Tèmel keeya 14

Fare oyya ge Pol mage Barnabas ne ge suwa ge Ikoniyom ne go

1Sok ge Pol mage Barnabas dee ya ge suwal Ikoniyom diŋ, àa mbo ge zok kee kaɗeya ge Yahuɗ ma way zì, ge mojo̰o̰ maa kê ge suwal Antiyoch ya go. Ge fare oyya ge num way ta, Yahuɗ mage Grek ma gḛḛ mbo ya hoɗ fareba ge Zeso ta. 2Ɗaŋɗe, Yahuɗ ge kuri be hoɗ fareba ma kan nda ge no rusu Yahuɗ zì to ma cece, àa ee num kee ho̰o̰l ge na̰ van ge ho fareba ma. 3Ge iigiya ma zì puy ɗe, nda ge temeya ma kee dwam ma kaal nde ge suwal mbe diŋ. Àa ka oy fare ge Bagezok ne be voo. Bagezok ka hon num pool kee kaŋ ajab mage kaŋ haŋle ma, ndwa ngayya zum go, fare janna ge num way ge kuwa a̰se ge na ne pagal, ne fare ge fareba ne. 4Ɓase ge suwal ga̰a̰l mbe diŋ-ge ma mbo ya vaa se pe zi: Cùb ge Yahuɗ ma pe go, gegene ma ge nda ge temeya ma pe go me.

5Guwa̰, nda ge no rusu Yahuɗ zì to mbe mage Yahuɗ ma, ɓanna ge maa ga̰a̰l ma za̰a̰ ta go, maa kee nda ge temeya ge Zeso ne ma yal, maa mbaa num gezi ge njal me. 6Sok ge nda ge temeya ma za̰a̰ fare mbe go, àa chiya mbo ge suwa ge Likawoni ne yà, ge suwal ga̰a̰l Listr mage Derb, ge num suwal ge vee num se ma go me. 7Àa ka oy Fare ge Kwaɗa ge Zeso ne ge suwa mbe ma go waɗme.

Fare oyya ge Pol mage Barnabas ne ge suwal ga̰a̰l Listr diŋ

8Ge sok oy fare ge suwal Listr diŋ go, àa mbo ya seɗ ndu a̰me ɗu ge ko looɗol, ge tolla ge ne ne ya day, ge gale mbo vin̰a dwam ɗu to, wa ya kàɗɗa. 9Ka za̰a̰ fare ge Pol ka janna, Pol ee na angal ya ge ne ta, kuwa go, ge hoɗ fareba ge ne ne ta, ne ge vin̰a seɗ zonna. 10Ge sok mbe go, Pol hee na ka̰a̰l digi, jan ne go: Ɗege digi mḛḛya temel. Ndu mbe mbo ya za̰a̰me digi ɓarta, ɗege mbo vin̰a. 11Sok ge ɓase ma ka̰a̰ ndwa kuwa kaŋ ge Pol kê ne, àa oy digi ge ka̰a̰l ndaal ge wa Likawoni go: Dok ge hê diir ge nda duwana ma way ma, kan maa ko ja ge i buwal zì no. 12Àa ka tol Barnabas go: Dok Zes, Pol me go: Dok Hermes, ge dape, ne sḛ ba ge ka oy fare ne. 13Ndu ge kee tuwaleya ge dok Zes ne, ge ne zok siim no ge suwal ga̰a̰l lee ge zum-ge go, gene nday pool ma ya zi, ge zok siim mbe wa ge waɗɗa go, ge àa tii ɔwara wa folla ma no num ta. Ne sḛ ɓanna ge ɓase ma ɓyare go maa kee tuwaleya ge nda ge temeya ma pe. 14Sok ge Barnabas mage Pol za̰a̰ fare mbe go, àa taabe maa ba̰a̰ ma gezi ge maa ta. Àa haa ta waɗ ge ɓase ma buwal zì yà ge oyya go: 15Kondore ma, ḛ kee kaŋ mbe go ge dape de? I sḛ ma nda duwana ma ne ge ḛ sḛ ma go waɗme. I mbo ya oy ḛ Fare ge Kwaɗa ndwa go, ḛ n̰a kaŋ siim ge bàŋ yag ma gezi, ḛ seŋe ta ya se ge Dok ge ndwa ta, ne ge kê pḭḭ, kê suwa, kê mam ga̰a̰l nuwam mage kaŋ ge na pul se ge ma no peɗ me. 16Ge doŋ pe ge kale ya ma go, Dok n̰a pe rusu ge diige kee laa ɓyareya ge na ne. 17Go no puy ɗe, ka kee tene kuwaya ɗaɗag ge kaŋ keeya ge na ne ge kwaɗa ma ta. Ka suwa ḛ mam ge pḭḭ zì ya, ḛ ka kan siyal ge ḛ kaŋ kyarga ma way ge maa sok ma go tetem me. Ka hon ḛ kaŋ zam, ḛ ka an̰n̰a ge laa saal me.

18A ge yal gḛḛ, àa ɗege tele ɓase ma be kee tuwaleya ge hon maa mbe no.

19Guwa̰, Yahuɗ ma zuɗ ge Antiyoch ge no ge Pisidi go ya, ge Ikoniyom ya, àa mbo ya muwa̰le ɓase ma ge maa pe go, àa ɔwabe njal gṵṵ ma mbal Pol gezi. Guwa̰ ge àa mbaa ne go, àa zwal ne mbo dol ge suwal ga̰a̰l guwa̰ zum yà, ge dape, àa kaa ge dwaɗɗa go ne suu suu. 20Ɗaŋɗe, sok ge nda ge ame hateya ma mbo ya vee ne se go, zwal tene digi, àa ge num ɓan mbo suwal ga̰a̰l diŋ. Sok yan kin̰are, àa ge Barnabas gaa mbo suwal Derb.

Gwanna ge sok oy fare ya ge suwal Antiyoch,ge no suwa ge Siri ne go diŋ

21Barnabas mage Pol oy Fare ge Kwaɗa ge suwal ga̰a̰l Derb diŋ, nda gḛḛ mbo ya seŋe nda ge ame hateya ma. Guwa̰, àa gwan mbo ge suwa ge Pisidi ne yà, ge ne suwal ga̰a̰l Listr, Ikoniyom mage Antiyoch diŋ. 22Àa ka moɗege nda ge ame hateya ma ndwa go num see pool, ge maa fare janna ma ta. Àa ka dwage num janna go: Num ka̰a̰ maa tok ge hoɗ fareba ge maa way ma ta to, ge dape, ne ge yal njoɗɗa ma ta, nè wa seɗ vin̰a ge waɗ muluk ge Dok ne zì go. 23Ge ɓase ge Krist ne ma buwal zì, ge suwal ge diige diŋ, àa ka ee num ga̰a̰l ge ɗeme tèmel ma. Guwa̰ ge àa kee kaɗeya mage wan mam njuwal ge num go, àa deŋe num ge Bagezok ge àa ho fareba ge ne ta tok go.

24 Nda ge temeya ma kale mboya ge suwa ge Pisidi ne pagal, àa deɗ-ɗa ge suwa ge Pamfili ne go. 25Sok ge àa dee ya ge suwal Perg diŋ, àa oy fare ge Dok ne, àa ɗege ge ne go kale mbo ge suwal Atali yà. 26Ge sok mbe go, àa ndee baaburi ge mam se ge go gwan mbo suwal ga̰a̰l Antiyoch ge no Siri go, suwal ga̰a̰l ge àa dee ee pe deŋe num ge Dok tok go, ndwa go ne ho̰ num pool ge kee na tèmel. Tèmel mbe ge àa deɗ ja aa ne pe keeya ge sego no.

27Guwa̰ ge Pol mage Barnabas dee ya ge suwal ga̰a̰l Antiyoch diŋ, àa kwate ɓase ge Krist ne ma ya se, àa wan num fare ge Dok kee ge maa ma pe peɗ, ge hageya ge ne hage vin̰a ge nda ge no rusu Yahuɗ zì to ma pagal pe, ndwa go num dee ya hoɗ fareba. 28Àa gaa kàɗɗa kaal nde ge nda ge ame hateya ma ta, ge suwal ga̰a̰l mbe diŋ kee tèmel ge num.

Currently Selected:

Tèmel keeya 14: kiaGRB

Highlight

Copy