LOX KAB 30
30
Lox Agurax Kawn Simex Yake Khankix
1Lox pa sidiex gau Agurax, kawn simex Yake ka Itelax mai Ukalax mawh nin. 2Aux ang lai mawh pui, hoik mawh totiag heue. Aux ang lai grum ka pingnya kawn pui. 3Aux ang gau ka been pingnya mai aux ang tawng ka ceu pa singax singeh. 4Mawh pui mawx pa haok meung raoma mai deeh hoek? Pui mawx pa pon jhawp bhaung daux taix tix? Pui mawx pa pon kie ti deuh rawm ka kraung ceep tix? Pui mawx pa kieh haktiex kaux cong tom sidah? Phan maix ang tawng Nawh, ceu kaux Nawh mai ceu kaux kawn simex Nawh, kaux patix? khex pon krai maix lie? 5Gumlox Siyiex khawmuik, mawh pa singax singeh, Nawh mawh dee tiebtie, pui pa deuh rhawm ka Nawh heue. 6Paw lai baox naok lox piang lox Nawh, phan yuh nan, Nawh deuh phimap ka maix mai maix tak mawh pui pie lhen heue. 7Aux rawg bwanson ka tokaux Maix Simiang ra ceu, tom sidah ang aux nyang yum, paw thiang ti tik aux liak. 8Ceu pa ang mhawm mai pie lhen teei ti tik khaing aux liak, paw kieh aux hot mai paw kieh aux mi, tawx ngie mee kub eei ju tix liak. 9Phan ang mawh nan, ha aux kox cha nie luan mi mai thiang ti tik ka Siyiex ah nin, Maix mawh mawx? Phan ang mawh nan, ha aux kox cha nie luan hot sibhawm mai briex kraung khrai pui mai jheeh aux ah lox sibriem ka ceu kaux Siyiex heue. 10Phan ex sang yuh siliex laux, paw krai ka simiang nawh, ha nawh kox jhax lawg ka maix mai phimap tak hoek piang maix heue. 11Ceu pui pa jhax lawg ka keeing mai pa ang chix nawb bwanson ka miex tix, 12Ceu pui pa keud tokaux tix, mawh pa singax mai ang khoek, pa seeing brai ka tokaux tix, 13mai ceu pui pa ting rhawm pa deuh tokaux tix ting lhaong. 14Ceu pui pa grum naog rhang, pa awm gawn, rhang gieb pa awm vaig, pa chix kiied tix ih ka pui cud pui cha mai pui hot sibhawm piang haktiex heue. 15Pling koe kawn bun ra mu pa ah nin, tawx liak tawx liak, lheu khaing an, pa ang chix fah rhawm, ang joeng mawh loe ceu, pa ang chix ah naox heue. 16Pa ah nin pon ceu, simeeig tix ceu, vaig bun neh pa ang koe kawn tix ceu, haktiex pa ang chix sak ka rawm tix ceu, ngu pa ang chix ah naox heue tix ceu. 17Ngai pui pa ah lox pa ang cee cag mai naknon ka keeing tix mai pa ang nghiet lox miex tix khankix, lak pa po daux klawng daux ngawd khankix, tak tut ngai nawh jiiet mai kawn klang preng tak hoek tix ih nex nawh heue. 18Pa daox deng aux, ang joeng mawh loe ceu mai pa ang aux tawng koe pon ceu, 19mawh nin, krax pa po klang preng daux bhaung tix ceu mai daux krax hu siuing piang simaox tix ceu, daux krax hu reu ting daux sigreung rawm pang lai tix ceu, daux krax hu sinaw mai bunkrih tix ceu heue. 20Daux krax bun pa koe mex mai pa phit vao kawx, awm an heue. Bun pa hoik ih pa ih mai khaix hoik awt jheeh jhai tix ah nin, aux ang yuh phimap heue. 21Pa chix kieh haktiex yung yiang, ang joeng mawh loe ceu mai pa kieh haktiex ang pon kham pon ceu pa ah nin, 22siliex pa yaox ti yuh simiang tix kaux mai pui caox pa yaox tix sawm sak tix kaux, 23bun caox pa koe mex tix kaux, bun siliex pa pon sin, miex simiang cao nyiex tix kaux heue. 24Ka piang haktiex, viang mawh ceu pa nie iak kawx, pa koe pingnya, koe pon ceu mawh inkix, 25mawh meeik tix ceu, viang mawh ceu pa iak riang rao kawx, chix sawg ti deuh pa ih bawg yam rung heue. 26Petla tix ceu, mawh ceu pa iak riang kawx, chix yuh dee ot tix ka daux rang. 27Sido tix ceu, viang ang koe laux simiang kawx, chix khrawm tix ot tau heue. 28Lai tang ceu pa iak tix ceu, viang mawh pa iak kawx, chix pin taix tix mai ot ka daux nyiex haw heue. 29Ceu pa chix hu mhawm mhawm, ang joeng mawh loe ceu, pa nyawm tix jhak grang, pa hu koe pon ceu, mawh inkix, 30sivai sangsi tix ceu, mawh ceu pa ting riang khaing totiag khawmuik, pa ang chix via ka pui mawx tix heue. 31Brung puing naing tix ceu, pex mhaing tix ceu mai simiang pa ang pui mawx lai pon tix tiebtie tix ceu heue. 32Phan maix yaw tokaux tix maix yuh pa caox ang ah maix keud ti yuh pa ang mhawm ang ah, teei taix maix thox ka jheeh maix awx. 33Nied tix sigwiex ka rawm teeih mawie tom lih mawh bee lon teeih, phan ex siyiied gawng meeh, chix kieh nham lih, awm an, phan cheeik krax pa song rhawm, chix lih ti mawh krax pa simah heue.
Currently Selected:
LOX KAB 30: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
