Tèmel keeya 3

Zonna ge ndu ge ko looɗol ne

1Ge dwam a̰me go ɗu, Piyer mage Yohana ɗege mbo ge zok ge Dok ne zì, mbo kee kaɗeya ge gyala swa saa go. 2Sok ge àa dee ya, àa kuwa ndu a̰me ge ko looɗol ge na tolla go day, àa wa ya ka gene ne ya eeya, ge mojo̰o̰ maa ee ne dwam ma pagal tatab go, ge zok ge Dok ne wa ge waɗɗa, ge àa tol ne go: Zok wa waɗɗa ge siŋli go, ndwa go, ne wa ka kaɗe bware ge nda ge mbo waɗ ne zì ma tok go. 3Sok ge ka̰a̰ na ndwa kuwa Piyer mage Yohana mbo waɗ ge gulum ge zok ge Dok ne wa zì go, kaɗe num go, num ho̰ na a̰me nde. 4Piyer mage Yohana seŋe maa ndwa ya ndil ne, Piyer jan ne go: Ndi i kwaɗa! 5Ee na ndwa ya ge num ta, ge dape, kaa ge dwaɗɗa go, na mà seɗ a̰me ge num tok go. 6Ɗaŋɗe, Piyer jan ne go, bware koo dinar, a ge mbi tok go to, kaŋ ge mbi no ge ne, mbi hon mo ne: Ge dḭḭl ge Zeso Krist ge suwal Nazareɗ ne, ɗege digi, mo mbo vin̰a! 7Guwa̰, wan ne tok matoson, ndwa mbaa ne ɗege digi mḛḛya. Ge sok mbe go gaw, ne ko mage ne ko ndwal pe ma haɗ pool. 8Za̰a̰me digi avun cab, ɗege mbo vin̰a. Waɗ dagre ge num ge zok ge Dok ne zì yà, gaa mboya, ka zon digi ko jɔjwag ge laa saal, ka uware Dok me. 9Nda ge kaa go ma peɗ kuwa ne mboya, ka uware Dok me. 10Sok ge àa dee ya kuwaya go, ne ndu ge ka kàɗɗa ge zok ge Dok ne wa, ge àa tol ne go zok wa waɗɗa ge siŋli go, ndwa kaɗe kaŋ ne, voo mbo ya wan num, àa kee ajab gḛḛ ge ndu mbe mbo vin̰a ya pe.

Fare pe ge Piyer wa̰a̰ nda ne ge zok ge Dok ne zì

11Ndu ge see zonna mbe ɓyale tene ge Piyer mage Yohana. Sok ge ɓase ma kuwa num, àa kan soo ya mbo seɗ num, ge pag wa ge àa tol ne pag wa ge Salomo̰ ne zì. Àa ka kee ajab. 12Sok ge Piyer kuwa ano mbe go, gwan ge num janna go: Izrayel van ma, ge dape, ḛ wa ka kee ajab ge zonna ge ndu ge ko looɗol mbe ne pe de? Ge dape, ḛ wa ka ndil i ge mojo̰o̰ ndu mbe ɗege ya mbo vin̰a no, ne ge pool ge i i ta koo ge mboya dagre ge i i ge Dok ta de? 13Dok ge Abraham ne, ge Isak mage Jakob ne me, Dok ge nè baŋ ma way, pate Zeso na ndu ge tèmel, ge ḛ ɓin̰a ne gezi, ḛ ee fare ge ne pagal no ge Pilaɗ ndwa se, sok ge ne sḛ vḭḭ tene go na dol ne digi. 14Ɗaŋɗe ḛ, ḛ ɓyare to Ba ge Harcal mage temel, ḛ kaɗe no zoo go kaɗɗa àa kuwa ḛ a̰se, àa doo ḛ ya digi ndu ge hun swày. 15A go mbe no, ḛ gene Ba ge hon nda ndwa mbo swày no, ɗaŋɗe, Dok ta̰a̰ ne ge swày se no, i sḛ ma kuwa kaŋ mbe ma ge i ndwa. 16Ndu ge ḛ ndil ne, ge ḛ kuwa ne mbe no, a hoɗ fareba ge Zeso dḭḭl ta, ee nee ne seɗ zonna. A hoɗ fareba ge Zeso ta ee nee ne haɗ pool ɗiɗiŋ ge mojo̰o̰ ḛ kuwa ne no go.

17Ge sego, na̰ van ma, mbi kuwa go ḛ ke ne be wan pe, ḛ, ɓanna ge ḛ ga̰a̰l ma me. 18Ɗaŋɗe, fare ge Dok dee wuwage ne zḛḛ wal ge na nda ge zwagre na wa ma ta go: Krist, Ndu ge Dok taa ne mbo njoɗ yal, ne wa huy ne. 19Ḛ seŋe ta se ɗaŋ, ḛ eya fare, ndwa go ḛ wa seɗ poreya ge ḛ sone ma way. 20Go mbe no, Bagezok Dok mbo hon ḛ dwam ma, ge go ḛ wa seɗ ɗwabeya, wa teme ḛ ndu ge na mbege ne gezi ge ḛ pe ya waɗme, ndwa go Krist, Ndu ge na taa ne. 21Ge sego, Zeso Krist mbiya kaɗ ge pḭḭ zì ya gale, ɗiŋ ge go dwam mbe ma wa huy. Kaŋ ma dee ya keeya tetem ge maa sok ma go, ge mojo̰o̰ Dok wuwage ne ge zḛḛ ya day, ge na nda ge harcal ge zwagre na wa ma ta go. 22Ago, Moyiz jin̰a go: «Bagezok Dok ge ḛ ḛ, mbo ndage ndu ge zwagre na wa a̰me ɗu, ge ḛ buwal zì dinna ge mbi go, ḛ mbo gwan ḛ pagal ge fare ge ne mbo jan ḛ num ya ma pe se peɗ.»#Dwa 18.15-16. 23Ɗaŋɗe, ndu ge mbo gwan na pagal ya ge ne pe se to, àa mbo daa gwan isi ne ge nda ge Dok ne ma buwal zì to. 24Ge ndu ge zwagre Dok wa Samiyel ta ya day, ɗiŋ deɗ-ɗa ge nda ge ne guwa̰ se ma ta, kaŋ ge kee no dwam ge màno ma pul zì, àa wuwage num fare ge zḛḛ ya wal waɗme. 25Nda ge zwagre Dok wa ma van mage van ge wa tii vwalla ne ma! Dok vuwa wa tii ge ḛ baŋ ma ge ḛ pe, sok ge jin̰a Abraham go: «Pe rusu ge suwa pagal ma peɗ mbo seɗ wa tare ge mo rusu ta.»#Ped 22.18. 26Go mbe no, sok ge Dok ta̰a̰ na ndu ge tèmel ge swày se, ee pe teme ne zḛḛ wal gale ge ḛ ta, ndwa go, ne ke ḛ wa tare, ndu ge diige ge ḛ buwal zige seŋe tene se, ge kaŋ keeya ge na ne ge sone ma go.

Currently Selected:

Tèmel keeya 3: kiaGRB

Highlight

Copy