LUKAX 10

Ploi Kawncau Tang Kaux Hu Sidiex

1Khaix ceu in khankix, Simiang, baox laug ti teei kawncau tang kaux atixgliah kaux mai ploi kix hu tix cub ra kaux, ra kaux, plak sivoe ngai Nawh Cao, ka daux ku veng mai kudah kudee, dee dex sang hoek Nawh Cao heue. 2Nawh Cao ah nin ka kix, “Nghox pa kaux pa khaw ti vawg kied nie viang mawh nan pui pa vawg tux heue. Mawh kheu nan pex rawg bwan ka Simiang cao nghox, yuh ka mawx sonsang ploi Nawh pui vawg nghox khankix hoek sonsang vawg nghox Nawh heue. 3Hu dee hu pex heue. Jhak heue, Aux ploi pex hu awm kawn yung iak, ka sinax soxla khankix heue. 4Paw viex hau mau, bau mai kiep, yam hu pex krax paw vi ah lox nawb ka pui tikaux kawx heue. 5Pex laig ka daux nyiex mawx ang ah, ah lox yuh nin ka ha, kieh pa nhim koe piang nyiex in liak. 6Phan kawn praix pa nhim koe tan, pa nhim pex tak ot piang nawh, viang mawh nan phan ang koe, pa nhim an tak deeh ka pex heue. 7Ot ka daux nyiex an mai ih nyaux ceu pa tawx kix. Grawh grawng nawh, pui yuh kaing keung ti pon ngawh riang tix. Paw gah hu tix nyiex hoik tix nyiex heue. 8Pex laig ka daux veng mawx ang ah, phan kix rieb ti teei pex, ih ceu pa khankix sivoe pex heue. 9Cox pui saux ka daux dee an mai ah nin ka kix, Meung Siyiex hoik hoek dex ka pex heue. 10Viang mawh nan, veng mawx ang ah, phan kix ang rieb ti teei pex, lih hu ka daux krax veng an khankix ah nin, 11“Phawng tiex veng pex pa kawb ka caong ex kawx, ex kawt sonsang mawh mhai mawh khen ka piang pex. Viang mawh nan kieh tawng ceu in, Meung Siyiex hoik hoek dex ka pex heue. 12Aux krai ka pex, ka daux ngaix an sax, veng an tak lheu yaoh ti kham geu khaing veng Sawdom heue.”

Veng Pa Ang Yum Rhawm

(Mat 11:20-24)

13Veng Khawrazin eue, maix tak pon pa kha rhawm heue. Veng Biesedax eue, maix tak pon pa kha rhawm heue. Phan hoik yuh kaing pa ting sibrawm khankix pa hoik yuh ka daux pax, ka daux veng Turux mai Sidon, kiex tak hoik dawg doh keud ka phimap tom rheung mai fua tix ka man pa taing ka hauk mai ngawm ka daux nyaox heue. 14Ka daux bawg yam prawng sax, tak lheu yie ti kham geu son veng Turux mai veng Sidon, khaing son pax heue. 15Veng Kapeniom eue, tak yaogyaw maix tom hoek meung raoma lie? Tak viex maix lih hu ka daux meung yum heue. 16Pui pa nghiet lox pex, nghiet lox Aux heue. Pui pa tik ka pex, tik ka Aux heue. Pui pa tik ka Aux, tik ka kaw pa ploi Aux hoek heue.”

Kawncau Tang Kaux Deeh Hoek

17Kawncau atixgliah kaux deeh hoek gaux rhawm ah nin, “Simiang eue, phicaox phicaig khankix kawx, ot greem ex nghiet lox ex ka daux ceu kaux Maix heue.” 18Nawh Cao ah nin ka kix, “Aux hoik yaox Satan rau khaing raoma awm tuhsah heue. 19Jhak heue, Aux hoik tawx sibrawm ka pex, sonsang pon dig pex piang siuing mai tamtim khankix mai ka piang sibrawm pui pa koeng ka pex mai tix ceu kawx ang tau ti pon kieh pex saux heue. 20Paw gaux rhawm kheu phi khankix ot greem pex nghiet lox pex, viang mawh nan gaux rhawm ka pa hoik tiiem ti deuh ceu kaux pex, ka daux meung raoma heue.”

Yesux Gaux rhawm

(Mat 11:25-27, 13:16-17)

21Ka daux bawg yam nari an Nawh Cao gaux rhawm ka daux Khuan Singax Singeh ah nin, “Aux yaogyaw bwanson Maix, Keeing eue, Simiang pa ting piang raoma mai haktiex, kheu hoik mox Maix ceu in khankix, khaing pui lhak lhiem mai pa chix tawng khankix mai hoik plak kieh kawn ngie khankix yaox heue. Mawh heue, Keeing, kheu Maix koe rhawm khaw rhawm ti yuh nan heue. 22Keeing Aux hoik tawx khawmuik ka Aux heue. Tix kaux kawx ang tawng Kawn Cao mawh mawx, lheu khaing Keeing Cao tix kaux khaing mai tix kaux kawx ang tawng Keeing Cao lheu khaing Kawn Cao, Kawn Cao koe rhawm ti plak kieh nawh tawng heue.” 23Nawh Cao veeh ka kawncau Nawh khankix, dee ot kix nong ah nin, “Ngai pa pon tix yaox ceu pa yaox pex khankix, ting bwanson heue. 24Grawh grawng nawh, Aux krai ka pex, cao jhai mai simiang khankix hoik koe tom nie pa simie ti yaox ceu pa yaox pex mai ang pon ti yaox mai kix simie tix mhong pa mhong pex mai ang pon ti mhong heue.”

Lox Tiag Pui Mhawm Samarix

25Jhak heue, cao prawng cao tawng lai been tix kaux kaoh cung sonsang cheuk sang nyaw ti yaox Nawh Cao, chawk ah nin, “Sara Cao Gau eue, sonsang pon aux sin ju leeing ju, aux tak sang yuh ka mawx?” 26Nawh Cao ah nin ka nawh “Hoik tiiem ti deuh daux lai beenli pa yuh ka mawx? Maix phat pa ah ka mawx?” 27Kaw an deeh pawk lox ah nin, “Maix tak moh Siyiex maix khawm rhawm khawm rhi tix khawmuik mai khawm ju tix khawmuik mai khawm riang rao tix khawmuik mai khawm ka dee chix keud tix khawmuik mai maix tak moh paox plawg tix awm moh tokaux tix heue.” 28Nawh Cao baox ah nin ka nawh, “Lox pa pawk maix khaw heue. Yuh nin heue, maix tak pon tix im ju heue.” 29Viang mawh nan kaw an, simie ti yuh tokaux tix, awm pui rahsee pa ang koe dee lud, nawh tom chawk ah nin ka Yesux, “Paox plawg paox nyhawm aux mawh mawx?” 30Yesux pawk lox nawh ah nin, “Pui tix kaux kaoh lih hu khaing veng Yerusaliem, sonsang hu ka veng Yerikho, nawh sidah pui tud rhim pa rud ti teei kraung nawh khawmuik mai tap toi nawh, tom dex yum mai grham nawh tan mai lih hu heue. 31Cao giex kaing li tix kaux lih hawt krax an, yam yaox nawh kaw an, nawh via plak teh krax mai luan hu heue. 32Awm an pui Lewix tix kaux kawx, yam hoek nawh tan, yaox kaw an, via plak teh krax mai luan hu heue. 33Viang mawh nan, pui Samarix tix kaux, yam hu nawh krax hoek dee ot kaw an, yam yaox nawh kaw an, nawh caux rhawm kah, 34mai hoek ka nawh mai groi rawm bee mai rawm plix siiet ka dee mat nawh mai pua dee saux nawh mai deuh nawh ka piang khawng brug nawh mai viex nawh hu ka nyiex nyo mai kia ngien nawh heue. 35Singaix pasax yam lih hu nawh teei denari ra plah mai tawx ka cao nyiex nyo an mai ah nin ka nawh, kia ngien kaw in mai baox uik maix miex ding ka piang in, yam deeh hoek aux sax, aux tak deeh viied ka maix heue. 36Maix ce yuh ka mawx, ka daux pui in loe kaux, mawh mawx pa mawh paox plawg ka kaw pa sidah pui tud rhim an lie?” 37Cao prawng cao tawng lai been an, deeh pawk ah nin, “Mawh kaw pa caux rhawm ka nawh heue.” Yesux baox ah nin ka nawh, “Maix kawx, hu mai yuh awm an heue.”

Hu Fi Ka Mathax mai Marix

38Yam hu kix krax, Nawh Cao laig ka daux yaong tix yaong mai bun tix kaux pa kaux Mathax, rieb ti teei Nawh Cao ka daux nyiex tix heue. 39Bun an koe pux tix kaux pa kaux Marix, pa ngawm liep caong Yesux mai nghiet lox Nawh Cao heue. 40Viang mawh nan Mathax ang nyawm rhawm, kheu kied haoh kaing pa khan pa kheu nawh mai hoek ti ah nin ka Nawh Cao, “Simiang eue, Maix ang keud grawng pux aux, hoik prah grham aux, yuh kaing khan kheu nong nong lie? Mawh kheu nan nhie nawh teem aux liak” 41Yesux pawk lox ah nin ka nawh, “Mathax, Mathax eue maix khi rhawm mai sung sang rhawm, ka kied nie ceu heue. 42Viang mawh nan, lo ngie tix ceu khaing, Marix hoik laug ti cie ceu pa mhawm an, pa tak ang teei khaing nawh heue.”

Currently Selected:

LUKAX 10: WCL

Highlight

Copy