Mata 28

Tanna ge Zeso Krist ne

Mrk 16.1-8; Luk 24.1-12; Yoh 20.1-20; 1Ko 15.4-7

1Guwa̰ ge dwam sabaɗ ne go, dwam ge zḛḛge, ndwa go Dumas aaram pe vḛḛ, Mari Magdala mage Mari gegene mbo ge sḭḭ pagal-la. 2Suwa kale ɗege ndaɗ ndaɗɗa ge sone, malayka a̰me ge Bagezok ne, mbo ya se ne ge pḭḭ zì ya, mbo ya viŋri njal gezi ge tàal wa go, kaɗ na pe ne pagal. 3Ne diir kaa dinna ge mam seeya go, ne ba̰a̰ kaɗ saal taɗag dinna ge kakḭḭli sa̰a̰m go. 4Sok ge asagar ge koy sok ma kuwa ne, voo wan num, àa ɗege ndaɗɗa, num kḭḭ mbo ya ndageya cɔcwaɗ. 5Ɗaŋɗe, malayka jan nda zaab mbe ma go: Kaɗɗa ge ḛ ɗe, ḛ chiya voo to, ago, mbi kuwa kuwa go ḛ ɓyare Zeso ge àa pee ne ɔwara kaŋre ta digi. 6Daa ge sok mbe no go to, tanna ya ge swày se dinna ge àa jin̰a ḛ ne mbe go tem. Ḛ mbo ya ndil sok ge ne duul swày ee go. 7Ḛ haa ta avun cab mbo jan ne nda ge ame hateya ma go, ne tan-na ge nda ge swày ma buwal zì. Ge sego mbo ya da̰a̰re ḛ ge Galile yà. A ge sok mbe yà go, ḛ wa mbo kuwa ne. A fare ge mbi mbo ya jan ḛ nee ne. 8Àa ɗege ge sḭḭ pagal avun cab, voo ka kee num me no, laa saal ɓyare ka dol num se me. Àa chiya ndwa mbo jan ne nda ge ame hateya ma fare ge kwaɗa mbe. 9Zeso mbo ya tan num tugcug, jan num go: «Mbi sa̰a̰ ḛ wa», àa mbo ya ne ta zì guwa, àa guu maa ko ma se ndwa uware ne. 10Sok mbe go, Zeso jan num go: «Ḛ chiya voo to, ḛ mbo jan mbi na̰ van ma go, num mbo ge suwa Galile yà, ne ge sok mbe yà go, num wa mbo kuwa mbi.» 11Sok ge àa gale no vin̰a zì, asagar ge koy sok a̰me ma cub deɗ-ɗa ge suwal ga̰a̰l diŋ yà, àa wan ga̰a̰l ge nda ge kee tuwaleya ma way, kaŋ ge kê mbe ma pe peɗ. 12Num sḛ ma tol kwateya avun cab ɓanna ge Yahuɗ ma ga̰a̰l ge ɗeme num ma ndwa za̰a̰ ta fare a̰me ma pagal. Àa hon asagar ge koy sok ma bware gḛḛ. 13Àa yuwale num, num wa̰a̰ nda fare pe go: «Ne nda ge ame hateya ma mbo ya ge ɗaal zì yalaŋ, num chee ne duul no, i fii ya dwam galgatag.» 14Mà kaɗɗa fare mbe deɗ-ɗa ge goformo̰ tɔgwa zì yà puy, i mà kuwa fare ge jan ne, ge go fare mbe dṵṵl gaa ge ḛ pagal to. 15Asagar mbe ma ame bware, àa kee dinna ge fare ge àa yuwale maa num ma pagal tem. Fare mbe kṵwa̰ dasare se ge Yahuɗ ma ta, ge dwam mbe ya day ɗiŋ màno.

Zeso din̰a tene ge na nda ge ame hateya ma ta

16Nda ge ame hateya ge wol pɔgwa ɗu ma mbo ge suwa Galile yà go, ge njal ge Zeso dee ngay maa ne pagal digi. 17Sok ge àa kuwa ne, àa ɗege uware ne. Ano puy, a̰me ma ka tumri ta. 18Zeso mbo ya num ta zì guwa, jan num go: A hon mbi pool ge kee muluk ya mɔɗwag, ge pḭḭ zì yà, ge suwa pagal me. 19Ḛ mbo ge rusu ge ɗogle ma ta peɗ, ḛ seŋe num mbi nda ge ame hateya ma, ḛ kee num baptem ge dḭḭl ge Ba ne, ge Van ne, ge On̰om ge Harcal ne ta me, 20ḛ hate num koy fare ge mbi ho ḛ wa num pagal ma peɗ. Ḛ kuwa go, mbi go ge ḛ dagre dwam ma mɔɗwag, ɗiŋ dunin̰a pe aaya.

Currently Selected:

Mata 28: kiaGRB

Highlight

Copy