Tèmel keeya 15

Kwateya ge ga̰a̰l ge suwal ga̰a̰l Jerusalem diŋ

Gal 2.1-9

1Nda a̰me ma mbo ge suwa ge Jude ne ya ge Antiyoch go. Àa ka hate na̰ van ge ho fareba ma go: Kaɗɗa ḛ vyan bḛḛ ya ge wa yuwaleya ge Moyiz ne ma pagal to, ḛ seɗ monna to. 2Pol mage Barnabas pee num fare mbe, gool ge ga̰a̰l mbo ya ɗege ge num buwal zì. Sok mbe go, àa vin ta go maa teme Pol mage Barnabas ɓanna ge na̰ van ge ɗogle ge ho fareba ma mbo Jerusalem, mbo seɗ nda ge temeya mage nda ga̰a̰l ge ɗeme tèmel ma, ge fare mbe pe. 3Sok ge àa ɗege mboya, ɓase ge Krist ne ma ɓyare num a̰me fyalag ge num tok go. Sok kale mboya ge suwa ge Fenesi mage Samari ne pagal, àa wan num fare pe ge seŋe ya ge nda ge no rusu Yahuɗ zì to ma seŋe ta ja se ge Bagezok pe go. Fare mbe mbo ya kee na̰ van ge ho fareba ma peɗ laa saal gḛḛ me.

4Sok ge àa dee ya ge Jerusalem diŋ, ɓase ge Krist ne mage nda ge temeya ma ɓanna ge nda ga̰a̰l ge ɗeme tèmel ma ame num. Num sḛ ma wan num kaŋ ge Dok ka kee num ma peɗ, ge sok ge maa ka oy fare ge ne ne go. 5Ɗaŋɗe, Farisi a̰me ge ho fareba ma mḛḛ piliya, àa jan go: Ɓyare go àa ho̰ nda ge no rusu Yahuɗ zì to ma, ge ho fareba ma wa go num vin̰a bḛḛ mage mboya ge eeya ge Moyiz ne ma pagal.

6Nda ge temeya mage nda ga̰a̰l ge ɗeme tèmel ma mbo ya kaɗ se ndwa hale fare mbe pe. 7Sok ge àa geleŋe fare mbe kaal nde ge ta buwal zì, Piyer mbo ya ɗege digi jan num go: Na̰ van ma! Ḛ ge kuwaya go: Dok taa mbi ne ge ḛ buwal zì, ge zḛḛ ya day, ndwa go mbi oy Fare ge Kwaɗa, ge nda ge no rusu Yahuɗ zì to ma ta, num za̰a̰ ne, num wa deɗ-ɗa hoɗ fareba me. 8Dok ge kuwa dul wa ge nda duwana ma way, ngay zum no go, na ame num ya go, ho̰ num On̰om ge Harcal no, ge mojo̰o̰ ne sḛ ho̰ nè ne go waɗme. 9Ndi nè ge num ge nda ge ɗu ma go, be vare ndu a̰me to. Haa num dul wa ma harcal no, sok ge àa ho fareba go. 10Ge sego, a ma̰ kaŋ ee ḛ ne hee Dok pe, sok ee dṵṵl ge go mbe no ge nda ge ame hateya ma pagal, dṵṵl ge nè baŋ ma koo ge nè sḛ ma mbiya in ne to de? 11Nè dee ya ge hoɗ fareba go, nè mo̰o̰ mon ge kwaɗa keeya ge Bagezok Zeso ne ta, ge mojo̰o̰ num sḛ ma dee ya no go waɗme.

12Ɓase ge ho fareba ma mbo ya zaneya segeg, sok ge Barnabas mage Pol ka wan num kaŋ ajab mage kaŋ ngayya, ge Dok ka kee num ge maa ta ma go, ge nda ge no rusu Yahuɗ zì to ma buwal zì. 13Sok ge num wa aa go, Jak hee fare, jan go: «Na̰ van ma, ḛ za̰a̰ mbi gale! 14Simo̰ wa̰a̰ nè fare pe gyana, ge pe eeya go gaw, ge Dok daleya ge pe rusu ma ta, ndwa tal pe rusu a̰me ɗu ge num buwal zì, ne kaa mbegeya gezi caɗ ge na pe. 15Fare janna mbe mage nda ge zwagre Dok wa ma way ma ge sok ge ɗu go, ge mojo̰o̰ maktub ge Dok ne njaŋe go:

16“Dwam ɗu, mbi mbo gwan-na,

Mbi mbo sin zok ge Daviɗ ne ge guu se digi,

Mbi mbo gwan ge ne na byalam go,

Mbi mbo gwan ɗû ne ndiŋ.

17A ge pe no, nda ge no rusu Yahuɗ zì to ma peɗ,

Mbo mbo ya ɓyare mbi ge Bagezok pe waɗme,

Ɓanna dagre ge num ge mbi taa num go,

Num gaa mbi nda ma peɗ me.

18Ano, a fare janna ge Bagezok ne,

Ne ge kee kaŋ mbe ma deɗ-ɗa kɔn̰al go,

Ge zḛḛ ya wal day.”#Amo 9.11-12.

19«A ge pe, mbi Jak, mbi duwa no go, ne be kee kwaɗa ge go, a ka seŋe nda ge no rusu Yahuɗ zì to, ge gwan ja ge Dok ta ma ndwa to. 20Ɗaŋɗe, àa njaŋe num lawayta ndwa jan num go, num daa gwan zam duul ge no harcal to ge àa hun num kee siim ma tuwaleya to, num ɔwabe ta gezi ge ene sḛ duul keeya ge batraŋ ma ta, num za duul ge kaŋ kogor ge àa muwa̰se num ka̰a̰l ma to, koo swàm num za ne to me. 21Ago, ge doŋ pe ge zḛḛge ma ta ya day, àa ka hate nda eeya ge Moyiz ne ma, ge suwal ga̰a̰l ge diige diŋ peɗ, ge dape, àa ka isi num ge zok kee kaɗeya ge Yahuɗ ma way ma zì, ge dwam sabaɗ ma go tatab.»

Lawayta hon nda ge no rusu Yahuɗ zì to, ge ho fareba ma

22Sok mbe go, nda ge temeya ma, nda ga̰a̰l ge ɗeme tèmel ma ɓanna ge ɓase ge Krist ne ma mɔɗwag vin ta go, maa see nda a̰me ma ndwa teme num mbo suwal ga̰a̰l Antiyoch ɓanna ge Pol mage Barnabas. Àa mbo ya tal Jude ge àa tol ne Barsabas mage Silas, num ge na̰ van ma hon num hormo gḛḛ. 23Àa hon num lawayta mbe ge num tok go, ge a njaŋe no ne zì go: I, Zeso nda ge temeya ma ɓanna ge nda ga̰a̰l ge ɗeme tèmel ge no ḛ na̰ van ma sa̰a̰ ḛ wa gḛḛ, ḛ na̰ van ge ho fareba ma, ge no rusu Yahuɗ zì to ma, ge kaa no ge suwal ga̰a̰l Antiyoch diŋ, ge suwa ge Siri mage Silisi ne go ma. 24I za̰a̰ go nda a̰me ge i buwal zige ma, ge i ho num i wa ge fare a̰me pagal to ma peɗ, num vuuɗi ḛ ya digi, num vaa ḛ dwaɗɗa ma ya se, ge hateya ge maa way ma ta. 25A ge pe, i vḭḭ ta no go, ne keeya kwaɗa, i taa nda a̰me ma, i wa teme ḛ num yà ɓanna ge na̰ van ge laa wanna ma, Barnabas mage Pol, 26num ge ho̰ ta swày ge tèmel ge Bagezok Zeso Krist ne pe ma. 27I teme ḛ na̰ van Jude mage Silas yà ndwa go, num mbo yà ge maa ndwa gwan wan ḛ fare mbe ma pe. 28On̰om ge Harcal ɓanna ge i, i vḭḭ ta no go, ne keeya kwaɗa ɗe, i daa gwan ee dṵṵl a̰me ge ɗogle ma ḛ pagal to, ɗeŋew fare ge kwaɗa ge mbiya mbaaya mbe ma no: 29Num daa gwan zam duul ge àa hun num kee siim ge ɗogle ma tuwaleya to, num ɔwabe ta gezi ge ene sḛ duul keeya ge batraŋ ma ta, num za duul ge kaŋ kogor ge àa muwa̰se num ka̰a̰l ma to, koo swàm num za ne to me. I wa aa ne, ḛ sa̰a̰ ta wa.

30Àa ee nda ge àa taa num ma mboya, sok ge àa dee ge Antiyoch yà, guwa̰, àa kwate ɓase ge ho fareba ma ya se, àa hon num lawayta mbe. 31Sok ge àa isi lawayta mbe go, àa kee laa saal gḛḛ ge maa see pool ge ne ta pe. 32Ajo̰o̰ Jude mage Silas ma sḛ nda ge zwagre Dok wa ma ne, àa faa na̰ van ma fare ma gḛḛ, ndwa moɗege num, ee num cirsiya ge hoɗ fareba ge maa way ma zì. 33Àa kee dwam ma kwaɗa lag ge num buwal zì, guwa̰, na̰ van ma n̰a num mboya halas, àa jan num go: Dok mbo ge ḛ. Àa gwan ge nda ge teme num ya ma ndwa zì. 34[Ɗaŋɗe, Silas vin tene go, na gaa kàɗɗa swag ge na̰ van ge Suwal Antiyoch diŋ-ge ma ta. Jude gwan mbo Jerusalem hini.]

35Pol mage Barnabas gaa kàɗɗa ge suwal Antiyoch diŋ. Num sḛ ma ɓanna ge na̰ van ge ɗogle ma ka hate mage oy Fare ge Kwaɗa ge Bagezok ne.

Za̰a̰ ta to ge Barnabas mage Pol ne

Gal 4.13-15

36Dwam ma guwa̰ kwaɗa lag, Pol jan Barnabas go, n̰a nè guwa̰ mbo suwal ga̰a̰l ge nè oy fare ge Bagezok ne ge num diŋ ma go peɗ, ndwa ndilla go na̰ van ma don go maa hoɗ fareba zì kode? 37Barnabas ka ɓyare go na wan Yohana ge àa chiya ne dḭḭl go Mark ge maa pe yà. 38Ɗaŋɗe, Pol ɓyare fare mbe to, ge dape, Yohana dee suwa num ge suwa Pamfili go go, na daa mbo ge num pe ya, mbo kee tèmel ge num to. 39Za̰a̰ ta to ge num way kee ɗiŋ, àa mbo ya vaa ta se. Barnabas wan Mark, àa ge ne ndee ge baaburi go gwan mbo til Chipr. 40Pol wan Silas ge na pe go me. Guwa̰ ge na̰ van ma ee sok mboya ge num way ge Bagezok tok go, àa n̰a num mboya. 41A ge Silas an ge suwa Siri mage Silisi ne go, ndwa cirsi ɓase ge Krist ne ma, ge hoɗ fareba ge num way ma zì.

Currently Selected:

Tèmel keeya 15: kiaGRB

Highlight

Copy