Tèmel keeya 12

Swày ge Jak ne mage wanna ge Piyer ne ge daŋay zì

1Ge zaman mbe go, gan ga̰a̰l Heroɗ, ɗege kee ɓase ge Krist ne a̰me ma yal ge suwal Jerusalem diŋ. 2Hoɗ asagar ma na wa go, num hṵṵ Jak ge Yohana na̰ van gezi ge kasagar. 3Sok ge kuwa go, fare mbe kee Yahuɗ ma sḛ ya tii ɗe, gwan taale na tok, wan Piyer dol ne daŋay zì. Kê na fare mbe ge dwam vḛḛso ge dupḛ ge be jìn̰al hore na ndwa zì ne go. 4Guwa̰ ge doo ne daŋay zì, vaa asagar ma se ndà ndà pe ndà, ndwa koy ne. Ne sḛ kê na dwaɗɗa go, na gene ne ya ge ɓase ma ndwa se, ndwa kun ne sariya, guwa̰ dwam vḛḛso ge Paska ne go. 5Sok ge Piyer kaa dibiya ge daŋay zì, ɓase ge Krist ne ma ka kee kaɗeya ge aa ta ge Dok ta, ge ne pe.

Dolla ge Piyer ne ge daŋay zì ya zum

6Ajo̰o̰ àa gene Piyer ya zum kin̰are aaram ndwa kun sariya ge ne pagal, ge ɗaal mbe zì, kaa vwalla se ge zul ma zi, ge asagar ge zi ge ka koy na ma ta. Lee ɗu, ge asagar ge ɗu ta, lee gene ge asagar gegene ta me. Asagar ge koy zok daŋay wa ma gwan kaɗ mḛḛya ge zum iya. 7Tugcug, malayka ge Bagezok ne a̰me ɗu, dyan tene ge zok daŋay zì, kɔn̰al zen, ame zok pul se mɔɗwag. Malayka dabe Piyer ge ne ziya wa go, kore ne digi, jan ne go: Ɗege digi avun cab, bàŋ go helo, zul ma kale fen ta ge ne tok ma ta gezi ɓal. 8Guwa̰, Malayka gwan jan ne go: Vuwa mo hoo ge mo pul go, pa mo tyako ma. Piyer kee mbe go tem. Gwan jan ne go: Ka̰a̰ mo ba̰a̰ ga̰a̰l kapoɗ ge mo ta, mbo ya ge mbi pe go.

9Piyer waɗ ge daŋay zì ya zum ge malayka pe go, be ge wan pe fareba go na waɗ go zum ge daŋay zì to. Ɗaŋɗe, ka dwaɗ go ne kin̰a jan na ne. 10Àa mbo ya kale asagar ge koy zok wa ge zḛḛ ge ma, ge zi ma, àa deɗ-ɗa ge zok wa ge walam, ge hage waɗ mbo suwal diŋ go. Zok wa mbe kale hage tene se ɓal, àa waɗ-ɗa zum, àa hee vin̰a a̰me ɗu. Ge num sok mboya go, Piyer tan tene, malayka fwaɗ-ɗa sok. 11Guwa̰ go, Piyer ndwa tyan gezi, jan tene go: A fareba mbi kuwa ya go go, Bagezok teme ya na malayka ndwa mon mbi ge Heroɗ mage Yahuɗ ma yal ge daa mà kee mbi num ya ma zì.

12Guwa̰ ge ne sḛ duwa nde, hee vin̰a mbo ge Mari ge Yohana na̰ yà, Yohana ge àa chiya ne dḭḭl go Mark. Nda ge ho fareba ma gḛḛ wa ya seɗ ta kee kaɗeya ge ne diŋ. 13Sok ge Piyer dee ya, dabe zok wa ge zum-ge, moor kale ge àa tol ne Rode mbo ya ndwa ndil ndu ge dabe zok wa. 14Sok ge za̰a̰ Piyer ka̰a̰l, kee ne laa saal gḛḛ, ge go na hage zok wa se ɗe, gwan soo, mbo wuwage ɓase ma go, ne Piyer ne zok wa zum. 15Àa jan ne go: Seger kee mo ne de? Wan na wa bàba go, ne nee ne. 16Àa gwan jan ne go: Kaɗ mà ne malayka ne. Ɗaŋɗe, Piyer gwan ka dabe zok wa, sok ge àa mbo ya hage zok wa, àa kuwa ne, àa kee ajab. 17Kee num na tok ndwa go num zane, ɗege wan num fare pe ge kaŋ ge Bagezok kê ge na, ge ne doo na ge daŋay zì ya zum. Gwan jan num go, fare mbe no, ḛ mbo wuwage Jak mage na̰ van gegene ma ne waɗme. Guwa̰, waɗ-ɗa zum mbo sok ge ɗogle.

18Sok yan aaram, asagar ge ka koy Piyer ma mbo ya iigi digi giliw, àa ka ele ta ge fare ge seɗ ne ya pe. 19Heroɗ kan na asagar ma mbo ɓyare ne sok ma go peɗ, ɗaŋɗe, àa seɗ ne to. Guwa̰ ge ele asagar ge koy zok daŋay wa ma fare go, hoɗ na wa go, àa hṵṵ num gezi. Ge sok mbe go, Heroɗ ɗege ge suwa ge Jude ne go, mbo kaɗ ge suwal Sezare yà swag.

Swày ge gan ga̰a̰l Heroɗ ne

20Ajo̰o̰ Heroɗ mage nda ge suwal Tir mage Sido̰ ma be ka za̰a̰ ta to, num sḛ ma mbo ya vin ta wa dagre ɗu teme nda ya ge ne ta. Àa za̰a̰ ta ge Blastus, gan ga̰a̰l wa ge se ge, ndwa seɗ vin̰a ge mbo ge gan ga̰a̰l ta gene halas ya maa buwal zì, ge dape, num suwal ma ka seɗ kaŋ zam ge suwal ge gan ga̰a̰l Heroɗ ne ta. 21Sok ge dwam ge àa ge num za̰a̰ ta ge ne pagal go mbiya, Heroɗ kan na ba̰a̰ gan ge na ta, kaɗ ge na hòol kun sariya pagal. Ndage na ka̰a̰l digi ge ɓase ma pagal, ka sage fare janna. 22Ɓase ma ka oyya digi go: A ka̰a̰l ge dok a̰me nee ne me to no, a ka̰a̰l ge ndu duwana nee ne ɗer ɓade! 23Ge sok mbe go gaw, malayka ge Bagezok ne a̰me ɗu iyal ne ge tuguɗi, ge dape, ne sḛ ame hormo ge Dok daa mà seɗ ne ya. Chabso ma zam ne ge na ndwa, gaa suuya.

24Go no puy, fare ge Bagezok Dok ne ka dasare se, nda ka hoɗ fareba. 25Guwa̰ ge Barnabas mage Sol huy tèmel ge àa teme maa ya ge ne pe wa, ge Jerusalem diŋ, àa wan Yohana ge àa chiya ne dḭḭl go Mark ya ge maa pe go, sok ge àa seŋe ya gwanna go.

Currently Selected:

Tèmel keeya 12: kiaGRB

Highlight

Copy