MAKUX 9

Tokaux Loh Tix

(Mat 17:1-13; Luk 9:28-36)

1Nawh Cao baox ah nin ka kix, “Aux krai lox tete ka pex. Koe pui pa cung dex tin tix blah, pa tak ang cim krax yum, tom ka ang kix bax yaox pa hoik hoek Meung Siyiex ka daux sibrawm heue.” 2Khaix an liah ngaix, Yesux teei Petrux, Yakop, Yohan mai viex kix haok piang gawng lhaong nong nong, ka dee ang pui ot mai tokaux Nawh Cao loh tix sivoe kix tan heue. 3Kraung ceep Nawh kied paing cawt tom lih riang, tom ang pui chix sidaux kraung piang haktiex in chix sidaux tix kaux kawx kieh paing awm an heue. 4Kix yaox Eliyax hoek tau mai Mose mai kiex sikah mai Yesux heue. 5Petrux ah nin ka Yesux, “Rabi eue, ex ot tin mhawm son ex heue, kieh ex yuh nyiex bang loe lhang. Son Maix tix lhang, son Mose tix lhang, son Eliyax tix lhang heue.” 6Kheu kix kied lhat mai nawh ang tawng lox pa sang krai tix, nawh tom ah nan heue. 7Paiawm hoek ti kheem veei kix, lox lih khaing paiawm an ah nin, “In mawh Kawn pa moh Aux heue, nghiet ka Nawh awx.” 8Yam an dom mawx dom an kix jhak vung viang kix ang yaox pui tix kaux kawx lheu khaing Yesux nong nong, pa ot tau mai kix heue. 9Yam lih hoek kix khaing gawng, Nawh Cao tawm lox ka kix, “yuh ka mawx son ang kix krai ka pui tix kaux kawx, ka grawng ceu pa hoik yaox kix, ka ang Kawn kawn pui nyang bax deeh kaoh khaing krax yum heue.” 10Kix priex ti hawt lox an mai chawk paox tix, tix kaux lai tix kaux grawng dee bleeh lox pa ah, “Deeh kaoh khaing krax yum heue.” 11Kix chawk Nawh Cao ah nin, “Kheu pui tiiem lai khankix ah Eliyax tak sang hoek phao ka?” 12Nawh Cao ah nin ka kix, “Eliyax tak hoek phao ka tete mai cox mhawm khawmuik heue. Pa hoik tiiem grawng Kawn kawn pui, tak kham geu tom nie ceu mai pa tik vud sang yuh ka mawx? 13Viang mawh nan Aux krai ka pex, Eliyax hoik hoek heue, kix hoik yuh ka nawh awm pa simie kix tiyuh awm pa hoik tiiem grawh grawng nawh heue.”

Pai Pui Laig Phi Moi

(Mat 17:14-21; Luk 9:37-45)

14Yam hoek kix ka kawncau Nawh khankix, kix yaox cub pui hun ot sivie kix tan, pui tiiem lai khankix chawk lox ka kix tan heue. 15Dom mawx dom an yam yaox cub pui hun khawmuik ka Nawh Cao, kix kied daox deng kah mai to hu ka Nawh Cao mai ah lox nawb ka Nawh heue. 16Nawh Cao ah nin ka kix, “Pex chawk lox patix ka kix?” 17Pui tix kaux ka daux cub pui hun pawk lox mai ah nin ka Nawh Cao, “Sara cao gau eue, aux hoik viex kawn simex aux pa laig phi pa aw hoek ka Maix heue. 18Phi an giex nawh dee mawx ang ah, nyhot nawh goh mai bai lih khaing jheeh nawh mai nawh greeik rhang tix mai krawx hu heue. Aux khyox ka kawncau Maix khankix nhie kix grheu phi an lih, viang mawh nan kix ang pon grheu lih heue.” 19Nawh Cao pawk lox mai ah nin ka kix, “Pui ju pa ang koe krax yum rhawm eue, Aux tak kawn sang ot mai pex miex grheung? Aux tak kawn sang gun yeung pex miex grheung? Viex nawh hoek ka Aux heue.” 20Kix viex nawh hoek ka Nawh Cao mai yam yaox phi an ka Nawh Cao dom mawx dom an nawh nyhot kaw an goh piang tiex, nawh lulieh tix, bai lih khaing jheeh nawh heue. 21Nawh Cao chawk ka keeing nawh ah nin, “Ceu in hoik hoek ka nawh miex grheung?” Keeing nawh pawk ah nin, “Mawh tom yam mawh nawh kawn nyawm iak heue. 22Phi an hoik taing nawh daux ngu, daux rawm law lawx, kheu sang yuh nawh laux, heue. Phan Maix chix yuh tix ceu ceu, caux rhawm ka ex mai teem liak” 23Yesux baox ah nin ka nawh, “Maix ah, Phan Maix chix, pui pa yum rhawm chix kuceu heue.” 24Dom mawx dom an keeing kawn nyawm an yo ah nin, “aux yum rhawm heue, teem krax ang yum rhawm aux liak” 25Yam yaox Yesux cub pui hun to hoek tau, Nawh Cao ah ka phi pa seeing brai, “Phi pa aw pa lheet eue, Aux tawx lox ka maix, lih khaing daux nawh mai paw lai baox laig ka nawh heue.” 26Phi an kok yo mai biak nawh mai lih hu khaing daux nawh heue. Kawn nyawm an lih mawh awm pui pa hoik yum, tom pui hun ah nin, “Nawh hoik yum heue.” 27Viang mawh nan Yesux teei taix nawh mai yaog nawh mai nawh kaoh heue. 28Yam hoik laig Nawh Cao ka daux nyiex, yam ot tau Nawh mai kawncau nong nong, kix chawk Nawh ah nin, “Kheu ang ex pon ti grheu phi an lie?” 29Nawh Cao pawk lox ah nin ka kix, “Phi ceu in phan ang mawh kheu rawg bwan mai twah pa ih ang pon ti lih heue.”

Yesux Krai Tideuh

(Mat 17:22-23; Luk 9:43b-45)

30Kix lih hu khaing tan mai hu preeng ka daux meung Galilie mai Nawh Cao ang rhawm kieh pui tawng tix kaux kawx heue. 31Kheu Nawh Cao gau ka kawncau Nawh khankix mai ah nin ka kix, “Tak sang tawx Kawn kawn pui ka daux tawm taix kawn pui khankix, kix tak teei Nawh yum, khaix hoik yum Nawh loe ngaix Nawh tak deeh kaoh im heue.” 32Viang kix ang tawng dee bleeh lox an kawx, kix lhat chawk ka Nawh Cao heue.

Pui Mawx Blon Ting

(Mat 18:1-5; Luk 9:46-48)

33Kix hoek ka veng Kapenion mai yam ot Nawh Cao ka daux nyiex, Nawh chawk kix ah nin, “Yam hoek pex daux krax pex kum pex thung thiang paox tix grawh grawng patix?” 34Kix ang nye, kheu hoik thung thiang kix paox tix, yam hoek daux krax, grawh grawng daux kix pui mawx, lheu ting khaing paox tix heue. 35Nawh Cao ngawm kok kix kao ra kaux hoek, Nawh ah nin ka kix, “Phan pui tix kaux kaux mie ti ting khaing paox tix, nawh tak mawh kaw pa dah khaix khawmuik mai siliex khawmuik heue.” 36Nawh Cao teei kawn nyawm iak tix kaux mai deuh nawh sinax kix, kawm nawh ka taix tix mai Nawh Cao ah nin ka kix, 37“Pui mawx ang ah pa rieb ti teei kawn nyawm iak pa awm in khankix, tix kaux, ka daux ceu kaux Aux, rieb ti teei Aux, pui mawx ang ah pa rieb ti teei Aux, rieb ti teei Aux ang mawh, rieb ti teei Kaw pa ploi Aux hoek heue.”

Pui Ot Plak Ex

(Luk 9:49-50)

38Yohan ah nin ka Nawh Cao, “Sara Cao gau eue, ex yaox pui tix kaux pa grheu phicaox lih ka daux ceu kaux Maix, ex kieh ka nawh kheu ang nawh hawt mai ex heue.” 39Viang mawh nan Yesux ah nin, “Paw vi kieh nawh, kheu ang koe pui tix kaux kawx, pa yuh kaing pa ting sibrawm ka daux ceu kaux Aux, pa pon ti krai pa caox ka grawng Aux laung laung heue. 40Mawh kheu pui pa ang koeng ka ex, ot plak ex heue. 41Pui mawx ang ah pa tawx pex nyaux rawm tix kawk, mawh kheu mawh pex cie Cao Khrit, Aux krai lox tete ka pex, bwanson cie nawh tak ang grai, ang piawm heue.

Pa Tawx Satix

(Mat 18:6-9; Luk 17:1-2)

42Pui mawx ang ah pa kieh kawn nyawm iak khankix pa yum rhawm ka Aux tix kaux kaux sideeing caong tix, lheu mhawm son kaw an, phan preue simaox mhaw pa ting ka ngawg nawh mai taing nawh ka daux rawm sigrit sigra heue. 43Phan taix maix kieh maix sideeing caong tix, kid ti tik heue. Laux taix maix mai laig ka daux pa im ju, mhawm khaing koe taix ra khawn mai laig ka daux mawnarhok, ka daux ngu pa ang chix yeet heue. 44Dee ang kawng chix yum mai dee ang ngu chix yeet. 45Phan caong maix kieh maix sideeing caong tix, kid ti tik heue. Laux caong maix mai laig ka daux pa im ju, mhawm khaing koe caong ra khawn mai taing sau ka daux mawnarhok, ka daux ngu pa ang chix yeet heue. 46Dee ang kawng chix yum mai dee ang ngu chix yeet. 47Phan ngai maix kieh maix sideeing caong tix, koh ti tik heue. Koe ngai maix tix khawn mai laig ka daux Meung Siyiex, mhawm khaing koe ngai ra khawn mai taing sau daux mawnarhok heue.” 48Dee ang kawng chix yum mai dee ang ngu chix yeet. 49Kheu tak teei kih ngu sau ka pui ku kaux daux pui, pa tan ku mu, tak teei kih sau kah heue. 50Kih kienie mawh pa mhawm, viang mawh nan phan pa laoh kih hoik grai, tak sang teei pa yuh ka mawx ti deeh chix kieh nawh laoh? Kieh kih koe ka daux tokaux pex mai kieh tix kaux lai tix kaux khaw paox tix heue.”

Currently Selected:

MAKUX 9: WCL

Highlight

Copy