San Mateo 21

Jesús ku yok'o ix Jerusalén

(Mr. 11.1-11; Lc. 19.28-40; Jn. 12.12-19)

1Tuk'in xok'o u k'uchu ix u kʌjta Jerusalén y kaj k'ucho' ix Betfagé, tu yʌn u yaj witsi u k'aba' Olivos, Jesús tu tuchi'taj ka'to' u kʌ'sa winiko', 2tu ya'tio':

—Xene'x to a lay u kʌjta a ka wike'x, ka ojke'x, bin a wire'x junturi' burra yete u yar; pite'x y tase'x ten. 3Wa mok ku k'atik, a'e'x ti': Ak Ts'uri u k'at u k'ʌnik y mʌnʌ' u xʌnta u sutik tech.

4Tu woro a je' a ba' ku mʌn, lʌji' ti' u nupsik u t'ʌn K'uj a bex tu ya'a a profeta:

5«A'e'x ti' u winki u kʌjta Jerusalén:

“Ire'x, tʌn u tar a wesie'x, kurukba yok'o junturi' burro,

a lʌji' u yar a ku k'ʌna' ti u kuchik ba'.”»

6Ij bini a kato' u kʌ'sa winik a Jesús y bex tu meto' a bex a'tio' u metik. 7Tu taso' ti' a Jesús a burra yete u yar, tu jʌyo' u nok'i tu pacho' ij nʌ'ki Jesús kʌpta. 8Ne pim winik chu'mpʌjo' u jʌyko' u nok' ix u beri tuku mʌn Jesús; u jer a winik tu xat'o' u le' che' y tu jʌyo' bexi' tuku bin mʌn a Jesús. 9A winiko' a tʌn u tar pʌti y a tʌn u tar tu pach a Jesús, tʌn u k'ʌ'm ei'ko':

—¡Hosanna u ti'a David! ¡Kaj k'ujinte a ku tar a je' aj tuchi'ta ti ik Ts'uri! ¡Hosanna ix kʌ'! 10Kaj oki Jesús ix u kʌjta Jerusalén, tu woro u winki chu'mpʌjo' u ne jumo', y tʌn u k'atko':

—¿Moki a lay a xi'ra?

11A mok u yet taro' a Jesús tu nuko':

—A je' lʌji' a Jesús a mok lʌji' profeta, a lʌji' u winki u kʌjta Nazaret yok'o u lu'mi Galilea.

Jesús oki yok'o u yatoch K'uj y tʌn u kanko' u ba' a winiko'

(Mr. 11.15-19; Lc. 19.45-48; Jn. 2.13-22)

12Oki Jesús yok'o u yatoch K'uj, y tu laj jara tu woro a mok ku kanik u bao' yok'o u jamni u yatoch K'uj y bexi' tu laj jara tu woro a mok ku mʌnik u bao', tu laj tech'inta tu woro u pojcheo' tuku kuto' u k'axko' u tak'ino' yete u jer winik, y bexi' tuku kuto' u kʌno' aj uk, 13y Jesús tu ya'tio':

—Ti ts'ibʌ' yok'o u t'ʌn K'uj, ku yei'k: “In watoch lʌji' u nʌji ti' u t'ʌna' K'uj”, chen teche'x ta wayse'x in watoch ti' u much'ik u bʌj a mok ku yakraba'. 14Pachi taro' a mok muj yik u ber y bexi' a mok muj xima ti' u ch'ensa' ti' Jesús y Jesús tu laj ch'enso'. 15Chen u t'ojio' a moko' ku meajo' yok'o u yatoch K'uj yete a mok ku ts'ibtik u t'ʌn K'uj a ts'ibʌ' ten Moisés uchik, nej ts'ikcho' ka tu yiro' baiki ne tsoy ba' tu meta Jesús yete u muk' K'uj y bexi' tuku yaboto' a cho mejeno' y tʌn u yei'ko': «¡Hosanna au ti'a David!» 16Y tu yao' ti' a Jesús:

—¿Ka wui'k baiki ku yei'ko'?

Jesús tu nuka:

—Ki wui'k. Chen ¿ma' a xakbe'x tu yei'k u t'ʌn K'uj:

“Yok'o u chio' a cho mejeno'

yete a to' u yʌ chu'chʌntʌ

lʌji' ku bino' u k'ʌyech.”

17Pachi jok'i Jesús tu tiʌ, ij bini ix u kʌjta u k'aba' Betania y tij weni.

Jesús ku ts'ek u tiji a che' u k'aba' higuera

(Mr. 11.12-14,20-26)

18Ne ja'ts'ka', tuk'in tʌn u ka' sut Jesús ix Jerusalén, chu'mpʌ u wijchʌj. 19Yok'o u beri tu yira jump'eri' che' u k'aba' higuera, chen kaj xok'i u yire, tu yira mix k'ʌs u wich, toj jai' u le' yʌn, lʌji' ka tu ya'ti' a che':

—¡A tech mʌnʌ' a yʌ ichʌnkʌj!

Toj yayaj kaj tiji a che' a u k'aba' higuera. 20Nej pekno' u yoro' u kʌ'sa winiko' a Jesús ka tu yiro' baij tu meta Jesús ti' a che y tu k'ato' ti' a Jesús:

—¿Bik tijki toj se'p' a che' a u k'aba' higuera?

21Jesús tu nuka tio': jach taj ki wei'k teche'x, wa jach ka ki cheik u t'ʌn K'uj y maj wei'ke'x mo' jach toj jai' u t'ʌn K'uj, mo jari ja' metke'x a je' ti' a che' a u k'aba' higuera, bexi' ja' wei'ke'x ti' a lay a wits: “K'uyabʌj y xen purabʌj yok'o a peta'” a lay a wits je'e u metik a baij ta wa'a ti'. 22Wa jach ka ki ch'eik u t'ʌn K'uj, tu woro a ba' ka k'atik ti', jeu' laj ts'ektech.

Jesús ku k'ata ti' mok tuchi'tik u tsikba bex

(Mr. 11.27-33; Lc. 20.1-8)

23Kaj oki Jesús tu kʌ'sa yok'o u yatoch K'uj, xok'o' tu tiʌ a Jesús tu kʌ'sa a u t'ojio' a moko' ku meajo' yok'o u yatoch K'uj u yet tar a mok nuxio' u winik a judíos y tu k'ato' ti' a Jesús:

—¿Mok tu li'sa u t'ʌni tech a je' a ba' ka metik? ¿Mok u ts'uri tu ya'tech a je' ka metik?

24Ka tu nuka Jesús:

—Bexi' ten ki bin in k'ate jump'e ba' ti' teche'x, wo ka nujke'x ten, bexi' ten je'e in wei'k teche'x moki tu li'sa' u t'ʌni tin metik a je' a ba' ka wike'x.

25A tu but'a ix ja' a winik a Juan ¿mok li'sik u t'ʌni ti' u metik, wa K'uj o winik? Kaj u chu'so' u tsikbo' bik taba ku bu nu'ku, kaj u yao': “Wa kak ei'k, lʌji' tu li'sa u t'ʌni K'uj, bin u ya'e to'; ¿biken mo' ta ch'ae'x u t'ʌn?” 26Mo' bik ak kei'k, lʌji' li'sik u t'ʌni tea winik, ka wirik sajko' tea winik, a winiko' toj u yeo' jach lʌji' a Juan lʌji' profeta. 27La'jen ka tu nuko' bex ti' a Jesús:

—Mi' weo'.

Y Jesús tu ya'tio':

—Bexi' ten mʌnʌ' in wei'k teche'x mok li'sik u t'ʌni tin metik a je' a ba'.

A kʌ'sa a yʌn u jer u nu'ku yok'o junturi' xi'ra yʌn kato' u xi'ra u ti'a

28Jesús tu k'ata tio':

—¿Bik a wike'x teche'x a je' kin tsikbʌtik? Tiʌ junturi' xi'ra yʌn kato' u xi'ra u ti'a, tu ya'ti' a suku'ubi u ti'a: “Ti'a, xen ta meaj ix in lu'm tu in pʌk'ba a nukuch ts'us (uva).” 29U ti'a tu nuka ti': “¡Mi' k'at bin!” Chen pachi tu ki tukrubʌj, ij bini. 30Pachi a xi'ra xok'i ti' a juntu u ti'a y bexi' tu ya'ti' bix a juntu. Y ti' tu nuka: “Jei bin a ten Ts'uri” Chen toj moj bini. 31¿To' baij tu jach meta a baiki u k'at u tet?

—Tu nuko' ti' Jesús:

—A suku'ubi u ti'a

Y Jesús tu nuka tio':

—Jach taj kin wei'k teche'x, a winik a mok ku k'atik u bo'ri u ba' u bojo' a ku meaj tij wes yete a ch'upra a ku kanik u bʌj, lʌji' ku bin yʌ oko' yok'o tuku wesintik K'uj. 32Ka wirik tari a Juan a ku but'ik ja' u bojo', tu kʌ'se'x a metik tsoy ba' ti K'uj y a wui'ke'x u t'ʌn, chen maj ch'ae'x u t'ʌn; chen a mok ku k'atik u bo'ri u ba' u bojo' a ku meaj tij wes yete a ch'upra a ku kanik u bʌj, a tio' tu ch'ao' u t'ʌn a u tsikba a Juan, chen a teche'x tak ta wire'x mix ta k'axe'x a tuku y mix ta ch'ae'x u t'ʌn a baij tu tsikbʌta.

A mok mo' tsoyo' ku meajo'

(Mr. 12.1-12; Lc. 20.9-19)

33»Ka' ch'exte'x a je' a kʌ'sa a yʌn u jer u nu'ku: U winki jump'e lu'm, tu pʌk'a u yo'ch nukuch ts'us (uva), tu ki sutmʌkta, tu meta u kuchi tuku bin u jarik u ya'ri a nukuch ts'us, bexi' tu meta jump'e u nʌji ne kʌ'nʌ ti' u nʌ'kʌ kʌnʌnta ti', pachi tu mʌjʌnta ti' mo' ne pim winik, y u winki a lu'm bini yok'o u jer lu'm nʌch. 34Ka k'uchi tu k'ini u t'aka u wich u yo'ch nukuch ts'us, u winki u lu'mi, tu tuchi'taj mo' ne pim u ne k'ʌni' ix u lu'mi tu pʌk'a u yo'ch nukuch ts'us, ti' u k'atik a to' lʌji' yʌni. 35Chen a mok ku kʌnʌntik u lu'm, tu chuko' u laxo' aj tuchi'ta a mo' ne pim u k'ʌni' a u winki a lu'm, tax jujuntu tu kinso' y u jer yete tunich tu kinso'. 36U winki a lu'm tu ka' tuchi'ta u jer k'ʌs más ts'ets'i' pim u k'ʌni', a bex a tu yʌ tuchi'ta; chen a mok ku kʌnʌntik u lu'm bexi' tu ka meta tio' a bex tu meto' ti a yʌ tari u yʌj chuni.

37»Ya u ts'o'k u winki a lu'm tu tuchi'ta u ti'a, tu yao' u bʌj: “In tukrik wa ku yira in ti'a, je'e u yua u t'ʌn.” 38Chen a mok a ku kʌnʌntiko' u lu'mi tu p'ʌk'ʌ u nukuch ts'us u winki a lu'm, ka tu yiro' u ti'a u winki a lu'm, tu yao' yete u bojo': “A je' lʌji' u ti'a u winki a lu'm a ku bin u p'ʌte u lu'mi u p'ʌk'ʌ nukuch ts'us ka kimik, ka ʌk kinse, y ti' to'o ku bin p'ata u lu'mi u p'ʌk'ʌ a nukuch ts'us.” 39Y tu chuko' u ti'a a u winki a lu'm, tu jaro' tu lu'mi u p'ʌk'ʌ a nukuch ts'us, y tu kinso'.

40»Ka' sutuk u winki u lu'mi tu u pʌk'ba u yo'ch nukuch ts'us, ¿baij ku bin u mete tio' a ku kʌnʌntik u lu'm u p'ʌk'ʌ a nukuch ts'us?

41Nuka ti' Jesús: Bi u laj kinse tu woro a lay a mo' pataj a tu kʌnʌnta u lu'm, mʌnʌ' u nʌj ch'eik otsi ti', y u winki a lu'm bin u ts'a ti' u jer u winik ti u kʌnʌnta' ti' y ti' u jach ts'abati' u wich ka k'uchuk u k'ini u tʌjʌ, a to' toj lʌji' yʌni.

42Jesús tu ya'tio':

—¿Ma' nʌj xakbe'x tu ts'ibʌ' u t'ʌn a K'uj tu ku yei'k?:

“A tunich a mo' tsoy ira' ten a winik a mok ku metik nʌj

K'uj tu meta' a tunich

a jach lʌji' ne tsoy ti' u kukinta yok'o nʌj ti' u chixta u muk' a nʌj;

a je' ak Ts'uri tu meta

y nej peknʌ in woro tu ti wiro' bex.”

43Ben ki wei'k teche'x, teche'x muj bij cha'ba teche'x a woke'x yok'o tuku wesintik K'uj, lʌji' ku bi cha'a ti u jer winik a mok ku bin u yue u t'ʌn K'uj. 44Tu woro a mok ku lubu tu yʌn a tunich, jach yaj ku bin yue, wa a tunich ku chere tu yok'o ti' mok, binukaj laj muxa'. 45U t'ojio' a moko' ku meajo' yok'o u yatoch K'uj yete u winiko' a judíos a ku ya'batio' fariseos, ka tu yuo' a kʌ'sa a yʌn u jer u nu'ku, lʌji' ku ya'ba tio' a ku tsikbʌtik Jesús. 46Lʌji' tuk'in poch u chujko' a Jesús, chen ma' tu chuko' Jesús, tu tu sʌjto' a tiʌ pim a winiko', ka wirik a winiko' tu tukro' a Jesús lʌji' profeta.

Currently Selected:

San Mateo 21: PLacNaha

Highlight

Copy