Lucas 19

I Jesús xaq i ma Zaqueo

1I Jesús xok pa tinimit Jericó, are ktijin rik'awik chupam i tinimit le. 2Are uri che i tinimit le o jun achi ma Zaqueo ub'i, i upatan ire are kaj-atzil i je ajtz'onol alkawal pa Roma; xaq ire lik b'eyom. 3Kraj ire kretamaj uwach i Jesús, xwiri lik naj ti rij, rumali ktiki ti chrilik man lik je k'i i winaq. 4Rumali pa'anem xnab'ej b'ik, i xel b'i puwi jun che' chi ub'i sicómoro o xukut b'e pa kik'aw wi i Jesús. 5Are ktijin rik'awik i Jesús chila, xtzun an chikaj xaq xub'ij che i achi le:

—Ma Zaqueo, chatqaj la loq; man wo'or lik o uchak kinkanaj ni kan chi awachoch —xcha.

6Are uri i ma Zaqueo juntir xqaj loq, lik kkikotik xuk'am b'i i Jesús chi rachoch. 7I winaq, are xkil ile, xe'ok chuch'ach'axik i Jesús, man x-e chi rachoch jun utz ti laj winaq. 8Chila pa ja, i ma Zaqueo xtak'i anoq i xub'ij che i Ajwal:

—Nim laj winaq, ni'pa o wu', kinya ni nik'aj chke i nib'a'ib'. We o taq inmajom che i jun, kintzalijsaj chik kajmul uri che —xcha.

9I Jesús xub'ij che:

—Wo'or, yet junam ku' awalk'uwal iriqom chik tob'al iwe chwach i Dios —xcha.

Te'uri xub'ij i tziji:

—Ire xaq umuq uxikin kan i mam Abraham pacha yix. 10Yin chi Xinalaxoq chwach Ulew pacha Winaq, in k'unnaq chkitzukuxik i je sachnaq elsab'al ni ke chupam i kimak —xcha chke.

I tijojb'al tzij chrij pwaq

11I Jesús tz'aqat ketijin i winaq chutayik utzij, xub'ij jun tijojb'al tzij chke. Keje xu'an ile chke man ya kok pa tinimit Jerusalén. Xwiri i winaq kkich'ob'o, chi we xok ire chila, ya kujeq i nim laj ajawinik re i Dios pkiwi.

12Rumali, ire xub'ij i tziji chke:

—O jun achi, nim u'ij upatan, chi x-e che jun tinimit k'a naj, chuk'amik upatan re ajawinel puwi utinimit; are o chik pu'ab', ktzalij loq. 13Are k'amaja k-ek, xeusik'ij lajuj rajchakib' ru', xaq xuya kan jujun saqpwaq chke chi nimaq uwach. Xub'ij chke: “Chixch'akan ru' i pwaqi tz'aqat kink'un li yin.” Xcha chke. 14I rach aj tinimit tzel kkilo, xaq xekitaq b'i jub'an ajtaqon chub'ixkil: “Kqaj ti yoj i achi le, we are Ire kkanaj kan re ajawinel pqawi”.

15Xwiri Ire xya' pu'ab' chi are ajawinel pkiwi, te'uri xtzalij chaloq putinimit. Are xuponik, xeusik'ij i rajchakib' ru' chi uya'om kan i pwaq chke. Are uri xujeq utz'onoxik chke chkijujunal ni'pa i kich'akom chik chrij i pwaq chi xya' kan chke. 16I nab'e xupon ru' i xub'ij che:

—Nim laj winaq, i apwaqi, inch'akom chik lajuj tant puwi —xcha.

17I ajawinel xub'ij che: “Lik utz ni a'anom; at utz laj ajchak. A'anom ni utz ru' i jub'i' chi inya'om chawe, rumali katinya pkiwi lajuj tinimit”, xcha che. 18Te'uri i ukab' rajchak xtejeb' ru', xaq xub'ij che: “Nim laj winaq, riy apwaqi inch'akom chik jo'ob' tant puwi.” Xcha. 19I ajawinel xub'ij chik che ire: “Xaq yet, katinya ni pkiwi jo'ob' tinimit”, xcha.

20Xwiri jun chke i lajuj le xtejeb' pan ru' xaq xub'ij che: Nim laj winaq, riy apwaqi; ink'olom kan chupam jun sut. 21Xink'olo man kinxij wib' chawe; weta'am chi at k'an laj achi. At pacha jun chi kuchapo wach i uk'olom taj, o xaq kumol uwach i tikon chi xutik taj; xcha che.#19.21 Keje ile xub'ij i utz ti laj ajchak; kraj kukoj umak rajaw uchak. 22Are uri i ajawinel xuyajo. “At utz ti laj ajchak; xcha che. ¡Lik yet atukel ru' i atzij xatzukuj ni amak! We aweta'am chi lik in k'an laj winaq, chi kinchapo wach ink'olom taj, o xaq kinmol uwach i tikon chi intikom taj, 23we keje kin-an ile ¿B'uchak uri xaya ti inpwaq ku' i kkitoj i alaj che?” Wetene keje ile xa'ano, are xink'unik o teneri inpwaq xaq i alaj. Xcha che. 24Te'uri xub'ij chke i je o chila ru': “Chimaja i pwaq che; chiya ni che i jun chi xuch'ak lajuj tant” xcha. 25Xwiri ike xkib'ij che, “Nim laj winaq ¡Ya o chik lajuj ru'!” Xecha. 26I ajawinel xula' uwach chke: Kinb'ij chiwe, jun we o ni chik o ru', kya' ni mas uri che; i jun chi nti qas o ru' kelsax ni jub'i' chi o ru', xcha chke. 27Te'uri xub'ij chke: “Ni'pa i winaq chi tzel kinkilo, chi kkaj ti in o pkiwi, cheik'ama loq, xaq cheikamsaj chinwach”. Xcha i ajawinel.#19.27 Keje i tijojb'al tzij ile xub'ij i Jesús chke i winaq.

I Jesús kok pa tinimit Jerusalén

28Are xb'itaj ile rumal i Jesús, xumaj chub'i ub'e pa Jerusalén, nab'e chkiwach i utijoxelab'. 29Are xeupon chunaqaj i keb' komon, Betfagé xaq i Betania, pa o wi i ral jyub' Olivos. Are uri xeunab'saj b'i keb' utijoxelab'. 30Xub'ij chke:

—Jix che i komon chi o pan chqawach le. Are kixuponik, kiriq ni uri jun b'uru yuqulik, chi k'amaja k-an eqan chrij. Chikira xaq chik'ama loq. 31We o i ktz'onow chiwe wach uchak kixtijin chukirik, chib'ija uri che chi kuriq uchak che i Ajwal.

32Ike xe'ek, are uri xkiriq i ral b'uru yuqulik pacha ub'im b'i Jesús chke. 33Are ketijin chukirik xeupon i rajaw xkitz'onoj chke:

—¿B'uchak kitor b'i ral b'uru? —Xecha.

34I tijoxelab' xkila' uwach: —Man kuriq uchak che i Ajwal —xecha.

35I tijoxelab' le, xkik'am li ral b'uru ru' i Jesús; are uri xkilik' ki'u' chrij, te'uri xkito i Jesús are x-an b'i chrij i ral b'uru. 36Are ktijin u'enam i Jesús pa Jerusalén, i winaq xkilik' ki'u' pub'e. 37Are ya keupon chunaqaj i Jerusalén, ipa o wi i qajb'al loq re i jyub' Olivos, konojel ni'pa i je teren chrij xe'ok chi sik' rumal i kikotemal. Lik xkikoj u'ij i Dios rumal uk'iyal nimaq taq il chi u'anom i Jesús chkiwach.

38Kkib'ij:

—¡Lik nim u'ij i Ajawinel chi utaqom li Ajwal Dios! ¡K'amori che i Dios chikaj! ¡Lik choksax ni u'ij i Dios! Keje ile xesik'in chub'ixkil.

39Xaq je o jub'an aj fariseo chkixol i winaq; are xkilo wach kki'an i uk'iyal winaq, xkib'ij che i Jesús:

—Tijonel, chea'atij atijoxelab' —xecha.

40I Jesús xula' uwach chke:

—Chita pe', we kein-atij, i ab'aji kesik'in ni uri pkik'exel ike —xcha.

41I Jesús ku' i je teren chrij are xeupon chunaqaj i tinimit Jerusalén. Ire are xril i tinimit le, lik k'ax xuna uk'ux, xaq xo'ik. 42Xub'ij: “¡To' iwach yix ix aj Jerusalén! Wetene wo'or kiwetamaj usuk' wach uriqik i saqil laj uxlanb'al k'uxij, utz te'eq iwe; xwiri kiwil taj, man xa pacha ch'uqtal uwach chiwe. 43Ya kuriq i ij chi kitij ni uyej. I ajch'oj chiwij kkikoj ni tapial chrij itinimit man keje ile nti chik ipa kixel wi. Te'uri kkisutij ni iwij re kki'anb'ej ch'oj chiwij. 44Kkisach ni uri uwach itinimit, xaq kekikamsaj ni ni'pa i je jeqel chupam. Are kutzinik, mitene jun ab'aj kkanaj puwi i rachi'il. Keje ni ile ke'eloq, man xita ti usuk' are xupon i Dios iwu' tob'al iwe.”#19.44 Keje xub'ij i Jesús ile are xril i tinimit.

I Jesús xeresaj b'i ajk'ay prachoch i Dios

45I Jesús xok prachoch i Dios; are uri xujeq li kelsaxik i ajk'ayinel xaq i ajlo'onel chi je o chila. 46Xub'ij chke:

—I Dios, chupam uwuj ub'im kan i tziji: “Wachoch, lik are jun ja re kitz'onb'al i winaq chwe”, xwiri yix i'anom kijul ili'omab' che —xcha i Jesús chke.

47Ij ij i Jesús ktijin chuk'utik chke i winaq prachoch i Dios. I kaj-atzil i rajpatan i Dios junam ku' i tijonelab' re i ujer atb'al tzij xaq kiwi kijolom i aj Judío, kkitzukuj wach ukamsaxik i Jesús kki'ano. 48Xwiri kkiriq taj wach u'anik kki'ano, man konojel i winaq lik kiya'om kik'ux chutayik utzij.

Currently Selected:

Lucas 19: ACHICUB

Highlight

Copy