Tèmel keeya 10

Piyer mage Korney

1Ndu a̰me ɗu, ge àa ka tol ne Korney, kaa ge suwal Sezare diŋ. Ne sḛ kaa ga̰a̰l ge asagar ge kis ma way, ge asagar ge ɗogle ge kikis menengal ma buwal zì, ge àa tol ne Itali. 2A ndu ge kaa ge voo ge Dok ne ge na zì ne, ka kee uwareya ɗaɗag hon Dok ge Yahuɗ ma way ɓanna ge na zok mɔɗwag. Ka mbaa Yahuɗ ge hoɗegeya ma gḛḛ, ka kee kaɗeya ɗaɗag ge Dok ta me. 3Dwam a̰me go ɗu, ge ler taa ge gyala tok gasamal ne mbiya go, kuwa gḭḭl ge malayka ge Dok ne gezi kɔn̰al yaɗaɗ, waɗ-ɗa ge na diŋ tol na go: Korney!

4Sok ge Korney ka̰a̰ na ndwa kuwa ne, voo mbo ya wan ne, jan go: Mo mbo ya kwaɗa ɓade Bagezok? Malayka jan ne go: Mo kaɗeya mage mbaaya ge mo mbaa nda ge hoɗegeya ma deɗ-ɗa ge Dok ndwa se yà dinna ge kaŋ dwaɗ pagal go. 5Teme nda ge sego mbo suwal Yafa, num too Simo̰ ge àa chiya ne dḭḭl Piyer ya. 6Kaa gɔswal ge ndu a̰me ge àa tol ne Simo̰ ba ge wan gwabal diŋ, ne zok ge mam ga̰a̰l nuwam wa go.

7Sok ge malayka ge ka jan ne fare doo tene mboya go, Korney tol na dore ma ya zi, ɓanna ge asagar a̰me ɗu ge kee na tèmel ma buwal zì, ne ge kaa ge voo ge Dok ne ge na zì. 8Wan num fare ge kee ma pe mɔɗwag, guwa̰, teme num mbo suwal Yafa.

9Sok yan kin̰are, ajo̰o̰ àa gale sok mboya go, sok ge àa gaa guwa ge waɗ suwal diŋ, Piyer ndee ya ge sok kàɗɗa ge no zok pagal digi yà, gyala pɔgwa taɗ ndwa kee kaɗeya. 10Camal ɗege kee ne, ɓyare a̰me ge ndal na dul pe, sok ge àa ka kee ne kaŋ zam go, kaŋ a̰me dyan tene ge ne ndwa go. 11Kuwa pḭḭ hageya gezi, kaŋ a̰me ɗu dinna ge ba̰a̰ fiyal vwalla go, ne keŋ ge ndà ma kaa vwalla ge tàal, ka siri ge digi ya suwa pagal se. 12Kaŋ ge ko ndà ge diige pe peɗ, kaŋ ge saa ge maa pul ma ɓanna ge njoole ge ɗege no pḭḭ digi ge diige pe peɗ me, àa kaɗ ge ne pul go. 13Ka̰a̰l a̰me ɗu jan ne go: Piyer ɗege digi, hṵṵ ɗu, mo zam. 14Ɗaŋɗe, Piyer gwan ge ne janna go: To, Bagezok, kaŋ ge àa tele ne koo ge harcal to gale be waɗ ge mbi wa zì dwam ɗu to. 15Ka̰a̰l mbe gwan jan ne ge ndwa zi go, kaŋ ge Dok haɗ ne ya harcal, kaa ge mo gwan ndil ne harcal to to. 16Fare mbe dwage keeya ɗiŋ ndwa taa, avun cab, àa zwal ba̰a̰ mbe ge ne ndwa se gwan mbo pḭḭ zì yà.

17Ajo̰o̰ Piyer be wan fare taaya ge na see ne pe to, kaɗ ge iigiya ge na sḛ zì. Ɗaŋɗe, nda mbe ge Korney teme num ya ma, sok ele Simo̰ zok pe go, àa deɗ-ɗa ge ne zok wa go. 18Àa ele sok diŋ yà go, Simo̰ ge àa chiya ne dḭḭl go Piyer no, ne kaa gɔswal zok mbe no diŋ-go de? 19Piyer gale sok dwaɗ ge na fare taaya mbe pagal, On̰om jan ne go: Nda taa ndil mo go zum. 20Ɗege digi, mo mbo ya ge num ta se, gii tene to, ḛ ge num ɓan mboya. Ago, a mbi sḛ teme num ya ne. 21Piyer mbo ya ge num ta se, jan num go, mbi ndu mbe ge ḛ ɓyare nee ne, ḛ ɓyare mbi ge dape de? 22Àa gwan ge ne janna go: Ga̰a̰l ge asagar ge kis ma way Korney teme i ya ne ge mo ta. A ndu ge temel ne, kaɗ ndu ge no ge voo ge Dok ne ge na zì, ge pe rusu ge Yahuɗ ma way peɗ dore ne me. Malayka ge harcal a̰me ɗu din̰a tene ge ne ta, jin̰a ne no go, ne ee tèmel tol mo ya, ndwa go ne wa za̰a̰ fare ge mo wa zige. 23Guwa̰ ge za̰a̰ num go, ɔwabe num ya diŋ, hon num sok fiiya.

Sok yan aaram, àa ee ta ge vin̰a pe go mboya, ɓanna ge na̰ van a̰me ge ho fareba ge suwal Yafa diŋ-ge ma. 24Ge dwam ge zi pagal, àa deɗ-ɗa ge suwal Sezare go, Korney wa ya ka da̰a̰re num ɓanna ge na sele mage na kondore ge na too num ya ma me. 25Sok ge Piyer dee ya diŋ, Korney mbo ya ge ne ndwa zì kun ne, guu na ko se san ne wa ndwa hon ne hormo. 26Ɗaŋɗe, Piyer wan ne digi, jan ne go: Ɗege digi, mbi ndu duwana ne bàŋ ge mo go me. 27Guwa̰, àa ge ne gaa ya siɗigi fare ɗiŋ, àa waɗ-ɗa diŋ, Piyer seɗ go nda kwate se gḛḛ. 28Hee fare, jan num go: Ḛ kuwa kuwa go, ge wa yuwaleya ge Dok ho̰ i ne pagal, tele tele go, Yahuɗ kee kondore ge ndu ge no rusu Yahuɗ zì to koo mbo ne diŋ to, ɗaŋɗe, Dok ke mbi kuwaya no go, ne kaa ge mbi ndi ndu a̰me seŋre koo harcal to. 29A ge pe no, sok ge ḛ ee tèmel mbo tol mbi ya, mbi be giɗ tene to. Ge sego, mà kaɗ ge go ḛ jan mbi fare ge ḛ too mbi ya ge pe nde de?

30Korney gwan ge ne janna go: Dwam keeya taa ge mbi kee kaɗeya no go ge mbi diŋ, ge ler taa ge gyala tok gasamal, ge nè no ne zì mbe go tem, mbi ta̰a̰ tene ge ndu a̰me ɗu, ge ba̰a̰ ga̰a̰l seeya cicim dyan tene ge mbi ta, jin̰a mbi no go: 31Korney, Dok za̰a̰ kaɗeya ge amo ya go, be vyale ge mbaaya ge mo mbaa nda ge hoɗegeya ma to me. 32Doo tèmel mbo tol Simo̰ ge àa chiya ne dḭḭl go Piyer ge suwal Yafa yà. Kaa gɔswal ge na kane Simo̰, ndu ge wan gwabal diŋ, ne zok ge mam ga̰a̰l nuwam wa go. 33Ge sok mbe go gaw, mbi doo tèmel mbo tol mo ya no, mo me, mo be kee dṵṵl ge mbo ya to. Ge sego, i no mɔɗwag, i ge Dok ndwa se ge sok no go, i kwate ya ndwa za̰a̰ fare ge Bagezok ho mo na wa num pagal ma go mo jin̰a i num ma.

Fare janna ge Piyer ne ge Korney diŋ

34Ge sok mbe go, Piyer hee fare, jan go: Fareba, mbi gale wan fare mbe pe ya no, Dok zane vare ndu to. 35Ɗaŋɗe, pe rusu ge diige, ge no ge voo ge Dok ne ge na zì, ge mbo ge temel pagal, Dok laa wan ne wan. 36Dok ho̰ Izrayel van ma na fare ndwa wuwage num Fare ge Kwaɗa ge halas ne, ge mbo ge Zeso Krist ta. Ne sḛ a Bagezok ge nda duwana ma way ne peɗ. 37Ḛ za̰a̰ fare ge Yohana ne, sok ge ka oy fare ge kee nda baptem ne, ḛ kuwa kaŋ ge kê ge suwa ge Izrayel ne pagal peɗ, ee pe ge Galile go deɗ-ɗa ge suwa ge Jude ne go. 38Ḛ ge kuwaya tyatyaɗ go, Dok ho̰ Zeso ge suwal Nazareɗ ne On̰om ge Harcal, ho̰ ne pool no me. Ne sḛ ka anna ge suwa ge Izrayel ne pagal go peɗ, ka kee nda kwaɗa, ka zon nda ge ka kee moor hon Ba ge ho̰o̰l ma me. Ago Dok kaa dagre ge ne. 39Nè kuwa kaŋ keeya ge ne ne ma peɗ ge nè ndwa, ge kee num ge Yahuɗ ma suwa pagal peɗ, ge num suwal ga̰a̰l Jerusalem diŋ me. Àa pee ne ge ɔwara kaŋre ta digi, guwa̰, see swày no. 40Ɗaŋɗe, Dok ta̰a̰ ne digi ge swày se no ge dwam ge taa pagal, ho̰ ne pool ge ngay tene ge nda ta no. 41Be ge nda ta peɗ to, ɗaŋɗe, ge i nda ge Dok tuwa i ge zḛḛ ya wal day go i kaa nda ge sayda ge na ne ma. I nda ge zâ, ge njoo dagre ge ne ma ne, guwa̰ tanna ge ne ne ge swày se go. 42Ho i na wa go, i oy Fare ge Kwaɗa ge Izrayel van ma ta, i jin̰a num zum waŋ go, ne ndu ge Dok taa nee ne ndwa kun sariya ge nda ge ndwa mage nda ge swày ma pagal. 43Nda ge zwagre Dok wa ma peɗ jin̰a fare ge Zeso pe go: Ndu ge mbo hoɗ fareba ya ge ne ta, Dok mbo pore ne sone ma ge dḭḭl ge ne ne pe.

On̰om ge Harcal ge pe rusu ge ɗogle ma pagal

44Piyer gale sok jan fare go, On̰om ge Harcal mbo ya ge num ge ka za̰a̰ ne fare janna ma pagal peɗ. 45Yahuɗ ge ho fareba ge ɗeme Piyer ya ma peɗ, mbo ya kee ajab ge Dok ho̰ bobo ge On̰om ge Harcal ge na ne ya, ge nda ge no rusu Yahuɗ zì to ma pagal pe waɗme. 46Ago, àa ka za̰a̰ num faa wa ge ɗogle mage mbal Dok gagso. Sok mbe go, Piyer hee fare ele go: 47Nè ge pool kuri be kee nda ge ame On̰om ge Harcal dinna ge nè go ma baptem de? 48Hoɗ na wa go, a kee num baptem ge dḭḭl ge Zeso Krist ne. Ge sok mbe go, num sḛ ma kaɗe ne go, ne gale kaa ge maa ta dwam ma kwaɗa lag.

Currently Selected:

Tèmel keeya 10: kiaGRB

Highlight

Copy