San Mateo 20

U tsikbʌta' ti' a mok ku meaj yok'o u lu'm a mok u pʌk'ba nukuch ts'us

1»Tu ku wesintik K'uj a tiʌ kʌ', bex bix u winki u lu'mi tuku pʌk'a a nukuch ts'us (uva), a jok'i ne ja'ts'ka' u kʌxte winik ti' u meaj to' u lu'mi u pʌk'a nukuch ts'us. 2Ka tu yira, tu ya'tio' u bo'tik bex u bo'ri ku bo'ta' meaj jump'e k'in, pachi tu tuchi'to' tu meaj ix u lu'mi u pʌk'a nukuch ts'us. 3Kaj nʌ'ki k'in tu yira u jer kurukbʌjo' mʌnʌ' ba' ku metko', ti' kuro' tuku kanko' u bao' a winik. 4Y tu ya'tio': “Xene'x bexi' ta meaje'x yok'o u lu'mi in pʌk'a nukuch ts'us, y bexi' je'e in ki' bo'tke'x,” y tio' bino' tu meajo'. 5Ka' jok'i k'ak' chuk'in u winki a lu'm u ka' kʌxte u jer u winik, chen ka tu yira, tu ya'ti' u bo'tik bexi' a bex tu ya'ti' a yʌno', ij ka' jok'i bexi' ka tu tsarubʌ k'in y bexi' tu meta ka tu yira. 6Kaj ojk'inchʌ, ka' jok'i tuku kanko' u bao' a winik y tu yira u jero' mʌnʌ' ba' ku metko' y tu ya'tio': “¿Biken way yʌne'x tu mona k'in y mʌnʌ' a meaje'x?” 7Tu nuko' ti': “Mix mok tu bo'to' tin meajo'.” Y Ti' tu nuka: “Xene'x bexi' ta meaje'x ix in lu'm y bexi' in ki bo'tke'x.”

8»Kaj ak'ʌ'chʌ, u winki u lu'mi tu pʌk'a nukuch ts'us tu ya'ti' a mok ku kʌnʌntik u lu'm: “Pʌye aj meajno' ti' ten y bo'te u bo'ri u meajo', ka' chu'sik a bo'tik a mok pachi ok tu meaj y pachi a mok yʌ ok tu meaj ne ja'ts'ka'.” 9Ij tari a mok ok tu meaj ojk'in ij bo'ta' bix u bo'ri ku bo'ta' jump'e k'in. 10Pachi taro' a mok yʌ ok tu meaj ne ja'ts'ka', y tio' tu tukro' jeu' bo'ta' más ya'p, chen bexi' bo'ta' bix u bo'ri ku bo'ta' meaj jump'e k'in. 11Ka tu chuko' u bo'ri u meaj, chu'mpʌjo' u tsutsustiko' u winki a lu'm. 12Bex tu yao' ti' u winki: “A jeo' jach chichin meajno' y bexi' ta bo'ta' u bex ta boteno' y to' jach chich meajno' tu jach mona k'in y tak muk'ta u chʌkʌri k'in.” 13U winki a lu'm tu nuka ti' junturi': “¡Ire bojo'! Ten mʌnʌ' in kʌxmetkech, ¿Mo' toj taj katajkor in bo'tikech bix u bo'ri ku bo'ta' meaj jump'e k'in? 14Ben ch'ae u bo'ri a meaj y xen. Wa ten poch in bo'tik a mok pachi ok tu meaj bexi' bix tin bo'tech tech 15¿A to'o ten yʌni mo tsoy in k'ʌnik a bex in k'at in k'ʌnik? ¿O k'ex a wor ti' ten tu ka wirik tsoy in pixʌn?”

16»Bein a mok beje' lʌji' u yʌj chuni chen lʌjio' ku bij wayo' pachio', y a mok beje' lʌjio' pachio' lʌji' ku bij wayo' u yʌj chunio', ka wirik ne pim a ku pʌya' chen mo pim a mok ku jach tejta'.

Jesús ku ka' tsikbʌtik u yoxwʌts' u ka' k'ini u kimi

(Mr. 10.32-34; Lc. 18.31-34)

17Ka tʌn u bin Jesús yok'o u beri tuku bin ix Jerusalén, tu much'a u bʌj jari yete a doce u kʌ'sa winik y tu ya'tio':

18—Beje' kak bin ix u kʌjta Jerusalén, tita ku bij k'uba' u Ti'a Xi'ra ti' u t'ojio' a moko' ku meajo' yok'o u yatoch K'uj y ti' a mok ku kʌ'sko' u t'ʌn K'uj a toj u ts'ibtamʌ a Moisés uchik y tita ku bin u yao'; ka' kinsa'k: 19Binukaj k'uba' ti' a moko' mo' judíos, binukaj p'asta', binukaj jʌts'a', u tup'a u wich, binukaj bʌja' ix cruz; chen ka mʌnʌk oxp'e k'in tuj kinsa', jeu' ka lik'i kuxta.

Jesús ku nukik ti' u nʌ' a santiago y a Juan

(Mr. 10.35-45)

20U lak' a Zebedeo yete u ti'o' a lʌji' a santiago y a Juan xok'o ti' a Jesús, y u nʌ' a santiago y a Juan tu xonkitubʌj ti' Jesús ti' u k'atik ti' ba'. 21Jesús tu k'ata ti':

—¿Baij a k'at?

Ti' tu nuka:

—Tuchi'te tu ka wesintik ka' kurak in ti'o' junxet' ta xax y a juntu bexi' junxet' ta xax. 22Jesús tu nuka:

—A teche'x ma' we'x baij ka k'atke'x. ¿Yʌn wa jea' wu'ke'x a ja' a ne k'aj a kin bin in wuk'e?

Y tio' tu nu'ku:

—Je'e in wuk'iko'.

23Jesús tu ka' nuka tio':

—Toj je'e a wu'ke'x a ja' a ne k'aj a kin bin in wuk'e, chen a mok ku bij kuta tin xax mo' ten kin wei'k, a in Tet lʌji' ku bin u ya'e mok ku bin kuta tin xax.

24Ka tu yuo' a yʌno' a diez u kʌ'sa winik a Jesús, ts'ikcho' ti' a Santiago y a Juan. 25Chen Jesús tu laj pʌyo' ka xok'ok ti' y tu ya'tio':

—A teche'x a we'ex, a moko' mo' judíos a mok akaʌ' tu wesio' o yʌn u kucho', a layo' ku yui'k u bʌjo' ne t'ojo' y a mok ne ts'uro' ne tsoyik u li'sik u t'ʌn ti' u winik u meta baij ku yei'k. 26Chen ti teche'x mo' bay ka ba mete'x, a teche'x a mok poch u yui'k u bʌj ne to'o lʌji' yʌnti' u yʌ meaj ti' u bojo', 27a mok poch u yʌ ira' pʌten yʌnti' u yʌ meaj ti u bojo'. 28Bex u Ti'a Xi'ra, a ti' moj tari ti u meaj a winik ti', a ti' tari ti u meaj ti' a winik y ti' u ts'ekubʌj ti' u takik a winik.

Jesús ku ch'ensik a wich ka'to' xi'ra a lʌji' muj yik u bero'

29Kaj jok'i Jesús ix u kʌjta Jericó yete u kʌ'sa winik, ne pim winik tu t'u'ra u pach. 30Ka'to' xi'ra a muj yik u ber kurukbʌjo' tu xur u beri, ka tu yuo' tʌn u mʌn Jesús tita, abotno':

—¡Ts'uri, u ti'a a David, k'ʌs ch'ae otsi teno'! 31A winik tu k'eya a ka'to' xi'ra ti' u mʌkik u chio', chen a tio' más k'ʌ'm abotno':

—¡Ts'uri, u ti'a David, k'ʌs ch'ae otsi teno'!

32Kaj xu'rij Jesús, tu pʌya a ka'to' xi'ra y tu k'ata tio':

—¿Baiki a k'ate'x in metik teche'x? 33A tio' nuko':

—Ts'uri, in k'ato' a ch'ensik in wicho' tin ka' iko' in ber. 34Jesús tu ch'a otsi tio', ka tu tʌra u wicho' y je'chʌ' u wicho' se'p' y pachi tu t'u'ro' u pach a Jesús.

Currently Selected:

San Mateo 20: PLacNaha

Highlight

Copy