G%E9nesis 25

Umuq uxikin mam Abraham ru' ati Cetura

1I mam Abraham xk'uli chik ru' jun ixoq chi ati Cetura ub'i. 2I rak'al mam Abraham chi xuk'uwalij ru' ati Cetura je are iri: A Zimram, a Jocsán, a Medán, a Madián, a Isbac xaq i a Súa. 3I ma Jocsán xuk'uwalij a Seba xaq i a Dedán; i umuq uxikin ma Dedán je are iri: A Asurim, a Letusim xaq i a Leumim. 4I rak'al ma Madián je are a Efa, a Efer, a Hanoc, a Abida xaq i a Elda. Konojel ike le is je umuq uxikin ati Cetura. 5I mam Abraham ronojel ni'pa ub'itaq re xuya kan che a Isaac. 6Xwiri i rak'al mam Abraham ku' jub'an chik ixoqib', xwi xusipaj jalajuj taq b'iroxik chke; xaq are k'a k'aslik xeutaq b'i naj, k'a che ulew prelb'al ij, jachb'al kixol ru' uk'ojol chi a Isaac.

Ukamik xaq umuqik mam Abraham

7I mam Abraham xk'asi jo'lajuj wajxaqwinaq (175) junab'. 8I mam Abraham le lik rij chik are xkamik, k'iyal chik junab' o che are x-e pa uxlanem ku' i ratit umam chi je kamnaq chik. 9Je are rak'al chi ma Isaac xaq i ma Ismael xemuquw i kiqajaw chila chupam i pek Macpela, chi o naqaj che i Mamre, pa rulew ma Efrón chi uk'ojol mam Zohar aj Het. 10I ulew ipa xmuq wi mam Abraham le are ulo'om kan ire chke i rak'al ma Het. Chila xmuq wi ru' etz rixoqil, chi tit Sara. 11Chrijil chik ukamik mam Abraham, i ma Isaac chi uk'ojol, xya' utzil chomal puwi rumal i Dios. I ma Isaac le xjeqi chila naqaj che i k'otom chi keje ub'i iri: “LAJAY ROI”, chi ke'eloq, “K'aslik xaq kinrilo”.

Je umuq uxikin mam Ismael

12Iri je are umuq uxikin mam Ismael, chi uk'ojol etz mam Abraham ru' ati Agar chi aj Egipto chi xaq rajke'el te'eq etz tit Sara. 13Are kib'i i rak'al mam Ismael iri chrij pacha kalaxik: A Nebaiot chi are nab'e ak'al, te'uri a Cedar, a Adbeel, a Mibsam, 14a Misma, a Duma xaq a Massa, 15a Hadar, a Tema, a Jetur, a Nafis xaq i a Cedema. 16Iri je are rak'al kan mam Ismael, xaq je are aj-atzil chke i je kab'lajuj utzob'ajil, chrij pacha i kulew xaq chrij pacha i kalk'uwal.

17I mam Ismael xk'asi wuqlajuj waqwinaq (137) junab', are uri x-e pa uxlanem ku' i ratit umam chi je kamnaq chik. 18I je umuq uxikin etz mam Ismael le, xejeqi chwach ulew chi o chuxol i Havila ru' i Shur, chwach i tinimit Egipto, xaq pusuk' b'i i tinimit Asiria. Chila xejeqi wi, tupu o ch'oj chkij kumal i katz kicha'.

Ralaxik a Jacob xaq a Esaú

19Are u'anoj ma Isaac iri: Chi uk'ojol mam Abraham. 20I ma Isaac le kawinaq (40) junab' o che are xk'uli ru' al Rebeca, chi umi'al ma Betuel xaq ranab' ma Labán. I ma Betuel le aj Aram, aj pa tinimit Padan-aram. 21Al Rebeca chi rixoqil ma Isaac kalan taj, rumali ma Isaac le xutz'onoj che i Ajwal puwi i rixoqil man keje ile kalanik; i Ajwal xuta wach xutz'onoj ma Isaac che, rumali ati Rebeca le, xk'aqtajik. 22Xwiri i ak'alab' lik kki'an ch'oj chupam upam ati Rebeca man je yox, rumali xub'ij che i Ajwal: “We lik arewi keje iri ku'an chwe, ¿Wach uchak uri chi ink'as b'ik?” Xcha. 23I Ajwal xula' uwach che ati Rebeca:

“I keb' awak'al chi je o chapam,

ke'eloq keb' tinimit chi su' chupam li apam kkijach wi li kiwach.

Jun tinimit lik mas o ucho'ab' chwach i jun chik,

i atz, lik ajchak na chrij i cha'xel.”

Xcha i Dios.

24Are xeuriqa i ij chi xalan ati Rebeca, lik je yox rak'al xealaxik. 25I jun chi xalax nab'e, lik kaqkoj ktzun uwi xaq nimaq rismal che ronojel uch'akul, xkiya pub'i a Esaú. 26Te'uri teren li ucha' uchapom che i rixtixil i ratz, rumali xkiya pub'i a Jacob. I ma Isaac le o sesenta junab' che are xealax i rak'al chi je yox ru' ati Rebeca.

Uk'ayixik u'atzil a Esaú

27Are xek'iy ak'alab' le, i a Esaú xe'eloq chi ajtzukul jalajuj taq chikop pa taq es; xwiri i a Jacob xe'eloq jun ala chi kraj olem ru' ja. 28I ma Isaac lik k'ax kuna a Esaú, man lik kraj utijawik i ti'ij ke i jalajuj taq chikop chi keuk'am li a Esaú pa taq es; xwiri ati Rebeca, are mas k'ax kuna a Jacob.

29Xuriqa jun ij, are ktijin a Jacob chuyijb'axik i ti'b'alil, are uri xk'un li a Esaú upetik pa taq es, lik kosnaq xaq lik knum chik rumali xub'ij che a Jacob:

30—Cha'ana utzil chwe, chaya jub'i' inti'b'alil kaq le re kintijo, man lik kinnum chik —xcha.

Rumali chi xya' pub'i a Esaú le, a Edom.

31I a Jacob xub'ij che:

—Utzi', xwiri we kak'ayij a'atzil chwe.

32I a Esaú xub'ij che: Pacha i kawilo ri, lik ya kinkam rumal i numik.

—¿Wach taq wa uchak in-atzil chwe? —Xcha.

33I a Jacob xub'ij che: —Lik wo'or chab'ij chwe pub'i i Ajwal we kaya a'atzil chwe.

Are uri a Esaú le xub'ij che a Jacob chi lik kuya u'atzil che. 34Te'uri a Jacob xuya uwa a Esaú xaq xuya uti'b'alil kaq. Ire xutij uwa xaq xutu' uya'; are xrelej wa'im xwalij b'ik, x-ek. Keje ile xu'an a Esaú are xuqajsaj u'ij u'atzil.

Currently Selected:

G%E9nesis 25: ACHICUB

Highlight

Copy