KAWNCAU 5

Ananix Mai Sapphirax

1Pui tix kaux pa kaux Ananix mai moeng nawh Sapphirax coh ceu pa koe kiex tix ceu, 2mai nawh khawm moeng nawh, awm caw rhawm kiex paox tix mai mox ti een ngawh an tix blah mai viex ngie tix blah hu een ka caong kawncau pa ting khankix heue. 3Viang mawh nan Petrux ah nin, “Ananix eue, yuh ka mawx maix lai kieh Satan naog ka rhawm maix, sonsang pie ka Khuan Singax Singeh mai mox ti een ngawh haktiex an tix blah? 4Yam kawn koe haktiex an mawh cie maix ang mawh lie? Khaix hoik coh haktiex an maix sang yuh ka mawx ka ngawh an koe ka maix ang mawh lie? Kheu maix lai keud ti yuh ceu in ka daux rhawm maix? Maix hoik pie ka kawn pui ang mawh, viang mawh nan, hoik pie ka Siyiex heue.” 5Yam mhong Ananix lox ceu an khankix nawh goh mai dud rhawm heue. Pui pa mhong grawng an khawmuik kied lhat ka heue. 6Pui pa awn ju khankix kaoh mai pua nawh mai klawm nawh lih hu mai sipaung nawh heue. 7Khaix an rheung dex koe loe nari, moeng nawh ang tawng grawng pa hoik mawh an mai hoek ti laig tan. 8Petrux chawk nawh ah nin, “Krai ka aux, pax coh haktiex an pon ngie ding khaing lie? Nawh deeh krai ah nin, “Mawh, pon ding khaing heue.” 9Petrux baox chawk ah nin ka nawh, “Kheu pax lai kum ti mawh rhawm tix mu, sonsang cheuk sang nyaw ka Khuan Siyiex lie? Jhak heue, caong kix pa hoik sipaung mex maix ot ka siviex mai kix tak sang klawm maix lih heue. 10Bun an goh dom mawx dom an ka liep caong nawh mai dud rhawm heue. Pui pa awn ju an khankix laig mai yaox pa hoik yum nawh mai kix klawm nawh lih mai sipaung nawh liep mex nawh heue. 11Pui ceu cao khawmuik mai pui pa mhong grawng ceu in khankix khawmuik die lhat kah heue.

Kawncau Yuh Mhai Daox Am

12Ka tawm taix kawncau pa ting khankix yuh mhai tom nie mai pa daox deng tom nie, ka sinax pui khankix mai kix khawmuik ih rhawm paox tix ot piang grah Sawlamon heue. 13Pa deuk pa taik khankix, ring yuh paox pie mai kix, viang mawh nan pui khankix yaogyaw ka kix heue. 14Cub pui pa yum rhawm Siyiex khawm simex khawm bun, baox nie haoh hun heue. 15Kix klawm pui pa koe jhawm saux hu ka daux krax mai een kix piang ku, piang bi, yuh ka mawx yam lawng Petrux krax, peue nawh sang kheem sang veei ka kix tix blah heue. 16Pui haoh hun pa ot daux veng khankix pa koe sivie siveng veng Yerusaliem khrawm paox tix viex pui pa koe jhawm saux mai pui pa laig phi pa seeing pa tuktiak khankix mai kiex cox kix ku kaux daux pui khawmuik moi heue.

Kawncau Yaox Ti Kham Geu

17Cao giex kaing li pa ting mai pui pa ot tau mai nawh khawmuik pa mawh cub pui Sadukie kaoh mai naog krax boh rhawm heue. 18Kix giex kawncau pa ting khankix mai sau kix ka daux thawng. 19Kawncau Siyiex tix kaux hoek yam pon sawm, paoh siviex thawng mai viex kix lih ah nin, 20“Pex hu mai cung ka daux nyiex bwan mai sidiex gau ka pui khankix, grawng gumlox pa im ju khawmuik heue.” 21Yam mhong kix grawng ceu in, kix laig ka daux nyiex bwan yam dex sang riang praix mai sidiex gau heue. Cao giex kaing li pa ting mai kix pa ot tau mai nawh hoek mai kok cub kuad song pa prawng see mai kuad pui Isarelax pa giex kaing khankix khrawm paox tix khawmuik mai ploi kix hu ka nyiex thawng, sonsang viex kawncau pa ting khankix hoek heue. 22Yam hu pui cau soi khankix ka daux thawng kix ang yaox mai kix deeh hoek krai, 23Ah nin, “Ex yaox pa hoik song siviex nyiex thawng mhawm mhawm mai pui pa pau cung dex ka siviex khankix heue. Viang mawh nan yam ex paoh siviex ex ang yaox pui ka daux tix kaux kawx heue.” 24Yam mhong cao giex kaing nyiex bwan mai cao giex kaing li pa ting khankix ka lox an, kix keud ang doh, grawng in tak sang yuh ka mawx. 25Pui tix kaux hoek mai krai ka kix, “Jhak heue, pui pa hoik sau pex daux thawng, cung ka daux nyiex bwan mai sidiex gau ka pui khankix heue.” 26Khaix an cao giex kaing nyiex bwan mai pui cau soi khankix, hu mai viex kawncau pa ting khankix hoek, viang mawh nan kix ang nieb yuh, nieb khin ka kix, kheu lhat kix pui khankix teei simaox dheem kix kah heue. 27Yam hoik viex kix kawncau pa ting khankix, kix deuh kix sivoe cub kuad song pa prawng see heue. Cao giex kaing li pa ting chawk kix, 28Ah nin, “Ex hoik tawm lox ka pex, ang kieh sidiex gau ka daux ceu kaux in mai jhak heue, pex hoik kieh veng Yerusaliem naog ka lox sidiex gau pex mai keud ti sang viex nham Pui in hoek piang ex heue.”#Mat 27:25 29Viang mawh nan Petrux mai kawncau pa ting tang kaux khankix, pawk lox ah nin, “Ex tak lai nghiet lox Siyiex khaing lox kawn pui heue. 30Siyiex tax ex, keeing ex, hoik kieh Yesux deeh kaoh im, Kaw pa hoik preue pex ka khaox mai teei yum heue. 31Siyiex hoik yaog Nawh Cao deuh ka taix khawn dawm Nawh, sonsang kieh mawh Simiang mai Cao Taoh, sonsang tawx krax doh keud mai pluat ploi phimap ka pui Isarelax heue. 32Ex mawh pui pa kham mhai rug grawng ceu in khankix mai Khuan Singax Singeh pa tawx Siyiex ka pui pa nghiet lox Nawh kawx, mawh pa kham mhai rug heue.”

Lox Tawx Satix

33Kix pa mhong lox an dung ka rhawm kix mai kix koe rhawm tix sang pah kawncau pa ting khankix yum heue. 34Viang mawh nan, pui tix kaux ka daux cub kuad song pa prawng see, pa mawh Pharishie, pa kaux Gamalelax, pa mawh cao gau lai been, pa yungyi pui kah khawmuik, kaoh cung mai tawx lox kieh kawncau pa ting khankix lih hu tivud heue. 35Nawh ah nin ka kix, “Pui Isarelax khankix eue, rien rhawm tokaux tix, ka grawng pa dex sang yuh pex ka pui inkix heue. 36Grawh grawng nawh, glang ka ngaix in khankix dix, pui pa kaux Thudax tix kaux lih hoek mai yaw tokaux tix mawh pa koe min plakngai mai pui tix blah pa dex koe pon yieh, neuex tokaux kix mai nawh heue. Hoik pah kaw an yum mai pui pa nghiet lox nawh khawmuik prung prang mai laux leeing heue. 37Khaix an ka daux bawg yam singaix yam teei yam tiiem ceu kaux an kix, pui meung Galilie pa kaux Yudax tix kaux lih hoek mai nyaw glaw pui tom nie hawt khaix nawh heue. Tokaux nawh kawx hoik laux leeing mai pui pa nghiet lox nawh khawmuik kawx, prung prang hu heue. 38Yam in aux krai ka pex, grham, paw chuh ka pui inkix mai kieh kix ot nong nong heue. Mawh kheu can pa yuh pa keud kix, phan mawh pa kaoh khaing kawn pui tak laux leeing heue. 39Phan mawh pa kaoh khaing Siyiex, pex ang pon yieh laux heue. Phan ang mawh nan ha pex kox tak awm pui pa cha pa yuh ka Siyiex heue.” 40Kix nghiet lox nawh mai yam hoik kok kix kawncau pa ting khankix hoek, kix sivied kix mai tawm lox ka kix, son ang kix sang sidiex gau ka daux ceu kaux Yesux mai ploi kix hu heue. 41Kawncau pa ting khankix lih khaing cub kuad song pa prawng see mai gaux rhawm kheu hoik sawn kix pa keung ti kham geu pa kaig tua, son Ceu kaux an heue. 42Ku ngaix kix sidiex gau grawng Yesux mawh Cao Khrit ka daux nyiex bwan mai ka daux nyiex kix, ang jud ang jai heue.

Currently Selected:

KAWNCAU 5: WCL

Highlight

Copy