Luk 7

Hoɗ fareba ge asagarge kis ma ga̰a̰l ne

Mat 8.5-13

1Guwa̰ ge Zeso aa ge sok hon ɓase ma na hateya mbe ma go peɗ, waɗ ge suwal Kapernawom diŋ yà. 2Ge sok mbe go me ɗe, ga̰a̰l ge asagar ge kis ma way ndu ge tèmel ge ne laa wa̰a̰ ne gḛḛ, wa ya kee tuguɗi ge gene ne mbo swày. 3Sok ge za̰a̰ fare ge Zeso ne, teme Yahuɗ ma ga̰a̰l ge ɗeme num a̰me ma, num ele ne go, ne mbo ya zon na ndu ge tèmel mbe nde. 4Àa deɗ-ɗa ge Zeso ta, àa ka kaɗe ne ge aa ta, àa ka jan ne go: Ndu mbe ndu ge hormo ne, mbo ya chiya ne kṵwa̰ nde no de! 5Ago ne laa wa̰a̰ nè pe rusu gḛḛ, a ne sḛ sḭḭ i zok kee kaɗeya ne. 6Zeso vin mboya dagre ge num, sok ge àa yin̰a guwa ge zok, ga̰a̰l ge asagar ge kis ma way teme na kondore ge wa kag ma ya ge ne ta ndwa jan ne go: Lwage tene to, Bagezok-goo, ago mbi be mbyaɗ ge go mo waɗ mbi zok wa to. 7A ge pe, mbi ndi tene no go, mbi be mbyaɗ ge mbo ya ge mbi ndwa mbo seɗ mo to waɗme. Ɗaŋɗe, ho mo wa gagag, mbi ndu ge tèmel mà seɗ zonna. 8Ago mbi sḛ waɗme, mbi ge ga̰a̰l ma ge mbi ndwa zḛḛ, mbi kaɗ ge asagar ma ge mbi pe se me. Mbi jan a̰me ya go: Mbo sok gene yà go! Ne sḛ mbo ɓal. Ndu gegene: Mbo ya go go! Mbo ya me. Mbi jan mbi ndu ge tèmel ya go: Ke mbi kaŋ gegene mbe no! Kee ne ɓal. 9Sok ge Zeso za̰a̰ ga̰a̰l ge asagar ge kis ma way mbe fare janna ma go, kee ajab gḛḛ. Seŋe tene ge ɓase ge ka kàre na pe ma ta, jan num go: Mbi jan ḛ go, ge Izrayel suwa pagal mɔɗwag, mbi be seɗ ndu ge hoɗ fareba ge na dul wa zì ya ge go mbe pe ɗu to. 10Ne kondore mbe ge teme num ya mbe ma gwan-na diŋ, àa kuwa go ne ndu ge tèmel mbe seɗ zonna ya go ge na tuguɗi zì.

Tanna ge Zeso ta̰a̰ gwale kumu ge suwal Nen ne van

11Dwam ma guwa̰ kwaɗa lag, Zeso mbo ge suwal ga̰a̰l ge àa tol ne Nen yà. Ne nda ge ame hateya mage ɓase ma nɔnɔg kaa ɓanna ge ne. 12Sok ge yin̰a guwa ge gulum ga̰a̰l wa, nda yan ja in swày mbo mbulla. Ndu ge suu, a van son mbe ne ɗu kikiɗ ge gwale kumu a̰me tok go. Nda ge suwal ga̰a̰l diŋ-ge ma mbo ya nɔnɔg dagre ge kumu mbe. 13Sok ge Bagezok kuwa ne go, ngay kuwa a̰se ge na ne ge ne ta, jan ne go: Kirgi tene ge fiyaso daa to! 14Zeso mbo ya ge duul swày mbe ta zì guwa, taɗ ne, nda ge in ne ma mḛḛ se, jan ne go: Mbi hoɗ mo mbi wa no, ta̰a̰ digi, van dore! 15Ndu ge suu za̰a̰me digi kàɗɗa ge na pe, ɗege faaya me. Zeso jan ne na̰ go: Nà mo van no! 16Voo mbo ya wan nda peɗ, àa ɗege sale Dok, àa ka janna go: Ndu ge zwagre Dok wa a̰me ge ga̰a̰l yan ja ge nè buwal zì no, ago Dok duwa ge ɓase ge na ne ma. 17Nda mbo ya faa ge kaŋ ge Zeso kê ma ge suwa ge Jude ne go mɔɗwag, ge suwal ge vê ne se ma go peɗ waɗme.

Fare eleya ge Yohana ba ge kee nda baptem ele Zeso

Mat 11.2-19

18Yohana mbo ya za̰a̰ fare mbe ma peɗ ge na nda ge ame hateya ma wa zì. 19Tol a̰me ma zi ge maa ka̰a̰m buwal zì, teme num mbo ge Bagezok ta mbo ele ne go, ne ndu ge maa no ge kuwaya go Dok teme ne ya mbe sḛ ne ɗer ɓade? Koo maa da̰a̰re go ge ɗogle de? 20Sok ge nda ge ame hateya ge zi mbe ma dee ya ge Zeso ta, àa jan ne go: Yohana ba ge kee nda baptem teme i ya ne ndwa ele mo go: Mo ndu ge i no ge kuwaya go Dok mbo teme ne ya, mbe sḛ ne ɗer ɓade? Koo i da̰a̰re go ge ɗogle de? 21Ge sok mbe go gaw, Zeso wa ya ka zon nda ge tuguɗi ma, nda ge za̰a̰ yal mage num ge no ge on̰om ge sone ma gḛḛ, tyan ɓaal ma ndwa gḛḛ me. 22Guwa̰, gwan ge num janna go: «Ḛ guwa̰ mbo wan Yohana kaŋ ge ḛ kuwa no mage ḛ za̰a̰ num no ma pe: Ɓaal ma kuwa sok no, giɗi ma mbo vin̰a no, nda ge kṵṵ swàm ma bol haɗ-ɗa somndol no, àa haɗ-ɗa kɔn̰al no, gisil ma za̰a̰ fare no, nda ge suu ma tan-na no, nda ge a̰se ma za̰a̰ Fare ge kwaɗa no me. 23Laa saal a ge ndu ge mbi mbo kaɗ-ɗa kaŋ chal ko ge ne pe to.»

Zeso faa fare ge Yohana ne

24Sok ge nda ge Yohana teme num ya ma n̰a num go, Zeso ɗege jan ɓase ma fare ge ne pagal, ele num go: «Ḛ daa mbo babur pul yà ndil huɗi zoo de? Ndu ge dḭḭ ge kɔn̰a go, ge sa̰a̰m fii ne se, ka mḛḛ ne digi de? 25Kaɗɗa na mbe go to ɗe, ḛ mbo ndil sḛ ma̰ kaŋ tem de? Ndu a̰me ge ka̰a̰ ba̰a̰ ge siŋli ma de? Ḛ za̰a̰ gale! Nda ge kan ba̰a̰ ge siŋli ma àa nda ge an̰ ma ne, àa kaɗ zok ge gan ma way ma diŋ. 26Go mbe no, ḛ mbo ndil ma̰ kaŋ sḛ tem de? Ndu ge zwagre Dok wa a̰me de? Ḛ ɓyare kuwa ndu ge zwagre Dok wa, mbi jan ḛ go, ndu ge ḛ kuwa ne waɗe ndu ge zwagre Dok wa waɗe. 27Ago ne sḛ ndu ge maktub ge Dok ne jin̰a fare ne pagal ne go:

“Kuwa, mbi doo yà mbi ndu ge vin̰a ndwa go,

Ne nuusi vin̰a ge mo pe, ge mo ndwa zḛḛ.”#Mal 3.1.

28«Mbi jan ḛ gezi waŋ go, Yohana ciciliŋ waɗe nda ge wuwa no ge laa zì ma kakaɗag. Go no puy ɗe, ndu ge fare a̰me pe to peɗ, ge mbo seɗ vin̰a ya waɗ muluk ge Dok ne zì, mbo kaɗ ciciliŋ waɗe ne. 29Ɓase ma peɗ ge za̰a̰ ne ma, koo nda ge chal siyal ma, àa kuwa go Dok ne Dok ge temel taɗ ne, àa vin kee baptem ge Yohana ne. 30Kaɗɗa Farisi mage nda ge hate eeya ge Moyiz ne ma ɗe, àa kuri kaŋ ge Dok ɓyare go num ke ne, sok ge àa vḭḭ kee baptem to go.

31-32«Mbi jan ḛ go, nda ge màge mbe ma no, àa dinna ca ge nda jabso ge vḛḛ no dàa se ma go, sok siɗigi fare ta buwal zì go, àa ka janna go: I sṵṵ gal go ḛ mà ndal kaŋ ne wa go de puy, ḛ ko be hee digi to. I mbaa baŋay no puy me ɗe, ḛ gwan be fyal to peɗ. 33Ago, Yohana ba ge kee nda baptem mbo ya, vḭḭ tene no go na taa swa kaso na wa zì to me no, na tare on̰or jìn̰al to me, ḛ jan no go: Ne sḛ ge on̰om ge sone. 34Van ge Ndu ne mbo ya no, ka zam kaŋ zam mage njoɗ kaŋ ma no, ge nda duwana gegene ma go, ḛ jan no go: Àa ndi ndu ge vagal gale no, ndu ge fere jìn̰al gale no, a nda ge chal siyal mage nda ge kee sone ma kondore ne me. 35Ano puy, Dok Van ge andaŋ ma peɗ kuwa vin̰a ge temel ge Dok ne ma no.»

Gwale ge Zeso pore ne

36 Farisi a̰me tol Zeso mbo zam kaŋ zam ge na. Zeso mbo ge ne diŋ yà, kaɗ kaŋ zam wa go. 37Sok mbe go, gwale a̰me ɗu ge no suwal ga̰a̰l diŋ, ge zam tene, za̰a̰ go ne zam kaŋ zam ge Farisi mbe diŋ. Waɗ-ɗa diŋ ge koblo ge àa ca ne ge njal Albatr ge na tok go, huyya ge idiir. 38Kaɗ ge ne ko se yà#7.38 Dwam vḛḛso kaŋ zam ma go, Yahuɗ ma hee Grek mage Rom ma fare keeya ma. Àa kaɗ sok kubiya daŋ se, ko ma suwa̰leya guwa̰ yà zam kaŋ zam., ɗege fyalla, ne miim ka kan Zeso ko go, guwa̰ go ka tigɗi num gezi ge na pagal susu, ka wan ne ko ma digi ɓaɓaram, ka kan idiir mbe ge num ta. 39Sok ge Farisi mbe ge too ne ya na diŋ kuwa kaŋ mbe ma go, ka dwaɗ na dul wa zì go: Daa go ndu mbe ndu ge zwagre Dok wa ge fareba ne, daa ma kuwa go gwale mbe ge ee na tok na ta no, ne gwale ge zam tene ne. 40Ge ne dwaɗɗa mbe pagal, Zeso gwan ge ne janna go: Simo̰, mbi ɓyare siɗigi fare ge mo. Simo̰ jan ne go: Ba ge hateya, fa fare. 41Dwam a̰me go ɗu, ndu a̰me hon nda a̰me ma zi gobso. Ge ɗu mbiya poɗ silay kikis nuwan̰, gegene silay warnuwan̰ me. 42Ajo̰o̰ num vin̰a ge poɗ ne bware mbe ma to ɗe, kuwa num a̰se jwàg. Ge sego jin̰a mbi gale, ge diige laa wan ne mà gḛḛ ne de? 43Simo̰ gwan ge ne janna go: Mbi dwaɗ go, a ndu ge àa kuwa ne a̰se, mbe ge see gobso gḛḛ. Zeso jan ne go: Mo va fare ma buwal kwaɗa. 44Seŋe na ndwa gwale ta, jan Simo̰ go: Mo kuwa gwale go ɓaa? Mbi se ge mo diŋ no puy, mo be hon mo dore ma mo wa go num ho̰ mbi mam usi mbi ko to; ɗaŋɗe, ne sḛ mbe lwaɗe mbi ko ma ge na miim, tigɗi num gezi ge na pagal susu no. 45Mo be ame mbi ge hormo to, ɗaŋɗe, ne sḛ vare zoo, ge mbi ko ndaa mo zok pul go day, a go sok ngay hormo mbi ta go. 46Mo be kan nùm ge huu tii ge mbi pagal digi to, ɗaŋɗe, ne sḛ ka̰a̰ idiir ge mbi ko ma ta. 47A ge pe mbi jan mo no go, ne hormo ge ngay ne gḛḛ no, a ge àa pore ne sone ge gḛḛ ceɗeɗ ma pe. Ɗaŋɗe, ndu ge ngay hormo hoɗege guwa, a ge àa pore ne ne sone ge hoɗege guwa ma pe. 48Jan gwale go: Mbi pore mo sone ma go.

49Nda ge àa too num ya ge kaŋ zam vḛḛso pe ma ka dwaɗɗa maa dul wa ma zì go: Ndu mbe daa huɗi ne ge mà kaɗ ge pool ge pore ɗiŋ sone ma de? 50Ɗaŋɗe, jan gwale go: Hoɗ fareba ge amo mon mo ya go. Mbo ge halas.

Currently Selected:

Luk 7: kiaGRB

Highlight

Copy