S. Juan 20

Kaj ka' kuxrʌ a Jesús

(Mt. 28.1-10; Mr. 16.1-8; Lc. 24.1-12)

1Ne ja'ts'ka' u yʌjchuni u k'ini a semana, María Magdalena bini yok'o u mukra a Jesús tuk'in ti'tʌ ak'bi, tu yira juts'ʌ' a tunich a tu mʌkʌ' u jor u mukra a Jesús. 2Y lʌji' kaj lik'i u k'ʌnuyaka ij bini tu tiʌ a Simón Pedro y u jer u kʌ'sa winik a Jesús a to'o a Jesús ne otsi u yi'ri, y tu ya'tio':

—¡Tu ch'ao' u bʌk'e a Jesús yok'o u mukra, y mok ej tuba tu puro'!

3Pedro y u jer u kʌ'sa winik a Jesús, bino' yok'o u mukra a Jesús. 4K'ʌni' akʌ' u bin tu ka'to', chen a juntu u kʌ'sa winik a Jesús más chich u yaka' y lʌji' yʌ k'uchi pʌti y pachi a Pedro. 5Tu p'uxubʌ u chʌ'te, y tu yira tiʌ tita a nok' chen moj oki. 6Pachi kaj k'uchi a Simón Pedro, oki yok'o u mukra y bexi' ti' tu yira u nok', 7y tu yira a nok' a tu tu tap'o' u jo' a Jesús, mo' ket charik yete a yʌno' a nok', a lay wuts'ʌ' y nʌch chakuntʌ'. 8Pachi oki u jer u kʌ'sa winik a Jesús a to'o yʌ kuchi u yaj chuni, ka tu yira a ba' mʌni, lʌji' ka tu jach ch'a a tʌn. 9Tu mu jach ki' k'omʌ a ba' ts'ibʌ' yok'o u t'ʌn K'uj, a ku yei'k yʌnti' u ka' kuxta. 10Pachi a layo' u kʌ'sa winik a Jesús suto' ix u yatocho'.

A Jesús ku ye'sik u bʌj ti' a María Magdalena

(Mr. 16.9-11)

11A María tij p'ati jaknʌki xok'o yok'o u mukra a Jesús, y ok'uka' ka' tu chʌ'ta ichi yok'o u mukra. 12Y tu yira kato' ángeles y ne sʌk u nok'o', kurukbo' tita tu tiʌ ka'chik u bʌk'e a Jesús, juntu tuj chari u jo' a Jesús y juntu to u yok. 13U k'ʌni' K'uj a bex ti' kʌ', tu k'ato' ti':

—Ch'upra, ¿biken ka wok'o?

A ch'upra tu ya'a:

—Ch'a'bi in Ts'uri, y mi' we tuba tu puro'.

14Kaj ts'ok u t'ʌn, tu suta u bʌj y yira tiʌ tita a Jesús, chen mo tu yʌ k'o'ota moki. 15A Jesús tu k'ata ti':

—Ch'upra, ¿biken ka wok'o? ¿Mok ka kʌxtik?

A ti' ku tukrik lʌji' moki a ku kʌnʌntik u lu'm a tu laj pʌk'a tu woro ba' tak che'i, y ti' tu ya'a:

—Ts'uri, wo tech ta ch'a, k'ʌs a'ten tuba ta pura ti in bin in ch'ae. 16Jesús tu ya'ti':

—¡María!

A María tu sutaj u bʌj, ka tu ya'a ix t'ʌni hebreo:

—¡Raboni! (A lʌji' u nu'ku: «Wʌjkʌ'si»)

17A Jesús tu ya'ti':

—Ma' chujken, ka wirik mo'tey xi'ken in much'e in bʌj yete in Tet. Chen xen a laj a'ti', ti' in bojo', a ten ya binika' in much'e in bʌj yete in Tet y a lʌji' a Tete'x bexi' y in K'uj ten y a lʌji' bexi' teche'x a K'uj.

18A María Magdalena bini y tu laj a'a, ti' tu woro u kʌ'sa winiko' a Jesús, a ti' tu yira a Jesús y bexi' tu laj tsikbʌta tio' baij tu ya'a.

A Jesús ku ye'sik u bʌj ti u kʌ'sa winiko'

(Mt. 28.16-20; Mr. 16.14-18; Lc. 24.36-49)

19Kaj k'uchi a ak'ʌ' lʌiti' u k'ini u yʌj chuni a semana, u kʌ'sa winiko' a Jesús tu much'a u bʌjo' yok'o jump'e nʌj, chen u ki mek'bo' u jor tu sajko' ti' u t'ojio' a judíos, Jesús oki tu tio' ij bini tu chumuk tu tio' y tu ya'tio':

—Ki jach tsoykinte a wore'x

20Ka tu ya'a a je', tu ye'sa u k'ʌ' y u ch'ʌrai, y u kʌ'sa winiko' nej tsoyji u yoro' u yirko' a Jesús. 21Pachi a Jesús tu ka' a'a:

—¡Ki jach tsoykinte a wore'x!, Bex ten tu tuchi'ten ak Tet, bexi' ten kin tuchit'ke'x.

22Pachi tu yusta yok'o tio' y tu ya'a:

—Chae'x u pixʌn K'uj. 23A mok teche'x ka sa'sik u si'pi, ku laj bin sa'sa' ti', y a mok maj sa'sik tio', mʌnʌ' u sa'sa' tio'.

Tomás ku yirik a Jesús ka' kuxraji

24A Tomás a lʌji' lʌiti' a tiʌ yok'o a doce u apóstoles a Jesús, a to'o ku ya'bati' Gemelo, mo' tio' yete tio' kaj k'uchi a Jesús. 25Pachi u jero' u kʌ'sa winiko' a Jesús tu yao' ti':

—Tin wiro' ak Ts'uri.

Chen a Tomás tu nuka tio':

—Wo mij wirik u k'ʌ' tuj bʌja' y mij but'ik in tuch'u' tita y bexi' wo mij but'ik in k'ʌ' tu ch'ʌrai mʌnʌ' jach ch'eik a t'ʌne'x.

26Mʌni ocho k'in y u kʌ'sa winiko' a Jesús, tu ka' much'a u bʌjo' yok'o jump'e nʌj, chen a beje' tiʌ a Tomás. Y laj mʌkʌ' u joro' tu tio', chen a Jesús oki, bini tu chumuki tu tio' y tu laj t'ʌna, ka tu ya'a:

—¡Ki' tsoykinte a wore'x!

27Pachi tu ya'ti' a Tomás:

—But'e a tuch'u' way, y chʌ'te in k'ʌ', xokse a k'ʌ' y but'e tin ch'ʌrai. Jach ch'ae t'ʌn, y maj jach metik a bʌj maj ch'eik t'ʌn.

28A Tomás tu nuka:

—Techech in Ts'uri, y in K'uj.

29A Jesús tu ya'a:

—¿Ka ch'eik t'ʌn tu ta wiren? ¡Ku jach bij tsoy ta u yor a mok ku ch'eik t'ʌn tak muj yiken!

Lʌji' yok'o tu meta a je' a ju'un

30Jesús tu meta más ne ya'p ba' jach tsoy tu yiknʌ u kʌ'sa winiko', a to'o mo' ts'ibʌ' yok'o a je' a ju'un. 31Chen a je' a ju'un ts'ibta ti' a ch'eik u t'ʌn a Jesús a lʌji' a Mesías, u Ti'a K'uj, y a mok ku ch'eik u t'ʌn jeu yik u kuxta yok'o ti' a Jesús.

Currently Selected:

S. Juan 20: PLacNaha

Highlight

Copy