EZARAX 7
7
Grawng Hoek Ezarax Ka Veng Yerusaliem
1Yam in khaix hoik ceu inkix, ka daux bawg yam kwang Atazerit simiang Pasha ka haktiex, Ezarax kawn simex Serayax pa mawh kawn simex Azarix, kawn simex Hilakhix. 2Hilakiyax mawh kawn simex Shalum, Shalum mawh kawn simex Tadok, Tadok mawh kawn simex Ahitup, 3Ahitup mawh kawn simex Amariyax, Amariyax mawh kawn simex Azariyax, Azariyax mawh kawn simex Merayok, 4Merayok mawh kawn simex Tarahiyax, Tarahiyax mawh kawn simex Awzi, Awzi mawh kawn simex Bukhix, 5Bukhix mawh kawn simex Abishu, Abishu mawh kawn simex Phinehiet, Phinehiet mawh kawn simex Elaza, Elaza mawh kawn simex Arun pa mawh cao giex kaing li pa ting heue. 6Ezarax in hoik hoek khaing Babulon; mai nawh mawh cao pa min ka lai lox tat jhawm prawng pa hoik tawx Siyiex ceu pui Isarelax ka Mose heue. Simiang hoik cu tix tawx pa mhaing nawh khankix ka nawh, mawh kheu hoik koe plawng taix Siyiex piang nawh heue. 7Kawn praix ceu pui Isarelax khankix tiblah, pa mawh cao giex kaing pui Lewix, cao pa ah lai rhax, cao pau siviex mai cao pa kham geu ti yuh kaing nyiex bwan Siyiex khankix hoik hoek ka veng Yerusaliem, baux yam kwang simiang Atazarit ka daux haktiex aliah num heue. 8Ezarax hoek ka veng Yerusaliem daux khix phwan, baux num kwang simiang ka haktiex aliah num tix num heue. 9Ka daux khix tix, tix ngaix nawh jah krax khaing veng Babulon mai ka daux khix phwan tix ngaix nawh hoek ka veng Yerusaliem, mawh kheu hoik koe plawng taix mhawm Siyiex piang nawh heue. 10Grawh grawng nawh Ezarax hoik but rhawm tix sawg gumlox tat jhawm prawng Siyiex mai sonsang hawt yuh mai sonsang gau tix gumlox beenli mai lox tat jhawm prawng pa deuh tix khankix ka daux ceu pui Isarelax heue.
Lai Tiiem Atazerit Ka Ezarax
11In mawh bua lai pa tiiem simiang Atazerit tix tawx ka cao giex kaing li pa mawh cao pa tiiem lai mai pa min ka gumlox pingnyap Siyiex mai ka gumlox beenli Nawh Cao pa hoik tawx ka ceu pui Isarelax khankix, 12khaing Atazerit pa mawh simiang piang simiang khankix, tawx hoek ka cao giex kaing li Ezarax, pa mawh cao tiiem lai pa min ka gumlox tat jhawm prawng Siyiex meung raoma tix kaux, kieh pa nhim pa grum naog koe piang maix hu sivoe ngai heue. 13Aux tawx lox tix ka can pui Isarelax khankix mai cao giex kaing li mai pui Lewix pa ot ka daux meung haktiex aux khankix, pa tang koe rhawm tix hu ka veng Yerusaliem khawmuik, tak pon ti hu tau mai maix heue. 14Simiang mai cao tawx krax keud nawh khankix aliah kaux hoik ploi maix hu, sonsang chawk cheng ka grawng haktiex Yudax mai veng Yerusaliem, tau mai gumlox tat jhawm prawng Siyiex maix pa koe ka daux tawm taix maix khankix, 15mai baox teei maix viex mau khri an khankix, pa koe rhawm simiang mai cao pa tawx krax keud nawh khankix tix tan ka Siyiex ceu pui Isarelax, pa ot ka daux veng Yerusaliem, 16tau mai mau mai khri pa pon maix khaing baoh haktiex Babulon khankix mai khawm krax tan pa koe rhawm pui mai cao giex kaing li khankix tix tan, ka son nyiex cao kix ka daux veng Yerusaliem; 17mawh kheu nan yam in maix teei mau in mai nied teei ti tawx mawie mhaing, yung mhaing mai kawn yung iak khankix tau mai krax tan phawng nghox ca im mai khawm ka pa nyaux khankix mai tan ceu an piang khu dee tan nyiex bwan Siyiex daux veng Yerusaliem heue. 18Ka can mau khri pa kawn deuk khankix maix mai puxaik maix khankix mhawm ti yuh ka mawx son pex yuh ceu ankix awm pa koe alo Siyiex pex heue. 19Son kraung shiao son kaing jhaw nyiex bwan Siyiex pa hoik ap ka maix, teei maix tawx khankix khawmuik ka plak sivoe Siyiex daux veng Yerusaliem heue. 20Can ceu pa kawn lo khankix son nyiex bwan Siyiex maix mai pa kawn sang caw maix teei ti tawx khankix, teei ti tawx khaing daux krao sinngao cie simiang heue. 21Aux pa mawh simiang Atazerit tawx lox tix ka cao pa priex sinngao khankix, pa ot ka baoh haktiex toi rawm klawng plak klip singaix khawmuik, tak tawx can ceu pa mhaing cao giex kaing li Ezarax cao tiiem lai pa min ka gumlox tat jhawm prawng Siyiex meung raoma, kieh pex khre tix tawx phai phai, 22tom hoek mee tix yieh talantan mau mai gaox nghox ca tix yieh kawrax, khawm rawm plix shiiet khankix tix yieh bat mai rawm bee tix yieh bat, khawm kih pa ang lai simin heue. 23Can ceu pa hoik tawx Siyiex meung raoma, kieh mawh pa coca ti yuh grum naog mhawm mhawm, son nyiex bwan Siyiex meung raoma heue. Kheu lai sang kieh krax song rhawm hoek piang simiang mai piang meung haktiex simiang khawm doeh kawn simex nawh khankix yuh ka mawx lie? 24Aux baox krai mai kieh pex tawng ang lai mawh pa khaw daux been sonsang koh tix keen mai mau gawng mai ngawh gha khankix ka cao giex kaing li pui Lewix khankix mai cao pa ah lai rhax, cao pa pau siviex, pa khaw ti yuh kaing son nyiex bwan mai pui cau son nyiex bwan Siyiex heue. 25Maix pa mawh Ezarax eue, pa hoik tawx Siyiex cuyi pingnya ka maix, maix tak yaog ti deuh cao prawng see mai cao tat see mai cao pa kwang ka baoh haktiex toi rawm klawng plak klip singaix khawmuik, ka can pui pa tawng ka gumlox tat jhawm prawng Siyiex maix mai gau ka can pui pa ang nyang tawng ka ceu ankix heue. 26Can pui pa ang hawt yuh awm gumlox tat jhawm prawng Siyiex maix mai ka lox tawx simiang khankix, kieh nied tix prawng ca piang nawh, ka daux pa pah yum ang ah, krax pa grheu lih ang ah, krax pa rhim ti teei kraung khankix ang ah, krax pa laung ka daux thawng ang ah heue. 27Kieh krax pa yaogyaw bwanson Siyiex keeing ex khankix, pa hoik sau ti deuh pa awm in ka daux rhawm simiang sonsang sum nyiex bwan Siyiex pa koe daux veng Yerusaliem mhawm grang, 28mai hoik pon krax pa caux rhawm ka plak sivoe simiang mai cub cao tawx krax keud nawh khankix mai ka plak sivoe cub cao kaing naing ting khawmuik pa ot greem tawm taix simiang heue. Mawh kheu nan aux hoik koe riang rao, awm hoik koe plawng taix Siyiex piang aux mai aux hoik kraix khrawm cao kaing ting pui Isarelax khankix lih hu tau mai tix heue.
Currently Selected:
EZARAX 7: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
