Yohana 8

Ndu gwale ge àa wa̰a̰ ne sok fii ge tene go

1Zeso mbo ge njal ge ɔwara oliv ma do̰o̰ no ne pagal digi, digi yà. 2Kin̰are aaram pe vḛḛ, gwan mbo ge zok ge Dok ne pul ge zum-ge zì yà, nda ge kaa sok mbe go ma peɗ mbo ya ne ta. Kaɗ se, ɗege hate num.

3Sok mbe go, nda a̰me ge hate eeya ge Moyiz ne ma ɓanna ge Farisi a̰me ma gene gwale ge àa see ne kee zina ya ge Zeso ta. Àa ee ne nda tuwal zì, 4àa jan Zeso go: Ba ge hateya, i see gwale mbe no sok kee zina go ngaraf. 5Ge eeya ge Moyiz njaŋe num ma zì, ho i na wa go, i mbaa gwale ge kee kaŋ ge go mbe no pe gezi ge njal. Mo sḛ no, mo jan gyana de? 6Àa ka jan ne ano mbe ndwa ndilla go, ne mà jan fare a̰me ge mbiya ee maa wan ne ge fare de. Ɗaŋɗe, Zeso hugi na pagal se, ka kḭḭli na tok ge suwa se. 7Ajo̰o̰ àa ka dwage ne fare eleya gḛḛ go ɗe, hee na pagal digi, jan num go: Ndu ge kê sone ɗu to, ge no ge ḛ buwal zì, ne ee pe ne kwal mbal ne ge njal. 8Gwan hugi na pagal se, ee tene gwan kḭḭli na tok ge suwa se. 9Sok ge àa za̰a̰ ne fare mbe ma go, ndu ge diige ka kan na pagal mboya, ge sabar ma ta digi ya ɗiŋ mbo ya se. Zeso gaa ne hini ɗu ge gwale mbe sḛ mḛḛya na sok mbe go. 10Sok mbe go, Zeso gwan hee na pagal digi, jan gwale mbe go: Za̰a̰ mbi gale, nda mbe ma ge diya de? Ndu a̰me ge wan mo ge sariya to de? 11Gwan ge ne janna go: Ndu ge zok, ndu daa go to. Zeso jan ne go: Mbi sḛ waɗme, mbi wan mo ge sariya to, mbo, a gaa no mbo zḛḛ, daa gwan kee sone to baɗ.]

Zeso dḭḭ ge kɔn̰al go ge nda pe dunin̰a zì

12Zeso gwan jan nda mbe ma go: Mbi, mbi ge kɔn̰al go ge nda pe ge dunin̰a zì. Ndu ge kàre mbi pe, daa mbo tṵṵ zì to, ɗaŋɗe, mbo seɗ kɔn̰al ge ee nda kaɗ ge ndwa ge fareba. 13Ge ne fare mbe no pagal, Farisi ma jan ne go: Ge sego, mo kee tene sayda ne ge mo pagal, mo sayda mbe sayda ge fareba ne to. 14Zeso gwan ge num janna go: Koo kaɗɗa mbi kee tene sayda ne ge mbi pagal puy, mbi sayda mbe sayda ge fareba ne, ge dape, mbi kuwa sok ge mbi ɗege ge ne ya mage sok ge mbi mbo go kuwa. Ɗaŋɗe, ḛ kuwa sok ge mbi ɗege ge ne ya mage sok ge mbi mbo go to. 15Kaɗɗa ge ḛ, ḛ kun sariya ge dwaɗɗa ge ḛ nda duwana ma way pagal, mbi, mbi kun ndu a̰me sariya to. 16Ɗaŋɗe, kaɗɗa mbi kun ndu a̰me sariya puy, mbi sariya kunna mbe sariya kunna ge fareba ne, ge dape, mbi hini to, ago mbi Ba ge teme mbi ya dagre ge mbi. 17Àa njaŋe ge ḛ eeya ma zì go, kaɗɗa nda zi kee sayda ya #8.17 Ndu ge pool seɗ fare mbe no ge Dwage eeya 17.6 mage 19.15 zì yà.ge ka̰a̰l ge ɗu, num fare mbe fare ge fareba ne. 18Mbi sḛ, mbi kee tene sayda ne, mbi Ba ge teme mbi ya kee mbi sayda me. 19Àa ele ne go: Mo Ba ge diya de? Zeso gwan ge num janna go: Ḛ kuwa mbi koo mbi Ba to. Daa go ḛ kuwa mbi kuwa, ḛ daa mà kuwa mbi Ba waɗme. 20Zeso ka faa fare mbe ma no ge sok ge ka hate nda ge zok ge Dok ne pul zì go, guwa ge kaŋ ge nda dol bware no ne zì. Ndu a̰me be ee na tok ne pagal to, ge dape, ne dwam ma gale be mbyaɗ to.

Zeso wuwage gwanna ge na ne Dok Ba ta yà

21Zeso gwan jan nda mbe ma go: Mbi mbo mbo, ḛ mbo ɓyare mbi pe, ɗaŋɗe, ḛ mbo suu, ge dape, ḛ bulmi ge sone keeya zì. Ḛ mbyaɗ mbo ge sok ge mbi mbo no ne yà to. 22Yahuɗ ma ka jan ta, ta buwal zì go: Ɓyare mandu mbo hal na ka̰a̰l gezi de, ge dape wa jan go: Ḛ mbyaɗ mbo ge sok ge mbi mbo no ne yà to. 23Jan num go: Ḛ nda ge dunin̰a se ma ne, mbi, mbi ndu ge pḭḭ zì yà ne. Ḛ ge dunin̰a ne ma ne, mbi, mbi be ge dunin̰a nee ne to. 24A ge pe, mbi jin̰a ḛ no go: Ḛ mbo suu, kaɗɗa ḛ bulmi ge ḛ sone keeya ma zì. A ngaɗ go ḛ mbo suu ge ḛ sone keeya mbe ma zì, kaɗɗa ḛ hoɗ fareba go, «mbi Ndu mbe ne gagan̰ to.» 25Àa ele ne go: Mo huɗi ne de? Zeso gwan ge num janna go: A fare mbe ge mbi dwage ḛ ne janna ne ge pe eeya ya day. 26Kaɗɗa ge ḛ ɗe, mbi ge fare janna mage sariya kunna ma gḛḛ-gḛḛ ge ḛ pagal. Mbi zwagre nda duwana ge suwa pagal ma fare ge mbi ame ge ndu ge teme mbi ya ta ɗeŋew. Ne sḛ jan fare ge fareba.

27Àa be wan pe go, Zeso ka jan maa fare ge na Ba ge no pḭḭ zì yà ne to. 28Ge sok mbe go, jan num go: Sok ge àa mbo pel mbi, Van ge Ndu ne ya ge ɔwara kaŋre ta digi, ḛ mbo kuwa go ne «mbi mbe ne gagan̰.» Ḛ mbo kuwa go, mbi kee a̰me ge mbi pagal to, ɗaŋɗe, mbi zwagre fare hateya ge mbi Ba ne. 29Ndu ge teme mbi ya dagre ge mbi, be n̰a mbi hini to, ge dape, mbi kee ɗaɗag kaŋ ge kee ne sḛ tii. 30Sok za̰a̰ Zeso fare janna mbe ma go, nda gḛḛ mbo ya hoɗ fareba ne ta.

Van ge Dok ne haɗ nda suli

31Sok mbe go, Zeso jan Yahuɗ ge ho fareba na ta ma go: Kaɗɗa ḛ mbo go ge fare ge mbi hate ḛ num ma pagal, ḛ mbi nda ge ame hateya ma ne fareba. 32Ḛ mbo kuwa fare ge fareba ge Dok pagal, fareba mbe mbo ee ḛ haɗ suli. 33Àa gwan ge ne janna go: I pe rusu ge Abraham ne ma ne, i be kaɗ ndu a̰me moor dwam ɗu to. A ma̰ fare ee mo ne janna go: Ḛ mbo gaa suli de? 34Zeso gwan ge num janna go: Fareba mbi jan ḛ ne no, ndu ge bulmi no ge sone keeya zì, a moor ge sone mbe nee ne. 35Moor kaɗ na ba ge zok diŋ swag boo, ɗaŋɗe, van twàl kaɗ ge ndwa ɗiŋ. 36Ge pe no, kaɗɗa Van ge Dok ne ee ḛ ya haɗ suli, ḛ mbo gaa suli fareba. 37Mbi ge kuwaya go ḛ Abraham rusu ma ne ɓa. Ɗaŋɗe, ḛ ɓyare go vin̰a ge hun mbi, ge dape, ḛ vin mbi fare ma ḛ sḛ zì to. 38Kaɗɗa ge mbi, mbi jan ḛ kaŋ ge mbi kuwa ne ge mbi Ba ta ya. Kaɗɗa ge ḛ, ḛ kee kaŋ ge ḛ ba jin̰a ḛ go ḛ ke num ma.

39Yahuɗ ma mbal ne fare janna go: I ba Abraham. Zeso jan num go: Kaɗɗa ḛ Abraham van ma ne, ḛ ke kaŋ ge Abraham kee num ma. 40Ɗaŋɗe, ge sego, ḛ ɓyare vin̰a ge hun mbi, ge mbi jin̰a ḛ fare ge fareba ge mbi za̰a̰ ne ge Dok ta pe. Abraham be kee ano mbe no pe to. 41Ḛ kee kaŋ keeya ge ḛ ba ne ma. Àa jan ne go: I be van buwal pe ma ne to, i Ba Dok melaw ɗu. 42Zeso jan num go: Daa no go Dok ḛ Ba ne, ḛ laa daa mà wan mbi, ago mbi mbo ge ne ta ya, a ge pe, mbi no ge go go no. Mbi be mbo ya ge mbi pagal to, ɗaŋɗe, a ne sḛ teme mbi ya ne. 43Ḛ wan mbi fare ma pe to ge dape ḛ mbyaɗ za̰a̰ mbi fare mbe ma to. 44Kaɗɗa ge ḛ, ḛ ba, a Ba ge ho̰o̰l, ḛ laa wa̰a̰ kee kaŋ mbe ge ḛ ba kee num ma. A ndu ge hun swày ya ne day. Be mḛḛ ge fareba pagal dwam ɗu to, ge dape, fareba ne zì to. Sok ge ɗege kun hày, jay ne bàŋ ɓoɗ ge na pagal, ago, a ndu ge kun hày ne, gwan kaɗ nda ge kun hày ma ba me. 45Kaɗɗa ge mbi, mbi jan fare ge fareba, a ge pe, ḛ ho fareba ge mbi fare janna ma ta to no. 46A huɗi ne ḛ buwal zì, ge no ge fare, ge mbiya wan mbi go, mbi kee sone de? Kaɗɗa go mbi jan fare ge fareba, ge dape, ḛ wa hoɗ fareba mbi ta to de? 47Ndu ge go na ge Dok nee ne, ee na tɔgwa kwaɗa za̰a̰ ne. Ɗaŋɗe, ajo̰o̰ ḛ be ge Dok ne ma ne to ɗe, a ge pe, ḛ dol ḛ tɔgwa ma gezi no.

Zeso mage Abraham

48 Yahuɗ ma gwan ge Zeso janna go: Sok jan mo go, mo ndu ge suwa Samari ne#8.48 Sok tol Zeso go ne ndu ge samari ne, Yahuɗ ma ka sen num sen, ge dape, àa ka ndil num ge mojo̰o̰ nda ge hate fare ge Dok ne ge na vin̰a to ma go.me no, mo ge on̰om ge sone mo zì me ɗe, i fare temel. 49Zeso gwan ge num janna go: Mbi be on̰om ge sone ge mbi zì, a ndwa go, mbi hee ga̰a̰l hoɗ mbi Ba, ḛ me ɗe, ḛ hon mbi ga̰a̰l to me. 50Kaɗɗa ge mbi, mbi ɓyare go nda ho̰ mbi hormo ne to. Ndu a̰me ge ɗogle ge ɓyare ne ge mbi pe go ɗu, a ne sḛ kun sariya kunna ge temel ne. 51Fareba mbi jan ḛ ne no, kaɗɗa ndu gwan na pagal ya ge mbi fare ma pe se, mbo suu to baɗ#8.51 Zeso jan fare mbe ge swày ge on̰om ne pagal be swày ge duul ne to.. 52Yahuɗ mbe ma jan ne go: Ge sego, i kuwa ya tyatyaɗ go, mo ge on̰om ge sone ge mo zì. Abraham suu go, nda ge zwagre Dok wa ma suu go me, mo me, mo jan go: Kaɗɗa ndu gwan na pagal ya mbi fare ma pe se, mbo suu to baɗ. 53Mo dwaɗ go mo ciciliŋ waɗe i baŋ Abraham ge suu koo waɗe nda ge zwagre Dok wa ge suu ya ma me de? Mo ɓyare kee tene go mo huɗi ne de? 54Gwan ge num janna go: Daa no go mbi sḛ dore tene ne ɗe, mbi dore tene mbe mà kaɗ doreya ge bàŋ. Ndu ge dore mbi, a mbi Ba. Ne ge ḛ jan go: A i Dok ne! 55Zane no ḛ kuwa ne to peɗ. Kaɗɗa ge mbi, mbi kuwa ne kwaɗa. Kaɗɗa mbi ee mbi wa ya go mbi kuwa ne to, mbi mà seŋe ndu ge hày dinna ge ḛ go. Ɗaŋɗe, mbi kuwa ne kwaɗa, mbi gwan mbi pagal ge ne fare ma pe se me. 56Abraham ge ḛ baŋ kê laa saal, ge dwaɗɗa ge go, na mà kuwa dwam ge mbi mboya ya ge dunin̰a zì de. Sok ge kuwa ne, laa saal huy ne no. 57Yahuɗ ma jan ne go: Mo del ma gale be dibi warnuwan̰ to peɗ, mo mà kuwa Abraham de! 58Zeso gwan ge num janna go iya: «Fareba mbi jan ḛ ne no, zḛḛ ge go Abraham wa ya, “mbi go.”» 59Ge fare mbe no pagal, àa hee njal ma ndwa mbal ne gezi. Ɗaŋɗe, Zeso ban tene ge ɓase mbe ma buwal zì, waɗ zum ge zok ge Dok ne zì.

Currently Selected:

Yohana 8: kiaGRB

Highlight

Copy