San Lucas 10

Jesús ku tuchi'tik setenta a bex u kʌ'sa winik

1Pachi a Jesús tu tejta setenta u kʌ'sa winiko' y tu tuchi'ta ka'p'e ka'p'e pʌti, yok'o tu woro u lu'mi tuku bij mʌn.

2Jesús tu ya'tio': «Jach ne ya'p nʌr yʌn ti' u jak'a chen mo ya'p a mok ku meaj, bein a'e'x ti' a mok u winki a kor ti' u kʌxtik más winik ti' u meaj. 3Ki tuchit'ke'x, bex ku tuchi'ta' aj choj me' yok'o tu ne yʌn a u pek'i k'ax. 4Ma' ch'eike'x ba'i, mix poxa mix xʌnʌ' y mix mok ka t'ʌnke'x yok'o bej. 5Tu ka woke'x yok'o nʌj, yʌ a'e'x: “Tsoykinta wore'x yok'o a je' a nʌj.” 6Wa mok yʌn tita ne ku tsoy tu yor, jeu tsoyta u yor a tu ta wa tsoy ba', wa mʌnʌ' ti ku ka' sut ti tech. 7Y p'atene'x yok'o a lay a nʌj, ki jʌne'x y uk'e'x a ku ts'aba teche'x, a mok ku meaj jach tsoy u bo'ta' u bo'ri u meaj y ma' mʌne'x ne ya'p nʌj. 8Tu woro a kʌjta tu ka mʌne'x y tsoy u yirik a woke'x, jʌnte'x a ba' ku ts'aba a teche'x. 9Ch'ense'x a mok mo' uts tita y a'e'x ti': “A tu ku wesintik K'uj a tiʌ kʌ' xok'i ti' teche'x.” 10Chen wa ka woke'x yok'o jump'e kʌjta y mo' tsoy u yirik a woke'x, jok'ene'x yok'o u bej y a'e'x: 11“¡Hasta u lu'mi a kʌjte'x a to'o nich'i yok'o in woko', ki titik teche'x ti' a wirke'x mo' tsoy ba' ta mete'x! Chen toj ki ete'x, tu ku wesintik K'uj a tiʌ kʌ' yaj xok'i ti teche'x.” 12Kin jach ei'k teche'x a bex mʌni ti Sodoma, a je' a kʌjta jach más ne yaj ku bin u yue u bo'tik a si'pi ka' k'uchuk u k'ini u bo'tik,

A winik a muj ch'ei'ko' u t'ʌn K'uj

(Mt. 11.20-24)

13»¡Jach yaj ba' ka bin a wue'x, u winki Corazín! ¡Jach yaj ba' ka bin a wue'x, u winki Betsaida! Wa ix u kʌjta Tiro o ix Sidón in we'se in metik tsoy ba' yete u muk' K'uj, toj ne uch tu suto' u t'ʌno' ti K'uj y tu tʌko' u nok'o' a ts'ab y tu puro' u tʌ'ni k'ak' ix u jo'o. 14Chen ka k'uchuk u k'ini u bo'ta' si'pi, a bex mʌni ti Tiro y Sidón, teche'x más ne yaj ka bin a wue'x. 15Y tech Capernaum, ¿ka tukrik jeu bise'x in kʌ'? Toj mʌnʌ', to jay ch'ik tu tʌmi ix k'ak' ka bij ensa'.

16»A mok ku yui'ke'x, ten ku yui'k in t'ʌn y a mok mu' k'at u yui'k a t'ʌne'x, ten muj k'at u yui'k in t'ʌn y mok mu' k'at u yui'k in t'ʌn lʌji' mu' k'at u yui'k u t'ʌn a mok tu tuchi'ten.»

Kaj suto' a setenta winik

17Suto' a setenta u kʌ'sa winik a Jesús y tu yao':

—Ts'uri, A kisin ku yui'k in t'ʌno' tuk'in ki wei'k a k'aba'.

18Jesús tu ya'tio':

—Ten tin wira a kisin au k'aba' Satanás u jutu yok'o kʌ' bex u jats' a k'uj. 19Ten tin ts'a a muk'e'x ti mu' kʌxmetike'x aj loch a kʌn y ti a chesik u muk' a kisin y mix ba' ku bin u kʌxmete'x. 20Chen ma' tsoykintik a wore'x tu ka wirke'x ku yui'k a t'ʌne'x a kisin, tsoykinta wore'x tu ts'ibʌ' a k'abae'x yok'o u ju'ni a tiʌ kʌ'.

Jesús tsoyji u yor

(Mt. 11.25-27; 13.16-17)

21Lʌji' u k'ini kaj jach tsoykinta u yor Jesús ten u Pixʌn K'uj, Jesús tu ya'ti' K'uj: «In tetech, ten kin k'ʌykech, tech lʌji' u Ts'uri a kʌ' y a lu'm, ta ta'ka tu woro a je' a ba' ti a mok ne u yue y se'p' ku k'ʌnik ba' y ta we'sa ti' a cho mejeno', tu bex tsoy ta wira.

22»Tu woro a ba' tu ts'aten in Tet y mix mok u k'omʌ u Ti'a toj ja'ri' u k'omʌ u Tet y mix mok u k'omʌ u Tet toj ja'ri' u k'o'mo' u Ti'a y jari u Ti'a ku ye'sik a mok poch u ye'sik ti' u k'o'ota u tet.»

23Kaj p'ati Jesús ja'ri' yete u kʌ'sa winiko', ja'ri' tio' tu ya'tio': «Ku jach bin tsoy u yoro' a mok ku yirik a ba' a bex teche'x ka wirke'x, 24Kin wei'k teche'x ne pim a bex lʌji' a profetas y a bex aj wes poch u yire a ba' ta wire'x y u yui'k a ba' ta wue'x, chen mo' tu yuo'.»

A samaritano a tsoy u tuku

25Junturi' a mok lʌji' a ku kʌ'sik u t'ʌn Moisés a toj ts'ibʌ' uchik, xok'i u ya'e ti' Jesús bex, ti' u tuntik u yor:

—Wʌjkʌ'si, ¿a'e ten baiki bin in metik ti' u ts'ekten ix kuxta K'uj y mʌnʌ' yʌn kimi?

26Tu nuka Jesús:

—¿Baij ts'ibʌ' yok'o u t'ʌn K'uj? ¿Baij ka xakik tita?

27A ku kʌ'sa tu nuka:

—“Yʌnti' a yakuntik a Ts'uri a K'uj yete tu woro a pixʌn yete tu woro a wor, yete tu woro a muk' y yete tu woro a tuku” y “yʌnti' u yakuntik a bojo' bex tech ka yakuntik a bʌj.”

28Y tu ya'a Jesús:

—Jach taj a ba' ta nuka. Wa ka metik je'e a kuxta.

29Chen ti mo' jach tsoychʌ u yor tuj nuka ti' bex ten a Jesús, ben tu k'ata ti' a Jesús:

—¿To bay in bojo' a yʌn ti' in yakuntik?

30Tu nuka Jesús:

—Junturi' xi'ra tij jok'i ix Jerusalén y tʌn u bin ix Jericó chen yok'o u beri, tij akra' u ba' bex ten a ku yakriko' ba' y laj taka' u ba', jʌts'a' y p'is kimen p'ʌta'. 31Y tita mʌni a mok ku meaj yok'o u yatoch K'uj, chen ka tu yira a xi'ra to jay tu xoyta ij bini. 32Bexi' mʌni junturi' levita tu cha' a xi'ra, chen bexi' ka tu yira to jay tu xoyta ij bini. 33Chen bexi' mʌni junturi' xi'ra ti' u tar u winki Samaria y ka tu yira tu ch'a otsi ti'. 34Lʌji' kaj xok'i ti a xi'ra, tu laj tap'a ti' tuj jʌts'a' y tu cho'a ti' tsats y a u ya'ri ts'us pachi tu nʌ'sa yok'o u tsimin y tu bisa yok'o nʌj y tita tu kʌnʌnta. 35Kaj k'uchi u jer k'in, a samaritano tu jara u tak'in bex u ya'p'i bex ka'p'e k'in u bo'ri u meaj a winik, y tu bo'ta a ku kʌnʌntik a nʌj y tu ya'ti': “Kʌnʌnte ten a je' a xi'ra y tu woro a ba' a ka bin a xupe wa moj chukbʌ a bex tin bo'ta, jei bo'tik ka sutken tu woro a p'ata.” 36¿Moki tu yoxtoi' jach tu ye'sa ti aj akra u ba' ten a ku yakra ba', jach otsi u yirik u bojo'?

37Y tu nuka a mok lʌji' a ku kʌ'sik u t'ʌn Moisés a toj ts'ibʌ' uchik:

—A mok tu ch'a otsi ti' a lay a xi'ra.

Jesús tu ya'ti':

—Bexi' tech, xen a mete bex.

Jesús ku bin u ch'e'te a Marta y a María

38Ka tʌn u bin a Jesús, mʌni yok'o jump'e meje kʌjta y tita junturi' ch'upra u k'aba' marta tu yaksa tu yatoch. 39A Marta yʌn u yits'in, u k'aba' María, a lʌji' bij kuta tu xax a Jesús ti' u ki ch'extik u tsikba. 40Chen Marta ku tukrik jach ya'p u meaj y xok'i ti a Jesús y tu ya'ti':

—Ts'uri, ¿Maj tukrik toj jay ten tʌn in metik tu woro a ba' y in U ch'upra in bojo' mix ku yʌntiken? A'e ti' u yʌntiken.

41Chen Jesús tu nuka ti':

—Marta, Marta, toj jai' a meaj ka tukrik ne ya'p, bein ne ka tukrik a bʌj. 42Chen jai' jump'e ba' más ne tsoy y a María lʌji' tu tejta y mix mok ku bin u take ti'.

Currently Selected:

San Lucas 10: PLacNaha

Highlight

Copy