Mark 11

Kunna ge walay nde ge Zeso ne Jerusalem diŋ

Mat 21.1-11, 14-17; Luk 19.20-44; Yoh 12.12-19

1Zeso ma yan-na ge njal ge ɔwara oliv ma do̰o̰ no ne pagal digi go, ge suwal van ge zi ma, Betfaje mage Betani, ge no Jerusalem ziya guwa ma. Ge sok mbe go, Zeso teme na nda ge ame hateya ma zi ge maa ka̰a̰m buwal zì, hoɗ num na wa go: 2Ḛ mbo ge suwal van ge no ge nè ndwa nga diŋ yà. Sok waɗ ge ne diŋ yà go gaw, ḛ mà seɗ kwar van vwalla se, ge ndu gale ndâ ne dwam ɗu to. Ḛ saa ne, ḛ gene ne ya. 3Kaɗɗa ndu a̰me mà ele ḛ ya go: Ḛ kee ano mbe no ge dape de? Ḛ guwa̰ ge ne janna go: A Bagezok ɓyare nee ne. Ge sok mbe go gaw, mà n̰a ḛ mboya ge ne. 4Àa kan ta mboya, sok ge àa dee yà, àa seɗ kwar van vwalla se ge zok ge vin̰a kin̰a go ge a̰me wa zum. Àa saa ne ya. 5Nda a̰me ge kaa ge sok mbe go ma ele num go: Ḛ daa kee da no de, ḛ saa kwar van mbe ge dape de? 6Àa gwan ge num fare janna ge mojo̰o̰ Zeso ho maa na wa ya go. Guwa̰, àa n̰a num mboya. 7Àa gene Zeso kwar van mbe ya, àa kan maa ba̰a̰ ma ge ne guwa̰ digi, Zeso kaɗ na pe ge num pagal. 8Nda gḛḛ zen maa ba̰a̰ ma ge vin̰a pul go, nda gegene ma tiɗ ɔwara tok van ge tɔgwal ge maa chiya num ge gaaso zì ya ma se me. 9Nda ge ka mbo ge ne ndwa zḛḛ ma, nda ge ka kàre ne pe ma me, àa ka oyya go: Hosana! Dok ke wa tare ge ndu ge mbo no ya ge dḭḭl ge Bagezok ne pagal! 10Dok ke wa tare ge muluk ge mbo no ya pagal, muluk ge nè Ba Daviɗ ne. Hosana! Uwareya kaa ge Dok ge no pḭḭ digi yà vyaw pagal.#Mkm 118.25-26.

Fere ge àa vḛḛne wa ge ne pagal

Mat 21.18-19; Luk 13.6-9; 19.45-48; Yoh 2.13-17

11Zeso waɗ-ɗa ge suwal ga̰a̰l Jerusalem diŋ, mbo ge zok ge Dok ne zì. Sok ge aa ge kaŋ ma ndilla ge na ziya go peɗ, ajo̰o̰ sok kale ya gasamal, ɗege mbo Betani ɓanna ge na nda ge ame hateya ge wol pɔgwa zi ma. 12Sok yan kin̰are, sok ge àa ka waɗ ge Betani diŋ ya zum, camal ɗege kee ne. 13Sok ge ka̰a̰ na ndwa kuwa fere ya mḛḛya ge na dɔgwa ma pisil twalab, mbo ge ne ta yà, ndwa ndilla go na mà seɗ a̰me ge zamma ge ne digi de. Ɗaŋɗe, sok ge dee ne ta zì yà guwa, see no go ne gàa ma ne ɗeŋew, ago a be sok ge fere ma zon go ne to. 14Zeso jan go: A gaa no mbo zḛḛ, mo daa gwan tol ndwa ge ndu zam ne to baɗ. Ne nda ge ame hateya ma za̰a̰ ne fare mbe.

Waɗɗa ge Zeso ne ge zok ge Dok ne zì

15Àa gwan-na ge Jerusalem diŋ, Zeso waɗ ge zok ge Dok ne zì. Ɗege yan nda ge ka ee kaŋ yaɗɗa ne zì mage num ge yaɗ kaŋ ma zum. Pugi taabul ge nda ge eya bware ma way ma ya se, dol kaŋ kàɗɗa ge nda ge ka yaɗ tugtug gezi ma way ma ya se me. 16Be n̰a ndu a̰me waɗ zum ge zok ge Dok ne zì, ge a̰me ge na tok go to. 17Guwa̰, hate num fare mbe no go: Daa njaŋe ge maktub ge Dok ne zì go: Àa mbo tol mbi zok go, zok kee kaɗeya ge pe rusu ma pe peɗ to wa? Ɗaŋɗe, ḛ me ɗe, ḛ seŋe ne ya sok way ta ge nda ge chala ma way no.#Eza 56.7. 18Ga̰a̰l ge nda ge kee tuwaleya ma way mage nda ge hate eeya ge Moyiz ne ma za̰a̰ fare mbe, àa ɓyare vin̰a ge go maa ban ne gezi. Ago, àa ka chiya ne voo, ge dape, ɓase ma gaa za̰a̰ ne ɗu. 19Sok ge gyala dḭḭ se go, Zeso mage na nda ge a̰me hateya ma waɗ ge suwal ga̰a̰l diŋ ya zum. 20Àa dwam, sok yan kin̰are, aaram pe vḛḛ, àa gwan-na kaleya ge vin̰a mbe go, ne nda ge ame hateya ma kuwa fere mbe fin̰a ya, ge pagal digi ɗiŋ mbo ge ne tòo ma se yà. 21Piyer pagal dwaɗ fare ge Zeso jin̰a ne dana, jan ne go: Ba ge hateya, kuwa, fere ge mo vḛḛne mo wa ge ne pagal mbe fin̰a ya no. 22Ge sok mbe go, gwan ge num janna go: Ɓyare go ḛ kaa ge hoɗ fareba ge Dok ta. 23Fareba, mbi jan ḛ ne no, ndu ge mbo jan njal ge ɔwara oliv ma do̰o̰ no ne pagal mbe ya go, ndage ge sok mbe no go, mbo dol tene ge mam ga̰a̰l nuwam se yà, kaɗɗa na tumri tene ge na dul wa zì to, kaɗ ge hoɗ fareba go fare ge na jin̰a ne mbe kee kee, Dok mbo kee ne kaŋ mbe. 24A ge pe, mbi jan ḛ ne no: Kaŋ ge diige pe peɗ ge ḛ mbo ele ne ya ge sok kee kaɗeya go, ḛ kaa ge hoɗ fareba go ḛ seɗ ne ya go, àa mbo hon ḛ ne. 25Ɗaɗag ge ḛ ɗege digi kee kaɗeya, kaɗɗa ḛ laa hoɗ ge ndu a̰me ta, ḛ pore ne. Go mbe no, ḛ Ba ge no ge pḭḭ ma zì yà wa pore sone ge ḛ kee ma go. 26[Ɗaŋɗe, kaɗɗa ḛ pore ne ya to, ḛ Ba ge kaa no ge pḭḭ ma zì yà, mbo pore sone ge ḛ kee ma to waɗme.]

Pool ge kee muluk ge Zeso ne

Mat 21.23-27; Luk 20.1-8

27Zeso mage na nda ge ame hateya ma gwan-na ge Jerusalem diŋ, àa waɗ ge zok ge Dok ne pul diŋ. Sok ge Zeso ka anna ge ne pul diŋ go, ga̰a̰l ge nda ge kee tuwaleya ma way ma, ge nda ge hate eeya ge Moyiz ne ma ɓanna ge Yahuɗ ma ga̰a̰l ge ɗeme num ma mbo ya ge ne ta. 28Àa ele ne go: Mo see vin̰a ge kee kaŋ mbe ma ge huɗi ta de? A huɗi ho̰ mo pool ge kee num ne de? 29Zeso gwan ge num janna go: Mbi mà ele ḛ fare ɗu, mà kaɗɗa ḛ gwan ge mbi vinna ya ɗe, mbi mà jan ḛ ge ma̰ pool ɗoo, mbi kee kaŋ mbe no de. 30Ḛ guwa̰ ge mbi vinna gale, A huɗi ho̰ Yohana vin̰a ge kee nda baptem ne, a Dok koo nda duwana ma de? 31Sok mbe go, àa ɗege pee ta ta buwal zì, àa ka janna go: Mà kaɗɗa nè gwan ge ne vinna ya go: A Dok ho̰ ne vin̰a ne, mà jan nè no go: Ge dape ḛ wa hoɗ fareba ge ne ta to de? 32Ɗaŋɗe, mà kaɗɗa nè janna go: «A nda duwana ma teme ne ya ne» me ɗe? Go no, àa be day jan ne ano mbe to ndwa go àa ka chiya ɓase ma voo, ago nda peɗ kaa ge kuwaya go, Yohana ndu ge zwagre Dok wa ge fareba ne. 33Sok mbe go, àa gwan ge ne janna go: I wan pe to. Ne sḛ jan num go: Mbi sḛ waɗme, mbi jan ḛ go, mbi see pool mbe ge kee kaŋ mbe ma ge dii de to me.

Currently Selected:

Mark 11: kiaGRB

Highlight

Copy