MAKUX 15

Tawx Yesux Ka Pilat

(Mat 27:1-2,11-14; Luk 23:1-5; Yo 18:28-38)

1Daux ponngawb dom mawx dom an, cao giex kaing li ting khankix mai kuad song mai pui tiiem lai khankix mai cub cao prawng see khawmuik, kum paox tix mai phyawk Yesux mai viex Nawh Cao hu tawx ka Pilat heue. 2Pilat chawk Nawh ah nin, “Maix mawh Simiang pui Yudax lie? Nawh cao pawk lox ka nawh ah nin “Pa ah maix mawh heue.” 3Cao giex kaing li khankix deuh phimap ka Nawh Cao tom nie ceu heue. 4Pilat baox deeh chawk Nawh Cao ah nin, “Maix ang pawk lox tidtix lie? Jhak heue, kix deuh phimap ka Maix tom nie ceu miex ding.” 5Viang mawh nan Yesux ang lai pawk lox tidtix, tom daox deng Pilat kah heue.

Tat See Dam Yum

(Mat 27:15-26; Luk 23:13-25; Yo 18:39—19:16)

6Yam yuh pawie an nawh hoik sax ploi pui pa ot daux thawng ka kix tix kaux, awm kaw pa rawg kix ka nawh heue. 7Koe pui tix kaux pa kok mawh Barabax, pa phyawk tau mai kix pa mawh pui tieh feen, pui pa hoik teei pui yum yam tieh feen kix heue. 8Cub pui hun khankix hu mai rawg mhaing ka nawh, nhie nawh yuh awm pasax yuh nawh, son kix heue. 9Pilat pawk lox ka kix ah nin, “Pex mie ti kieh aux ploi Simiang Pui Yudax ka pex lie?” 10Kheu nawh tawng cao giex kaing li pa ting khankix, hoik teei ti tawx Nawh kheu boh rhawm kix kah heue. 11Viang mawh nan cao giex kaing li pa ting khankix cheeik ka cub pui hun khankix, son sang ploi nawh Barabax ka kix khaing Nawh heue. 12Pilat baox deeh chawk kix ah nin, “Phan mawh nan aux tak yuh patix ka Kaw pa kok pex mawh Simiang pui Yudax?” 13Kix baox kok yo ah nin, “Tawk Nawh piang khaox lhak heue.” 14Pilat baox ah nin ka kix, “Mawh kheu grawng patix, Nawh hoik yuh pa caox pa yuh ka mawx?” Viang mawh nan kix nied ti yo ah nin, “Tawk Nawh piang khaox lhak heue.” 15Pilat simie ti kieh pui hun khankix fah rhawm, nawh tom ploi Barabax ka kix mai teei ti tawx Yesux, son sang sivied Nawh mai tawk Nawh Cao piang khaox lhak heue.

Yuh Pa Ang Khaw Ka Yesux

(Mat 27:27-31; Yo 9:2-3)

16Pui naing khankix tuk Nawh Cao hu ka brawk nyiex dee ot pui naing mai kok pui naing khawmuik khrawm paox tix heue. 17Kix teei kraung raoh klai ceep ka Nawh Cao mai taing mhok kat lawm sau ka Nawh Cao heue. 18Kix jah ti ah nin ka Nawh Cao, “Simiang pui Yudax eue, kieh nyawm ot heue.” 19Kix sivied kaing Nawh Cao ka priem mai baig rawm myia piang Nawh mai grux ngawng tix krub ka Nawh Cao heue. 20Khaix hoik yuh kix pa ang cee cak ka Nawh Cao, kix peeik kraung pa raoh klai khaing Nawh mai deeh ceep kraung cie Nawh. Kix tuk Nawh hu song sang tawk Nawh Cao piang khaox lhak heue.

Tawk Yesux Piang Khaox lhak

(Mat 27:33-44; Luk 23:33-43; Yo 19:17-27)

21Kix khin Simon pui meung Kurene, pa mawh keeing Alezandru mai Rufux, pa hoek khaing daux tiag, hu mai kix, sonsang kieh nawh klawm khaox lhak Nawh Cao heue. 22Kix viex Nawh Cao hu ka dee Gawlaxgawthax, phan toe dee bleeh mawh, “Dee Si-ang Kaing” heue. 23Kix tawx ti yaox sidah niex pa hoik klao tau mai Muran ka Nawh Cao. Viang mawh nan Nawh ang rieb ti teei. 24Kix tawk Nawh Cao piang khaox lhak mai gwieh kraung Nawh sinax kix, khaix hoik nieb kix ti yaox mawh pui mawx pa tak sang teei pa yuh ka mawx. 25Yam tawk kix Nawh Cao piang khaox lhak, mawh bawg yam loe nari heue. 26Lai tiiem grawng deuh Nawh lud, hoik tiiem deuh ka piang ah nin, “SIMIANG PWI YUDAX” 27Kix tawk pui tud rhim ra kaux tau mai Nawh Cao piang khaox lhak, plak dawm Nawh tix kaux mai plak gwiex Nawh tix kaux. 28Phuk lai sigang khri ah nin, “Hoik simin Nawh tau mai pui pa yuh pa ang khaw jiet khankix hoik naog heue.” 29Kix pa hu hoek dex tan, ah pa ang khaw ang jiet ka Nawh Cao mai vuvied kaing tix ah nin, “Ha, Maix pa yieh nyiex bwan mai deeh yuh daux loe ngaix eue, 30taoh tokaux Maix mai lih khaing khaox lhak heue.” 31Awm an cao giex kaing li pa ting mai pui tiiem lai khankix kawx, ah pa ang cee ang cak ka Nawh Cao ah nin, “Nawh chix taoh pui tang kaux, tokaux Nawh, Nawh ang chix taoh. 32Kieh Khrit, Simiang Pui Isarelax, lih khaing khaox lhak yam in, sonsang yaox ex mai yum rhawm ex kah heue.” Kaw pa hoik tawk piang khaox lhak tau mai Nawh Cao kawx, ah pa ang cee ang cak ka Nawh heue.

Grawng Yum Yesux

(Mat 27:45-56; Luk 23:44-49; Yo 19:28-30)

33Yam hoek liah nari praix faik piang haktiex khawmuik tom hoek dim nari. 34Yam hoek dim nari Yesux kok yo lox sinum ah nin, “Elix, Elix, lama sabak-tanix?” Phan toe dee bleeh mawh, “Siyiex Aux, Siyiex Aux, Maix lai tik vud Aux yuh ka mawx?” 35Pui pa cung dex tan tix blah yam mhong kix lox an, ah nin, “Jhak heue, Nawh kok ka Eliyax.” 36Kix tix kaux to hu mai teei gai ploh pa awm tih tix mu pa sau rawm sidah niex naog mai sau ka toh gawng priem mai tawx Nawh nyaux ah nin, “Paw chuh, kieh ex jhak Eliyax sang hoek ti teei Nawh lih lie, ang hoek lie?” 37Yesux ah lox sinum mai deeh tawx khuan tix heue. 38Yam an man tie daux nyiex bwan griah lih ra pak, jah plak piang tom hoek ka caong heue. 39Yam an pui giex kaing naing pa cung dex Nawh Cao, yaox Nawh deeh tawx Khuan mai nawh ah nin, “Pui in mawh Kawn Siyiex tete heue.” 40Bun khankix kawx ot dee singai mai jhak heue. Ka daux kix koe Marix Magadalax mai Marix miex Yakop pa iak mai Yosiep mai Salom, 41pa hoik hawt Nawh yam ot Nawh Cao ka daux meung Galilie, mai khan kheu ka Nawh Cao mai bun tang kaux tom nie pa hoik hoek tau mai Nawh Cao ka veng Yerusaliem heue.

Sipaung Yesux

(Mat 27:57-61; Luk 23:50-56; Yo 19:38-42)

42Yam hoek ponbo kheu mawh Singaix Khre, pa mawh ngaix sivoe ngaix twah, 43Yosiep pui Arimase, pa mawh simiang pa koe min plakngai tokaux nawh kawx, krox ti jhak son yam sang hoek Meung Siyiex. Nawh viex rhawm kwa hu ka Pilat mai rawg mhaing tokaux yum Yesux heue. 44Pilat daox deng ka grawng Nawh Cao hoik khran yum yam an nawh kok pui giex kaing naing hoek ka nawh mai chawk grawng hoik rheung yum Nawh Cao lie? 45Yam hoik mhong nawh grawng ceu an ka pui giex kaing naing, nawh tawx tokaux yum Nawh Cao ka Yosiep heue. 46Nawh liag man paing mai teei Nawh lih pua Nawh ka man paing an mai sau ka daux, daux simeeig, pa hoik saik ka daux rang heue. Nawh plu plie simaox mai thox ka moing daux simeeig an heue. 47Marix Magadalax mai Marix miex Yosie, yaox dee een tokaux yum Nawh Cao heue.

Currently Selected:

MAKUX 15: WCL

Highlight

Copy