KAWNCAU 2

Khuan Singax Lih Hoek

1Yam ngaix pawie Pientekote #Krub 23:15-21; Pi 16:9-11hoik hoek ti grum naog, kix khawmuik ot tau tix dah heue. 2Dom mawx dom an lox lih hoek khaing raoma awm lox phlu bhaung ting mai naog daux nyiex khawmuik ka dee ngawm kix heue. 3Kix yaox bleeh dak kukak khankix pa awm ngu mai tum piang kix ku kaux heue. 4Kix khawmuik naog ka Khuan Singax Singeh mai jah ti sikah ka daux lox tang ceu khankix, awm pa tawx Khuan kix ah heue. 5Ka daux bawg yam an koe pui Yudax ka daux veng Yerusaliem, pa mawh pui pa chix nab yam ka Siyiex, pa kaoh khaing meung pui ku meung pa koe greem raoma heue. 6Yam mhong lox pa sinum an, pui hun khrawm paox tix mai daox deng ka kheu kix ku kaux daux pui, mhong kawncau khankix sikah ka daux lox tokaux tix heue. 7Kix khawmuik kied daox deng kah mai ah nin ka paox tix, tix kaux lai tix kaux, “Jhak heue, pui pa sikah khankix khawmuik, mawh pui Galilie ang mawh lie? 8Phan mawh nan, ex ku kaux daux pui pon mhong lox tokaux tix, dee hoik keh ex yuh ka mawx? 9Ex pa mawh pui meung Pathi mai pui meung Mede mai pui meung Elam mai pui pa ot ka daux meung Mesopotemia mai ka daux meung Yudax mai meung Kapadosia mai ka daux meung Pawntux mai meung Asix, 10mai ka daux meung Pharuki mai meung Pampuli, ka daux meung Ejiptux mai haktiex meung Libya mai sivie veng Kurene mai nyo sinie khankix pa kaoh khaing veng Romax, pui Yudax mai khawm pui pa hoik laig li kix. 11Pui meung Karete mai pui meung Arebia khankix mai ex mhong kix sikah ka daux lox ex, krai grawng pa ting lhaong pa hoik yuh Siyiex heue.” 12Kix khawmuik kied daox deng ka mai ah nin ka paox tix, “Dee bleeh grawng in mawh pa yuh ka mawx?” 13Tang kaux tix blah nieb ah pa ang cee ang cak ah nin, “Kix sak kix yoek ka rawm plix siiet pa tie heue.”

Petrux Sidiex

14Petrux cung tau mai kawncau kao tix kaux mai kieh lox tix sinum mai sidiex ka kix ah nin, “Pui meung Yudax mai pui pa ot ka daux veng Yerusaliem khawmuik eue, kieh pex tawng grawng ceu in mai nghiet gumlox aux heue. 15Grawh grawng nawh kix yoek awm pa ce pex ang mawh, kheu kawn tak hoek ngie ponngawb loe nari heue. 16Viang mawh nan in mawh grawng ceu pa hoik grux krai cao jhai Yoelax ah nin, 17Siyiex ah, ka daux bawg yam ngaix sidah khankix, Aux tak kieh Khuan Aux lih piang pui khawmuik heue. Kawn simex kawn bun pex tak sang krai lox jhai mai pui pa awn ju pex, tak sang yaox riang susai mai pui kuad song pex tak sang camaox ti yaox heue. 18Mawh heue, Aux tak sang kieh Khuan Aux lih piang kawncau simex cie Aux mai kawncau bun cie Aux ka daux ngaix Aux khankix mai kix tak sang krai lox jhai heue. 19Aux tak jhi yaox mhai pa daox deng, ka raoma dee long mai mhai ka greem piang haktiex, pa mawh nham mai ngu mai taox ngu heue. 20Singaix tak tieh loh ti mawh pa faik mai khix tak sang mawh nham, phao ka sivoe sang hoek ngaix pa ting lhaong Simiang an heue. 21Pui mawx ang ah pa kok ka ceu kaux Siyiex, tak sang hoek krax taoh heue.#Yol 2:28-32 22“Pui Isarelax eue, nghiet gumlox in khankix heue. Yesux Pui veng Nazariet, Pui tix kaux pa hoik jhi Siyiex pex yaox grawng pa khaw caw rhawm Nawh, ka daux kaing pa ting sibrawm mai ka daux mhai pa daox deng, pa hoik yuh Siyiex ka daux Nawh Cao sinax pex, awm tokaux pex kawx hoik tawng heue. 23Kaw pa hoik dud keud Siyiex, grux tawng mai tawx, pex hoik teei ti tawk Nawh yum piang khaox lhak, ka tawm taix pui ceu pa ang koe lai beenli heue.#Mat 27:35; Mak 15:24; Luk 23:33; Yo 19:18 24Viang mawh nan Siyiex hoik deeh kieh Nawh kaoh im,#Mat 28:5-6; Mak 16:6; Luk 24:5 khaix hoik yah ceu pa saux krax yum, mawh kheu krax yum ang lai chix pon giex pong gang Nawh heue. 25Mawh kheu Davit hoik krai grawng Nawh yuh nin, Aux yaox Siyiex sivoe pakngai aux jheung jheung Kheu Nawh ot plak taix khawn dawm aux, son ang pon ti yung yiang aux. 26Mawh kheu nan rhawm aux gaux kah mai dak aux tom gaux rhawm heue. Lheu khaing an nex aux kawx, tak ot ka daux krax keud pot jun pot heue. 27Mawh kheu Maix tak ang grham ju aux ka daux meung yum. Lheu khaing an Kaw Pa Singax Singeh cie Maix kawx, tak ang kieh pon cux pon sium heue. 28Maix hoik kieh aux tawng krax pa im ju khankix heue. Maix tak sang kieh aux naog mai pa gaux rhawm, ka pakngai Maix heue.#Yaog 16:8-11 29“Puxaik khankix eue, aux pon ti krai grawng tax ex Davit ka pex mhawm mhawm, grawng hoik yum hoik sipaung nawh mai simeeig nawh koe tau mai ex tom yam in heue. 30Mawh kheu mawh nawh cao jhai mai kheu tawng nawh Siyiex hoik tiextu ti krai grawng Nawh tak sang kieh ru nawh tix kaux ngawm piang dang ngeung nawh heue.#Yaog 89:3-4, 132:11 31Kheu nawh hoik grux yaox ceu in, nawh tom krai grawng pa sang deeh kaoh im Cao Khrit mai grawng tak ang grham Nawh daux meung yum mai grawng nex Nawh kawx tak ang hoek krax cux krax sium heue. 32Yesux in, Siyiex hoik deeh kieh kaoh im mai ex khawmuik mawh pui pa kham mhai rug grawng an heue. 33Mawh kheu hoik yaog Nawh mai kheu ot Nawh plak taix khawn dawm Siyiex mai kheu hoik pon awm lox mukheu pa hoik tawx Keeing Cao grawng Khuan Singax Singeh, pa hoik kieh Nawh ceu in lih, pa yaox pa mhong pex kah heue. 34Grawh grawng nawh, Davit ang haok ka daux meung raoma, viang mawh nan tokaux nawh ah nin, Siyiex ah nin ka Simiang aux, ngawm plak taix khawn dawm Aux, 35tom Aux kieh pui pa koeng ka Maix, mawh ngot dee deuh Maix caong tix heue.#Yaog 110:1 36“Mawh kheu nan kieh geh pui Isarelax khawmuik, tawng mhawm mhawm, grawng Yesux pa hoik tawk pex piang khaox lhak, Siyiex hoik kieh Nawh mawh Siyiex mai Khrit heue.”

Thai Lox Cox Rhawm tix Hoek

37Yam mhong kix lox an, dung ka rhawm kix mai kix chawk ah nin ka Petrux mai kawncau pa ting tang kaux khankix, “Puxaik khankix eue, ex tak sang yuh ka mawx?” 38Petrux deeh ah nin ka kix, “Doh keud ka phimap pex mai cubcom pex ku kaux ka daux ceu kaux Yesux Khrit, sonsang pon luan khaing daux phimap pex mai pex tak sang pon totaix Khuan Singax Singeh heue. 39Mawh kheu lox mukheu pa hoik tawx an, mawh son pex mai son kawn praix pex mai pui pa ot dee singai khawmuik. Awm kok Siyiex ex hoek ka Nawh miex ding ang ah, mawh ding heue.” 40Nawh teei lox tang ceu tom nie mai kham mhai rug, sidiex gau ka kix ah nin, “Taoh tokaux pex khaing ju pa kawk vawk in heue.” 41Kix pa rieb ti teei gumlox nawh, cubcom daux rawm mai ka daux ngaix an pui pa baox tiien kix dex koe loe rheng heue. 42Kix nghiet lox pa sidiex kawncau pa ting khankix jheung jheung mai yuh paox pie ka daux pa sivit blah mai pa rawg bwan heue.

Pui Yum Rhawm Ot Tau

43Pui ku kaux daux pui lhat graung ka, ceu pa daox deng tom nie mai mhai pa daox deng pa hoek ti mawh ka tawm taix kawncau pa ting khankix heue. 44Pui pa yum rhawm khawmuik ot tau mai pa koe kix khawmuik kix rom ti shiao tau heue.#Cau 4:32-35 45Kix coh haktiex kix mai kraung khrai cie kix mai gwieh ka paox tix khawmuik, awm pa lo pui mawx pui an heue.#Mat 19:21; Mak 10:21; Luk 12:33, 18:22 46tix ngaix hoik tix ngaix kix khaw caw rhawm paox tix, ot ka daux nyiex bwan mai kix sivit blah tau ka daux nyiex kix. Kix gaux sile he sivoek, ih pa ih kix mai ih rhawm, ang tang lox siyox moing, 47yaogyaw Siyiex mai pon pa khaw caw rhawm pui khawmuik heue. tix ngaix hoik tix ngaix Siyiex baox tiien ka kix pa hoek krax taoh heue.

Currently Selected:

KAWNCAU 2: WCL

Highlight

Copy