YAM JAH 9

1Siyiex nawb bwan ka Noax mai kawn nawh khankix ah nin, “Kieh pex baox deeh keh haoh hun mai naog ka haktiex in heue.#Jah 1:28 2Totiag kuceu pa koe piang haktiex, pa mawh sim raoma mai can pa im ju piang tiex mai can kuceu pa koe daux rawm sigrit sigra khankix tak koe krax lhat graung sivoe maix heue. Ceu inkix khawmuik, Aux hoik appong ka daux tawm taix maix heue. 3Can ceu pa im ju kuceu, tak sang mawh pa ih son maix, Aux hoik tawx inkix khawmuik ka maix awm tawx taux lhax klai khankix heue. 4Viang mawh nan maix ang pon ti ih nex tau mai nham, kheu mawh nham ju heue.#Krub 7:26-27, 17:10-14, 19:26; Pi 12:16, 23, 15:23 5Aux tak ciyang ka pui pa pah ka ju pex mai tak ciyang ka totiag pa laux yuh ka ju pex mai ka puxaik pex pa pah ka ju puxaik tix heue. 6Pui mawx ang ah, phan nawh kieh nham kawn pui jauh, #Lih 20:13 nham nawh kawx tak yaox ti jauh ka taix kawn pui heue. Mawh kheu Siyiex hoik yuh kawn pui awm grang pakpeung tix heue.#Jah 1:26 7Kieh pex deeh pon kawn praix tom nie, #Jah 1:28 kieh pre haoh hun ka piang haktiex heue.” 8Khaix an Siyiex sikah mai Noax mai kawn praix nawh khankix ah nin, 9“Jhak heue, Aux tak yuh sijax mukheu ka pex, son doeh ru pex khankix, 10can totiag pa im ju khankix tau mai pex pa mawh sim, tobrie, totiag kuceu piang tiex pa hoik lih tau mai pex khaing daux reu khawmuik heue. 11Aux hoik yuh sijax mukheu tau mai pex, sonsang ang lai yuh totiag pa im ju khankix laux leeing ka pa kheem rawm mai ang lai baox kieh rawm kheem piang haktiex heue.” 12Siyiex ah nin, “In mawh mhai rug sijax mukheu pa yuh Aux sinax pex mai Aux, totiag pa im ju, pa ot tau mai pex, khawm doeh ru pex leeing ju heue. 13Aux tak deuh siyawng ka daux paiawm, sonsang mawh mhai rug sijax mukheu sinax Aux mai haktiex heue. 14Yam kieh Aux paiawm ceep ka piang haktiex, tak sidawng yaox siyawng mukheu an ka daux paiawm heue. 15Aux tak doh keud ka sijax mukheu pa hoik yuh tix sinax maix mai Aux, totiag pa im ju kuceu khawmuik, tak ang lai baox deeh kieh rawm kheem laux leeing heue. 16Yam jhak Aux ka siyawng mukheu pa koe daux paiawm, Aux tak doh keud ka sijax mukheu pa yuh tix leeing ju, tau mai can totiag pa im ju pa koe ka piang haktiex in heue.” 17Siyiex baox ah nin ka Noax, “In mawh mhai rug sijax mukheu pa hoik yuh Aux ti deuh sinax Aux mai can totiag pa im ju pa ot piang haktiex khawmuik heue.”

Kawn Simex Noax

18Kawn simex Noax khankix pa lih khaing daux reu, mawh Shemax, Hamax mai Yaphiet. Hamax mawh keeing Khanan heue. 19Inkix loe kaux mawh kawn simex Noax, pa lih tah hu ka piang haktiex heue. 20Noax jah ti yuh kaing ma mai yuh sipeem plix siiet heue. 21Khaix an nawh nyaux rawm plix siiet tom yoek tix mai it kakaong daux nyiex gox tix heue. 22Hamax, keeing Khanan yaox ka it kakaong keeing tix, nawh lih krai puxaik tix ra kaux mhong heue. 23Khaix an Shemax mai Yaphiet teei kraung ceep tix pheen mai kiex deuh piang klip tix mai hu deeh khaix, lhop ka keeing kiex, mawh kheu jhak kiex plak praix yam lhop kiex nawh, kiex tom ang chix yaox ot kakaong keeing tix heue. 24Yam siduad Noax khaing yoek tix ka rawm plix siiet, nawh tawng pa yuh kawn simex tix khankix heue. 25Nawh jhax lawg Khanan ah nin, “Kieh nawh mawh siliex ka siliex puxaik tix khankix heue.” 26Nawh ah nin, “Kieh Simiang Siyiex nawb bwan ka Shemax mai kieh Khanan mawh siliex nawh heue.” 27“Kieh Siyiex joh jhan Yaphiet ting lhaong mai kieh nawh ot daux nyiex gox Shemax mai kieh Khanan mawh siliex nawh heue.” 28Noax baox im ju loe yieh tixphwan num, khaix kheem rawm ka haktiex in heue. 29Noax im ju tom hoek dim yieh tixphwan num mai nawh yum heue.

Currently Selected:

YAM JAH 9: WCL

Highlight

Copy