San Lucas 24

Kaj lik'i Jesús tu kimen

(Mt. 28.1-10; Mr. 16.1-8; Jn. 20.1-10)

1U yʌjchuni u k'ini a semana#24.1 U yʌjchuni u k'ini a semana La' domingo, jach nejats'ka', a ch'upra bino' tu but'a u bake Jesús, yete a ki' u bok a tu meto' y yete u jer a ch'uprao'. 2Kaj k'ucho', tu yiro' a nukuch tunich a tu mʌkʌ' u jor tu but'a u bʌk'e a Jesús. 3Kaj oko', mo' tu yiro' u bʌk'e a Jesús. 4A ch'upra jach jak'u u yor ka tu yiro' mʌnʌ' u bʌk'e Jesús, y tu yiro' yʌn ka'to' xi'ra tu xax y u nok' k'ux sʌk y ne cha'a. 5A ch'upra jak'i u yoro', y se'p' tu yenso' u wicho'; kaj a'bitio':

—¿Biken tʌn a kʌxtike'x yok'o kimen a mok toj kuxʌ'? 6Ma' ti' yʌn wai beje' chen toj lik'i tu ka' kuxta, k'ʌjkunte'x a ba' tu ya'a teche'x, a tuk'in ti' yʌne'x ix u lu'mi Galilea 7Ka tu ya'a: U Ti'a Xi'ra yʌn u k'uba' ti' a winik jach k'as u tuku, ti' u bʌja' ix cruz y oxp'e k'in ku ka' bij lik'i tu kuxta.

8A ch'uprao' kaj k'ajiti' ti' a ba' tu ya'a Jesús. 9Kaj sutbʌjo' tu but'a u bake Jesús, bino' tu yʌn a once u kʌ'sa winiko' Jesús y yete a laj ti tita, tu yao' ti' a ba' tu yiro'. 10Lʌji', María Magdalena, yete Juana, yete María u nʌ' Jacob, yete u jer ch'upra, lʌji' tu ya'tio' tu woro a je' a ba' tu yiro' ti' a apóstoles. 11Chen u kʌ'sa winiko' muj tu ch'ao' a ku ya'ti' ten a ch'uprao', ku tukrik a ba' ku yei'k a ch'uprao' mo' tu jay ku yei'ko'.

12A Pedro se'p' kaj lik'i, kaj u k'ʌnaj u yaka' ij bin u yire tu but'a u bʌk'e a Jesús. Kaj k'uchi u ch'e'te, tu yiraj toj ja'ri' u nok'i tu tap'ʌ' u bʌk'e tiʌ, ij sutpʌji ix nʌj y nej peknʌ u yor a tu tu yira a ba'.

Yok'o u beri Emaús

(Mr. 16.12-13)

13Lʌji' u k'ini, ka'to' u kʌ'sa winiko' Jesús, tʌn u bino' yok'o u beri u kʌjta Emaús, yʌn once kilómetros u nʌchi ti' u kʌjta Jerusalén. 14Tʌn u tsikba yete u bojo' tu ku bino' ix bej. Tʌn u tsikbʌtiko' a ba' mʌni. 15Tuk'in tʌn u tsikbo' y mu' ket u yor a ba' ku yei'ko', Jesús xok'i tio', ij ket bini yeto'. 16U kʌ'sa winiko', tap'o' u wich ti mu' k'oo'tik a Jesús. 17Jesús tu ya'a tio':

—¿Baiki ka tsikbʌtik tʌn a bine'x ix bej? Y ¿Biken mo' tsoy a worex?

18Tu nuka junturi' u k'aba' Cleofás:

—¿Toj jari tech a tar u jer kʌjta a tiʌ ix Jerusalén, mu yue a baij mʌni yok'o a je' u k'inio'?

19Jesús tu k'ata:

—¿Baij mʌni?

Ka tu ya'o':

—A ba' meta ti' Jesús a lʌji' u profeta Nazaret, a ti' tu woro a winik y ti K'uj, a Jesús ne chich u muk' tuk'in ku ye'sik ba' y ku jach tsikba. 20Y bik u t'ojio' a moko' ku meajo' yok'o u yatoch K'uj, yete u jach ts'urio' u kʌjta, bik tu k'ubo' a Jesús ti' u kinsa' y ti' u bʌja' 21Y a to' tak tukra wo lʌji' ku bin u tako' ti u kʌjta Israel, chen beje' yʌn oxp'e k'in tu laj mʌni tu woro a je' a ba'. 22Chen yʌn jujunto' a ch'upra a tiʌ yete to', tu jach ts'a u peknʌ in woro', tu bini ja'ts'ka' ix mukra. 23Kaj k'ucho' y muj yiro' u bʌk'e kaj sutbʌjo' ix nʌj y tu tsikbʌta ti' teno' bik tu yiki a ángeles y tu ya'tio', kuxʌ' a Jesús. 24Chen jujunto' ak bojo' kaj bino' u yiro' tu but'a u bʌk'e Jesús Kaj yiro' taj a ba' ya'a a ch'upra, chen ma' tu yiro' u bʌk'e a Jesús.

25Jesús kaj ya'ti':

—¡Mʌnʌ' a tuke'x teche'x, jach ne omo' ka waksike'x ta wor a ba' tu ya'a a profetas uchik! 26¿Mo' toj yʌnti' u yʌn mʌsik a Cristo u muk' yaj, ti' u jach ira' jach tsoy?

27Pachi a Jesús chu'mpʌ u ki kʌ'sik yok'o u tʌn a K'uj tuj a'bi baiki yʌnti' u mʌsik, tij chu'mpʌ to' u ju'un a Moisés hasta ch'ik u ju'un a profetas.

28Kaj k'ucho' to u kʌjta winik a to'o tu ku bino', a Jesús tu tus meta, a ti k'ʌs nʌch ku bin. 29Chen u kʌ'sa winiko' kaj u chich ya'a ti' u p'ata, tu ya tʌn u yak'ʌchʌ:

—P'aten yete to', taba u bin k'in, y binukaj ak'ʌ'chʌ.

La'jen a Jesús p'ati yete tio'. 30Y pachi kaj kuro' tu jʌno'. Jesús tu chuka aj pʌn kaj ya'ti' K'uj: Baij tech K'uj Kaj u xat'a y tu t'axa tio'. 31Y t'upti' jomo u yirik y tu ki iro', chen ti' sa'ti tu yikno'. 32Kaj u ya'a, ti' u ka' bojo':

—¿Mo' toj tʌn ak tar yok'o bej tʌn u kʌ'sko' u tʌn K'uj y tak u'a yʌn p'is k'ak' yok'o ak pixʌn?

33Toj se'p' kaj lik'o sut ix Jerusalén y kaj k'ucho' tu yira a once u kʌ'sa winiko' ket tio', y yete u bojo'. 34Ka tu ya'a tio':

—Jach taj ak Ts'uri jach ka' lik' tu kuxta y tu ye'sa u bʌj ti' Simón.

35Y a tio' chu'mpʌ u tsikbʌtik a ba' tu yiro' ix bej, y bik tu k'otko' a Jesús, ka tu xat'a aj pʌn.

Jesús ku ye'sik u bʌj ti' u kʌ'sa winiko'

(Mt. 28.16-20; Mr. 16.14-18; Jn. 20.19-23)

36Ti' toj ku tsikbatik a ba' tu yiro', kaj jok'i a Jesús chumuk tu yʌno' u kʌ'sa winiko', y tu ya'a:

—Ka tsoyta a wore'x ten K'uj.

37Chen u kʌ'sa winiko' jach ja'k'i u yoro' y nej pekno' u yoro', y ku tukriko' tu yiro' u pixʌn winik. 38Jesús ka tu ya'a:

—¿Biken sajake'x? ¿Biken kaj tukrike'x ta pixane'x mok, a je'? 39Ire'x a wire'x in k'ʌ' yete in wok, ti' a wirik jach ten, tare'x y ire'x: u pixʌn a kimen mʌnʌ' u bʌk'e mix u bake, bex ka wike'x a ten laj yʌnten.

40Kaj ts'o'k u yei'k, kaj u ye'sa u k'ʌ' y yete u k'ʌ'. 41Y a tio' muj jach ki ch'eik u t'ʌn, tu ne jach k'ux tsoy u yor y tu peknʌ y yor tu tu yira, a Jesús tu k'ata:

—¿Yʌn wa a wo'che'x wai?

42Y tu ts'ao' ti' u xet'e kʌy yete ka'p. 43Jesús kaj u chuka u jʌnta, ʌkʌtʌn tu yʌno'. 44Jesús tu ya'tio':

—A je' lʌji' a ba' a tin wa'a teche'x, a tuk'in ti' yʌnen yete teche'x, a yʌn ti u laj nupsik tu woro a ba' ti' ts'ibʌ' ix u t'ʌn Moisés, bexi' a ba' ti' ts'ibʌ' ix u t'ʌn profetas. Y a ts'ibʌ' ix u t'ʌn salmos.

45Y tu ts'a ti' u tuko', ti' u jach ki' uiko' a ba' ts'ibʌ' ix u t'ʌn K'uj. 46Jesús tu ya'tio':

—Bex ts'ibʌ' a Mesías yʌnti' u kimi y ku ka' lik'i kuxta oxp'e k'in. 47Y ch'ik tu woro u kʌjta, ku bin tsikbʌta u t'ʌn ti' u suto' ti K'uj, y ti ku sa'sik a k'ebʌn, y ti' ku chu'mpʌ ix Jerusalén. 48Teche'x yʌnti' a tsikbʌtik a ba' ta wire'x. 49Y ten je' in tuchi'tik teche'x a ba' tu toj a'a K'uj, chen a beje' wai ka bij p'ata ix u kʌjta Jerusalén, hasta ka ch'eik u muk' K'uj a tiʌ kʌ'.

Jesús ku bini ix kʌ'

(Mr. 16.19-20)

50Jesús tu pura u kʌ'sa winiko' ix xur u kʌjta Betania, y ka' tu tich'a u k'ʌ', ka tu k'ata ti' K'uj ti u kʌnʌnta K'uj u kʌ'sa winko'. 51Kaj ts'o'k u t'ʌnik K'uj tio' lʌji' kaj ch'a'bi ix kʌ'. 52U kʌ'sa winiko', kaj ts'ok u yei'ko' tsoy ba' ti', lʌji' kaj jok'o' y bino' ix Jerusalén y ne jach tsoy u yoro'. 53Y tu woro k'in ti' yʌno' ix u yatoch K'uj, tu ku yei'ko' jach ne tsoy K'uj. Amén.

Currently Selected:

San Lucas 24: PLacNaha

Highlight

Copy