Hechos 4

I ma Pedro xaq i ma Wan xek'am b'i chkiwach i aj-atol tzij

1I ma Pedro xaq i ma Wan k'a ketijin che i lapanik ku' i winaq, are uri xeupon pan i rajpatan i Dios xaq i aj-atzil ke ajchajinelab' re i rachoch i Dios junam ku' aj Saduceo#4.1 Saduceos: Are jutzob'aj aj Judío chi kkikoj ti i walijik che i kamik.. 2Lik mi'naq koywal man i ma Pedro xaq i ma Wan ketijin che i k'utunik chrij ni'pa i je kamnaq kewalijik pacha xu'an i Jesús chi xwalij che i kamik. 3Are uri xekichap b'ik, xwiri ya xqaj i ij rumali xekitz'apij kan prexil re chukab' ij. 4Xwiri je k'i chke i winaq chi xkita ni'pa xkib'ij ma Pedro xaq i ma Wan, lik xkikojo; i kik'iyal i winaq le, lik xwi i achiyab' je kolo lajujwinaq kab'lajujmo' (5,000) konojel.

5Chukab' ij i kaj-atzil aj Judío xkimol kib' pa tinimit Jerusalén junam ku' i uwi ujolom i tinimit xaq i tijonelab' re atb'al tzij. 6Xaq chila o ma Anás chi atz laj rajpatan i Dios xaq junam ru' ma Caifás, ma Wan, ma Alejandro xaq konojel ni'pa i kaj-atzil i rajpatan i Dios 7Are uri xkitaq kik'amik ma Pedro xaq i ma Wan chi kitz'apim prexil, xekiya chkixol, te'uri xkitz'onoj chke:

—¿Pachin taq xyaw pi'ab' u'anik ile xaq pachin pub'i ki'an wi ronojel ile?

8Are uri ma Pedro rumal Lo'laj Utewal i Dios chi o ru', xula' uwach chke:

—Ix nimaq taq aj-atzil xaq ix nimaq taq uwi ujolom i tinimit: 9Yix kixtijin chutz'onoxik chqe wach taq u'anik jun utzil chomal chi x-ani che jun achi chi iwab' xaq wach taq u'anik ile chi utzirnaq chik. 10Rumali chi kqa'aljinsaj chiwe man keje ile kketamaj ni konojel aj Israel chi i achi chi o waral chiwach yix, xutzir rumal i nim laj ucho'ab' i Jesucristo chi aj Nazaret chi are Ire le xiripo xaq xitz'aw chwach i krus, xwiri i Dios xuwalijsaj che i kamik. 11I Jesús le lik keje pacha i ab'aj chi kkixutuj i aj-anol ja, xwiri i ab'aj le ke'eloq chi lik mas kajwaxik xaq nim uchak. 12Lik xwi i Jesús o ucho'ab' re kojuto; man chwach ronojel i jyub' ta'aj lik nti jun chik winaq yatal che chi ktiki chqato'ik.

13I aj-atol tzij are xkilo chi ma Pedro xaq i ma Wan lik ko kiwach che i lapanik are uri xkinab'ej chi nti jun k'utunik yatal chke, chi xaq to' je winaq, are uri lik xkib'isoj xaq xqaj ki'ij man xkita ub'e chi ike le je utijoxelab' i Jesús. 14Xwi ta la ile, xaq i achi chi xutzirsaxik o chila chkixol, rumali chi ike lik kkiriq taj wach taq ula'ik uwach kki'ano. 15Are uri xekitaq b'i ma Pedro xaq i ma Wan chisaq, te'uri ike xe'ok kan chuyijb'axik chkiwach wach taq kki'ano. 16Kkib'ij:

—¿Wach kqa'an chke i achiyab' le? Konojel i winaq aj Jerusalén keta'am chi ike le xki'an jun nim laj il xaq yoj kojtiki ti chruwaxik uwach. 17Xwiri we kqaj chi ronojel ni'pa ile kkimayij uch'ach'axik, cheqaxib'ij uri man keje ile su' wo'or kkib'ij ti chik ucho'ab' i Jesús chke i winaq.

18Rumali chi xekisik'ij chik ma Pedro xaq i ma Wan, xkib'ij chke chi kkimayij uk'utik xaq ub'ixkil i ucho'ab' i Jesús. 19Xwiri ma Pedro xaq i ma Wan xkila' uwach chke:

—Chich'ob'o na we utz ke'el ile kib'ij yix chwach i Dios, we kojkojon chiwe yix i kojkojon ti che Ire. 20Yoj lik kqamayij ti ub'ixkil ni'pa qilom xaq i qatom.

21Are uri i aj-atol tzij xekixib'ij, xwiri xeko'taj b'ik. Man lik xkiriq taj wach taq kki'an chke man konojel i winaq xe'ok chukojik u'ij i Dios rumal i nim laj il chi xkilo. 22I achi chi xutzirsax rumal i nim laj il le, ik'awnaq chik che i kawinaq (40) junab'.

Utz'onoxik kicho'ab' xaq ukub'ib'al kik'ux i winaq chi kekojon che i Dios

23I ma Pedro xaq i ma Wan, are xe'o'tax b'ik, xe'e ku' i kachi'il xaq xkilap ronojel wach taq xb'ix chke kumal i kaj-atzil i rajpatan i Dios xaq wach xb'ix chke kumal i je uwi ujolom i tinimit. 24Chrijil chik utayik ile, konojel lik junam xe'ok che i lapanik ru' Dios, ru' i tziji: Ajwal, yet chi xa'an i kaj, jyub' ta'aj, i mar xaq ronojel ni'pa o chwach, 25xataq awajchak ma David chub'ixkil chqe ru' Lo'laj Atewal:

¿B'uchak chi kech'oqow i winaq?

¿B'uchak kkich'ob' u'anik jun b'iroxik chi utz ti ke'eloq?

26I ajawinelab' xaq i aj-ok'al utzam i jalajuj taq tinimit re uwach i jyub' ta'aj,

kkiqel i Dios xaq kki'an ch'oj

chrij i Ajwal, chrij i u'ulum Ire chi are i Cristo.#4.26 Salmos 2.1-2.

27Qatzij ile chi ma Herodes#4.27 I tzij Herodes ri b'iyaj taj, iri are ub'i upatan xaq rumal u'ij. xaq i ma Poncio Pilato, xkimol kib' waral pa Jerusalén junam ku' aj Israel xaq ku' jub'an chi je aj Israel taj re xkitzukuj tzaqsab'al re i lo'laj awajchak Jesús, xaq xa'ulu, chi are i Cristo. 28Keje uri ile chi ike xki'an ronojel chrij pacha ab'im yet ujer chi lik keje ile kuk'ulmaj. 29Wo'or Ajwal, cheawila ike le man kojkixib'ij, xwiri chaya ni ukowil qak'ux man keje ile kqaxij ti qib' chub'ixkil atzij chke i winaq, 30xaq chak'utu ni acho'ab' ru' kutzirsaxik iwab'ib', xaq ru' nimaq taq k'utb'al re, xaq ru' nimaq taq il ru' i nim laj ucho'ab' i lo'laj awajchak Jesucristo.

31Are xeutzin che i lapanik ru' i Dios, i k'ijib'al ipa kimolom wi kib' lik xyikyatik, are uri lik konojel xok Lo'laj Utewal i Dios pkik'ux, rumali lik xkowir kik'ux chutzijoxik utzij i Dios.

Ronojel ub'itaq ke lik ke konojel

32Konojel i winaq chi kekojon che i Dios chi lik je k'i chik, junam kinojb'al, xaqjunam kik'ux lik mijun kub'ij we xwi re ire jun b'iroxik. Ni'pa ub'itaq ke is junam ni kiwach puwi. 33I apostolab' xkimayij ti utzijoxik uwalijik i Jesús che i kamik, i Dios lik arewi kuya utzil chomal pkiwi konojel. 34Mijun chke kutij uyej, man ni'pa o kulew xaq ni'pa o kachoch lik kkik'ayij, i pwaq le 35kkiya pki'ab' i apostolab'. Te'uri i apostolab' le kkijach chke konojel chrij pacha i rajwaxik chke chkijujunal. 36Keje pacha xu'an ma José chi aj Leví, chi alaxnaq che i jun ulew Chipre chi setel chwi i mar. Chi xya' pukab' ub'i kumal i apostolab', ma Bernabé, (Bernabé ke'eloq: “Ralk'uwal i ajkub'sanel k'uxij”). 37I achi le o te'eq rulew xwiri xuk'ayij, te'uri xuya i pwaq chke i apostolab'.

Currently Selected:

Hechos 4: ACHICUB

Highlight

Copy