Marcos 1

Ma Wan chi Ajqajsanel Ya o pa tz'inilik jyub' chaqij

1Are iri are i jeqb'al i utz laj tzij k'ak' chrij i Jesucristo, chi uk'ojol i Dios.

2Utz'ib'am kan mam Isaías chi profeta. Ire xutz'ib'aj i tziji chi xub'ij i Dios che Uk'ojol:

“Chata pe', xub'ij che, kintaq b'i jun intaqon chi knab'ej b'i chawach,

man kuyijb'a pan i b'e chawach.

3Ktataj jun ch'awb'al chi ksik'in chub'ixkil i tziji pa tz'inilik jyub' chaqij:

Chiyijb'a ub'e i Ajwal, chib'ut'u ni'pa i jul

xaq chiwesaj ni'pa i tanalaq.”

Keje ile tz'ib'tal kanoq.

4Lik keje ile xe'eloq, man xk'un jun achi chi ma Wan ub'i Ajqajsanel Ya, xok chkipixb'axik i winaq chila pa tz'inilik jyub' chaqij xaq xuqajsaj ya pkiwi, xub'ij chke: “Chijalwachij inojb'al, xaq chitz'onoj uqajsaxik ya piwi, man i Dios kukuy ni imak”; chiwe xcha. 5Che taq i ij le lik je k'i ni i winaq xeupon ru' chila chutayik utzij ma Wan le; xeupon i aj Jerusalén, xaq konojel jub'an tinimit re i jyub' Judea. Chila xkijach wi kimak, te'uri i ma Wan xuqajsaj ya pkiwi chila chupam i raqana Jordán.

6I ma Wan le, i u'u' antal che i rismal kamey#1.6 Chikop chi kmajaw kaway. Chi lik kuch'ij b'e pa taq k'ijib'al chaqij xaq pa taq seneb'.; i ximb'al upam are jun ch'aqap tz'um, i uwa chi kutijo are i sak' xaq i uwa'al kab' chi aj pa taq es. 7Are ktijin chub'ixkil utzij i Dios, xub'ij i tziji chke i winaq: “Chwijil yin kk'un chik jun chi lik nim u'ij chinwach yin, chi lik kmajaw ti chwe chi kinchakiqaj chutorik uwach uxajab' che, man lik nim u'ij. 8Yin, xa ya xinqajsaj piwi, xwiri Ire kuqajsaj ni i Lo'laj Utewal i Dios piwi.” Keje ile xub'ij ma Wan chke i winaq.

Uqajsaxik ya puwi i Jesús

9Che taq i ij le xel i Jesús pa Nazaret chi o chila che i ulew re Galilea, x-e chi raqana Jordán, are uri i ma Wan xuqajsaj ya puwi chupam i raqana le. 10Are xel li Jesús pa ya xaqte'et xrilo chi xjaqtaj i kaj, xaq i Utewal i Dios xqaj li puwi Ire pacha jun palomax. 11Xaq xtataj jun ch'awb'al chikaj chi xub'ij i tziji: “Yet at Wak'al chi lik k'ax katinna'o, xaq lik kinkikot awumal.” Keje ile xub'ij i ch'awb'al.

Itzel kutzukuj wach tzaqsab'al re i Jesús

12Te'uri i Jesús xk'am b'i rumal Utewal i Dios che jun tz'inilik jyub' chaqij. 13Chila xk'iji wi kawinaq (40) ij chkixol itzel taq chikop, are uri Itzel xuk'am upam i Jesús man xraj utzaqsaxik chupam i mak atzalal. Chrijil chik ile i ángel xeupon chuto'ik i Jesús.

I Jesús xujeq uchak pa Galilea

14Chrijil chik utz'apixik ma Wan prexil, are uri i Jesús x-e pa Galilea chub'ixkil i utz laj tzij k'ak' re i Dios. 15Xub'ij chke: “Ya xuriq i ij chi uch'ikom i Dios, chi kjeqan i ajawinik re Ire. ¡Chijalwachij inojb'al chi utz taj! ¡Chikub'a ik'ux che i utz laj tzij le!” Keje ile xub'ij i Jesús chke.

Jesús xeusik'ij kajib' ajchapol kar

16I Jesús are ktijin chi b'e chuchi' i mar Galilea, are uri xeril keb' achiyab' katz kicha' kib', ma Simón xaq i ma Andrés. Ike le ajchapol kar rumali ketijin chuk'aqik i katraya pa ya. 17I Jesús xub'ij chke:

—Chixpetoq xaq chixterej chwij man Yin kin-an ni chiwe chi ix ajmolol winaq re keterej chwij —xcha.

18Are uri i achiyab' le juntir xkiya la kan kitraya, xeterej b'i chrij i Jesús.

19I Jesús xb'in chupan jub'i', are uri xril pan uwach ma Jacobo i ma Wan chi je uk'ojol mam Zebedeo; ike le je o chupam jun barco ch'utin, ketijin chuyijb'axik kitraya. 20Are uri i Jesús xeusik'ij ru'. Ike le juntir xkiya kan kiqajaw xaq i mokom chila chupam i barco, —xeterej b'i chrij i Jesús.

Achi chi o i tzel tew che

21I Jesús xaq konojel ni'pa je enaq ru', xeupon pa tinimit Capernaum, are je o chik chila, xe'ok pa ja re molb'al ib' ke i Judío che jun ij sábado#1.21 Iri are klapan chrij i uxlanb'al ij (sábado).; are uri xujeq uk'utik utzij i Dios chila. 22I winaq lik xkib'isoj wach taq i k'utunik xu'an i Jesús chke, man Ire are ku'an i k'utunik ku' lik ko uwach chu'anik; keje taj pacha kki'an i tijonelab' re atb'al tzij. 23Xwiri o jun achi chila pa ja re molb'al ib' ke i Judío le chi o itzel tew che, ire xsik'in chub'ixkil i tziji:

24—¿Wach kawaj chqe yoj, Jesús aj Nazaret? ¿Xatab'a xatk'un chusachik qawach? Yin weta'am awach Yet, xaq weta'am chi at Lo'laj Rak'al i Dios —xcha i itzel tew.

25I Jesús lik xula' uwach che itzel tew, xub'ij che:

—¡Match'aw chik! ¡Chawo'taj kan achi le!

26Are uri i itzel tew ko xub'arb'a i achi le, xaq lik ko xsik'inik are xel b'ik. 27Konojel i winaq lik xe'ok il xaq xe'ok chutz'onoxik chkiwach:

—¿Wach taq usuk' ile? ¡Lik k'ak' i k'utunik ku'ano, xaq lik ko uwach chuk'utik! ¡Lik kuya i taqanik chke itzel taq tew xaq ike lik kekojon che! —Keje ile xkib'ij i winaq.

28Lik juntir xpax uwach u'ij i Jesús chwach ronojel i ulew Galilea.

I Jesús xrutzirsaj uchuch uji' ma Simón Pedro

29I Jesús junam ru' ma Jacobo xaq i ma Wan xe'el li pa ja re molb'al ib' ke i Judío, xe'e chi kachoch ma Simón xaq i ma Andrés. 30Are xeupon ru' ja i uchuch uji' ma Simón lik iwab', kotz'ol chwi ch'at rumal i a' tew chi o chrij, rumali xkib'ij che i Jesús. 31Are uri i Jesús xtejeb' pan ru' ixoq, xuchap che u'ab' xaq xuwalijsaj, i ixoq le juntir xchup i a' tew chrij are uri xok chuya'ik wach kkitijo.

I Jesús k'i iwab'ib' xeukunaj

32Are xok a'ab' i winaq xkitikb'a li uk'amik konojel iwab'ib' ru' i Jesús xaq xkik'am li ni'pa o itzel taq tew chke. 33Konojel i winaq re i tinimit xkiriq kib' chila tzam ja re i tinimit ipa o wi i Jesús. 34Are uri i Jesús xeukunaj iwab'ib' chi o jalajuj taq yob'il chke, xaq xeresaj b'i k'iyal itzel taq tew. Xwiri xuya ti chke itzel taq tew le chi kech'awik man ike keta'am uwach i Jesús.

I Jesús kutzijoj utzij i Dios pa taq ja re molb'al ib' ke i aj Judío

35Che jun chik ij i Jesús lik k'a equm xwalijik, xel pa tinimit x-e chutz'onoxik che i Dios che jun k'ijib'al tz'inilik. 36I ma Simón junam ku' i rachi'il xe'e chutzukuxik i Jesús. 37Are xkiriqo xkib'ij che:

—Konojel i winaq ketijin chatzukuxik.

38Xwiri i Jesús xub'ij chke:

—Jo' chik che jub'an komon chi naqaj je o wi, man rajwaxik xaq kinb'ij utzij i Dios chke i winaq chila, man are inchak ile in petnaq —xcha.

39Are uri i Jesús x-e che ronojel i ulew Galilea, chub'ixkil utzij i Dios chke i winaq pa ja re molb'al ib' ke i Judío chke i jalajuj taq tinimit xaq xeresaj itzel taq tew chke i winaq.

I Jesús xukunaj jun achi chi o yob'il che utz'umalil

40O jun achi chi o te'eq yob'il che utz'umalil xtejeb' pan ru' i Jesús, xxuki chwach xaq xub'ij che:

—Ajwal, wetene kawaj kawesaj i yob'il chi o chwe —xcha.

41Are uri i Jesús lik xril tob'al uwach, xuchapo xaq xub'ij che:

—Kwaj, ¡Chatutziroq! —Keje ile xub'ij i Jesús che achi.

42Are xb'itaj i tzij le rumal i Jesús, juntir xik'aw i yob'il che utz'umalil, i lik ch'am xkanajik. 43Te'uri i Jesús xu'ijla b'i achi le, lik xupixb'aj b'ik:

44—Chata pe', lik malap che jun winaq wach xin-an pak'aslemal; xwi jak'utu awib' che i rajpatan i Dios, k'utb'al re chi nti chik yob'il chawe. Xaq chak'ama b'i asipon pacha ub'im mam Moisés, tioxb'al re che i Dios rumal akuntajik. Keje ile kketamaj ni i rajpatan i Dios chi at utzirnaq chik che i k'ax chi o te'eq chawe —keje ile xub'ij i Jesús che achi.

45Xwiri i achi le are x-ek xok chulapik chke konojel i winaq wach xu'an i Jesús puk'aslemal. Rumali i Jesús xok ti chik pa taq tinimit, xa tzam taq ja chik xok wi ipa nti wi k'iyal winaq. Tupu i Jesús xuk'ut ti chik rib' chke i winaq xwiri lik je k'i xeupon chrilik chi je petnaq pa jalajuj taq k'ijib'al.

Currently Selected:

Marcos 1: ACHICUB

Highlight

Copy