Yohana 9

Zonna ge ndu ge ɓaal ne

Mrk 8.22-25; 10.46-52

1Sok kaleya go, Zeso kuwa ɓaal a̰me ɗu ge na tolla ya day. 2Ne nda ge ame hateya ma ele ne go: Ba ge hateya, a ge ndu mbe ke sone koo ge ne ba ma ke sone pe ɗoo, too ya se ɓaal no de? 3Zeso gwan ge num janna go: A be ne sḛ koo ne ba ma ke sone ne to. Ɗaŋɗe, a ndwa go nda kuwa pool ge Dok ne zum ge ne ta. 4Gyala no waɗ, ɓyare go nè za zḛḛ sok kee tèmel ge Dok ge teme mbi ya ne ma go. Ajo̰o̰ ɗaal gaa guwa, ndu mbo daa gwan kee a̰me to. 5Teg ge mbi gale no ge dunin̰a zì, mbi ge kɔn̰al go ge nda ge dunin̰a mbe zige ma pe. 6Guwa̰ ge jin̰a fare mbe go, too watwa suwa se, waɗ ne digi, taɗ ne ɓaal mbe ndwa bol ma go. 7Jan ne go: «Mbo, mo mbo usi mo ndwa ge baal ge àa nuusi ne kan mam se, ge àa tol ne Silowe», ge ne pe wanna no go «Temeya». Ɓaal mbe mbo ge sok mbe yà, usi na ndwa, sok ge seŋe ya gwanna, gaa ya kuwa sok kwaɗa.

8Ɓaal mbe nda ge zok pe mage num ge ka kuwa ne kaɗe kaŋ wal ma ka ele ta go: Daa be ndu mbe ge nè ka kuwa ne kàɗɗa kaɗe kaŋ ne no to de? 9A̰me ma ka janna go: A nee ne. Gegene ma ka janna go: To, dḭḭ ne din. Ne sḛ ka janna go: A mbi sḛ ne gagan̰. 10Sok mbe go, àa ele ne go: A ma̰ kaŋ kee ne ɗoo, mo gaa ya kuwa sok no de? 11Gwan ge num janna go: Ndu ge àa tol ne Zeso, ke njiyal, taa ne ge mbi ndwa bol ma go no, jin̰a mbi no go, mbi mbo usi mbi ndwa ge baal ge àa nuusi ne ge àa tol ne Silowe se. Mbi mbo no, guwa̰ ge mbi usi mbi ndwa go, mbi gaa kuwa sok no. 12Nda mbe ma ele ne go: Ndu mbe ge diya de? Gwan ge num janna go: Mbi wan pe to.

Fare pe haleya ge zonna ge ɓaal mbe ne pagal

13Guwa̰, nda a̰me ma ɗeme ndu mbe ge kaa ɓaal wal ge Farisi ma ta yà, 14ge dape, Zeso kee njiyal #9.14 Ke njiyal mage zon ndu dwam sabaɗ go tele tele ge Yahuɗ ma ta. Num keeya kaɗ go, ne fare ge ɓyare gene swày ya ne mbḛḛ.mage hage ne ndwa ge dwam sabaɗ go. 15Farisi ma ele ne waɗme go, ne ndwa ma gaa kuwa sok pe gyana de? Jan num go: Fuwa njiyal ge mbi ndwa bol ma go, mbi usi mbi ndwa gezi no, mbi gaa kuwa sok no. 16Farisi ma ka janna go: Ndu mbe ge kee kaŋ mbe no be mbo ge Dok ta ya to, ge dape, kee kaŋ ge mbiya ndu kee ne ge dwam sabaɗ go to. Ɗaŋɗe, nda gegene ma ka ɗege num pagal janna go: Ndu ge kee sone mà mbyaɗ kee kaŋ ajab ge go mbe ma pe no de? Àa da gwan za̰a̰ ta to. 17Farisi ma gwan ele ɓaal mbe fare go: Mo sḛ no, mo jan gyana ge ndu ge zo̰o̰ mo mbe pe de? Gwan ge num janna go: A ndu ge zwagre Dok wa ne.

18Ɗaŋɗe, Yahuɗ ma ga̰a̰l ma be ɓyare hoɗ fareba go ndu mbe kaa dee wal ɓaal, ne gaa ya kuwa sok ge sego no to. Ge ano mbe no pe, àa ee tèmel mbo tol ne ba ma ya. 19Sok ge àa mbo ya, ga̰a̰l mbe ma ele num fare mbe ma no go: Ndu mbe ḛ van ne kade? Too sḛ ya ɓaal ɗaŋ de? Kee pe gyana, a gaa ya kuwa sok ge sego no de? 20Van ba ma gwan ge num janna go: I kuwa kuwa go ne i van ne, too ɓaal. 21Ɗaŋɗe, ge sego gaa kuwa sok gyana koo a huɗi zo̰o̰ ne ndwa ne de me ɗe, i wan pe to. Haɗ-ɗa ndu pool, ḛ ele fare ne, mà kuwa fare ge janna ge na sḛ pe ne. 22Van ba ma jin̰a go mbe ge dape, àa ka chiya Yahuɗ ma ga̰a̰l ma voo. Ago àa vḭḭ ta vin wa dagre go: Kaɗɗa ndu a̰me jan nda ya zum go, Zeso ne Krist, ndu ge Dok taa nee ne, àa tele ne daa be mbo ge maa zok kee kaɗeya ma zì. 23A ge pe, ne ba ma jin̰a no go: Haɗ-ɗa ndu pool, ḛ ele fare ne.

24Farisi ma ee tèmel mbo tol ndu ge kaa ɓaal wal mbe ya iya, àa gwan ele ne fare go: Guni tene go mo mà mbo jan fare ge fareba ge Dok ndwa se. Kaɗɗa ge i, i kuwa ndu mbe ge zo̰o̰ mo ndwa kuwa, a ndu ge kee sone ne. 25Gwan ge num janna go: Mbi wan pe go ne ndu ge kee sone ne koo ne ndu ge kee sone to ne de to. Ɗaŋɗe, kaŋ ɗu ge mbi kuwa ɗe, ago mbi kaa wal ɓaal, ge sego, mbi gaa ya kuwa sok. 26Àa ele ne go: Kee mo da ɗoo, mo ndwa ma gaa kuwa sok no de? 27Gwan ge num janna go: Mbi jan ḛ fare mbe ya go, ḛ be ɓyare za̰a̰ mbi to. Ḛ ɓyare za̰a̰ ne ge dape iya de? Ḛ ɓyare se seŋe ne nda ge ame hateya ma no waɗme kade? 28Àa gan ne saaso janna go: Mo sḛ ta kaɗ mà ne ndu ge ame hateya ne kyala. Kaɗɗa ge i, i Moyiz nda ge ame hateya ma ne. 29I kuwa kuwa tyatyaɗ go Dok jin̰a fare ge Moyiz. Ɗaŋɗe, kaɗɗa ge ne sḛ gene mbe no, i wan sok ge ne mbo ge ya pe to peɗ. 30Ndu mbe gwan ge num janna go: Fare mbe kee mbi ya ajab, ge ḛ jan go ḛ kuwa sok ge ne mbo ge ya to, zane no, a ne zo̰o̰ mbi ndwa ne. 31Nè kuwa kuwa go Dok hon nda ge kee sone ma kaŋ ge num ele na ma to, ɗaŋɗe, za̰a̰ num ge gwan maa pagal ge fare ge na ne pe se mage kee laa ɓyareya ge na ne ma za̰a̰. 32Nda gale be za̰a̰ go, ndu ge ɓaal ge ne na̰ too ne ya se day see zonna ge ndu a̰me ta dwam ɗu to. 33Daa no go, ndu mbe ge zo̰o̰ mbi ndwa be mbo ge Dok ta ya to ɗe, daa mà kee a̰me to. 34Àa gwan ge ne janna go: Ge mo tolla ya day ɗiŋ màno, mo bulmi ge sone zì, mo ɓyare hate i da de? Àa yan ne ge maa zok kee kaɗeya zì ya zum.

Ɓaal ge fareba ma

35Sok ge Zeso za̰a̰ go nda mbe ma yan ɓaal mbe ja zum ge maa zok kee kaɗeya zì, ɓyare ne pe. Sok ge see ne, ele ne go: Mo hoɗ fareba hoɗ ge Van ge Ndu ne ta de? 36Gwan ge ne janna go: Jin̰a mbi gale, ndu ge zok, ne sḛ huɗi ne ge go mbi wa hoɗ fareba ne ta de? 37Zeso jan ne go: Mo kuwa nee ne no ɔwal kade, a mbi sḛ jan mo fare ne no. 38Sok mbe go, jan ne go: Bagezok, mbi hoɗ fareba ya go, guu na ko se uware ne.

39Guwa̰ Zeso jan go: Mbi mbo ya ge dunin̰a zì ndwa kun sariya nda pagal. Mbi mbo ya ndwa go nda ge kuwa sok to ma num kuwa sok kwaɗa, nda ge kuwa sok ma, num seŋe ɓaal. 40Farisi a̰me ge kaa sok mbe go ma, guwa̰ ge àa za̰a̰ ne fare mbe ma go, àa ele ne go: I sḛ ma puy, i mà kaɗ ɓaal peɗ de? 41Zeso gwan ge num janna go: Daa no go ḛ ɓaal ma ne fareba, dṵṵl ge sone keeya ne daa mà kaɗ ḛ pagal to. Ɗaŋɗe, ge ḛ jan go ḛ kuwa sok pe, a go mbe no, dṵṵl mbe kaa ḛ pagal no.

Currently Selected:

Yohana 9: kiaGRB

Highlight

Copy