San Mateo 23

Jesús ku ki' ei'k ti' a winik

(Mr. 12.38-40; Lc. 11.37-54; 20.45-47)

1Pachi, Jesús tu ya'a ti' a winik y ti' u kʌ'sa winiko': 2«A ku kʌ'sko' u t'ʌn K'uj a toj u ts'ibtamʌ a Moisés uchik yete a u winiko' a judíos a ku ya'batio' fariseos, lʌjio' a mok más u yeo' u t'ʌn K'uj a ts'ibtamʌ a Moisés uchik. 3Yʌnti' a wui'ke'x a baij ku yei'k a metik; chen ma' metke'x a baiki ku metko', a tio' toj muj metko' a baiki ku yei'ko' u metko'. 4Ku yei'k ti u bojo' u metik a ba' a toj ne yaj u meta', chen a u bʌjio' a tio' toj muj metko' mix k'ʌs chichin ku pesik u k'ʌo' u metko'. 5Tu woro a je' a ba' ku tus metko' jai' ti' u yira' ti' u bojo' ku jach metko' u t'ʌn K'uj. Tsoyik u k'ʌxik yok'o u chi' u pʌm y bexi' yok'o u kʌ' a ba' meje menʌ' tuku li'sik ju'un a ts'ibʌ' ti' u t'ʌn K'uj ne tsoyik u más chukuxtik, y bexi' ku chukuxtik a ba' ku ch'uykintiko' yok'o u nok'o' a judíos ti' u yira' ku metko' u t'ʌn K'uj. 6Ne tsoyik u kuto' tuku kuto' tu ku jʌno' a ne t'ojo', bexi' ne tsoyiko' u kuto' tuku kuto' u ne t'ojio' yok'o u nʌji tuku much'ik u bʌjo' a judíos u xake u t'ʌn K'uj. 7Ne tsoy u yiko' u ki t'ʌna' ten u bojo' tu ku naj kanik u bao' a winik, y bexi' ne tsoy u yiko' u ya'ba tio': Wʌjkʌ'si, wʌjkʌ'si.

8»Chen a teche'x ma' cheike'x u t'ʌne'x, Wʌjkʌ'si, toj jai' yʌn junturi' a wʌjkʌ'si, lʌji' a Cristo, a teche'x ja'ri' laj bexi' a boje'x tu woro winik. 9Ma' t'ʌnke'x tet mix mok way yok'o lu'm, toj jai' yʌn junturi' a Tete'x, la' a tiʌ yok'o kʌ'. 10Ma' kʌxtike'x u t'ʌne'x, wʌjkʌ'si, toj ja'ri' a Cristo lʌji' a wʌjkʌ'si. 11A mok ku yui'k u bʌj más t'o'o lʌji' yʌnti' u yʌ meaj ti' u bojo'. 12Tu woro a mok ne t'o'o ku yui'k u bʌj, K'uj ku bin u wayse ne mʌnʌ' y a mok ku yui'k u bʌj mo t'o'o, K'uj ku bin u mete ne t'o'o.

13Jesús tu ya'tio' a ku kʌ'sko' u t'ʌn K'uj a toj u ts'ibtamʌ a Moisés uchik yete u winiko' a judíos a ku ya'batio' fariseos: »¡Jach yaj ka bin a wue'x a teche'x ka metke'x a bʌje'x ne tsoy a tuke'x chen tusaka'e'x! A ka mʌjke'x u jor ti' a winik ti' mu' yoko tuku wesintik K'uj a tiʌ kʌ', y mix teche'x ka woke'x y mix ka cheike'x u yoko u mok poch u yoko. 14¡Jach yaj ka bin a wue'x a teche'x ka metke'x a bʌje'x ne tsoy a tuke'x chen tusaka'e'x! Ka laj akrik u ba' a ch'uprao' a laj kimen u lak' y tus ka we'sik ne ya'p ka t'ʌnke'x K'uj chen woro tus; ben más ne ya'p ka ba' bo'te'x a si'pie'x ti' K'uj.

15»¡Jach yaj ka bin a wue'x a teche'x a ka kʌ'sko' u t'ʌn K'uj a toj u ts'ibtamʌ a Moisés uchik y yete a fariseos a teche'x ka metke'x a bʌje'x ne tsoy a tuke'x chen tusaka'e'x! A ka laj ch'iki mʌne'x ch'ik toj woro a lu'm ti' a kʌxtik más a mok ku kʌnik a baij ka we'sik, chen tuk'in ku kʌnko', ka waysike'x ne mo' pataj y más ku nʌj bij bino' ix k'ak'.

16»¡Jach yaj ka bin a wue'x, a teche'x p'is bexe'x a winik a muj yirik u ber! A ka wei'ke'x: “Wa mok ku ts'ek u t'ʌn yok'o u yatoch K'uj o mu metik a tu ya'a, joyti', chen wo mok ku ts'ek u t'ʌn ti a oro a yʌn yok'o u yatoch K'uj a lay yʌnti' u jach metik a tu ya'a u metik.” 17¡A teche'x ma' we'x ba' p'is bexe'x bix a winik a muj yirik u ber! ¿To' jach más ne tsoy: a oro o u yatoch K'uj? ¿Maj we'ex a u yatoch K'uj lʌji' ku tsoykintik a oro? 18Bexi' ka wei'ke'x: “Wa mok ku ts'ek u t'ʌn yok'o a tuku k'uba' ba' ti' K'uj o muj metik a tu ya'a, joyti', chen wa mok ku ts'ek u t'ʌn ti u tak'in a ku ts'abati' K'uj a lay yʌnti' u jach metik a tu ya'a u metik.” 19¡Maj wui'ke'x t'ʌn y ya mʌ'iche'x! ¿To' jach más ne tsoy: A tak'in a ku ts'abati' K'uj o a tuku k'uba' ba' ti K'uj? ¿Mo' lʌji' a ku tuku k'uba' ba' ti' K'uj ku tsoykintik a tak'in a ku ts'abati' K'uj? 20Wa mok ku ts'ek u t'ʌn yok'o a tuku k'uba' ba' ti' K'uj, mo' ku ts'ek u t'ʌn jai' yok'o u lu'mi, lʌji' ku ts'ek u t'ʌn ti' tu woro a baiki yʌn tita, 21a mok ku ts'ek u t'ʌn yok'o a yatoch K'uj, mo jai' ku ts'ek u t'ʌn ti' u nʌji, ku ts'ek u t'ʌn ti K'uj a ti' kʌjʌ' tita. 22A mok ku ts'ek u t'ʌn yok'o a kʌ', ku ts'ek u t'ʌn yok'o u k'ʌnche' a tuku kuta K'uj, y bexi' ti' u bʌji' K'uj ka wirik lʌji' K'uj kura' tita.

23»¡Jach yaj ka bin a wue'x a teche'x, a teche'x ka metke'x a bʌje'x ne tsoy a tuke'x chen tusaka'e'x! A teche'x jai' más ka tukrike'x a ts'ek u diezmo a pʌk'a u k'aba' menta, a jump'e a eneldo y a jump'e u k'aba' comino, chen mo' lʌji' más ka tukrik a metik a ts'ibʌ' u t'ʌn K'uj a to' ku yei'k a metik jach u tsoyi ba', a ch'eik otsi ti' a bojo' y a ki metik u t'ʌn K'uj. A je' a oxp'e ba' tin wa'a yʌnti' a metke'x chen ma' p'ʌtik a metik a jump'e u t'ʌn K'uj. 24¡A teche'x p'is bexe'x a winik a muj yirik u ber, chen mix a we'ex tu ka bine'x, a teche'x bexe'x bix tus ka jarike'x oj k'opi ta wuk'u aj us, chen ka ya luk'ike'x a camello!

25»¡Jach yaj ka bin a wue'x a teche'x a ka kʌ'sko' u t'ʌn K'uj a toj u ts'ibtamʌ a Moisés uchik y yete u winiko' a judíos a ku ya'batio' fariseos a teche'x ka metke'x a bʌje'x ne tsoy a tuke'x chen tusaka'e'x! A teche'x jai' ka p'oi'ke'x u pach a luche'x yete a lake'x chen ichi yaj bʌjʌ' woro akrabi ba' yete ne ya'p mo' tsoy ba'. 26¡Yaj mʌ'ichech a teche'x a u winiko' a judíos a ku ya'batio' fariseos! Yʌ ki' p'o'ex ichi a lʌk yete a luch ti' u p'ata tsoy jaknʌki.

27»¡Jach yaj ka bin a wue'x a teche'x, a teche'x ka metke'x a bʌje'x ne tsoy a tuke'x chen tusaka'e'x! A teche'x bexe'x bix mukra winik, ki' banʌ' sʌk, p'is ki menʌ', ka wirik jach ne tsoy, chen ichi ne turu yete u bake winik y yete tu' ba'. 28Y bexi' bexe'x a teche'x: Ka we'sike'x tus p'is ne tsoy a tuke'x, chen yok'o a tuku, ne ya'p k'as ba' yʌn y yete ne mo tsoy ba'.

29»¡Jach yaj ka bin a wue'x a teche'x, a teche'x ka metke'x a bʌje'x ne tsoy a tuke'x chen tusaka'e'x! Ka metke'x u nʌji tuku muka' a profetas, ka laj ch'uykintik ba' tiu tsoyta yok'o u mukra a mok kimi tsoy u tuku, 30y pachi ka wei'ke'x: “Wo a teno' tio' tuk'in a yaxk'in kuxo' ak nuke'x, mo' tak a'a u kinsao' a profetas.” 31Yete a je' a ba' ta wa'ex, a bʌji' te'x ta wa'ex, y ka we'sik lʌjie'x a tet a moko' a tu kinso' a profetas uchik. 32¡Ts'o'se'x a metke'x a bay tu chu'so' u metko' a nuke'x!

33»¡A teche'x mo' pajtie'x bex a kʌno'! ¿Bik ka bij puts'e'x ix k'ak' a tuka bin a bo'te'x a si'pi? 34Ben a ten bin in tuchi'te teche'x profeta yete a mok u yeo' tu woro ba' y yete a ku kʌ'sko' u t'ʌn K'uj a toj u ts'ibtamʌ a Moisés uchik. Chen a teche'x bi a kinse'x y bin a bʌje'x ix Cruz, tax jujuntu bin a jʌts'e ix u nʌji tuku much'ik u bʌjo' a judíos u xake u t'ʌn K'uj, bi a kʌxte ch'ik tu woro kʌjta ti' a chujko'. 35Bein, ti' teche'x ku bij kuta a si'pie'x tu laj kinsa' tu woro a winik a laj tsoy u tuko', toj lik' u chuni ka yʌn kinsa' a Abel a mok ne tsoy u tuku hasta kaj kinsa' a profeta Zacarías a lʌji' u ti'a a Berequías, a to' a teche'x ta kinse'x ix u chumuki to' tu tiʌ u yatoch K'uj y tu tiʌ a tuku k'uba' ba' ti' K'uj. 36Jach taj kin wei'k teche'x, tu woro a ba' ti tsikbʌta' teche'x, binukaj laj mʌn ti' a beje' a winiko' kuxʌ'.

Jesús ku yak'tik u bʌj ti' u kʌjta Jerusalén

37Jesús tu ya'a:

»¡Jerusalén, Jerusalén, a teche'x ka kinsike'x a profetas, ka ch'inke'x u jo'o yete tunich a mok tuchi'ta' ten K'uj! ¡Bon wʌts' in k'at in much'e a ti'a, bex a kax ku jukintik u yar ti' u kʌnʌntik, chen teche'x mo' ta cha'ex! 38Ch'ex ta wue in wei'k teche'x, a wato'che'x binukaj p'ata tu juna, 39ki wei'k teche'x, mʌnʌ' a ya iken beje', ja' ka iken ka k'uchuk u k'ini hasta ka wei'ke'x: “¡Jach kaj k'ujinte a ku tar, a tuchi'ta ti' ak Ts'uri!”»

Currently Selected:

San Mateo 23: PLacNaha

Highlight

Copy