San Mateo 25

A ka u k'ʌ' (diez) ch'upra mo' naj wenek yete xi'ra

1»A tuku wesintik K'uj a tiʌ kʌ' p'is bex a yʌn a kaj u k'ʌ' (diez) ch'upra a mo' nʌj wenek yete xi'ra, tu ch'ao' u ki'p'o' y jok'o u ch'ao' u ber a yʌj k'ate u k'ʌ'. 2Jumuj k'ʌ' ch'upra ne t'ajo' y jumuj k'ʌ' mo t'ajo'. 3A to'o mo' t'ajo', tu ch'ao' u ki'p'o', chen muj ch'ao' u jer tsatsi ti' u ka' turko', 4chen a t'ajo' tu ch'ao' u ki'p'o' y tu toj ch'ao' ya'p u tsatsi yok'o u chuji, ti' u ka' turko' u tsatsi u ki'p'o'. 5Chen u yʌjk'ati u k'ʌo' xʌni u tar, y chu'mpʌ u takchʌ' u weneo', y laj weneo' tu woro'. 6Y tʌn chumuk ak'ʌ' tu yuo' u tar u yabot a winik, tʌn yei'k: “¡Tʌn u tar u yʌjk'ati a k'ʌ', jok'ene'x a ch'ae'x u ber!” 7Kaj laj lik'o a ch'uprao' y chu'mpʌjo' u t'ʌpko' u ki'p'o'. 8A to' mo' t'ajo' tu yao' ti a to' t'ajo': “Ts'ae'x to' chichin a tsats a ch'amue'x, in ki'p'o' tʌn u tu'po'.” 9Tu nuko' a t'ajo' a ch'uprao': “Ti mu' xu'pu ti' teno' y ti teche'x, xene'x a kʌxte'x a mʌne'x tuku kana' y mʌne'x a bʌjie'x.” 10Chen tuk'in tʌn u bino' u mʌno' u jer u tsatsi, a u yʌjk'ati u k'ʌ' tari, a ch'uprao' a toj u ki' utskimʌ u bʌjo', lʌji' oko' yok'o nʌj yete a yʌj k'ato' u k'ʌo' y mʌkchʌ u jor u nʌji. 11Pachi taro' a ch'uprao' aj bino' u mʌno' u tsatsi, tu yao': “¡Ts'uri, Ts'uri, jeo' u jor ti' teno'!” 12Chen ti' tu nuka: “Jach taj kin wei'k teche'x, toj mi' wue moke'x a teche'x.”

13»Ki ch'ukte'x tu woro k'in, ka wirke'x ma' a we'x u k'ini tuk'in ku bin sut a Ti'a a Xi'ra.

A kʌ'sa a yʌn u jer u nu'ku yok'o a tak'in

(Lc. 19.11-27)

14»A tuku wesintik K'uj p'is bex bixa tiʌ junturi' xi'ra binukaj tu jer ne nʌch kʌjta, chen mo tey xik', tu t'ʌna u ne k'ʌnio' y tu p'ʌta' tio' u tak'in tiu kʌnʌnta' ti'. 15Ti juntu tu p'ʌta ti cinco mil chixtak'in, a juntu tu p'ʌta' ti' dos mil y a juntu tu p'ʌta' ti' mil, a bex toj u yej k'uchu u muk' u kʌnʌnto', pachi ti' bini nʌch u jer kʌjta. 16A to'o tu ch'a cinco mil chixtak'in, meajnʌ yete a tak'in y kʌnʌnʌ u jer cinco mil chixtak'in. 17Bexi' a to'o tu ch'a dos mil kʌnʌnʌ u jer dos mil. 18Chen a to'o tu ch'a mil to jai' tu ta'ka u tak'in u ts'uri yok'o jump'e u jor lu'm.

19»Pachi mʌni k'in ne ya'p, a u ts'uri a layo' u k'ʌnio', suti u k'ate tio' bik ts'ojki ti' u tak'in a tu p'ʌta tio'. 20Lʌji' yʌn tari a to'o tu ch'a cinco mil chixtak'in, y ti' tu tasa u jer cinco mil, y tu ya'a: “Ts'uri, a tech ta ts'aten cinco mil a chixtak'in y kin tasik tech u jer cinco mil tuj kʌnʌnen.” 21U ts'uri tu ya'ti': “Ne tsoy, a tech jach tsoy in winikech y ne ka ki' kʌnʌntik in ba', tu taj ki' kʌnʌnta in tak'in, tak mo' ya'p tin p'ʌta tech, bin in ts'ae a kʌnʌntik más ne ya'p. Oken a tsoykinte a wor yete a ts'uri.” 22Bexi' tari a juntu a to'o tu ch'a dos mil chixtak'in y tu ya'a: “Ts'uri, a tech ta ts'aten dos mil chixtak'in y ki tasik tech u jer dos mil tuj kʌnʌnen.” 23U ts'uri tu ya'ti': “Ne tsoy, a tech jach tsoy in winkech y ne ka ki kʌnʌntik in ba', tu taj ki' kʌnʌnta in tak'in tak mo' ya'p tin p'ʌta tech, bin in ts'ae a kʌnʌntik más ne ya'p. Oken a tsoykinte a wor yete a ts'uri.”

24»Chen kaj tari a to'o tu ch'a jai' mil chixtak'in tu ya'a: “Ts'uri, toj in we a tech. Lʌji' a xi'ra a jach ts'ik, toj in we a tech ka ch'eik a ba' a ma' tech ta meta y ka jak'ik a nʌr tak mo' tech ta pʌk'a. 25Ben ti' in ch'a sajki tech y binen in ta'ke a tak'in yok'o jump'e u jor lu'm. Y bein kin sutik tech a toj tech yʌni.” 26Tu nuka u ts'uri: “Mo tsoy in winkech y ne mo' k'orech, wo a wue jach ts'iken, a wej ki ch'eik a ba' a mo' ten tin meta, kin jak'ik u nʌr, tak mo' ten tin pʌk'a, 27o a che but'e in tak'in ix banco y ka' sutken je' in wirik t'ari in tak'in.” 28U ts'uri tu ya'ti' a mok tiʌ tita: “Take'x ti' a mil chixtak'in y ts'ati' a mok a yʌn ka uj k'ʌ' ti' mil ti'. 29A mok yʌn ti' más ya'p ku bij ts'abati' y a mok mʌnʌ' ti', tak tiʌ chichin ti binukaj laj taka' ti'. 30Y a je' in k'ʌni a mo' tsoy u meaj, chuke'x y ka purke'x jaknʌki tu ts'uakbi, tita ku bij ok'o y ku laj bin u k'uxe u koj yete u yʌyi tuku bu yue a ba'.”

U k'ini ka' u bo'te u si'pi tu woro a kʌjʌ' yok'o a lu'm

31»Tuk'in ka' sutuk u Ti'a Xi'ra yete tu woro u muk' y u yet tar yete tu woro u ángeles, binukaj kuta yok'o u k'ʌnche' tuku bin u wesintik tu woro a lu'm. 32Y tu woro a winik a kʌjʌ' yok'o a lu'm bi u laj much'e; bin u jʌtse a winik a bex ku jʌtsik a pastor u yʌrʌk' me' y u ti'ri aj me' a bex yʌn u xuru'. 33Aj me' a mʌnʌ' u xuru' junxet' biu k'uye y aj me' a ne chukuch u xuru' bexi' junxet'. 34Y aj Wes biu ya'e tio' a nikʌ' yok'o a derecha: “¡Ko'tene'x, a teche'x in Tet tu yʌnte'x, okene'x yok'o a tuku wesintik a to'o toj u meba ti' teche'x a mo yaj metak a lu'm. 35Tuk'in ka wijchen, ta ts'ae'x in wo'ch, ka uk'ajchʌjen, ta ts'a in wuk'u, tuk'in ti'en ix a kʌjte'x, ta waksen ta wato'che'x. 36Tuk'in mʌnʌ' in nok', teche'x ta ts'aten, tuk'in mo' utsen, tare'x a wiren, tuk'in kaj chuka mʌken, a teche'x tarech a ch'eten.” 37A winiko' a tsoy u tuko', ku bin u k'ato': “Ts'uri, ¿tuk'in tin wiro' a wijchʌj y ti ts'ao' a wo'ch? ¿Tuk'in tin wiro' a wuk'ujchʌ y tin ts'ao' a wuk'u? 38¿Tuk'in tin wiro' a mʌn ix in kʌjto' y tin waksech ix in watocho' o tuk'in mʌnʌ' a nok' tin ts'ao'tech? 39¿Y tuk'in tin wiro' mo utsech, o kaj chuka mʌkech bino' in ch'e'tech?” 40Aj Wes tu nuka: “Jach taj kin wei'k teche'x, tuk'in ta wʌnta a bex a je' a winik a lʌji' in bojo' a to'o mu' jach tukra, ti' ten ta wʌnten.”

41»Pachi aj Wes tu yao' ti' a to'o tu k'uya yok'o a izquierda: “K'uya bʌje'x ti' ten, K'uj ts'ik ti' teche'x, xene'x ix k'ak' a to'o muj tu'pu a menʌ' ti' a kisin y ti' u winik. 42A teche'x tuk'in kaj wijchʌjen, mo' ta ts'a in wo'ch, kaj uk'ajchʌjen, mo' ta ts'a in wuk'u, 43mʌnen ix a kʌjte'x, mo' ta waksen ta wato'che'x, tuk'in mʌnʌ' in nok' ta wiren, mo' ta ts'aten, tuk'in mo utsen o tuk'in kaj chuka mʌken mix tarech a ch'eten.” 44Bexi' a tio' tu k'ato': “Ts'uri, ¿Tuk'in tin wiro' a wijchʌj, o a wuk'ujchʌ, o a mʌn yok'o in kʌjta, y tuk'in tin wiro' mʌnʌ' a nok' o mo utsech, o kaj chuka mʌkech y mix tin wʌntech?” 45Aj Wes tu nuka: “Jach taj kin wei'k teche'x a bex mo' ta wʌnta a bex a je' a winik a lʌji' in bojo' a muj ne tukra, ti ten mo' ta wʌnten.” 46A lay a winiko' ti ku bij bin u bo'te u si'pi tu woro k'in y a to'o tu jach u'a u t'ʌn K'uj, a tio' ku bin ts'aba tio' u kuxta ti' K'uj y mʌnʌ' u yʌ kimo'.»

Currently Selected:

San Mateo 25: PLacNaha

Highlight

Copy