यहुन्ना 18
18
यीशु पकड़ायूंणा
1यीशु प्रार्थना करि-करि अपड़ा चैला सेईतै किद्रोन नाऐरै पारियै पासैनि ग्या, जेठि अक बगीचा थ्या। 2यहूदा जै यीशु पकड़वाणै वा थ्या तैस बि ऐस जगायरा पता थ्या, केईनी कि अक्सर यीशु अपड़ा चैला सेईतै तैठि गांहथा रिहींथ्या। 3ऐठणीरै तेईनी यहूदा, सैनिका केरा दल जां प्रधानयाजका जां फरीसिया केरै पैहरेदारा सेईतै, लालटैन, मशालि जां हथियार लै करि तैठि पुज्जा।
4तां यीशु तैन्हांं सभनियांं गला केरै बारै मझ जै तैस सिंउ भूंणै बाई थी तैन्हांं समझि करि आघरियालीं या जां तैन्हांं किना पुच्छु, “कोस तोपतै अत्तै?” 5तैन्हैं तेसनी उत्तर दित्ता, “नासरत नगरेरै यीशु!” यीशु तैन्हां सेईतै बौलु, “आंउ ऐ यीशु नासरी आ।” जां तैन्हांं सेईतै यीशुनि धोखा दींणार बि तैठि तैन्हांं मैहणुवां सिंउ खड़ा थ्या। 6जेख्णी यीशु तैन्हांं सिंउ बौलु, “आंउ यीशु नासरी आ”, ता सै पीछै घिरी करि यीशुरी सामर्थी ला जमीनि पन ढढ़ै चलि ग्यै। 7यीशु तैन्हांं किना फिरी पुच्छु, “कोस तोपतै अत्तै?” तैन्हैं बौलु, “नासरत नगरेरै यीशु!”
8ऐत पन यीशु बौलु, “आंउ आ यीशु नासरी। अगर तुवे मूं तोपतै अत्तै ता मिंडै चैला गांहणा देया।” 9ऐ ऐठणीरै तेईनी भूं कि, यीशु जै पेहिलै बोलोरू थियु, सै सच भौ गहिया: “तीं जै मिंडै हवालै क्यौरै थ्यै, तैन्हांं मझां अक बि नष्ट भूंणा ना दित्ता।” 10शमौन पतरसा किनि अक तलवार थी। तेनी तलवार कढि करि महायाजकेरै दासैरा कंन बढि सुटा। तैस दासैरू ना मलखुस थियु। 11यीशु पतरसा सिंउ बौलु, “अपड़ि तलवार म्यानि मझ रख। जै दुख पिता परमेश्वरै मूनी सेहन कांननी दितौरा, केया तैस आंउ सहन ना करूं?”
हन्नेरै सांमणै यीशु
12तां सिपाहिया केरै दलै, सूबेदारै जां यहूदी मंदरेरै सिपाहियै यीशु पकड़ी करि बंन्ही ल्या। 13सै पेहिलै यीशु हन्ना किनि लै ग्यै; केईनी कि तैस साला जै महायाजक कैफा थ्या, सै तेसैरा शोहुरा थ्या। 14ऐ सैहै कैफा नाँईयेरा अक मैहणु थ्या जेनि यहूदी अगुवोनि सलाह दितोरी थी कि; “असेड़ै मैहणुवां केरै तेईनी एकि मैहणुरू मरनु जरूरी आ।”
पतरसैरा नमां
15शमौन पतरस जां अक होरा चैला बि यीशु पीछै-पीछै चलै। ऐ चैला प्रधान याजकेरा पैहचाणी वा थ्या। सै यीशु सेईतै महायाजकेरै घरेरै आंगणा मझ ग्या। 16पण पतरस तेसैरू दुवारा किनि खड़ा बेठा, तां सै होरा चैला जै महायाजकैरा पैहचाणी वा थ्या, सै भेईर ग्या जां द्वारपाला सिंउ बोलि करि पतरसा अंदरैनि लै या। 17सै दासी जै द्वारपालक थी, तेनी पतरसा सिंउ बौलु, “क्या तु बि ऐस मैहणुरै चैला मझां आ?” पतरसै बौलु, “आंउ ना।” 18महायाजकेरै दासै जां मंदरेरै सिपाहि ठंडिरै कारण कोयलै जायि करि खड़ै भौ-करि आग सैकतै थ्यै जां पतरस बि तैन्हांं सिंउ खड़ी करि आग सैकता थ्या।
महायाजका किना यीशुरी पूछताछ
19तां महायाजकै यीशु किना तेसेरै चैला केरै बारै मझ जां उपदेशा केरै बारै मझ पुच्छु। 20यीशु उत्तर दिता, “मीं संसारेरै मैहणुवां केरै सांमणै शरैआम बोलोरू आ। मीं यहूदी सभा घरा जां मंदरा मझ, जेठि सभ यहूदी अगवे किट्ठै भुईंथ्यै, उपदेश दितौरा, छपि करि किछ बि ना बोलोरू। 21ऐ तुवे मूं किना केईनी पुछतै अत्तै? तैन्हांं किना पुछा जैन्हैं मिंडै उपदेश शुणौरै अत्तै। तैन्हांं पता कि मीं क्या-क्या बोलोरू आ।” 22तां ऐस गलै बोलणा पन तैठि खड़ै मंदरेरै सिपाहिया मझां एकि यीशु पन थप्पड़ मारी करि बौलु, “तु महायाजकनि ऐहीं-चारै जुबाव दींता?” 23यीशु तैस सिंउ बौलु, “अगर मीं गलत बौलु, ता साबित करा कि मीं गलत बौलु, जां अगर ठीक बौलु ता मूं केईनी अत्तै मातै?” 24ऐत किना बाद हन्नै यीशु तिहियें बन्हौरा कैफे महायाजका किनि भेईजि दिता।
पतरसैरा दुबारे नमां कांना
25शमौन पतरस तैस टैंमा खड़ा-खड़ा आग सैकता थ्या। किछ मैहणुवें तैस सिंउ बौलु, “क्या तु बि तेसेरै चैला मझां आ?” तेनी नमां कातै बौलु, “आंउ ना।” 26महायाजकेरा अक दास तैस मैहणुरा रिश्तेदार थ्या, जेसैरा कंन पतरसै बढौरा थ्या। तेनी बौलु, “क्या मीं तु बि तैस सेईतै बगीचै मझ ना तकाईथ्या?” 27पतरस फिरी मुकरी ग्या जां तेसै टैंमा कुख्ड़ै ल्यौ दित्ती।
पिलातुसेरै सांमणै यीशु
28तां यीशु सैक्यै कैफे किना रोमी राज्यपाल पिलातुसेरै मैहलानि लै ग्यै। अबै भियाग भौ गियोरी थी। यहूदी अगुवे राजभवना अंदर ऐठणीरै तेईनी ना ग्यै कि गैर-यहूदिया किनि गांहणै ला सै अशुद्ध ना भौ गहिया, अशुद्ध भूंणै ला सै फसहैरी रोटी ना खा सकींथ्यै। 29ऐठणीरै तेईनी राज्यपाल पिलातुस भेईर अईछी करि तैन्हांं सिंउ मिला जां बौलु, “तुवे मैहणु ऐस मैहणु पन कोस गलैरा दोष लांतै अत्तै?”
30तैन्हैं तेसनी उत्तर दित्ता, “अगर ऐ कुकर्मी ना भूंता ता असु ऐ ताउ किनि ना थ्या अंणना।” 31पिलातुसै तैन्हांं सिंउ बौलु, “तुवे ऐस लै गहा जां जै तुवाड़ी व्यवस्थाय मझ सही आ, तेठणिरै अनुसार फैसला करा।” यहूदी अगुवे उत्तर दित्ता, “असुनि कोसनि मोउतिरी सजा दींणैरा हक ना।” 32ऐ ऐठणीरै तेईनी भूं कि यीशुरी बोलौरी सै गल पूरी भुईया, जेनि गलै ला तेनी इशारा क्यौरा थ्या कि तेसैरी मोउत किहीं-चारै भूंणी
33तां पिलातुस फिरी राजभवना अंदर ग्या जां यीशु शदा करि तैस किना पुच्छु, “क्या तु यहूदिया केरा राजा?” 34यीशु उत्तर दित्ता, “क्या तु ऐ गल अपड़ि तरफों बोलता या होरनियें मिंडै बारै मझ ताउ सेईतै बोलोरू आ?” 35पिलातुसै उत्तर दिता, “क्या आंउ यहूदी आ?” तिंडियै जातिरै मैहणुवें जां प्रधानयाजके तु मिंडै हवालै क्यौरा। तीं कितु क्यौरू आ। 36यीशु उत्तर दित्ता, “मिंडा राज्य इस संसारैरा ना। अगर मिंडा राज्य इस संसारैरा भूंता भुईं ता, मिंडा चैला भिड़ियूंणु थियु जां आंउ यहूदी अगुवो केरै हवालै ना थ्या कांना। पण मिंडा राज्य ऐठणीरा ना।”
37ऐत पन पिलातुसै तैस सेईतै बौलु, “ता क्या तु राजा?” यीशु उत्तर दिता, “तु ऐ बोलता कि आंउ राजा। मीं ऐठणीरै तेईनी जन्म ल्या जां संसारा मझ यौउरा कि सच्चाईरै बारै मझ गवाहि दियुं। जै सच्चाईरा आ सै मिंडी गल शुणता।”
38पिलातुसै तैस सेईतै बौलु, “सच कितु आ?” सै ऐ बोलि करि फिरी भेईनि चलि ग्या जां यहूदी अगुवा किनि गहि करि बौलु, “मूं ता ऐस मझ कौ दोष लाधी ना ऐईंता।
यीशु या बरअब्बा
39तुवाड़ा अक रिवाज आ; आंउ तुवाड़ै तेईनी फसहेरै त्यौव्हारा पन एकि केईदी छडि दिईंथ्या। क्या तुवे चांहथै अतै कि तुवाड़ै तेईनी आंउ यहूदिया केरै राजै रिहा करि दियुं?” 40तां तैन्हैं दुबारे चिंडै दी-करि बौलु, “ऐस ना पण असेड़ै तेईनी बरअब्बै छडि देया।” बरअब्बा अक डाकु थ्या।
Currently Selected:
यहुन्ना 18: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
