1 Timoteo 1
1
Rutzil wachij
1Yin in ma Pablo chi kintz'ib'aj b'i wuji chawe yet a Timoteo; in apóstol re i Jesucristo, in taqtal rumal i Dios chi Tol qe, xaq rumal i Jesucristo, chi ajkub'sanel re qak'ux. 2Kintz'ib'aj i wuji chawe, chi lik pacha lik at wak'al rumal ukub'ib'al ak'ux che i Ajwal. I Qaqajaw Dios xaq i Qajwal Jesucristo chkiya i utzil chomal pawi, xaq i uxlanb'al ak'ux, xaq chkiya ni i utz laj olem pawi.
Chachajij awib' che i saqil ti laj taq k'utunik
3Wo'or kinkamulij chik ub'ixkil chawe pacha i xinb'ij kan chawe are xin-e pa Macedonia: Chatkanaj pa tinimit Éfeso man kea'atij ni i winaq chi junwi kkik'utu. 4Lik chab'ij chke chi kkimayij ukojik retalil che taq i ujer tzij chi to' kinojim kan i katit kimam, xaq che taq i wuj ipa tz'ib'tal wi uk'iyal b'iyaj ke i katit kimam, man nti ke'el wi chke. Ni'pa taq ile, xa are kpetsaw tzij chkixol i je re i Dios. Ile keuto ti chuk'amik usuk' uch'ob'onik i Dios; man ile xwi kojtiki che we kqakub'a qak'ux che i Dios.
5Kinb'ij chawe chi chak'utu i saqil laj k'axnab'al k'uxij chke. Ni'pa i ketiki chu'anik ile xwi ketiki i ch'am kanima, xwi i o kino'oj xaq ni'pa i kkikub'a ronojel kik'ux che i Dios. 6Xwiri, o jujun je sachnaq man kib'ayom kib' che i tzij chi nti uchak. 7Kkaj ike kki'an tijonel che kib' re i ujer atb'al tzij, xwiri kkita ti ub'e wach taq i kkib'ij; lik ko kiwach ketijin chuk'utik, xwiri mitene ike kkita usuk'.
8I atb'al tzij le chi utz'ib'am kan i mam Moisés, qeta'am chi lik utz we pusuk' k-ani wi. 9Xwiri msach chqak'ux, chi i atb'al tzij chi olik kumal ti i winaq chi je utz. Ile kumal i je aj-anol i utz taj xaq kumal ni'pa i kekojon taj, kumal ni'pa i je utz ti laj taq winaq, kumal ajmakib', kumal ni'pa i kekojon ti che i Dios, kumal ni'pa i kkikamsaj kiqajaw kichuch, xaq kumal konojel i je ajkamsanel, 10i atb'al tzij le olik kumal i winaq chi kkimin kib' ru' jun chik chi je k'ulinaq ti ru', xaq kumal i achiyab' chi kkuk'aj kib' chkiwach je achiyab'; xaq kumal i ke'el-an winaq; kumal i je ajt'oronel; xaq kumal i je aj-anol t'oronik chwach i atb'al tzij, kumal i winaq chi kkaj ti i atb'al tzij suk'ulik. 11I utz laj k'utunik le are i tzij k'ak' chi kintijin yin chupaxsaxik chi elsab'al qe chisaq. Are i lo'laj Dios, rajaw i kikotemal lik uya'om chinqul upaxsaxik uwach.
I nim laj k'axnab'al uk'ux i Dios che i ma Pablo
12Lik kintioxij che i Qajwal Jesucristo man uya'om incho'ab' chu'anik i chaki. Kintioxij che man ire kul uk'ux chwe chi kin-an ni uchak, xaq xuya chinqul. 13Keje ile xu'an ire chwe, tupu yin ujer k'ax xinch'aw chrij, xaq xin-an k'ax chke i je teren chrij, xeinyo'ya. Xwiri i Dios rilom tob'al inwach man are xin-an ile k'amaja inkub'am ink'ux che, xaq lik xinch'ob' taj wach taq i kintijin chu'anik. 14Xwiri i Qajwal Dios lik k'ax xinuna'o xaq xukuy inmak, rumal i Jesucristo xuya ukub'ib'al ink'ux xaq xuya i k'axnab'al uk'ux chwe.#1.14 Keje ile ku'an ire chke i je o chik che i Jesucristo.
15O jun tzij lik qatzij xaq kmajawik chi qonojel kqakojo, are iri: I Jesucristo xk'un chwach i jyub' ta'aj tob'al ke ajmakib'. I yin in nab'e ajmak chkiwach konojel. 16Xwiri, i Dios xril tob'al inwach; i Jesucristo xu'aljinsaj wach unimal uk'ux chwe. Keje xu'an ire ile chwe k'utb'al re i rutzil uk'ux chke ni'pa i kkikub'a ni kik'ux che ire, riqb'al re i kik'aslemal chi nti uk'isik. 17Rumali chqakojo u'ij i qa-Dios k-e ij saq chrij, chi are i Qajawinel; chqakojo u'ij Ire, chi nti uk'isik u'atb'al tzij xaq kkam taj, xaq k-iltaj ti uwach. Choksax u'ij Ire chi lik are Dios saqil. Lik keje ile ch-antaj na.
18-19Yet, a Timoteo, chi pacha at jun wak'al, kinya chaqul chi kab'ij chke i je jutzob'aj re i Dios chila, wach inb'im chawe, chatch'ojin ru' i utz. Msach chak'ux wach i tzij xkib'ij li qachalal chawe ujer, chi petnaq ru' i Dios. Chakowirsaj ak'ux che ile, xaq chaya acho'ab' chu'ankil achak rumal ile. Tz'aqat ka'an ile, chakub'a ak'ux che i Ajwal, xaq chaya awib' chu'anik i utz pacha kub'ij ak'ux chawe. O jujun xekojon ti che wach i utz xub'ij i kik'ux chke, nti chik ukub'ib'al kik'ux, rumali xesachik, ketijin ti chik chukojik i saq laj tzij. 20Keje ile xki'an i ma Himeneo xaq i ma Alejandro. Rumali, je injachom che Itzel suk'b'al ke, utz kkib'ij ti chik itzel tzij chrij i Dios.
Currently Selected:
1 Timoteo 1: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
