Marcos 3
3
I Jesús xrutzirsaj jun achi sikirnaq u'ab' che i ij sábado
1I Jesús xok chik pa ja re i molb'al ib' ke i judío, are uri xrilo chi o jun achi chila chi sikirnaq u'ab'. 2Xwiri chila pa ja le, je o jujun aj fariseo chi ketijin chuk'ak'alixik i Jesús we krutzirsaj i achi le che i ij sábado, man keje ile kkiriq uri wach umak kkikojo. 3Are uri i Jesús xub'ij che i achi chi sikirnaq u'ab':
—Chatwalijoq xaq chattak'al chqaxol.
4Te'uri xutz'onoj chke i jub'an chik:
—¿Wach yatal chqe chi kqa'an che i ij sábado, are i utz o are i utz taj? ¿Are uto'ik uk'aslemal jun winaq o are kqaya che chi kkamik?
Xwiri mijun xula' uwach. 5Are uri i Jesús lik xpe roywal, xumaj kitaqexik konojel i winaq chi je o chrij chwach, xaq xpe ub'is man lik kkita ti ub'e. Te'uri xub'ij che achi chi sikirnaq u'ab':
—Chasuk'b'a a'ab'.
I achi le xusuk'b'a b'i u'ab', are uri juntir xutzir u'ab'. 6Xwiri i aj fariseo are xe'el b'ik xkimol la kib' ku' i jutzob'aj chi je uwinaq ma Herodes, junam xe'ok chuch'ob'ik wach ukamsaxik i Jesús kki'ano.
Uk'iyal winaq chuchi' i semelik ya
7Lik je k'i i winaq aj Galilea je teren chrij i Jesús; are uri xe'e junam ku' utijoxelab' chuchi' i semelik ya. 8Are xketamaj i winaq wach i nimaq taq anik chi ku'an i Jesús, are uri xaq xeupon k'iyal winaq aj pa Judea, aj pa Jerusalén, aj pa Idumea, aj ch'aqap re i raqana Jordán, xaq xeupon i winaq re keb' tinimit Tiro xaq i Sidón. 9Rumali i Jesús xub'ij chke utijoxelab' chi kkitzukuj jun barco man keje ile kpitz'pat ti chkixol i winaq, 10man je k'i iwab'ib' xerutzirsaj, rumali lik laj konojel iwab'ib' kki'an pen chi kkimin kib' ru' i Jesús, man kkaj kkichap pan jub'i'. 11I itzel taq tew are xkil uwach i Jesús, juntir xexuki chwach xaq xesik'in chub'ixkil:
—¡Yet at uk'ojol i Dios! —Xecha che.
12Xwiri i Jesús xeuyaj itzel taq tew; xuya ti chke kkib'ij pachin ire.
I Jesús xeucha kab'lajuj apostolab'
13Chrijil chik ile i Jesús xel b'i puwi jun jyub', chila xeu'ul wi pachin taq kraj ire chi keterej chrij, i lik xeupon ru'. 14Je kab'lajuj xeu'ul chkixol re keterej chrij, xaq re keutaq b'i chub'ixkil utzij i Dios. Ike le xuya pkib'i apostolab'. 15Xaq xuya pki'ab' chi kkesaj b'i itzel taq tew chke i winaq. 16Are kib'i i kab'lajuj iri chi xeu'ul i Jesús: Ma Simón chi xaq ma Pedro xb'ix che rumal i Jesús; 17Xaq i je keb' uk'ojol ma Zebedeo chi are a Jacobo xaq ucha' chi a Wan; i Jesús xuya pkib'i, Boanerges (chi ke'eloq rak'al i ray chi kraqlajik), 18ma Andrés, ma Felipe, ma Bartolomé, ma Mateo, ma Tomás, xaq i ma Jacobo chi uk'ojol mam Alfeo; ma Tadeo, ma Simón chi aj Cananeo, 19xaq i ma Judas Iscariote chi x-on panoq xujach i Jesús pki'ab' i tzel keilawik.
I je ajkojol umak i Jesús kkib'ij chi ucho'ab' xa ru' Itzel petnaq wi
20I Jesús are xok chik che jun ja, are uri xemoltaj tan chik k'iyal winaq ru'; ire xaq i utijoxelab' lik xkitij ti chik kiwa rumal kik'iyal winaq le. 21I rachalal i Jesús are xkita utzijol ronojel ni'pa ktijin i Jesús chu'anik, are uri xe'e chuk'amik man i winaq kkib'ij chi i Jesús ch'ujernaq.
22Xaq xeupon i tijonelab' re ujer atb'al tzij chi je petnaq pa Jerusalén, ike xkib'ij: “Ile are i Beelzebú chi kaj-atzil itzel yawnaq i cho'ab' le pu'ab', rumali ktiki chkelsaxik b'i itzel taq tew”; xecha.
23Are uri i Jesús xeusik'ij konojel i tijonelab' le, xub'ij jun tijojb'al tzij chke: “¿Wach u'anik ile chi jun Itzel kresaj b'i jun rach Itzel?” 24Knajtin b'awa jun tinimit ile kib'ij yix we kki'an keb' tzob'aj che kib' xaq kki'an ch'oj chkiwach; kenajtin taj. 25Xaq keje jub'an alal ile we je ajch'oj chkiwach lik kenajtin ti uri. 26Xaq keje ku'an Itzel ile we kki'an keb' tzob'aj che kib' xaq we kki'an ch'oj chkiwach lik kenajtin ti uri, chila uri ksach wi kiwach.
27Mijun ktiki chrel-axik ub'itaq re jun winaq chi lik o ucho'ab' we kuyut' taj, xwi keje ile ktiki uri che i el-anik.
28Lik saq laj tzij kinb'ij chiwe chi i Dios kukuy ni ronojel kimak i winaq xaq ronojel ni'pa i utz ti laj taq tzij chi kkib'ij, 29xwiri, jun we kub'ij i utz ti laj taq tzij che i Lo'laj Utewal i Dios, lik nti kuyb'al umak uri, xaq lik ajmak uri k-e ij saq.
30Keje ile xub'ij i Jesús chke, man ike lik xkib'ij chi i Jesús o itzel tew che.
Uchuch xaq i je rachalal i Jesús
31Are uri xupon uchuch xaq i je rachalal i Jesús, xwiri xe'ok ti chub'i pa ja, xekanaj kan chisaq, rumali xa xkitaq usik'ixik i Jesús. 32I winaq chi je kul chrij chwach i Jesús chutayik utzij chila pa ja, xkib'ij che:
—I achuch, i je awachalal je o chisaq katkitzukuj —xecha.
33I Jesús xub'ij chke:
—¿Pachin inchuch, je pachin taq wachalal?
34Are uri xuk'am kitaqexik ni'pa je kul chrij chwach, xaq xub'ij chke:
—Are yix ix inchuch, yix ix are wachalal. 35Man xapachin ku'ano pacha kraj i Dios, are inchuch, are wachalal.
Keje ile xub'ij i Jesús chke.
Currently Selected:
Marcos 3: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
