Lucas 16

I tijojb'al tzij chrij i aj-atzil chi lik saqlej

1I Jesús xaq xub'ij iri chke i utijoxelab':

—O jun achi b'eyom, ire o jun umokom uya'om puwi ronojel ub'itaq re. X-on panoq xkiya utzijol che chi xaqmanal ktijin i mokom le chu'anik che ub'itaq re. 2Rumali i achi b'eyom le xusik'ij i umokom ru'; xub'ij che: “¿Wach kattijin yet chu'anik, chi kkib'ij i winaq chwe? Cha'ana jun wuj chwe aljinsab'al re wach u'onom inchak.” Man wo'or kwesaj rilik ub'itaq we chaqul. 3Are uri i mokom xok che i ch'ob'onik: ¿Wach kin-an wo'or man i rajaw inchak kuya ti chik inchak? Yin nti incho'ab' re kinchakun chwach ulew, xaq kink'ix che we to' kintz'onoj inmer chke i winaq. 4¡Ya xinch'ob'o wach i kin-ano! Man keje ile kinkik'ulaj ni i winaq ku' ru' ja, are nti chik inchak. 5Are uri chkijujunal xujeq kisik'ixik ni'pa i o kik'as ru' i rajaw uchak. I nab'e chi xupon ru' xutz'onoj che: “¿Ni'pa ak'as ru' i rajaw inchak?” 6“Ink'asom jo'winaq (100) b'aril aceite”. Are uri i mokom xub'ij che: “Riy i awuji; chatkuloq xaq chajalwachij i tz'ib' chwach; xa lajuj kawinaq (50) chatz'ib'aj chwach”; xub'ij che. 7Te'uri xutz'onoj che jun chik: “I yet, ¿Ni'pa ak'as ru' rajaw inchak?” “Jo'winaq (100) tintal trigo ink'asom ru'”; xub'ij. I mokom le xub'ij che: “Riy i awuji; chatkuloq xaq chajalwachij i tz'ib' chwach; xa kajwinaq (80) chatz'ib'aj chwach”; xub'ij che. 8I rajaw chak xretamaj chi utz ti laj umokom, lik o uno'oj chu'anik i wach i kuch'ob'o, are elsam chik che uchak.#16.8 Xu'an ire chi o i kkik'ulaj ku' pkachoch. I winaq chi to' je re uwach i jyub' ta'aj, lik je sik'aj chutzukuxik wach i rajwaxik che i kik'aslemal. Mas je sik'aj chkiwach i je re i Dios.

9Yin kinb'ij chiwe, i b'eyomal re uwach i jyub' ta'aj chikojo re ch'akb'al ke iwamiy, man keje ile are kk'is i b'eyomal waral o ni uri i kixk'amaw yix che i k'ijib'al chi nti uk'isik chila chikaj.

10Jun, we ku'an i utz ru' i jub'i' chi yatal pu'ab', xaq ku'an ni utz uri ru' we nim kya' pu'ab'. Xaq keje ile, we o jun, we utz ti ku'an che i jub'i' chi o pu'ab', xaq ku'an ti utz uri che we o ni uk'iyal ru'. 11Yix, we i'anom ti i utz ru' ub'itaq iwe chi re uwach i jyub' ta'aj, ¿Pachin uri kuya ni i b'eyomal saqil pi'ab'? 12We ki'an ti utz ru' i xa oqxanim pi'ab', ¿Pachin taq kyaw uri ib'eyomal yix pi'ab'?

13Mijun mokom ktiki chu'anik uchak ku' keb' rajaw uchak. Man xa jun k'ax kuna'o, i jun chik tzel krilo. Xa jun, utz u'anik uchak ku'an ru'; i jun chik, utz ti u'anik uchak ku'an ru', utz taj we ki'an uchak i Dios xaq we xa kitzukuj i b'eyomal.

14Je o jujun aj fariseo ketijin chutayik utzij le. Ike xe'ok chuyo'yaxik wach i xub'ij, man i aj fariseo le qus kkil i mer. 15Are uri i Jesús xub'ij chke:

—Yix ki'an che iwib' pacha ix utz chkiwach i winaq, xwiri, i Dios reta'am wach o pik'ux. O taq i ki'ano chi qus kkil i winaq, xwiri tzel kril i Dios.

I ujer atb'al tzij xaq i ajawinik re i Dios

16I ujer atb'al tzij xaq i profeta ujer, ni'pa ile o pkiwi i winaq lik k'a xk'un ni ma Wan chi Ajqajsanel Ya. Te'uri xpe i utz laj tzij k'ak' re ujeqb'al i ajawinik re i Dios; are iri are i ktijin upaxsaxik wo'or. Xaq konojel i winaq is kki'an pen ke'ok che i ajawinik re i Dios le.

17Lik mas k'ax ti usachik uwach i kaj xaq jyub' ta'aj, chwach we k-antaj ti pacha i kub'ij jun tz'ib' re i ujer atb'al tzij.

I Jesús kk'utun chrij ujachik kib' i je k'ulinaq

18Jun achi we kujach rixoqil man kk'uli ru' jun chik ixoq, lik o umak uri chwach i Dios. Xaq we jun achi xk'uli ru' jun ixoq chi jachtal kan rumal i rachijil, o ni umak i ukab' achi le chwach i Dios.

I b'eyom xaq i ma Lázaro

19O jun achi b'eyom, chi lik chom u'u' kukojo xaq lik paqal rajil, ij ij lik o nima'ij chi rachoch chi lik chom. Xaq lik paqal rajil i ti'b'alil chi kuya'o 20Xaq o jun achi nib'a', ma Lázaro ub'i, ij ij kul chila pa okb'al b'ik che i rachoch i b'eyom. Ire, lik o ch'ak che ronojel i uch'akul, 21xaq i tz'i ketejeb' ru' kkiri' uwach i ch'ak che. I nib'a' le lik kutij numik; kurayij uwach i uk'aj i wa chi ktzaq chuxe' umexa i b'eyom. 22X-on panoq xkam i nib'a', te'uri i ángel xkik'am b'i pa chom laj k'ijib'al putzal i mam Abraham. Te'uri xkam chik i b'eyom, ire xmuqik.

23Are lik o i b'eyom pa k'ax chila ipa je o wi i kamnaq. Are uri xtzun chikaj, xaq xril i mam Abraham, o li k'a naj, xaq xril uwach i ma Lázaro o ru'. 24Are uri, xsik'in pan che: “Ta Abraham, chawila tob'al inwach. Chataqa li a Lázaro kumu li uwi u'ab' pa ya, kolujorob'saj i utzam wa'. Lik kintij uyej waral chupam urep i a'” 25Te'uri i mam Abraham xub'ij che: Wak'al, chk'un chak'ux chi yet, are at k'as chwach i jyub' ta'aj, lik utz xatijo, nti xramtaj chawe; i ma Lázaro, lik uyej xutijo. Wo'or, ire kkikot waral, xwiri yet uyej ka'ano. 26Xaq xwi ta la ile, o jun nim laj siwan chqaxol iwu' yix; we o jun kraj k-ax jela, nti kik'aw wi; xaq i je o jela we kkaj ke'ax li waral, keik'aw taj.

27Te'uri i b'eyom xub'ij chik che: Kuyu inmak, Ta mam Abraham lik kintz'onoj chik jun utzil chawe: Chataqa b'i a Lázaro prachoch inqajaw, 28man je o jo'ob' incha', xaq re keub'ij chke chi chkimayij u'anik i utz taj man keje ile kepe ti che i k'ax laj k'ijib'ali. 29Are uri i mam Abraham xub'ij che: “Ike o chik ku' ronojel ni'pa i utz'ib'am kan i mam Moisés xaq kumal i profeta. Lik chekojon che i tzij le”; 30I b'eyom xub'ij: “Qatzij, Ta mam Abraham. Xwiri, wetene kwalij nu b'i jun kamnaq xaq k-e ku', ike kkijalwachij ni kik'aslemal uri.” Xcha. 31Xwiri mam Abraham xub'ij che: “Ike, we kekojon ti che i tzij chi tz'ib'tal kan rumal i mam Moisés, xaq kumal i profeta, xaq lik kkikoj ti uri we jun kamnaq kwalij b'ik”.#16.31 Keje utzij i Jesús ile chke i je aj fariseo winaq.

Currently Selected:

Lucas 16: ACHICUB

Highlight

Copy