Mateo 7

Mi'at tzij chkij jub'an chik

1Mi'at tzij pkiwi iwachi'il, keje ile, i Dios ku'at ti tzij uri piwi yix. 2Mi'ano, man pacha u'atik tzij ki'an yix, xaq keje uri u'atik tzij ku'an i Dios piwi yix; ire xaqjun u'ankil ku'ano, pacha u'ankil ki'an yix. 3¿B'uchak katk'achir chutaqexik i tz'il chi o pub'a'wach i awachalal chwach i Cristo, i yet kana ti awib' chi o jun nim laj et chupam ab'a'wach yet? 4We o jun et chupam ab'a'wach yet ¿B'uchak uri kab'ij che i awachalal chwach i Cristo: “Chaya ab'a'wach chwe man kwesaj i tz'il chi o chupam,” katcha? 5Yet, xa keb' apalaj ¡qatzij ti kab'ij! Nab'e chawesaj ni et pab'a'wach yet, man kattzun na, i kattiki chrelsaxik i tz'il chi o chupam ub'a'wach i awachalal chwach i Cristo.

6I b'iroxik chi o u'ij miya chke i tz'i man moqxa i tz'i le kkik'aq kib' chiwij xaq kixkiraxij. Xaq miya i chomiq taq iwuwaj chkiwach i aq, man moqxa ke'ok chuya'yaxik.

Tz'onoj, tzukuj xaq sik'ij xol uchija

7Chitz'onoj che i Dios Ire kuya ni chiwe; chitzukuj i kiriq na; chik'ojk'a uchija, xaq kjaqi ni chiwe. 8Keje ile chi'ana, man i jun chi kutz'onoj, kya' ni che; we lik kutzukuj, kuriq na; xaq we lik kuk'ojk'a uchija, kjaqi ni che.

9Yix chi ix qajawxelab', we o jun iwak'al kutz'onoj uwa chiwe, ¿Xatab'a kiya jun ab'aj che puk'exel uwa? 10We xaq kutz'onoj kar chiwe, ¿Xatab'a kiya jun kumatz che puk'exel? Kiya taj. 11Yix, chi nixti utz, iweta'am uya'ik i utz, chke iwak'al, ¡Iqajaw chi o chikaj, lik mas utz kuya ni chwach ile; lik kuya ni utz chke pachin i ketz'onow che!

12Chi'ana chke i winaq pacha i kiwaj yix chi ke kki'an chiwe yix. Are ile are usuk' i atb'al tzij chi utz'ib'am kan i mam Moisés, xaq are i usuk' i tzij kib'im kan i profeta.

Uchija chi pich' uwach

13Keb' i b'e re i k'aslemal: Jun, xa pich' uwach, i jun chik, nim uwach. Chixok yix che uchija chi pich' uwach, man uchija re i b'e chi nim uwach, xa pa a' re i kamik k-e wi. Lik je k'i keb'in ni che i b'e le. 14Xwiri i uchija xaq i b'e chi kojuk'am b'i che i k'aslemal saqil, xa pich' kiwach; ne te k'i kkiriqo.

Ru' i kki'ano kkik'utu je pachinoq

15Chi'ana kwent chke i keupon iwu' chi kkib'ij ike je profeta xwiri xa ket'oronik. Lik xa je pacha utiw chi ki'anom taq che kib' pacha je chij; lik je utz kiwil taq yix. 16Yix kiwetamaj ni kiwach je pachinoq, rumal wach taq i kki'ano. Iweta'am chi jun k'ix nti uva xaq nti higo kuwachij. 17Keje uri ile, jun utz laj che', lik utz uri uwach kuya'o, xwiri i utz ti laj che' xaq utz ti uri uwach kuya'o. 18Jun che' utz, kuya ti uwach chi utz taj; xaq i che' chi utz taj kuya ti uwach utz. 19Ni'pa i che' chi utz ti uwach kuya'o, kk'atzix na xaq kporox ni pa a'. 20Yix ut kiwetamaj ni kiwach pachin i xa je ajt'oronel, kiwetamaj na rumal i wach kki'ano.

Konojel taj ke'ok pa chom laj k'ijib'al ru' i Dios chila chikaj

21Konojel ti kkib'ij, “Ajwal, Ajwal”, ke'ok chikaj. Pu'atb'al tzij i Dios aj Chikaj, xa rumal taq ile chi kkib'ij ru' kichi'. Xwi ni'pa i kki'ano pacha kraj i Ta chikaj, xwi ike le ke'ok ni ru'. 22Are kuriq i k'isb'al ij, je k'i na kkib'ij: “Ajwal, Ajwal, chojato, man yoj xojch'aw pab'i are xqab'ij atzij chke i winaq; xaq lik pa b'i xeqesaj b'i itzel taq tew chke i winaq; lik pa b'i xqa'an k'iyal nimaq taq il.” Keje ni ile kkib'ij chwe. 23Xwiri yin kinb'ij ni uri chke: “Lik weta'am ti iwach; chixel chinwach, yix chi ix aj-anol utz taj!” Keje ile kinb'ij ni chke.

I ja chi utz uyijb'axik antalik o xaq we utz taj

24I ketaw intziji i we kekojon chwe, o kino'oj uri. Keje pacha jun achi o uno'oj, chi xukub'a i rachoch puwi ab'aj. 25X-on panoq xpe i jab' nim, lik xenimar i ya, xaq lik xpe i nim laj tew, lik xraj utzaqsaxik i ja pulew, xwiri xtzaq taj man kul uxeb'al puwi i ab'aj. 26Xwiri, ni'pa i ketaw intziji, we kekojon ti chwe, nti kino'oj uri. Keje pacha jun achi, nti uno'oj, chi xa puwi i seneb' xukub'a wi rachoch. 27X-on panoq xpe i jab'; xnimar i ya; xaq xpe i tew chrij i rachoch, i lik xtzaq pulew. ¡Xaq lik xk'is uwach!

28Are xutzin i Jesús che i lapanik ku', konojel i winaq lik xkib'isoj wach i k'utunik xu'ano. 29Man are kch'a'at ku', lik xuk'utu chi o atb'al tzij pu'ab' ru' itzij chi xub'ij chke; are ti pacha kki'an i to' je tijonelab' re ujer taq atb'al tzij.

Currently Selected:

Mateo 7: ACHICUB

Highlight

Copy