्नेरै सिक्कै ऐस किना लै करि, जां जैस किनि दश सिक्कै अत्तै तेसनी दी देया। 25तैन्हैं तैस सिंउ बौलु हे स्वामी, तैस किनि दश सुन्नेरै सिक्कै ता अत्तै। 26ऐत पन राजै बौलु, तुहैं ठीक बौलु केईनी कि जैस किनि आ, तेसनी होरू दियूंणु, जां जैस किनि थोड़ु बचोरू आ, तैस किना सै बि लेई गांहणु। 27पण मिंडै दुशमणनि जै ना चहींथ्यै कि आंउ तैन्हांं पन राज्य करूं, तैन्हांं ऐड़ि अंणि करि मिंडै सांमणै मारी छडा।
यरूशलेम मझ विजय प्रवेश
(मत्ती 21:1-11; मरकुस. 11:1-11; यूह. 12:12-19)
28ऐकेई गलै बोलि करि सै यरूशलेम शहरा धेरै चैला केरै अघ्रियालीं-अघ्रियालीं चला। 29जेख्णी सै यरूशलेम शहरा नीड़ पुज्जै जां जैतून नामक पहाड़ा पन बैतफगे जां बैतनिय्याह ग्राँईयां मझ यै, ता यीशु दो चैलै ऐ बोलि करि भेईजै, 30कि “सांमणेरै ग्राँईयां मझ गहा, जां तैठि पुजतै एकि गधेरै बच्चै, जैस पनि कौ बि ऐम्हियां तेईनी चढ़ौरा ना भुईया, बंन्होरा मेईंणा, तैस खोलि करि लै ऐईछा। 31अगर तुहां किना केणुक्या पुछिया, ऐक्यु केईनी अत्तै कातै? ता बोलै, असेड़ै प्रभु यीशु ऐसेरी जरूरत आ।”
32जै यीशु दो चैलै भेईजोरै थ्यै, तैन्हैं तैठि सै गधा बंन्होरा मेयि ग्या, जिहीं यीशु तेन्हांनि शुणाउरू थियु। 33जेख्णी सै गधेरै बच्चै खोलतै थ्यै, तां तेसेरै मालिकै तैन्हांं किना पुच्छु, कि “ऐस गधेरै बच्चै केईनी अतै खोलतै?” 34तैन्हैं बौलु, “असेड़ै प्रभु यीशु ऐसेरी जरूरत आ।” 35सै तैस गधै यीशु किनि लै यै जां तैस गधेरै बच्चै पनि अपड़ै लिकड़ै रखि करि यीशु तैस पन चाढ़ी दिता। 36जेख्णी सै गांहथा थ्या, ता बड़ै सारै मैहणु अपड़ै लिकड़ै बत्तै मझ बिछांथै थ्यै।
37जेख्णी यीशु यरूशलेम शहरा नीड़ तैस जगाय पन पुज्जा, जेठां किना सिड़क उंडी जैतूनेरै पहाड़ा धेरै गहींथी, तां चैला केरी सारी मंडली तैन्हांं सभनियांं चमत्कारेरै कमां केरी वजहि ला जै तैन्हैं तकाउरै थ्यै, तैस किना बड़ै खुश भौ करि जोरै-जोरै बोलि करि परमेश्वरेरी स्तुति कांना लगै; 38कि “धन्य आ सै राजा, जै प्रभुरा नाँ लै करि ऐईंता, स्वर्गा मझ सुख-शांति जां परम प्रधान परमेश्वरेरी महिमां भुईया।” 39तां भीड़ि मझांं किछ फरीसी तैस सिंउ बोलणा लगै, “हे गुरू! अपड़ै चैलानि झिड़खै दै, कि सै चुप बेशिया।” 40यीशु जुबाव दिता, कि “आंउ तुहां सिंउ बोलता कि अगर ऐक्यै चुप भौ ग्यै ता घौड़ा मिंडी माहिमा कांनेरै तेईनी चिंडै दींणी।”
यरूशलेमेरै तेईनी विलाप
41जेख्णी सै नीड़ या ता, यरूशलेम शहर तका करि तैस पन लैरी लगा दींणा। 42जां बौलु, “यरूशलेम शहरेरै मैहणुवो, अगर तुवे समझि गांहथै भुईं ता परमेश्वरा आज तुहांनि सुख-शांति दींणी थी; पण अबै तुहां ऐ गलै लाधिऐ ना ऐईंणी। 43केईनी कि अक टैंम ऐतिया ऐईंणा कि तिंडै दुशमणा तु चोउवो पासै किना घैरी लींणा, जां हर पासै किना शहरा पन हमला कांना जां हर-पासै किना तुवे दुशमणा दबांणै। 44जां यरूशलेम शहर पूरी तराहि सिंउ नष्ट भौ गांहणा।” जां नगरेरै सारै मैहणु मारी करि मिट्टी मझ मिला छडणैं, ऐठणीरै तेईनी तुवाड़ी कंथै जां घरै छिढ़ाय दींणै, केईनी कि जेख्णी परमेश्वर तुहां छडांणेरै तेईनी या, ता तुवे तैस टैंमा समझै ना।
मंदरा किना व्यापारी कढियूंणै
(मत्ती 21:12-17; मरकुस. 11:15-19; यूह. 2:13-22)
45तां सै मंदरेरै आंगणा मझ गहि करि समान बैचणारा भेईनि कढ़णा लगा। 46जां यीशु तेन्हांनि बौलु, कि पवित्र शास्त्रा मझ लिखोरू आ; कि “मिंडा मंदर प्रार्थना कांनेरू घर भूंणु; पण तुहैं ऐ व्यापारैरा अड्डा बंणा दितौरा।” 47जां सै हर-रौज मंदरा मझ प्रचार करींथ्या। जां प्रधानयाजक जां यहूदी शास्त्री जां मैहणुवां केरै नैतै तैस मांनेरै तेईनी मौका तोपतै थ्यै। 48पण तेन्हांनि मौका ना मैआ कि सै प्रभु यीशु मारी सकिया केईनी कि सारै मैहणु बड़ै ध्यान सिंउ तेसेरी गलै शुणींथ्यै।
Currently Selected:
लूका 19: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
