YAM JAH 18

Sijax Mukheu Keh Kawn Simex

1Khaix an Simiang Siyiex lih bleeh ka nawh hawt daux tiag khaox piakvan, nawh ngawm ka diang siviex nyiex gox man, bawg yam hax koek ka daux singaix an heue. 2Mawh kheu nan nawh yaog ngai tix mai yaox pui loe kaux pa cung hawt nawh tan heue. Yam yaox nawh kix, nawh to hu khaing diang siviex nyiex gox man mai hu rieb ka kix mai krub kix piang tiex tan heue. 3Nawh ah nin, “Simiang Siyiex aux eue, phan aux mawh pa pon bwanson ka sivoe ngai Maix Cao paw nyang luan khaing siliex Maix Cao liak” 4Kieh aux viex rawm ceeix mai khoek caong pex mai laux lee pex greem khaox ha. 5“Aux tak sang viex blah hoek mai ih sonsang deeh koe riang rao pex khawm rhawm khawm rhi heue. Khaix an pex sang deeh ing khaing siliex tix chix heue.” kix ah nin, “yuh awm pa ah maix heue.” 6Mawh kheu nan, Abraham niied tix laig daux nyiex gox man ka Sara ah nin, “Niied maix teei gaox nghox ca loe klong mai klu klao tau mhawm mhawm mai yuh blah ka heue.” 7Abraham to hu ka cub tobrie eei tix mai teei kawn mawie iak tix mu mai tawx ka kawncau tix sonsang niied kix ti khre priex preem son kix heue. 8Nawh teei bee mai rawm teeih tau mai nex kawn mawie pa hoik khre nawh hoek ka sivoe kix heue. Nawh cung greem khaox dex kix yam ih kix heue. 9Khaix an kix ah nin ka nawh, “Moeng maix Sara ot dee mawx?” mai nawh deeh ah nin, “Ot daux nyiex gox man heue.” 10Nawh Cao ah nin, “Aux tak deeh hoek ka maix tete, yam hoek singaix keh nawh heue. Jhak heue, moeng maix Sara tak sang koe kawn simex tix kaux heue.”#Ro 9:9 Sara ngiiet lox kix ka diang siviex nyiex gox man, plak khaix kix heue. 11Yam in Abraham mai Sara hoik kuad sipie mai Sara hoik dieh mee been bun daux yam an heue. 12Mawh kheu nan Sara briex nyiah ka daux rhawm ti ah nin, “Khaix hoik riex ju aux, aux tak sang pon krax pa nyawm rhawm yuh ka mawx? Abraham#1Pe 3:6 kawx hoik kuad heue.” 13Simiang Siyiex ah nin ka Abraham, “Sara nyiah jao patix?” mai nawh ah nin, “Aux rug sang pon kawn tix, tix kaux tete yam hoik kuad aux lie?” 14Pa ang Simiang Siyiex pon yuh ceu pa nu khankix koe tix ceuceu lie?#Luk 1:37 yam hoik hoek bawg yam keh nawh, Aux tak deeh hoek ka maix tete heue. Sara tak koe kawn simex tix kaux heue. 15Viang mawh nan, Sara thiang nawh jao hoik lhat tix ah nin, “Aux ang nyiah heue.” Nawh Cao ah nin, “Ang mawh, maix hoik nyiah tete heue.”

Abraham Khyox Khaw Son Veng Sawdom

16Khaix an pui khankix, yaog ti kaoh khaing tan mai jhak ka plak Sawdom heue, Abraham lih hu tau mai kix mai nawh hu tawx kix tom hoek daux krax heue. 17Simiang Siyiex ah nin, “Aux tak sang mox kaing pa yuh tix ka Abraham yuh ka mawx?” 18“Abraham tak mawh pui pa ting sibrawm tete daux ru nawh mai kawn pui piang haktiex in khawmuik, tak pon bwanson ka daux nawh heue.” 19“Mawh kheu hoik tawng Aux nawh mai nawh tak sidiex gau ka kawn praix tix mai can pui pa koe daux nyiex ma nawh, khaix in sax heue, kix tak hawt grawng lawng khaix Simiang Siyiex mai yuh pa rahsee mai pa khaw caw heue. Awm gumlox Nawh Cao Nawh tak sang viex ceu inkix hoek ka Abraham heue.” 20Simiang Siyiex ah nin, “Mawh kheu lox kok lox yo Sawdom Gawmawrax mai phimap krax lud kix hoik kied ting lhaong heue. 21Aux tak lih hu mai jhak ka pa hoik yuh kix khawmuik, mawh kheu lox kok yo kix hoik hoek ka Aux, mawh ang mawh sonsang tawng Aux ka heue.” 22Khaix an pui an kiex gah ti khaing tan mai hu plak Sawdom! Viang mawh nan, Abraham ca kawn cung sivoe Simiang Siyiex tan heue. 23Abraham tom hoek dex Nawh Cao ah nin, “Maix tak yuh pui pa rahsee laux tau mai pui caox caig khankix lie? 24Phan pui pa rahsee koe daux veng an, tixphwan kaux khex sang yuh Maix dee an laux, Maix ang lhawk ka pui pa rahsee khankix tixphwan kaux pa ot tan lie? 25“Kieh krax pa pah pui pa rahsee tau mai pui caox caig lih hu singai khaing Maix Cao, kieh pui pa rahsee kham geu tau mai pui pa caox khankix, hu singai khaing Maix Cao liak, krax prawng ca Simiang Siyiex ka haktiex mawh krax pa rahsee ang mawh lie?” 26Simiang Siyiex ah nin, “Phan Aux yaox pui rahsee daux veng Sawdom tixphwan kaux Aux tak deeh lhawk ka dee an jao kix heue.” 27Abraham deeh pawk lox ah nin, “Mawh tete yam in, viang aux mawh phawng tiex mai nyaox kawx, aux tak sang viex lox khyox khaw in hoek ka Maix Simiang Siyiex heue.” 28Phan pui rahsee an tixphwan kaux, dieh khaing phwan kaux, Maix tak yuh veng an laux kheu ang kix naog tixphwan kaux lie?” Nawh Cao ah nin, “Phan Aux yaox koe kix tixpon phwan kaux, Aux tak ang yuh kix laux leeing heue.” 29Khaix in nawh baox deeh ah nin ka Nawh Cao, “Phan kix koe tixpon kaux Maix sang yuh ka mawx?” Nawh Cao ah nin, “Aux tak ang yuh laux, jao tixpon kaux an heue.” 30Nawh ah nin, “Paw kieh Simiang Siyiex song rhawm liak” aux tak sang ah nin, “Phan ex kawn yaox pui mhawm tixngoe kaux tan, Maix sang yuh ka mawx?” Nawh Cao deeh ah nin, “Aux tak ang yuh laux, phan Aux kawn yaox tixngoe kaux tan heue.” 31Khaix an nawh ah nin, “Mawh tete heue. Aux hoik viex ceu inkix piang tokaux cao tix mai krai ka Maix Simiang Siyiex heue. Phan ex kawn yaox kix tixnga kaux tan Maix tak sang yuh ka mawx?” Nawh Cao ah nin, “Aux tak ang yuh kix laux leeing jao pui an khankix tixnga kaux heue.” 32Nawh ah nin, “Paw nyang kieh Simiang Siyiex song rhawm ka ha, kieh aux ghoik tix krai tix bawg khaing, phan ex kawn yaox kix kao kaux tan, Maix tak sang yuh ka mawx?” Nawh Cao ah nin, “Aux tak ang yuh kix laux leeing jao pui an khankix kao kaux heue.” 33Khaix hoik sikah Nawh Cao tau mai Abraham, dom mawx dom an Nawh Cao hu dee hu tix mai Abraham ing ka dee ot tix heue.

Currently Selected:

YAM JAH 18: WCL

Highlight

Copy