Tèmel keeya 4

1Piyer mage Yohana gale sok jan ɓase ma fare ge Dok ne go, nda ge kee tuwaleya ma, nda ge koy zok ge Dok ne wa ma ga̰a̰l, ɓanna ge Saduki ma waɗ-ɗa ge num pagal diŋ. 2Num laa mbo ya hoɗɗa gḛḛ, ge hateya ge àa ka hate ɓase ma fare pe. Ge hateya ge num way ma zì, àa ka janna go: Zeso tanna digi ge swày se, ndwa ngayya go, nda ge suu ma mbo tan ge swày se mbe go waɗme. 3Àa wan num, ajo̰o̰ gyala dinna, àa kan num ge zok daŋay zì, àa gaa dwamma zì ɗiŋ mbo aaram. 4Kaɗɗa ge ɓase ge za̰a̰ fare ge Dok ne mbe ma, nda gḛḛ mbo ya hoɗ fareba, num peɗ ge ho fareba ma ɓan digi guwa ge dudubu nuwan̰.

Piyer mage Yohana ge Yahuɗ ma ga̰a̰lge kun sariya ma ndwa se

5Sok yan kin̰are, Yahuɗ ma ga̰a̰l ge ɗeme num ma, ge nda ga̰a̰l ge ndil ɓase ma, nda ge hate eeya ge Moyiz ne ma, mbo ya twageya ge suwal ga̰a̰l Jerusalem diŋ, 6ɓanna ge An, ga̰a̰l ge nda ge kee tuwaleya ma way ge waɗe, Kayf, Yohana, Alekzandr, ge num ge no rusu ge ga̰a̰l ge kee tuwaleya ne zì ma peɗ me. 7Àa gene nda ge temeya ma ya ge num ndwa se, àa ele num go: Ḛ see pool ge kee kaŋ mbe no ge dii koo ge huɗi dḭḭl ta de? 8Ge sok mbe go, On̰om ge Harcal mbo ya biri Piyer, hee fare, gwan ge num janna go: 9Yahuɗ ma ga̰a̰l ge ɗeme num mage ga̰a̰l ge ndil ɓase ma! Màno kaɗɗa ḛ ele i fare ge kwaɗa ge i kê ndu ge ko looɗol ne pagal, ge vin̰a ge ne see zonna no pe ɗe, 10fare ge mbi ɓyare jan ḛ ne no, ḛ za̰a̰ ne kwaɗa, ḛ Izrayel van ma peɗ: «Ndu mbe ge mḛḛ no ge ḛ ndwa se pool no ɗiɗiŋ, a ge pool ge dḭḭl ge Zeso Krist ge suwal Nazareɗ ne ta, see zonna no. A Zeso mbe ge ḛ pee ne ge ɔwara kaŋre ta digi, ge Dok ta̰a̰ ne ge nda ge swày ma buwal zì ne.

11“Ne sḛ, a njal ge ḛ nda ge sin zok ma doo ne gezi ne,

A ne gaa ya njal ge gag ge zok keŋ pe ne.”#Mkm 118.22.»

12Vin̰a ge seɗ monna ge ndu a̰me ge ɗogle ta to, ago dḭḭl a̰me ge ɗogle ge mo wa tol ne ge suwa pagal, mo wa seɗ monna ge ne ta to me.

13Sok ge Yahuɗ ma ga̰a̰l ge kun sariya ma kuwa go, Piyer mage Yohana jan fare be voo, num nda ge see hateya to ma ne, àa kee ajab. Àa kaa ge kuwaya go, num nda ge ka an dagre ge Zeso ma ne. 14Ajo̰o̰, àa kuwa ndu ge see zonna mḛḛya ge num ziya, fare janna mbo ya rase num. 15Yahuɗ ma ga̰a̰l ge kun sariya ma hoɗ Piyer mage Yohana maa wa go, num wuwa zum ge zok seɗ ta ge maa way zì. Guwa̰, àa seɗ ta, àa ele ta ge ta buwal zì go: 16Nè kee ge nda mbe ma fare gyana de? Ago kaŋ ajab mbe no, àa kê ne ge ɓase ge Jerusalem diŋ-ge ma ndwa go peɗ, fare a̰me ge nè pe to. 17Ɗaŋɗe, ge go kṵwa̰ ge fare mbe ne dasare se ge nda ta to ɗe, ɓyare go nè ngwabe num ndwa go, num daa gwan jan ndu a̰me fare ge dḭḭl mbe ne to.

18Sok mbe go, àa tol nda ge temeya ma ya, àa hoɗ num maa wa ndaa kaka go, num daa gwan jan nda fare koo hate nda fare ge Zeso dḭḭl pagal to. 19Piyer mage Yohana gwan ge num janna go: Ḛ kuwa fare mbe buwal vaaya temel gale, a kwaɗa ge go i kuri Dok wa ɗoo! I wa za̰a̰ ḛ de? 20Kaɗɗa ge i sḛ ma ɗe, ge kaŋ ge i kuwa mage i za̰a̰ num ma, i mbo ka jan num zum be ngwabeya.

21Yahuɗ ma ga̰a̰l ge kun sariya ma mḛḛre num ol kekeŋ, guwa̰, àa n̰a num mboya. Àa be seɗ fare ge ee dṵṵl ge num pagal to, ge dape, ɓase ma ka sale Dok ge kaŋ ge kee no pe. 22Ago, ndu ge nda ka kee ajab ge ne zonna pe, kaa ge del waɗe del warndà.

Kaɗeya ge nda ge ho fareba ma way ge yal ma zì

23Guwa̰ ge àa doo Piyer mage Yohana go, àa mbo ge maa ka̰a̰m ma buwal zì yà, àa wan num fare ge ga̰a̰l ge nda ge kee tuwaleya ma way mage ga̰a̰l ge ɗeme ɓase ma jin̰a maa num ya ma peɗ. 24Sok ge àa za̰a̰ fare mbe ma go, àa ndage maa ka̰a̰l digi wa dagre ɗu, kee kaɗeya ge Dok ta janna go: Ba ge Hateya, mo ge mo ke pḭḭ, suwa, mam ga̰a̰l nuwam, ge kaŋ ge no ge num pul zì ma peɗ, 25mo ho̰ Daviɗ, mo ndu ge tèmel ge i baŋ, On̰om ge Harcal ne, ge ne ta, ee ne janna no go:

«Ge dape, rusu ma wa ka iigi ta go de?

Ge dape, ɓase ma wa kaɗ ge dwaɗɗa ge vḛḛne fare ma ge maa zì go de?

26Gan ga̰a̰l ge suwa pagal ma nuusi ta ya ndwa mbal twam,

Gan ga̰a̰l van ma vwal pe ya digi,

Kee ho̰o̰l ge Bagezok Dok mage Krist, Ndu ge na taa ne.»#Mkm 2.1-2.

27Ge mojo̰o̰ Daviɗ jin̰a ne go, a fareba go, gan ga̰a̰l Heroɗ mage goformo̰ Pons Pilaɗ ɓa̰a̰ pe digi ge suwal ga̰a̰l mbe no diŋ, ge nda ge gɔswal ma, ge ɓase ge Izrayel ne ma, kee ho̰o̰l ge Zeso mo ndu ge tèmel ge Harcal, ne ge mo taa ne. 28Àa dee ya huy kaŋ ge mo dee nuusi num ge zḛḛ ya day ma wa, ge pool mage laa ɓyareya ge amo pagal. 29Ge sego, Bagezok, ge mo kuwa num kee i ho̰o̰l no go, ho̰ mo nda ge tèmel ma pool ge oy fare ge amo be voo go fyalag. 30Ngay pool ge amo zum, ndwa go nda see zonna, kaŋ ajab ma, kaŋ ngayya ma num gwan ka keeya, ge ndu ge tèmel ge amo ge Harcal, Zeso dḭḭl pe. 31Guwa̰ ge num wa aa ge sok kee kaɗeya go, suwa ndaɗ ge num ko zì, On̰om ge Harcal mbo ya biri num mɔɗwag, àa gaa oy fare ge Dok ne be voo a̰me go fyalag.

Mbaa ta ge nda ge hoɗ fareba ma way

32Ɓase ge ho fareba ma peɗ, àa ka za̰a̰ ta ge ta buwal zì, àa kaɗ ge dul wa ge ɗu me. Ndu a̰me ɗu ge num buwal zige be ka cage a̰me ndwa ge tene pe to, ɗaŋɗe, àa ka vaa ta maa kaŋ ma ge ta buwal zì. 33Nda ge temeya ma ka jan fare ge pool, ge tanna ge Bagezok Zeso ne pagal. Dok ngay kwaɗa keeya ge na ne gḛḛ ge num ta peɗ. 34Ndu a̰me ɗu ge num buwal zige be hoɗege ge a̰me to. Ago num ge kaa ge gaaso ma koo ge zok ma, àa ka yaɗ num gezi, 35àa gene num bware ma ya ge nda ge temeya ma ndwa se. Num sḛ ma peɗ ka vaa num ge ta buwal zì, ge hoɗegeya ge ndu ge diige ne pagal.

36A mbe go no, ndu a̰me ɗu ge àa ka tol ne Jozef, ge no pe rusu ge Levi ne zì, ge too ge til ge Chipr ne go, ge nda ge temeya ma chiya ne dḭḭl Barnabas, ne pe wanna go: Van ge ca̰a̰me duul, 37ne sḛ waɗme, kaa ge gaaso ɗu, yiya ne gezi no, gene ne bware ya ge nda ge temeya ma ndwa se no me.

Currently Selected:

Tèmel keeya 4: kiaGRB

Highlight

Copy