KAWNCAU 7

Lox Sidiex Sathephan

1Cao giex kaing li pa ting chawk ah nin, “Grawng ceu in khankix mawh tete lie?” 2Nawh deeh ah nin, “Puxaik khankix mai keeing khankix eue, nghiet heue, Siyiex pa ting min plakngai hoik bleeh ka keeing ex Abraham yam ot nawh ka daux meung Mesopotemia, ka sang ot nawh ka daux veng Haran, 3mai ah nin ka nawh, maix lih khaing daux haktiex maix mai paox ru maix mai hoek ka daux haktiex pa tak sang jhi Aux maix yaox heue.#Jah 12:1 4Khaix an nawh lih khaing haktiex pui Kaladie mai hu ot ka daux veng Haran #Jah 11:31mai khaix hoik yum keeing nawh, Siyiex gah nawh khaing tan, bleeh ka daux haktiex in, dee ot pex yam in heue.#Jah 12:4 5Nawh ang tawx sinngao ka nawh daux haktiex in. Viang mawh dee kub dig nawh caong tix, tix khawn kawx ang tawx mai Nawh hoik grux tawx lox mukheu ka nawh, grawng sang tawx haktiex in ka nawh mai ka ru nawh khankix, #Jah 12:7, 13:15, 15:18, 17:8yam ang nawh nyang bax koe kawn tix kaux kawx heue. 6Siyiex hoik ah nin, Doeh ru nawh tak sang mawh nyo sinie ka daux meung pui tang ceu mai kix tak sang mawh siliex cawng mai kham geu ceu pa khin pui, son pon yieh num heue. 7Ceu pui kix tak sang yuh siliex cawng, Siyiex ah nin, “Aux tak sang prawng ca mai khaix an kix tak sang lih hu mai kix tak sang krub Aux ka dee in heue”.#Jah 15:13-14 8Siyiex tawx lox mukheu pa mawh been pa pat hak ka Abraham heue.#Jah 17:10-14 Nawh koe kawn pa mawh Icak #Jah 21:2-4mai yam uik hoek daix ngaix, nawh pat hak nawh heue. Icak koe kawn pa mawh Yakop#Jah 25:26 mai Yakop koe kawn pa mawh tax du kao ra kaux heue.#Jah 29:31—35:18 9Tax du khankix boh rhawm ka Yosiep #Jah 37:11mai coh ti tawx nawh ka daux meung Ejiptux, viang mawh nan Siyiex ot tau mai nawh.#Jah 39:2, 21 10Taoh nawh khaing krax kha rhawm nawh khawmuik mai tawx ceu pa khaw caw rhawm nawh mai pingnya cuyi sivoe Pharaw, pa mawh simiang meung Ejiptux mai nawh kieh nawh mawh, simiang giex kaing piang meung Ejiptux mai piang nyiex haw nawh khawmuik heue.#Jah 41:39-41 11Yam an meung Ejiptux khawmuik mai meung Khanan hoek sibhawm ting mai kied kha rhawm mai tax du ex sawg ang lai yaox pa ih heue.#Jah 41:54-57 12Yam mhong Yakop, grawng koe pa ih ka daux meung Ejiptux, nawh ploi tax du ex bawg phao ka heue.#Jah 42:1-2 13Yam hu ra bawg tix bawg, Yosiep kieh puxaik nawh khankix tawng tokaux nawh. #Jah 45:1Pharaw tawng grawng ru Yosiep heue.#Jah 45:16 14Yosiep ploi kix hu kok keeing nawh Yakop mai ru nawh khawmuik, #Jah 45:9-10,17-18pa koe atixgliah phwan kaux heue.#Jah 46:27 15Yakop lih hu ka daux meung Ejiptux#Jah 46:1-7 nawh mai tax du ex khankix yum tan heue.#Jah 49:33 16Kix klawm kix hu ka daux veng Shekhim mai deuh kix ka daux simeeig pa hoik liag Abraham ti teei ka mau khaing kawn simex Hamaw khankix, ka daux veng Shekhim heue.#Jah 23:3-16, 33:19, 50:7-13; Yaw 24:32 17Bawg yam pa hoik grux tawx Siyiex lox mukheu ka Abraham dex sang hoek, pui baox nie haoh hun ka daux meung Ejiptux, 18tom lih koe simiang tix kaux piang meung Ejiptux, pa ang tawng ka Yosiep heue.#Lih 1:7-8 19Kaw an yuh cuyi lukliak lukle ka pui ceu ex#Lih 1:10-11 mai yuh pa ang khaw ang jiet ka tax du ex, yuh ka mawx kix sang tik kawn ngie kix khankix, son ang kix sang im heue.#Lih 1:22 20Ka daux bawg yam an, Mose keh mai kied jiet mhawm grang heue. Eei tix ka daux nyiex keeing nawh loe khix heue.#Lih 2:2 21Yam tik nawh, kawn bun Pharaw teei nawh mai eei nawh awm pa mawh kawn lih tix heue.#Lih 2:3-10 22Gau Mose ka pingnya cuyi pui meung Ejiptux khawmuik mai nawh ting sibrawm ka daux gumlox mai khawm kaing pa yuh tix heue. 23Yam dex hoek ju nawh tixpon num, nawh koe rhawm ti sang hu fi ka puxaik nawh, pa mawh pui Isarelax heue. 24Nawh yaox kix tix kaux kham geu pa ang caw mai nawh ot plak nawh mai pawk bix kaw pa khin an mai pah pui Ejiptux an yum heue. 25Nawh ce puxaik nawh khankix tawng grawng Siyiex sang tawx pa kieh kix luan ka tawm taix nawh, viang mawh nan kix ang tawng. 26Ngaix pasax nawh hoek mai yaox pui pa simah ka paox tix mai nawh sang kieh raw kieh yiien nhim, ah nin, pui eue, pax mawh puxaik, pax lai yuh pa ang khaw ka paox tix, tix kaux lai tix kaux yuh ka mawx? 27Viang mawh nan kaw pa yuh pa ang khaw ka paox plawg nawh an, nyheen nawh yoi, ah nin, mawx pa kieh maix mawh cao giex kaing mai cao prawng ca piang ex? 28Maix khex mie ti pah aux yum awm pah maix pui Ejiptux yum kawx kawx lie? 29Mose to kheu lox an mai mawh pui pa hu ot ka daux haktiex Midian,#Lih 2:11-15 dee koe nawh kawn simex ra kaux heue.#Lih 18:3-4 30Khaix hoik naog tixpon num, kawncau Siyiex tix kaux lih bleeh ka nawh, ka daux tiag gawng Sina, ka daux raongu, ka daux yeem khaox heue. 31Yam yaox Mose ceu an, nawh daox deng ka pa yaox tix mai yam nawh greed ti jhak dee dex, lox Siyiex lih hoek ti ah nin, 32Aux mawh Siyiex tax du maix khankix, pa mawh Siyiex Abraham, Siyiex Icak mai Siyiex Yakop heue.

Mose Siyaung Mai Ring Jhak

33Siyiex ah nin ka nawh, Peeik kiep khaing caong maix, mawh kheu dee cung maix mawh haktiex pa singax singeh heue. 34Aux hoik yaox pui cie Aux pa kha rhawm, pa ot ka daux meung Ejiptux tete mai hoik mhong lox riag lox ngia kix mai Aux hoik lih hoek sonsang kieh kix luan heue. Hoek yam in heue, Aux sang ploi maix hu ka daux meung Ejiptux.#Lih 3:1-10 35Mose kaw pa ang kix rieb ti teei ah nin, mawx pa kieh maix mawh cao giex kaing mai cao prawng ca piang ex? Kaw an Siyiex hoik kieh mawh khawm cao giex kaing mai cao pa taoh, ka tawm taix kawncau Siyiex, pa hoik lih bleeh ka nawh ka daux yeem khaox an heue. 36Pui in hoik thong kix lih, khaix hoik yuh ceu pa daox deng mai mhai ka daux meung Ejiptux#Lih 7:3 mai ka daux rawm sigrit sigra raoh #Lih 14:21mai ka daux tiagtu tixpon num heue.#Si 14:33 37In mawh Mose, kaw pa hoik ah nin ka pui Isarelax, Siyiex tak sang kieh Cao jhai lih tix kaux, khaing ka daux puxaik pex, pa awm aux heue.#Pi 18:15, 18 38Kaw in mawh pa hoik ot ka daux cub an, daux tiagtu, tau mai kawncau Siyiex an, pa hoik sikah mai nawh ka gawng Sina tau mai tax du ex khankix, pa hoik pon ti tawx lox pa im ju ka ex heue. 39Tax du ex ang nghiet mai nyheen khaing kix mai koe rhawm ti sang deeh ing ka meung Ejiptux, 40mai ah nin ka Arun, Yuh siyiex son ex, pa sang hu sivoe ex, grawng nawh kheu Mose in, pa hoik thong ex lih khaing daux meung Ejiptux, ex ang tawng, hoik mawh pa yuh ka mawx ka nawh heue.#Lih 32:1 41Ka daux bawg yam ngaix an khankix, kix yuh riang kawn mawie mai kix viex pa tan ka riang grang mai kix gaux rhawm ka daux khaix taix pa hoik yuh tix heue.#Lih 32:2-6 42Mawh kheu nan Siyiex deeh veeh khaing kix mai grham kix krub cub raoma, awm hoik tiiem ka daux phuk lai cao jhai khankix ah nin, geh pui Isarelax eue, pex hoik tan Aux ka tobrie pa hoik pah yum ka daux tiagtu tixpon num lie? 43Pex hoik yaog nyiex gox Molawk mai simuing siyiex Rephan, riang pa hoik yuh pex ti krub ka khankix. Mawh kheu nan Aux tak viex pex hu ka veng Babulon heue.#Amo 5:25-27 44“Tax du ex khankix hoik koe nyiex gox bwan, pa kham mhai rug ka daux tiagtu, awm hoik krai Nawh ka Mose, yuh ka mawx, son nawh, sang yuh hawt riang pa hoik yaox nawh heue.#Lih 25:9, 40 45Tax du ex hoik toe ti viex nyiex gox an laig yam caw bawg yam kix, yam hu kix greem Yawsux #Yaw 3:14-17ti teei haktiex pui tang ceu, pa grheu Siyiex ti tik sivoe ngai tax du ex, tom hoek bawg yam ngaix Davit khankix heue. 46Kaw pa pon bwan sivoe ngai Siyiex mai rawg mhaing sonsang pon ti yaox dee ot son Siyiex Yakop heue.#2Sa 7:1-16; 1Been 17:1-14 47Mawh Sawlamon pa yuh nyiex son Nawh heue.#1Sim 6:1-38; 2Been 3:1-17 48Viang mawh nan Kaw pa ting lhaong khaing khawmuik, ang ot ka daux nyiex pa yuh ka taix, awm hoik krai cao jhai ah nin, 49Raoma mawh dang ngeung Aux mai haktiex mawh ngot dee deuh Aux caong tix heue. Siyiex ah nin, tak sang sum nyiex pa yuh ka mawx son Aux? Phan ang mawh nan, Aux tak koe dee laux lee pa yuh ka mawx? 50Taix Aux hoik yuh ceu in khankix khawmuik ang mawh lie?#Isa 66:1-2 51“Pui pa cong ngawg mai pa ang pat hak ka daux rhawm mai yhaok eue, pex sidien ka Khuan Singax Singeh jheung jheung, pex yuh awm pa sax yuh tax du pex heue.#Isa 63:10 52Hoik koe cao jhai kaw pa yuh ka mawx, pa ang tax du pex tuktiak kah? Kix pah kix yum pa jhi sivoe ka sang hoek. Kaw pa rahsee heue. Kaw pa pex hoik lih mawh pui pa tik vud mai pui pa teei yum heue. 53Pex pa hoik pon lai beenli pa hoik tawx kawncau Siyiex khankix, viang mawh nan pex ang priex ti hawt heue.”

Dheem Sathephan Ka Simaox

54Yam hoik mhong kix lox grawng ceu in khankix, dung ka rhawm kix mai kix song rhawm mai greeik rhang tix ka Sathephan heue. 55Viang mawh nan nawh naog ka Khuan Singax Singeh mai jawg ti maong ka raoma mai yaox min plakngai Siyiex mai yaox Yesux cung plak tai khawn dawm Siyiex, 56ah nin, “Jhak heue, aux yaox raoma uik baoh mai Kawn kawn pui cung plak taix khawn dawm Siyiex heue.” 57Viang mawh nan kix kok yo lox sinum mai thox yhaok tix mai kix khrawm paox tix tau mai hu plab ka nawh. 58Kix taing nawh plak praix veng mai teei simaox dheem nawh kah mai pui pa kham mhai rug khankix teei kraung ceep tix mai een dex caong pui pa awn ju tix kaux, pa kaux Sawlux heue. 59Kix dheem Sathephan ka simaox, yam rawg nawh bwan ah nin, “Simiang Yesux eue, rieb ti teei khuan aux liak.” 60Nawh grux ngawng tix, kok yo lox sinum ah nin, “Simiang eue, paw teei ti deuh phimap in piang kix liak.” Khaix hoik ah nawh nan, nawh man ti it heue.

Currently Selected:

KAWNCAU 7: WCL

Highlight

Copy