Mateo 20
20
I tijojb'al tzij chkij i ajchakib'
1Are uri i Jesús xub'ij:
—U'atb'al tzij i Dios aj Chikaj lik keje pacha jun rajaw tikon chi k-e we' chutzukuxik rajchakib' re molb'al uwach i uva. 2Are xeuriq umokom, xub'ij chke chi are jun denario#20.2 Jun denario are jun pwaq aj Roma. I pwaqi are kuch'ak jun ajchak che jun ij. i kajil re jun ij. Te'uri xeutaq b'i pa chak prulew. 3X-on panoq, kolo pa taq ub'elej or re i anb'al ij, x-e pa k'ijib'al ipa kkimol wi kib' i winaq re i tinimit xeuriqa jub'an achiyab' nti kichak. 4Xub'ij chke: —We kiwaj chak, jix pwulew, je imolo uwach intikon; xaq yin kintoj na pacha kmajaw chiwe, —xub'ij chke. Ike xe'ek. 5Xaq keje xu'ano are tik'il ij, xaq keje xu'an che oxib' or re uqajb'al ij. 6Xaq keje tan chik xu'ano are xqaj i ij, kolo jo'ob' or che uqajb'al ij: X-e pa k'ijib'al ipa kkimol wi kib' i winaq re i tinimit, xeuriqa jub'an chik achiyab' nti kichak. Xaq xub'ij chke: —¿Wach ki'an yix chi jun ij? ¿Nti b'awa ichak? —Xub'ij. 7Xaq xkib'ij ike che:
—Mijun usujum chak chqe —xecha.
—Jix pwulew, je imolo uwach intikon —xub'ij chke.
8Are ya xok a'ab', i rajaw i chak xub'ij che i kok'aw utzam i chak: “Cheasik'ij i ajchakib' xaq cheatojo. Nab'e cheatojo b'i ni'pa i xek'un k'isb'al re. Are i je oknaq nab'e k'isb'al re cheatojo b'ik”; xub'ij che. 9Xe'eloq chi are i xe'ok che i jo'ob' or re i qajb'al ij, xtz'aqatsax uwach i kajil re jun ij chkijujunal xya' b'i jun saqpwaq chke. 10Are i je oknaq nab'e xkich'ob' ike chi mas nim ni kkich'ak ike chkiwach i je oknaq k'isb'al re. Xwiri, xa jun saqpwaq xya' chke chkijujunal re jun ij. 11Are xkik'am i kajil, xe'ok chi chub'chatik chrij i rajaw i chak chi utz ti xu'an che i kajil. 12Xkib'ij: “I je k'unnaq k'isb'al re, xaqjun i kitojik xa'an qu' yoj. Ike, xa jun or xechakunik, i yoj lik jun ij xqach'ij i chak i xqach'ij i ij”; xkib'ij che i rajaw i chak. 13Ire xub'ij che i jun, “chata pe', yin xixint'or taj. ¿Xatab'a xqayijb'a ti chqawach, chi kixchakun jun ij chwach jun saqpwaq? Lik keje ile xqab'ij. 14Chak'ama i awajil i jat. Are i kwaj yin, kinya ni che i jun pacha i xinya chawe yet; nti ku'ano we xa pa k'isb'al re xokik. 15¿Xatab'a nti we yin che inpwaq, wach kwaj kin-an che? Lik olik. ¿O xa ktitat apam che chi utz xin-an yin chke i jub'an?” Keje ile xub'ij i rajaw i chak.
16Are ke'el uri, ni'pa i je o pa k'isb'al re, are kenab'ej na, i je nab'e wo'or, je are kekanaj kan pa k'isb'al re.
I Jesús xuroxmulij ub'ixkil ukamik
17X-on panoq, i Jesús ktijin che i b'e ku' utijoxelab', enam ke pa Jerusalén. Are uri xeusik'ij i kab'lajuj ru', i xeu'ijla kitukel:
18—Yix iweta'am chi ya xqamaj b'i qab'e pa Jerusalén. Are kojupon chila, Yin chi xinalaxoq chwach ulew pacha winaq, kinjachtaj ni pki'ab' i kaj-atzil i rajpatan i Dios, pki'ab' i tijonelab' re ujer atb'al tzij. Ike kki'at ni tzij pinwi xaq kkib'ij na chi o uchak kinkamsaxik. 19Te'uri kinkijach ni pki'ab' i ne te aj Israel winaq: Ike ut kinkiyo'ya, kinkich'ay na, kinkikamsaj chwach i krus. Xwiri, churox ij, kinwalij ni che i kamik —xub'ij i Jesús chke.
I Jesús kula' uwach che kichuch i ma Santiago xaq i ma Wan
20Te'uri i kichuch i ma Jacobo xaq i ma Wan, chi je uk'ojol i mam Zebedeo, xtejeb' pan ru' i Jesús je rachi'ilam i ralab'. Xxuki chwach i Jesús, tz'onb'al re jun utzil che. 21I Jesús xutz'onoj che:
—¿Wach kawaj yet? —Xub'ij.
I ixoq xub'ij:
—Are at o chik che i ajawinik re i Dios kwaj yin chi kaya chke i keb' wak'ali chi kekub'i ni pa taq atzal, jun pa wiqab'im, xaq i jun pa moxim —xub'ij i ixoq che.
22—Yix iweta'am taj wach i kitz'onoj —xub'ij i Jesús chke—. Ni'pa i k'ax, xaq i uyej chi kinik'aw wi Yin, ¿Kixtiki yix chuch'ijik ronojel ile? —Xub'ij chke.
—Kojtiki'ik —xecha.
23Are uri i Jesús xub'ij:
—Qatzij, yix is kixik'aw ni chupam i k'axi, xaq kitij ni uyej pacha kinik'aw wi Yin. Xwiri, nti pin-ab' Yin kinb'ij pachin kkub'i pinwiqab'im xaq pinmoxim. Xwi Inqajaw o pu'ab'; Ire uyijb'am chik i k'olb'al le, Ire reta'am pachin kek'iji che, —xub'ij i Jesús chke.
24I lajuj chke utijoxelab', are xkita wach i xkib'ij i keb' le chi je katz kicha' kib', ike xpe koywal chke. 25Are uri i Jesús xeusik'ij xaq xub'ij chke:
—Yix iweta'am chi i nimaq taq atol tzij chi nti Dios ku', kki'an che kib' pacha je kajaw i winaq chi je o pki'ab'; i winaq chi nimaq kipatan ke'ajawin pkiwi i kach winaq. 26Xwiri, chixol yix keje ti ki'an ile. Are i ki'an ni yix, pachin kraj ke'eloq nim u'ij, xwi chchakun uri chkij i rachi'il. 27I jun chi kraj kuya rib' chunab'eyal, chu'ana uri che rib' pacha ajtaqon chkij i rachi'il. 28Chu'ana uri che rib' pacha kin-an Yin chi Xinalaxoq chwach Ulew pacha Winaq; in k'unnaq na pacha mokom chkij i winaq; are ti ike je inmokom Yin. In k'unnaq man kinya ni wib' che i kamik, tojb'al re i kelb'al uk'iyal winaq pa k'ax —xub'ij i Jesús chke.
I Jesús xerutzirsaj keb' mawach
29Are ktijin kelik pa tinimit Jericó, je k'i i winaq je teren chrij i Jesús. 30Chila je o wi keb' mawach je kul chi b'e. Are xkita chi ktijin rik'awik i Jesús, xesik'in chub'ixkil:
—¡Nim laj winaq! ¡Yet chi at umuq uxikin kan i mam David, chawila tob'al qawach! —Xecha.
31I winaq chi je teren b'i chrij i Jesús xekiyajo xaq xeki'atij. Xwiri, ike lik xa mas xesik'in chub'ixkil i tziji:
—¡Nim laj winaq! ¡Yet chi at umuq uxikin kan i mam David, chawila tob'al qawach! —Xecha.
32Are uri i Jesús xtak'i'ik xaq xeusik'ij ru'. Xub'ij chke:
—¿Wach kiwaj kin-an chiwe? —Xcha.
33Ike xkila' uwach che:
—Nim laj winaq, kqaj kojtzunik —xecha.
34Are uri i Jesús k'ax xeuna'o. Xuyin i kib'a'wach, are uri lik juntir xetzunik. Te'uri ike xeterej b'i chrij i Jesús.
Currently Selected:
Mateo 20: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
