San Mateo 17

Jesús ku waysik u bʌj

(Mr. 9.2-13; Lc. 9.28-36)

1Kaj mʌni seis u k'ini, Jesús tu pʌya a Pedro, a Jacobo y a yete Juan a lʌji' u bojo' a Jacobo, ij bino' ja'ri' tio', ix u jo' wits tu ne kʌ'nʌ. 2Y tita tu wich u kʌ'sa winiko' tu waysa' u bʌj a Jesús. U wich bix u tichk'a a k'in y u nok' wayi ne jach k'ux sʌk bex a kip'. 3Pachi tu yiro' a Moisés y a Elías tʌn u tsikbo' yete a Jesús.

4Pedro kaj u ya'ti' a Jesús:

―Ts'uri, ¡boj tsoyi ti teno' tu tio' way! Wo a k'at bi meto' oxp'e pʌsa, jump'e ti tech, jump'e ti' a Moisés y jump'e ti' a Elías.

5Tuk'in a Pedro xuri' tʌn u t'ʌn, lʌji' kaj tari jump'e muya ne sasi y toj tij xu'ri tu tio', y toj yok'o a muya jok'i jump'e t'ʌn, tʌn u yei'k: «A je' lʌji' in Ti'a a jach otsi wirik, a mok ten tin tejta, jach ki ue'x u t'ʌn.»

6Ka' tu yuo' bex u kʌ'sa winik, tu xonkunto' u bʌjo' hasta cheri u wicho' ix lu'm, y jach ne tu sʌjto'. 7Jesús xok'i tio', y tu tʌra, ka tu ya'a:

—Lik'ene'x, ma' sʌjtike'x.

8Toj kaj lik'o y tu pʌkto', ya mix mok tu yiro', toj jari tu juni' a Jesús.

9Pachi ka tʌn u yensko' a wits, Jesús tu ya'tio' u kʌ'sa winiko':

—Ma' bine'x a wa'ex ti' mix mok a ba' ta wire'x, hasta ka lik'ik tu ka' kuxta u Ti'a Xi'ra.

10U kʌ'sa winiki' a Jesús tu k'ato' ti':

―¿Biken ku yei'ko' a ku kʌ'sko' u t'ʌn K'uj a toj u ts'ibtamʌ a Moisés uchik lʌji' pʌti ku bi yʌ tar a Elías?

11Jesús tu nuka tio':

―Jax to jʌy, a Elías lʌji' ku bi yʌn tar pʌti y lʌji' ku laj bin u ki' uts'kintik a ba'. 12Chen a ten ki wei'k teche'x, a Elías to yaj tari, y mo tu k'o'oto', ij meta' ti' tu woro a ba' u k'at meta' ti'. Bexi' ku bij mʌn ti' u Ti'a Xi'ra y ne yaj ba' ku bin u mʌse.

13U kʌ'sa winiko' tu yuo' u nu'ku a ba ku yei'k a Jesús, a Jesús lʌji' ku yei'k a Juan a ku but'ik ja' a winik.

Jesús ku ch'ensik a meje xi'ra a akʌ' kisin tu yok'o

(Mr. 9.14-29; Lc. 9.37-43)

14Kaj k'ucho' tu nikʌ' a winiko', xok'i junturi' xi'ra ti' a Jesús, y tu xonkitubʌj ti' Jesús y tu ya'ti':

15―Ts'uri, ch'ae otsi ti' in ti'a, a ti' mo' uts, ne ku p'uju u ya'ji y ne yap' wʌts' tuk'in ku p'uju u ya'ji, ku lubu ix ja' o yok'o k'ak'. 16Y tin tasa ti' a kʌ'sa winiko', chen mo' k'uchu y muk'o u ch'ensik.

17Jesús tu nuka ti': —¡Teche'x toj mo' ta ki aksa ta worex ti' ten y mʌnʌ' a tuke'x! ¿Hasta tuk'in yʌn ti' in muk'tike'x y yʌnti' p'ata yete teche'x?

Lʌji' a Jesús kaj u ya'ti' u tet a chijʌntʌ a xi'ra:

—Tase ten way a ti'a.

18Lʌji' a Jesús ka tu jara a kisin a akʌ' ti' a meje xi'ra, ij p'ati ne uts a lay u k'ini.

19Pachi u kʌ'sa winiko' a Jesús tu pʌya tu juna a Jesús y tu k'ato' ti':

—¿Biken a teno' moj k'uchi in muk'o in jarik a kisin a akʌ' ti' a meje xi'ra?

20Jesús tu ya'a:

—Yok'o tuj maj ki' akse'x ta wor ti' K'uj. Jach taj kin wei'k teche'x tak chichin a waksike'x ta wore'x ti' K'uj a bex u mijini u nek' a mostaza, toj jea' wei'k ti' a je' a wits: “K'uya a bʌj y xen tu jer lu'm” y a wits jeu k'uyik u bʌj, tu woro a ba' a ka wirke'x mo' bik u metchʌ jeu laj metchʌ ti' teche'x. 21A je' a kisin toj ja'ri' ka bin a jare'x yete ne yap' u t'ʌna' K'uj y u muk'ta jʌnʌ a bex ku ya'ba ti' ayuno.

Jesús ku ka' ei'k u kimi

(Mr. 9.30-32; Lc. 9.43-45)

22Tuk'in tʌn mʌn Jesús yete u kʌ'sa winik yok'o u lu'mi Galilea, Jesús tu ya'a:

―U Ti'a Xi'ra binukaj k'uba ti' a winiko', 23y binukaj kinsa', chen ka' mʌnʌk oxp'e k'in jeu ka' lik'i tu ka' kuxta.

U kʌ'sa winiko' a Jesús ne tu tukro' u bʌjo' a tu tu ya'a bex a Jesús.

U k'ata u bo'ri a ba' ti' u yatoch K'uj

24Tuk'in a Jesús yete u kʌ'sa winik k'ucho' ix Capernaum, a winiko' a moko' ku k'atko' u bo'ri u ba' u bojo' ti' u nʌji K'uj, bino' ti' a Pedro y tu k'ato' ti':

—¿A wʌjkʌ'si muj bo'tik u ba' ti' u nʌji K'uj?

25—Ku bo'tik— tu nuka a Pedro.

Y kaj oki a Pedro ix nʌj, Jesús tu yʌ t'ʌna y tu ya'ti':

—¿Tech bik ka wei'k Pedro? ¿Ti' mok ku k'atko' u bo'ri u ba' au wesio' a lu'm? ¿Ti' u winikio' o ti' a winiko' au tar u jer kʌjta?

26Pedro tu nuka:

—Ti' a winiko' au tar u jer kʌjta.

Jesús tu ya'a:

—Bein u winikio' mo' sik u bo'tik u bo'ri u bao' ka wirik toj u winikio', 27Chen ti' mu' ts'iko', xen ix a peta', pure a luts y a kʌy a ka bin a yʌ jare, yok'o u jor u kar ka bin a wire jump'ei' chixtak'in, toj a lay ku bij ki' chukbʌ ti' a bo'tik u bo'ri in ba' y ti' a tech. Ch'ae a lay a tak'in y bo'te tio'.

Currently Selected:

San Mateo 17: PLacNaha

Highlight

Copy