Luuka 7
7
Yisu mibelooso musalili a mukuutu a kama li masadaadu
Mataayi 8.5-13; Yowani 4.46-54
1Bu Yisu hamani uleele mambu mo manima mosi huli baatu ba baababaadiinga nde, nde ayeni hu musyenge a Kapernahumi. 2Huuna, hwaba na mukuutu a kama li masadaadu, wu aba na musalili mumosi wu nde haba hatondo. Musalili mowuuna abeedi na ubeele hwa ŋa pedu lipfu. 3Bu nde hayuhi tsangu a Yisu, nde atsindihi mwana kabu li bakuutu ba Bayudaayo, mana bayalembesene nde mu uyabeeloso musalili a nde. 4Bo baayato ŋa hwaba Yisu, baayayini nde: «Ufwani ti ni we uva bahala moli likumbasa, 5mu toni ati, nde atondo tsi a bisu. Nde ni wu atunga nzo a bisu yi lisambulu.»
6Yisu ayeni na bo. Bu bo batoodi bebele na nzo mukuutu mo, nde atsindihi bambaahi ba nde huli Yisu mu uleele nde: «Pfumu, amono nzuhu ve mu toni ati, me andi wakuha ti we koto mu nzo a me ve. 7Ni mu buuna, me wu aveleyelemene pelinza me mwakulu mu uyamonehele na we. Ka leele dyambu limosi, na musalili a me sa abeeloho. 8Mu toni ati, me mwakulu ndi hu tsina lituma li bakuutu ba me. Ka me kaka na masadaadu hutso lituma la me, na me undeele huli mumosi mu bo: “Yene!” — Na nde yeni. Na huli mukima: “Yanga!” — Na nde yidi. Huli muviha a me, me undele: “Sa bu!” — Na nde siidi.»
9Yisu ayuha mambu momaana, nde asilisi mukuutu masadaadu. Nde akinguhi huli konge yi yakaduukala nde, na aleeli: «Me ndeele benu, tso hu Isereli, me a hamoni imiinu hya pila moyi ve.» 10Bambaahi ba mukuutu bafutihi hu nzo a nde, na baayabiisa musalili a nde amiibeeloho.
Yisu asuuli mu lipfu mwana mukwili wu mukaasu hu Nayini
11Ilumbu hi hyaduuki, Yisu ayeni hu musyenge wa nduhi Nayini. Bayihi ba nde na konge yinene baakayene na nde mu nzila. 12Bu nde hatoodi bebele na musyenge, nde abwani konge a baatu yi yakayadiiha mwana mukwili. Mwana mo aba livingu la bahala. Bisu bula babalahi baakaduukala ngu a mwana.
13Pfumu amoni mukwili na aluuli mu lingebe mu nde, na aleeli: «Nyaha ubwe lila!» 14Titswene, nde ayasusaha na abembi kasu. Ba baakabita yo baatsikimi. Nde aleeli: «Mufudu mbahala! Me tumi we, teleme!» 15Na mwana wu akwa atsahili, abaandihi utoyo. Yisu afutili nde huli ngu a nde. 16Bu baatu baamoni maana, boosi baakiinzi na bayusi Nzambi. Bo baakaleele: «Mumbihuli wu munene mimonele ŋa hati la bisu. Nzambi miyakumbasa baatu ba nde.» 17Musamu mowunuwu atsaamuhi itanzi hya Yuda hyosi, nate mu mala ma ibiingi hina hyosi.
Yowani Mutondihi li mu ufuula hyuhu huli Yisu
Mataayi 11.2-6
18Bayihi ba Yowani ba yabisi nde moosi ma makavyoho. Yowani ni uteele boole ŋa hati la bo. 19Nde ni utsindaha bo huli Pfumu mu ufula: «We ni Masiya wafwana uya, vo bisu lafwana ukeele mukima?»
20Bo bato huli Yisu, bo ni uleele nde: «Yowani Mutondihi mitsindaha bisu huli we mu ufuula we bu, “We ni Masiya#7.20 Masiya: ni nde wuna, wu mimbihuli mi Bayudaayo myayabisi ti Nzambi sa atsindaha huli bo mu uyobolo bo. wu afwana uya, vo bisu lafwana ukeele mukima?”» 21Ka mu tangu mo yina, Yisu abeelusi baatu babalahi: babeedu, bikata, na banga mavupu mamabi. Na nde abeelusi ka binzimana bibilahi.
22Yisu afutili bo: «Ya yabisaani Yowani ma benu limiimono, na ma benu limiiyuha. Binzimana bili mu umono, bikata bili mu uteleme na uyene, banga a bwatsi bali mu utsyeme, bikwa-matswi bili mu uyuha, babaakwa bali mu usuuha, na biyaha bili mu uyuha musamu wu mubwe. 23Kinya yili na muutu wuna wu uvelebwisa imiinu hya nde mu toni a me.»
Imbangi mu toni a Yowani mu tondihi
Mataayi 11.7-11
24Bilumbi bya Yowani bu byafutihi, Yisu abwidi mu utoyo mu toni a Yowani huli konge a baatu: «Benu hima layatala hu kumu? Litsotso li ifula hili mu unyingasa? 25Ka benu na laaya mono? Muutu walwata bikutu bibibwe? Naana! Ba bubaalwata bikutu bibibwe na babali hutso busina, ubaatsahala hutso bibanga bi batumi. 26Ka na benu laaya mono? Mumbihuli? Eye, me ndeele benu, wa luta paa mumbihuli. 27Yowani, nde wuna wu baasonehe:
“Mono, me tsa tsindaha ilumbi hya me hu busu bwa we,
mu uvangila nzila a we.#Mal 3.1”
28Me ndeele benu ti ŋa hati la baatu a huli wu alutaala Yowani ve. Ka wuli ikenyi mu Ipfumu hya Nzambi, alutaala nde. 29Baatu boosi, na paa bakaambi ba limandu baayuhi ndongisili a Yowani. Bo baasilisi ti Nzambi li wakuha, na baayaki tondihili a Yowani. 30Ka Bafarisi na milongisi mi mikele baanyasuli hwa bo litondo la Nzambi, na baabisi tondihili a Yowani.
31Baatu ba tangu moyi, na baana me utwala ufwanisa bo? Bo na baana baafwanina? 32Bo baafwana we baana ba bangebe ba baatsahala ŋa saandu, ba bali mu utelesene na bali mu uleele: “Bisu lafulili benu munzololo, benu a laakini ve! Bisu layimbili benu nyimbu yi ikwili, benu a laalili ve.” 33Bu Yowani Mutondihi hayidi, nde lipa udya ve, nde malamu unywa ve, na benu lili mu uleele: “Tengo lamilwata nde.” 34Mwana a muutu miiya. Nde li mu udya, nde li mu unywa, na benu lili mu uleele: “Monwani bahala moli, nga mubaka na ikolo-mbungu! Nde wu, mbaahi bakaambi ba limandu na baatu banga masumu.” 35Ka baatu ba bubaadyata we buhuli tsiki a Nzambi, bu baamwese imbuli hya tsiki moyina.»
Yisu asiidi mukaasu wu imbembo kolo-kolo
36Mufarisi mumosi atsihi Yisu mu uya dya huli nde. Yisu akoti mu nzo Mufarisi, na atsahili ŋa metse. 37Mu musyenge mowuna, hwaba na mukaasu mumosi wu imbembo. Nde ayabi ti Yisu aba mu udya mu nzo Mufarisi. Nde abehi itutu hya alabati#7.37 alabati: manya lilifuka li baakatsula bisiha. hi hyaluula mu nyafi. 38Na nde avyohi Humbisa a Yisu bebele a miilu mya nde, abaandihi ulila. Matsanga ma nde maabolisi miilu mya Yisu, na nde akombili myo mu naanga a nde. Nde abumbi miilu mya Yisu, na ayitili myo nyafi. 39Mufarisi wu ateeli Yisu mu udya amono buuna, aleeli hutso mutima a nde: «Tso muutu mowunuwu beedi mumbihuli wa mbuli, kini nde kiyaba na li mukaasu wu mibembe nde, na mbiili a nde. Nde kiyaba ti mukaasu mowunuwu imbembo ali.»
40Yisu afutili huli Mufarisi: «Simoni, me na dyambu li uleele we.» Simoni afutili: «Eye Mulongisi, leele lo.» 41Yisu ti: «Baatu boole baaba na mukanu a muutu mumosi. Wa tsomi aba asombo biteesi maakama mataanu (500) ma makuta#7.41 bakuta: mu tangu moyina likuta limosi aba pfuta a isalu hi muyilala.. Wa boole aba asombo biteesi maku mataanu ma bakuta. 42Ka bu baaveli na bakuta ba ufuta, musombisi asiidi bo kolo-kolo na anyahuli mukanu a bo. Mu ma we matsimi, na mu bo baboole nde hafula utondo?» 43Simoni afutili: «Me tsimi, ni wu mukanu hafulala bunene.» Yisu afutili nde: «We miikese dyambu bu hwafwana.»
44Titswene Yisu akinguhi huli mukaasu, na aleeli huli Simoni: «We li mu umono mukaasu mowunuwu? Bu me koti mu nzo a we, we a vidi me mamba ma uswaha miilu mya me ve. Ka mukaasu mowunuwu swahi miilu mya me mu matsanga ma nde, na nde kombili myo mu naanga a nde. 45We a buumbi me ve, ka nde, umata bu me anzakoto, nde a hakolo mu ubaaviva miilu mya me ve. 46We a tsatsili me maadi hu yulu mutswe a me ve, ka nde puhili nyafi mu miilu mya me. 47Ni mu buuna, me ndeeli ti nde miyaka linyahula li masumu ma nde ma malahi, mu toni ati nde mwesi litondo lililahi. Ka huli wu bali mu unyahula hole, ubamwese litondo la hole.»
48Na Yisu aleeli huli mukaasu: «We miyaka linyahula li masumu ma we.» 49Baatu ba baaba ŋa metse bu baayuhi maana, baakalelesene mu mitima mya bo: «Nde wu na! Wuli mu uyehele unyahula paa masumu?» 50Ka Yisu aleeli huli mukaasu: «Imiinu hya we hi mifuuhasa we, yene mu hyenze.»
Currently Selected:
Luuka 7: TSA
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.