Juan 13

I Jesús kuch'aj kaqan i utijoxelab'

1Chuxe'el i nima'ij Pascua, i Jesús reta'am chik chi knaqajab' i ij chi kel waral chwach i jyub' ta'aj, man k-e chik ru' Uqajaw chila chikaj. Ire lik arewi k'ax xeuna ni'pa je re Ire chi je o chwach i jyub' ta'aj, lik k'ax xeuna'o k'a pa k'isb'al ij.

2Lik k'amaja ne ke'ok chwa'im, i Itzel oknaq chik puk'ux ma Judas, chi uk'ojol ma Simón Iscariote, chi kujach i Jesús pki'ab' i ajch'oj chrij. 3I Jesús reta'am chi yatal ronojel ni'pa i nimaq taq cho'ab' pu'ab' rumal uqajaw, xaq reta'am chi ru' i Dios petnaq wi xaq ru' Ire k-e wi chik. 4Rumali chi are ketijin chwa'im xtak'i anoq, xresaj jule che u'u' chrij, te'uri xuk'am jun to'ay xuxim xe upam. 5Te'uri xujam ya chupam jun yab'al, xujeq uch'ajik kaqan utijoxelab' chke xaq xuchaqijsaj ru' to'ay chi uximom xe upam.

6Are kuch'aj te i raqan ma Simón Pedro, ire xub'ij che i Jesús:

—Ajwal, kmajaw taj we Yet kach'aj waqan yin.

7I Jesús xula' uwach che:

—Wo'or, kamaj ti usuk' wach kintijin chu'anik, xwiri k-on panoq te'uri kamaj ni usuk' —xcha.

8Are uri ma Pedro xub'ij:

—¡Lik kinya ti chawe chi kach'aj i waqan!

I Jesús xula' uwach che:

—We Yin kinch'aj ti awaqan chawe, at we Yin ti chik uri —xcha.

9Are uri ma Simón Pedro xub'ij che:

—Ajwal, we keje usuk' ile, xwi ti waqani kach'ajo, xaq chach'aja ni in-ab' xaq injolom —xcha.

10I Jesús xula' uwach che:

—Jun, we k'ate atinnaq, rajwaxik ti uri kuch'aj u'ab' xaq i ujolom xwi i raqan uri man ronojel uch'akul is ch'am chik. Yix ix ch'am chik; tupu iwonojel taj —xcha.

11I Jesús xub'ij ile chi “konojel taj je ch'am”, man reta'am chik pachin kjachaw pki'ab' i ajch'oj chrij.

12Chrijil chik uch'ajik kaqan utijoxelab' xukoj chik i jule u'u' chrij chi xresaj. Te'uri xkub'i chik ku' chi mexa, xutz'onoj chke:

—¿Ximaj usuk' wach i xin-ano le? 13Yix kib'ij Tijonel xaq Ajwal chwe. Ile lik qatzij man lik are keje ile. 14Yin, we in tijonel xaq in Ajwal xwiri inch'ajom iwaqan chiwe, lik rajwaxik uri chi yix kich'aj iwaqan chiwach. 15Yin inya'om jun ilb'al re chiwach, pacha xin-an Yin le keje ile chi'ana yix. 16Saq laj tzij kinb'ij chiwe chi mijun ajchak atz taq u'ij chwach i rajaw; xaq mijun taqon atz taq u'ij chwach i ktaqawik. 17We kita ub'e ronojel ni'pa ile, xaq we ki'ano, lik utz iwe yix uri.

18Man iwonojel ti kixinlapo, man weta'am pachin je in-ulum. Xwiri rajwaxik chi k-antaj na pacha kub'ij uwuj i Dios: I jun chi kutij uwa wu' are i ajch'oj chwij. 19Su' kinb'ij iri chiwe man keje ile are kuk'ulmaj, yix lik kikoj na chi Yin lik in are Yin. 20Lik saq laj tzij kinb'ij chiwe: Xapachin jun kuk'ulaj intaqom b'i Yin, ke'eloq chi Yin kinuk'ulaj ru', xaq xapachin jun chi kinuk'ulaj Yin, ke'eloq chi kuk'ulaj i Jun chi xintaqaw loq —keje ile xub'ij i Jesús chke.

I Jesús kusaqij chi are ma Judas kk'ayiwik

21Chrijil chik ub'ixkil ronojel ni'pa ile i Jesús lik xpe utut uk'ux, are uri xusaqij chke:

—Lik saq laj tzij kinb'ij chiwe, o jun chiwe yix kinujach ni pki'ab' i ajch'oj chwij —xcha.

22Are uri utijoxelab' to' xkijeq utaqexik kib' chkiwach, man keta'am taj pachin ktijin i Jesús chulapik. 23Jun chke i tijoxelab' chi lik k'ax kna' rumal i Jesús o chuk'ulel are ketijin chwa'im. 24Are uri ma Simón Pedro xuk'ut pan che ru' u'ab' chi kutz'onoj che i Jesús pachin ktijin chulapik. 25Are uri i tijoxel le xtejeb' pan ru' i Jesús xutz'onoj che:

—Ajwal, ¿Pachin taq uri ile chi kab'ij?

26I Jesús xub'ij che:

—Kinmu ch'aqap wa re trigo, pachin che kinya wi, lik are ire uri kinjachawik —xcha.

Are uri xumu ch'aqap wa re trigo te'uri xuya che ma Judas chi uk'ojol ma Simón Iscariote. 27Are xk'amtaj i wa re trigo rumal ma Judas, xaq lik che i or le i Itzel xok puk'ux. Are uri i Jesús xub'ij che:

—Are ach'ob'om u'anik su' cha'ana —xcha.

28Xwiri lik mijun chke utijoxelab' chi ketijin chwa'im chwi mexa, xuta ub'e wach xub'ij i Jesús. 29I ma Judas are ajk'olol pwaq, rumali o jujun xkich'ob'o chi i Jesús xub'ij che chi kulo' wach taq kajwax chke che i nima'ij, o xaq we kuya jub'i' kimer i nib'a'ib'.

30I ma Judas are xuk'am i wa re trigo, Su' xel b'i chkixol. Are x-ek le lik cha'ab' chik.

I k'ak' utzij upixab' i Dios

31Chrijil chik u'enam ma Judas, are uri i Jesús xub'ij chke:

—Wo'or k-aljinsax ni u'ij uchomal i pacha Winaq chi Xolalaxoq chwach Ulew, xaq k-aljin ni u'ij uchomal i Dios che uk'ojol. 32I pacha Winaq chi Xolalaxoq chwach Ulew we kuk'ut u'ij uchomal i Dios, xaq keje uri i Dios kuk'ut u'ij uchomal Ire, ile lik juntir ku'an na. 33Ix ral taq wak'al, naj ti chik in o chixol yix. Yix kinitzukuj na, xwiri, pacha xinb'ij chke aj Judío xaq keje ile kinb'ij chiwe yix wo'or: Ipa kin-e wi Yin, yix kixtiki ti che enam chila. 34Rumali chi kinya jun k'ak' tzij pixab'i chiwe: Chi lik k'ax china iwib' chiwach. Keje pacha in-anom yin chiwe yix chi lik k'ax kixinna'o xaq keje ile chi'ana yix, lik k'ax china iwib' chiwach. 35We k'ax kina iwib' chiwach, konojel uri i winaq chwach i jyub' ta'aj lik kkil na chi yix ix intijoxelab'.

I Jesús xutzijoj chi ma Pedro kruwaj ni uwach

36Are uri ma Simón Pedro xutz'onoj che i Jesús:

—Ajwal, ¿Ipa kat-e wi?

I Jesús xula' uwach che:

—Ipa kin-e wi Yin, yet kat-e ti tan chila, k'a k-on ni panoq te'uri kat-e wu' chila ipa kin-e wi Yin —xcha.

37I ma Pedro xub'ij chik che i Jesús:

—Ajwal, ¿B'uchak chi kin-e ti awu' wo'or ipa kat-e wi yet? Yin lik kinya ni ink'aslemal pa kamik pak'exel yet —xcha.

38I Jesús xub'ij che:

—¿Qatzij lik kaya ak'aslemal pa kamik pink'exel Yin? Xwiri lik saq laj tzij kinb'ij chawe chi chuxe'el uch'awb'al i teren, oxmul kawuwaj ni inwach —xcha.

Currently Selected:

Juan 13: ACHICUB

Highlight

Copy