Mata 22
22
Fare sḭḭ ge vḛḛso sanna ne
Luk 14.16-24
1Zeso gwan ɗege jan ɓase ma fare ge fare sḭḭ iya, jan num go: 2Muluk ge Dok ne dḭḭ ge mojo̰o̰ gan ga̰a̰l a̰me ɗu, ge nuusi vḛḛso sanna ge na van ge son pe go. 3Teme na nda ge tèmel ma go, num mbo tol nda ge see tolla ge vḛḛso sanna ne pe ma ya, ɗaŋɗe, nda mbe ma kuri go maa mbo ya to. 4Gwan teme na nda ge tèmel ge ɗogle ma iya, hoɗ num na wa go: Ḛ mbo jan nda ge see tolla ge vḛḛso sanna ne pe ma go: Ḛ kuwa gale, mbi nuusi kaŋ zam ge vḛḛso ne ya go, mbi hun nday pool mage mbi kaŋ kogor ge so̰o̰l ma ya se, kaŋ ma nuusi go peɗ, ḛ mbo ya ge vḛḛso sanna go. 5Ano peɗ puy, nda ge see tolla ma ndil num fare mbe solom, ndu ge diige dol tene mbo na gaaso de, koo mbo seŋe na tok de. 6A̰me ma kan-na ge nda ge tèmel mbe ma ta, àa wan num, àa kee num yal mamaɗ, àa hun num gezi me. 7Gan ga̰a̰l laa vḛḛne, teme na vwag twam mbo puu nda mbe ge hṵṵ swày ma gezi, àa til num suwal ga̰a̰l gezi mɔɗwag. 8Guwa̰, jan na nda ge tèmel ma go: Kaŋ zam ge vḛḛso sanna pe nuusi ya go, ɗaŋɗe, num ge see tolla ge vḛḛso mbe pe ma be wan ndwa zam ne to. 9Ɓyare ḛ mbo ge vin̰a ga̰a̰ ma go, nda ge ḛ mà seɗ num ya ma peɗ, ḛ too num mbo ya vḛḛso sanna go. 10Ne nda ge tèmel mbe ma kan ta ge vin̰a ma go sasar, àa kwate nda ge maa seɗ num ma ya mɔɗwag, nda ge sone mage nda ge kwaɗa ma me. Sok kwateya ge vḛḛso sanna ne mbo ya huyya ge nda. 11Sok ge gan ga̰a̰l wuwa ya ge zok ge vḛḛso sanna ne zì, ndwa ndil nda ge àa too num ya ma, kuwa ndu a̰me ɗu be ba̰a̰ ge vḛḛso sanna ne ge na ta. 12Ele ne go: Kondore, mo kee pe gyana mo wuwa ya ge sok mbe zì no be ge ba̰a̰ sanna ge vḛḛso ne ge mo ta to de? Ndu mbe kuwa fare a̰me ge janna to. 13Sok mbe go, gan ga̰a̰l jan na nda ge tèmel ma go: Ḛ vuwa ne tok mage ne ko ma, ḛ mbeɗe ne mbo dol ge tṵṵ ge ɗeɗeg zum yà, sok mbe mbo kaɗ sok kirgi ta ge fiyaso mage sul kin̰a ma ne. 14Zeso gwan jan num go, nda ge àa too num ya ma gḛḛ, ɗaŋɗe, nda ge àa tal num ma hoɗege guwa.
Siyal ge Sezar ne
Mrk 12.13-17; Luk 20.20-26
15Ge sok mbe go, Farisi ma mbo seɗ ta ndwa wan Zeso, ge fare ge mà ndage ya ge ne wa zì ma ta. 16Àa teme maa nda ge ame hateya ma ɓanna ge Heroɗ nda ma ge ne ta. Àa jan ne go: Ba ge hateya, i kuwa kuwa go mo ndu ge fareba ne, mo kaŋ hateya ma fare ge fareba ma ne peɗ ge vin̰a ge Dok ne pagal, be ge go mo chiya ndu a̰me ndwa voo to. Ago mo vare nda to. 17Jin̰a i mo dwaɗɗa gale: Vin̰a hage hage ge eeya ge nè ne ma pagal go, àa poo siyal hon Sezar koo tele tele de? 18Ajo̰o̰ Zeso ka kuwa num dwaɗɗa ge sone mbe ma zḛḛ wal ɗe, gwan num janna go: Ḛ mbe ge mbuɗi nda ndwa ma, ge dape ḛ wa ka hee mbi pe go de? 19Ḛ ngay mbi bware ge nda poɗ siyal ge ne gale. Àa ngay ne silay ɗu. 20Ele num go: Pagal mage kaŋ njaŋeya ge ne ta mbe ma huɗi ne ma ne de? 21Àa gwan ge ne janna go: A Sezar ne ma ne. Sok mbe go jan num go: Kaŋ ge go na Sezar nee ne ɗe, ḛ ho̰ ne ne. Kaŋ ge go na ge Dok nee ne ɗe, ḛ hon Dok ne kaŋ me. 22Sok za̰a̰ ne fare janna mbe ma go, àa kee ajab. Àa swaɗ ne, àa mbo maa mboya.
Fare eleya ge tanna ge nda ge swày ma way pagal
Mrk 12.18-27; Luk 20.27-40
23Dwam mbe go baba, Saduki ma, num mbe ge hate go tanna ge nda ge swày ma way to ma, gwan ta ya Zeso ta zì, àa ele ne fare mbe no: 24Ba ge hateya, Moyiz njaŋe i ge na eeya ma zì go: «Kaɗɗa go ndu suu ya be van, ɓyare go ne na̰ van hee gwale kumu mbe, ne kê na na̰ van ge suu rusu.»#Dwa 25.5. 25Ndi nda a̰me ma kaa ge i buwal zì ta pe go nda soɗob ɓỳala na̰ van ge ba ɗu mage na̰ ɗu. Ge pul sway san gwale, wan suu be n̰a van a̰me ɗu to, ne gwale gaa, ne na̰ van hee ne. 26Ge zi mbe wan suu, ge taa, ɗiŋ deɗ-ɗa ge ɓỳala ta. 27Guwa̰, gwale mbe wan suu ge num pe ya waɗme. 28Ge dwam tanna ge nda ge swày ma way go, gwale mbe mbo kaɗ ge diige gwale ne ge num mbe ge ɓỳala ma buwal zì de? Ago num sḛ ma mɔɗwag kaa zok ge ne. 29Zeso gwan ge num janna go: «Fare ge ḛ jan go nda ge suu ma mbo tan to ɗe, a ge na vin̰a go to, ge dape, ḛ wan Njaŋeya ge Dok ne koo pool ge ne ne kaŋ ge mbiya keeya pe to. 30Ago, ge dwam tanna ge nda ge swày ma way go, nda soɗob mbo kaɗ ge gwale ma to, koo nda zaab kaɗ ge obe ma to me, ɗaŋɗe, àa mbo kaɗ dinna ge malayka ge Dok ne ma go ge pḭḭ zì yà. 31Kaɗɗa ge fare ge jin̰a ge tanna ge nda ge swày ma way pagal ɗe, mbi ge kuwaya tyatyaɗ go ḛ isi ne ya, fare ge Dok jin̰a ḛ ne go:
32“Mbi, mbi Dok ge Abraham ne, Dok ge Isak ne, Dok ge Jakob ne me.”#Waz 3.6.
Ago Dok mbe, a Dok ge nda ge swày ma way ne to, ɗaŋɗe,
A Dok ge nda ge ndwa ma way ne.»
33Ɓase ge ka za̰a̰ ne ma peɗ ka ke ajab ge ne fare hateya mbe ma pagal.
Eeya ge waɗe ge ga̰a̰l
Mrk 12.28-34; Luk 10.25-37
34Sok ge Farisi ma za̰a̰ go, Saduki ma daa be seɗ fare ge janna ge Zeso wa byalam go to ɗe, àa kwate ta se. 35Ɗu ge num buwal zige, ndu ge hate eeya ge Moyiz ne, ele ne fare mbe no ndwa hee ne pe go: 36Ba ge hateya, a wa yuwaleya ge diige ge no eeya ma zì waɗe na ka̰a̰m ge ga̰a̰l ne de? 37Zeso gwan ge ne janna go: «Mbiya go mo laa wa̰a̰ mo Bagezok Dok ge amo, ge mo dul wa mɔɗwag, ge mo sḛ mɔɗwag, ge mo dwaɗɗa mɔɗwag me.»#Dwa 6.5. 38A wa yuwaleya ge zḛḛge ne, waɗe ge ga̰a̰l ne me. 39Kuwa ge zi ge dḭḭ ne no me: «Mbiya mo laa wan mo kon ge mo sḛ go.»#Lev 19.1. 40Kaŋ ge wa yuwaleya mage nda ge zwagre Dok wa ma hate num ma peɗ, àa seɗ num ge eeya ge zi mbe ma no zì.
Krist mage Daviɗ
Mrk 12.35-37; Luk 20.41-44
41Ajo̰o̰ Farisi ma kwate se kwate, Zeso ele num fare mbe no: 42«Ḛ dwaɗ ge Krist, Ndu ge Dok taa ne pagal gyana de? Ḛ dwaɗ go ne huɗi baŋ ne de?» Àa gwan ge ne janna go: «A Daviɗ Baŋ ne.» 43Zeso jan num go: «Ge dape ɗoo, On̰om wa ee Daviɗ tol ne go Bagezok de? Sok ge jin̰a go:
44Bagezok Dok jin̰a mbi Bagezok go:
“Mbo ya kaɗ ge mbi tok matoson pagal go,
Ɗiŋ ge go mbi ee mo nda ge ho̰o̰l ma
Gwan maa pagal ge mo ko pul se.”#Lev 19.1.»
45«Mà kaɗɗa go Daviɗ sḛ ge na pagal tol ne Bagezok no, kee mà pe gyana
Krist, Ndu ge Dok taa ne wa gwan kaɗ ne baŋ de?»
46Ndu a̰me ɗu seɗ fare ge gwan ge ne byalam go to. Ge dwam mbe go day, ndu a̰me daa be tal tene ele ne fare a̰me ɗu to baɗ.
Currently Selected:
Mata 22: kiaGRB
Highlight
Share
Copy
Want to have your highlights saved across all your devices? Sign up or sign in
© 2017 Wycliffe Bible Translations, Inc. All rights reserved.
