Mateo 5

Uk'utunik i Jesús chila chwi jyub'

1I Jesús, are xeril uk'iyal winaq je teren chrij, xel b'i chwi jun jyub', i xkub'i chila. Te'uri utijoxelab' xkimol kib' ru'. 2Are uri xujeq kinawsaxik ru' i tziji:

Ile chi lik qatzij kukoj pajil i Dios

3Utz ke ike chi keta'am chi o rajwaxik kkitzukuj i Dios pkik'ux,

man ke'ok ni uri Pu'atb'al tzij i Dios aj Chikaj.

4Utz ke ike chi ke'o' rumal kib'is,

man i Dios kukub'saj ni kik'ux.

5Utz ke ike chi kki'an ti nim che kib',

man kya' ni jyub' ta'aj chke chi usujum i Dios.

6Utz ke ike chi lik kkaj u'anik i suk'ulik chwach i Dios,

man ire ku'an na pacha kkaj ike, xaq lik kunojsaj ni kik'ux.

7Utz ke ike chi o uk'axnab'al kik'ux chke i jub'an chik,

man i Dios xaq lik k'ax keuna ike.

8Utz ke ike chi lik ch'am pkik'ux, man ike kkil ni uwach i Dios.

9Utz ke ike chi kkikoch'ij kib' chutzukuxik i utz olem,

man “je wak'al” kub'ij ni Dios chke.

10Utz ke ike chi k-an k'ax chke rumal u'anik i suk'ulik chwach i Dios,

man ke'ok ni uri Pu'atb'al tzij i Dios aj Chikaj.

11Utz iwe yix are k'ax kech'aw ni winaq chiwe wumal yin. Utz iwe yix we kixkiyo'ya, xaq we kkib'ij i t'oronik chiwij xa rumal kixterej chwij. 12Mixb'isonik, lik chixkikotoq man kya' ni uri jun nim laj sipon chila chikaj. Chk'un chik'ux chi xaq keje xki'an ile chke i je profeta chiwijil yix.

I je re i Dios je keje pacha atz'am xaq pacha i saq

13Yix ut lik kixajwax chke i winaq waral chwach i jyub' ta'aj, ix keje pacha i atz'am; xwiri i atz'am we xsach ujelal, ¿Wach uyijb'axik chik uri ujelal k-anik? Ntaj. Ile kuriq ti chik uchak; xa kk'aq b'ik; to' kya'yax chik kumal i winaq.

14Yix ix keje pacha utzunb'al a' waral chwach i jyub' ta'aj. Iwilom ut wach u'onom jun tinimit we o tzam jyub'; lik alaj, ruwam ti rib'. 15Xaq iweta'am, we jun kutzij jun kantil, kumin ti chuxe' jun kajon; utz taj we kruwaj. Are i ku'ano, kuya an chikaj pa ja, man konojel ketzun ni rumal. 16Xaq keje ile chi'ana yix, chi ix pacha utzunb'al a' waral chwach i jyub' ta'aj, chiya che itzunb'al k-e chkiwach i winaq. Keje ile kkil na wach taq i utz ki'an yix. Konojel kkikoj ni u'ij Iwajwal chi o chikaj.

I Jesús kk'utun puwi i atb'al tzij

17Mich'ob' yix moqxa kolinsacha uwach i atb'al tzij, o kiwach i profeta. Yin in ti ajsachol re ile. Lik in ajya'ol u'ij i tzij le chiwach yix. 18Qatzij iri kinb'ij chiwe: Tz'aqat o i kaj, xaq i jyub' ta'aj, ksachsax ti uwach i ujer atb'al tzij, mita jub'i', mitene jun t'os, mitene jun tz'ib'. Ile ksach taj, k'a ktz'aqat ni ronojel u'anik pacha uch'ob'om i Dios chi k-ani na. 19Rumali, o uchak kki'an na pacha kub'ij ronojel i atb'al tzij. We o jun kkojon ti che i ral jupaj tzij tupu lik pich' re i atb'al tzij, xaq we xuk'ut ti chke i winaq chi kekojon che, ire xa pich' kel chkiwach konojel i jub'an Pu'atb'al tzij i Dios aj Chikaj. Xwiri, we jun kkojon che i saqil usuk' i atb'al tzij, xaq kuk'ut chke i jub'an chik, ire uri lik nim ke'el na Pu'atb'al tzij i Dios aj Chikaj.

I Jesús kuk'ut jun nim laj atb'al tzij

20Lik kinb'ij chiwe: O uchak mas utz u'anik chi'ana ni yix chkiwach i tijonelab' re ujer atb'al tzij; xaq mas utz u'anik chi'ana ni chkiwach i aj fariseo#5.20 I aj fariseo je are jutzob'aj aj Judío chi lik are kkaj ike chi are k-anik pacha kub'ij u'atb'al tzij i ma Moisés.. We ki'an taj, kixok ti uri Pu'atb'al tzij i Dios aj Chikaj.

I Jesús kk'utun chrij i kamik

21Yix itom i atb'al tzij chi b'ital chke iwatit imam ujer: “Mixkamsanik, man pachin jun kkamsanik, k-at ni tzij uri puwi;” xb'ix chke. 22Xwiri, Yin kinb'ij ni usuk' chiwe: Pachin jun xa kpe roywal che jun rachalal, xaq ire k-at ni tzij uri puwi. Xaq pachin jun kuyo'ya i rachalal, kya' ni ire chkiwach i nimaq taq jutz'ob'aj unimaqil chi kki'at tzij pkitinimit aj Judío. Xaq we o jun kub'ij utz ti laj tzij che i rachalal, chu'ana kwent uri rib', man ile kmajaw che k-e pa a' rumal.

23Rumali, we yet ak'amom li jun asipon kolaya chwach i Dios, te'uri we kk'un an pak'ux chi o jun awachalal kuch'ob'o chi o amak che, 24chakanaj kan uri asipon chila chwach i sujb'al sipon, i jat ru' awachalal. Chichomaj iwib' chiwach. Te'uri chattzalij chik i chajacha asipon chwach i Dios.

25We o jun ukojom amak, xaq katuk'am b'i chwach i atb'al tzij, chichomaj iwib' chiwach, tz'aqat k'a ix o pa b'e. Keje chi'ana ile, man ire katuya ti chwach i atb'al tzij. Man we xatupon chila, i atb'al tzij katujach ni pki'ab' i ajchajal re i tinimit; te'uri i ajchajinel le katutz'apij prexil. 26Qatzij uri: Katel ta loq k'a katoj ni ronojel ak'as.

I Jesús xk'utun puwi uminik rib' jun winaq ru' jun chik chi k'ulinaq ti ru'

27Itom yix wach kub'ij i atb'al tzij re i mam Moisés: “Mamin awib' ru' jun ixoq, we awixoqil taj, xaq keje ixoq mumin rib' ru' jun achi we rachijil taj” 28Xwiri, yin kinb'ij ni usuk' chiwe: We o jun lik kutaqej jun ixoq, man kurayij uwach, xe'el uri puk'ux chi ya xmakun ru'.

29Rumali, kinb'ij i tziji chiwe: We xa rumal i kawilo katmakunik, lik utz chawesaj ab'a'wach i chak'aqa b'i k'a naj. Mas utz ke'eloq we xa are ab'a'wach kasacho, chwach we ronojel ach'akul k-e pa a' ronojel ij saq. 30We xaq are a'ab' wiqab'im k-anaw chawe katmakunik, chak'atzij xaq chak'aqa b'i k'a naj. Utz ke'eloq we xa are a'ab' kasacho, chwach we ronojel ach'akul k-e pa a' ronojel ij saq.

I Jesús xk'utun chrij achi xaq ixoq chi kkijach kib'

31Xaq itom yix chi kb'ixik: “Jun we kujach kan i rixoqil, o uchak kutz'ib'aj jun wuj, kuya che i rixoqil, re i jachb'al kib'.” 32Xwiri, Yin kinb'ij ni usuk' chiwe: Jun achi, we kujach kan i rixoqil, i ixoq, we nti umak u'anom ru' jun chik achi, utz ti xu'an uri i rachijil che man xa kuya chwach i makunik. Xaq we o jun achi kk'uli ru' jun ixoq chi jachtal b'i rumal i rachijil, i achi le, kmakun uri chwach i Dios.

I Jesús kk'utun puwi u'anik i sujunik

33Xaq itom yix chi b'ital chke iwatit imam ujer: Chi “O uchak ka'an na pacha asujum che jun winaq, we akuxtam ub'i i Ajwal puwi i tzij le.” Keje ile tz'ib'tal kanoq. 34Xwiri, Yin kinb'ij ni usuk' chiwe: Utz taj kikuxtaj ub'i i Dios puwi i tzij che jun winaq. Xaq mikuxtaj ub'i i kaj, man are uk'ijib'al i Dios chi o u'ij, pa ku'at wi tzij. 35Xaq mikuxtaj ub'i i ulew, man are ipa kuya wi i raqan. Xaq mikuxtaj ub'i i tinimit Jerusalén, man are utinimit i nim laj Dios, chi Ajawinel. 36Xaq mikuxtaj ub'i ijolom, man kixtiki ti chu'anik saq xaq mitene eq che jun ral is re iwi. 37Xwi rajwaxik kib'ij: “Are, lik are”; “are taj, lik are taj”. We o mas tzij kib'ij puwi ile, xa ru' Itzel petnaq wi.

I Jesús kk'utun puwi u'anik i uk'exel jun utz taj

38Xaq itom yix chi i ujer atb'al tzij kub'ij: “We o jun upuch'um ab'a'wach yet, xaq kpuch' ni jun ub'a'wach ire uri; xaq we ub'oqom jun aware, xaq ire kb'oq ni jun uware uri.” Keje ile kub'ij i u'atb'al tzij i mam Moisés. 39Xwiri, Yin kinb'ij ni usuk' chiwe: Mitzalij uwach che, wach ku'an chiwe. Are i chi'ana, we o jun katuch'ay che juperaj apalaj, chaya i juperaj chik che. 40We o jun k-e pa atb'al tzij, man kraj kumaj akamix, chaya ni uri che, xaq chaya b'i achaket che. 41We o jun ku'an pen chawe kak'am b'i jun reqan k'a che unajtil jun kilómetro, yet chak'ama b'i keb' kilómetro unajtil che. 42We o taq ktz'onox chawe, chaya wach i ktz'onoxik. Xaq we o i kchi'max chawe, chaya wach i rajwaxik.

K'ax cheina i je ajch'oj chiwij

43Itom yix i tziji chi kb'ixik: “K'ax chana i k'ax katnawik,” kkib'ij, “xaq tzel chawila i tzel katilawik.” Kkib'ij. 44Xwiri, Yin kinb'ij ni usuk' chiwe: K'ax cheina i je ajch'oj chiwij; chitz'onoj i utz pkiwi i jub'an chi kixkiterb'ej re kamsab'al iwe. 45Keje ile lik ix rak'al Iqajaw yix chila chikaj. Ire ku'an che i ij chi ktzun pkiwi i ne te utz, xaqjun ru' pacha ku'an chke i je utz. Xaq kutaq li jab' pkiwi i je utz, xaq pkiwi i ne te utz. 46Yix ut, we xwi k'ax keina i k'ax kixkina yix, ¿Wach kich'ak uri che ile? Man keje ne kki'an i je ajtz'onol alkawal ile re Roma. 47Yix, we xwi i wachalal chwach i Cristo kiya rutzil kiwach ¿Utz uri ile? Xaq keje kki'an i winaq chi keta'am ti uwach i Dios. 48Yix, lik chisuk'b'a i k'aslemal, pacha ku'an Iqajaw chi o chikaj, chi lik suk'ul ni'pa i ku'ano.

Currently Selected:

Mateo 5: ACHICUB

Highlight

Copy