MAKUX 11
11
Brug Kawn La
(Mat 21:1-11; Luk 19:28-40; Yo 12:12-19)
1Yam dex hoek kix ka veng Yerusaliem, ka yaong Bephake mai yaong Betanix, ka gawng Sanlun, Nawh Cao ploi kawncau Nawh ra kaux hu, 2mai ah nin ka kiex, “Hu ka daux yaong pa koe sivoe pax mai yam laig pax ka daux yaong an, dom mawx dom an pax tak yaox kawn la pa hoik phyawk tan pa ang pui sax ngawm piang heue. Kah nawh mai viex hoek heue. 3Phan pui tix kaux kaux chawk pax ah nin, Pax yuh ceu in kheu patix? Pax deeh krai ah nin, Simiang lo nawh heue. Kaw an tak deeh ploi nawh hoek tin dom mawx dom an heue.” 4Kiex hu mai yaox kawn la tix mu pa hoik phyawk dex siviex plak praix ka daux krax. Kiex kah nawh viex hu heue. 5Pui pa cung tan tix blah ah nin ka kiex, “Pax kah la in yuh ka mawx?” 6Kiex ah ka kix awm pa hoik krai Yesux mai kix ploi kiex hu heue. 7Kiex viex kawn la an hu ka Yesux mai teei kraung ceep tix sau piang kawn la an mai Nawh Cao ngawm piang la an heue. 8Pui hun teei krang ceep tix nah ti tawm ka daux krax mai tix blah teei lhax khaox pa hoik kid kix khaing daux ma mai tawm heue. 9Kix pa hu sivoe mai kix pa hawt khaix khankix kok yo ah nin, “Hosanna, Kaw pa hoek ka daux ceu kaux Siyiex ting bwanson heue. 10Meung keeing ex Davit pa dex sang hoek, ting bwanson heue. Hosanna dee lhaong khaing paox tix heue.” 11Nawh Cao laig ka daux veng Yerusaliem mai laig ka daux nyiex bwan mai khaix hoik jhak Nawh Cao vung viang ka kuceu, mawh kheu hoik hoek bawg yam ponbo, Nawh Cao lih hu tau mai kawncau Nawh kao ra kaux ka yaong Betanix heue.
Jhax Lawg Khaox Ruh
(Mat 21:18-19)
12Singaix pasax yam hoik lih hoek kix khaing yaong Betanix, Nawh Cao cai rhawm heue. 13Nawh Cao yaox khaox ruh tix khaox ka dee singai pa koe lhax, kheu nan Nawh hu sonsang sawg ti yaox plix. Yam hoek Nawh Cao ka khaox an, Nawh yaox ngie lhax khaing, kheu bawg yam plix plix ruh ang nyang bax hoek. 14Yesux ah nin ka khaox an, “Jah yam in tom hoek leeing ju, paw kieh pui tix kaux kawx ih plix khaing maix,” kawncau Nawh khankix mhong lox an heue.
Kieh Nyiex Bwan Singax
(Mat 21:12-17; Luk 19:45-48; Yo 2:13-22)
15Kix hoek ka veng Yerusaliem mai Nawh Cao laig ka daux nyiex bwan mai jah ti grheu pui pa coh pa liag ka daux nyiex bwan khankix lih mai cot pheen pui pa loh mau khankix mai dee ngawm pui coh sikaux khankix cang klud heue. 16Nawh Cao ang cu ti kieh pui tix kaux kawx, viex kraung tidtix hu preeng daux nyiex bwan. 17Nawh Cao sidiex gau ah nin ka kix, “Hoik tiiem ti deuh ah nin, Nyiex Aux tak kok mawh nyiex dee rawg pui kuceu bwan, ang mawh lie? Viang mawh nan pex hoik kieh mawh dee ot pui tud rhim heue.” 18Cao giex kaing li pa ting khankix mai pui tiiem lai khankix mhong grawng an mai sawg ti yaox, kix sang pon ti yuh Nawh Cao laux yuh ka mawx. Kheu kix lhat ka Nawh Cao, mawh kheu cub pui hun daox deng ka lox sidiex gau Nawh heue. 19Yam hoek ponbo ku bo Nawh Cao lih khaing daux veng heue.
Khaox Ruh Pa Kroh
(Mat 21:20-22)
20Pon ngawb yam hu kix krax, kix yaox khaox ruh an hoik fit hoik kroh hu khawmuik jah tom riah nawh heue. 21Petrux doh keud ka grawng ceu an mai ah nin ka Nawh Cao, “Rabi eue, jhak heue, khaox ruh pa hoik jhax Maix, hoik fit hoik kroh hu khawmuik heue.” 22Yesux pawk lox ah nin ka kix, “Yum rhawm ka daux Siyiex heue. 23Aux krai lox tete ka pex, pui mawx ang ah pa ah ka gawng in, Gah dee ot maix mai rau ka daux rawm sigrit sigra heue, ang koe krax yum rhawm, viang mawh nan phan nawh yum rhawm grawng pa hoik ah nawh, tak mawh son nawh heue. 24Mawh kheu nan Aux krai ka pex, pa rawg bwan mai pa mhaing pex kuceu khawmuik, pex yum rhawm grawh grawng pon khankix mai pex tak sang pon heue. 25Yam mawx ang ah, yam cung pex ti rawg bwan, phan pex koe dee deuh phimap ka pui tang kaux, pluat phimap nawh heue. Kheu Keeing pex pa ot ka daux meung raoma tak pluat phimap son pex heue. 26Viang mawh nan phan pex ang pluat phimap pui tang kaux, Keeing pex pa ot daux meung raoma kawx tak ang pluat phimap pex heue.”
Pon Akhuang Dee Mawx
(Mat 21:23-27; Luk 20:1-8)
27Kix deeh hoek ka daux veng Yerusaliem mai yam hu lai ling Nawh Cao ka daux nyiex bwan, cao giex kaing li mai pui tiiem lai mai kuad song khankix hoek ka Nawh Cao heue. 28Kix chawk ah nin ka Nawh Cao, “Maix pon akhuang sibrawm ti yuh ceu in khankix dee mawx? Pui mawx tawx akhuang sibrawm in ka Maix, ti yuh ceu in khankix lie?” 29Yesux ah nin ka kix, “Aux sang chawk pex ka grawng tix ceu mai pex deeh krai ka Aux mai Aux tak sang krai ka pex grawng pa pon Aux akhuang sibrawm ti yuh ceu in khankix khaing dee mawx heue. 30Krax cubcom Yohan kaoh khaing raoma lie? Phan ang mawh nan kaoh khaing kawn pui lie? Deeh krai ka Aux liak” 31Kix keud tau ah nin, “Phan ex ah Kaoh khaing raoma, Nawh Cao tak chawk ah nin, phan mawh nan yuh patix pex ang yum rhawm ka nawh? 32Viang mawh nan phan ex ah kaoh khaing kawn pui,” kix lhat ka pui khankix, kheu pui khawmuik een Yohan mawh cao jhai tete heue. 33Kix pawk lox ka Yesux ah nin, “Ex ang tawng heue.” Yesux baox ah nin ka kix, “Aux kawx ang krai ka pex grawng pon Aux akhuang sibrawm tiyuh ceu in khankix khaing dee mawx heue.”
Currently Selected:
MAKUX 11: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
